Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Ya kakʼbeykotik koltayel te machʼatik ayik ta África te ma xyilik kʼinale

Ya kakʼbeykotik koltayel te machʼatik ayik ta África te ma xyilik kʼinale

Te machʼatik ma xyilik kʼinal te ayik ta kuxinel ta cheʼoxeb nacionetik te yaktonax ta mukʼubele ma jichuk ya yichʼik koltayel te bitʼil ta yantik lumetike. Melel bayal buelta ya yichʼik pʼajel sok maba ya yichʼik te koltayel ya skʼanike. Ay bayal bintik te ma wokoluk ta pasel ya yaiyik te yantike, yan te machʼatik ma xyilik kʼinale kʼax wokol ya yaiyik stukel. Jich bin-utʼil wokol ya yilik te ya xbajtʼik ta merkado, te ya tsakik te karro sok te stuʼuntesel te takʼine. Sok nix ay bayalik te maba snopojik te bin-utʼil ta tuuntesel te braille, ja yuʼun ma snaik skʼoponel. Sok ay yantik te ya snaik skʼoponel ta braille, jaʼukmeto ma staik junetik te pasbil ta skʼopike.

Jaʼukmeto, te stestigotak Jehová kʼaxemix ta cien jaʼbil te yakik ta slokʼesel junetik te lokʼemik ta Biblia ta swenta te machʼatik ma xyilik kʼinale. Mato ayuk bayal kʼajkʼal te la stikunik bael ta Paises Bajos (Malaui) jun makina te ya spas imprimir sok te ya snupʼtiklan junetik te pasbil ta Braille. Ta swenta-abi jich ya xjuʼ ya slokʼesik junetik te lokʼemik ta Biblia ta kʼopil ya xkʼopojik te jaʼ te chichewa.

Te Leo, te ya snaʼ ta lek slokʼesel te junetik ta Braille, bajtʼ ta Malaui, lokʼ bael ta sucursal yuʼun te stestigotak Jehová ta Brasil. Ay joʼtul te machʼatik la snojptes te bitʼil ya skʼan tuuntesel te makina sok jun programa yuʼun komputadora te ya skʼases ta braille te jaʼnix spasojik te stestigotak Jehová. Swenta ya xjuʼ ya skʼases te programa ta braille te kʼopil chichewa, te machʼatik la yichʼik nojptesele la schʼajpanik jun programa te banti la skʼasesik spisil te letraetik yuʼun chichewa te pajal sok te braille. Te programa ini ya xjuʼ ya spas ta jun formato te junetik yuʼun jich oranax ya xjuʼ ta kʼoponel-a. Jich yuʼun te machʼatik ma xyilik kʼinal te ya xkʼopojik ta chichewa ayix junetik yuʼunik te lokʼemik ta Bibia ta sbatsil kʼopik. Akʼa kaʼiytik te bintik la yalik chaʼoxtul Testigoetik te ma xyilik kʼinale.

Te Munyaradzi, jaʼ jtul jchʼiel ants te ya x-aʼtej ta jun programa yuʼun radio te jaʼnix yuʼune. Jaʼnix jich ya skʼases 70 hora ta jujun u ta snojptesel te spatxujk ta swenta te bin smelelil ya yal te Bibliae. Jich ya yal: «Ya yakʼbonikix-a te junetik te lokʼem ta braille ta inglés, jaʼukmeto te bitʼil ayix ta jbatsil kʼop, ya xkʼotxan ta koʼtan te bintik ya yale. Bayal skʼoplal ta koʼtan te bitʼil ya spasik tulan sok te takʼin ya slajinik te kermanotak [Testigoetik yuʼun Jehová] ta swenta te junetik te ya slokʼesik ta braille ta jbatsil kʼoptik. Jich ya jkaʼiy jba te bayal jkʼoplal ta yoʼtanike sok te maba chʼaybilotik ta oʼtanile».

Te Francis, ay ta nainel ta norte yuʼun Malaui, ay machʼa ya xkʼoponbot yuʼun te junetik te lokʼem ta Biblia ta chichewa. Jaʼukmeto te kʼalal la yichʼ akʼbeyel te sbabial junetik ta braille ta kʼopil chichewa, chamnax yoʼtan yuʼun, jich la yal: «¿Yakonbal ta wayich o maʼuk? ¡Ma jchʼuun yaʼiyel!».

Te Loyce spisil-ora ya xlokʼ ta scholel te bin smelelil ya yal te Biblia. Te kʼalal ya yakʼ te nojptesele, te ants winiketike jaʼ ya stuuntesik te junetik te ya xjuʼ ta kʼoponele, yan stukel te Loyce jaʼ ya stuuntes te junetik te lokʼem ta braille. Ta swenta-abi, skoltayej 52 ta tul ants winiketik ta sjeltayel te skuxlejalike.

Te Loyce yak ta yakʼel nojptesel ta Biblia

Leo, te Testigo yuʼun Jehová te la kalbeytik skʼoplal ta sjajchibale jich la yal: «Bayal stseʼelil koʼtan ta yakʼbeyel junetik te lokʼem ta braille te ants winiketik te ma xyilik kʼinale sok te bin yaʼiyel ya yaʼiy sbaik te kʼalal ya snaʼik te lokʼem ta sbatsʼil kʼopike. Bayal machʼatik yalojik te ya yalbeyik bayal wokol te Jehovae, melel te junetik ini ya xkoltayotik yuʼun ta schajpanel sbaik ta tsoblejetik sok ta scholel skʼop Dios. Ma yejtalukix te ay machʼa ya xkoponbotik yuʼune, melel ya xjuʼ ya snopikix ta stukelik te sKʼop Diose. Jaʼnix jich maba wokol ya yaʼiyikix ta skoltayel te sfamiliaik ta smukʼubtesel te schʼuunel yoʼtanike. Te bin bayalxan skʼoplale, te junetik ini ya xkoltayotik yuʼun jun yoʼtan ya yakʼ sbaik ta stojol te Jehovae».