Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Te machʼa ya skʼoponik te junetike ya xkoltayotik yuʼun te lokʼombaetike

Te machʼa ya skʼoponik te junetike ya xkoltayotik yuʼun te lokʼombaetike

Bayal junetik yuʼun te stestigotak Jehová yichʼoj lokʼombaetik te bayal sbonil swenta ya xkʼotxan lek ta koʼtantik te bin ya yale, jaʼnax yuʼun te ma jichuk tal te nameye. Te sbabial La Atalaya la yichʼ lokʼesel ta yaʼbilal 1879 maʼyuk lokʼombaetik yichʼoj. Ay bayal tal jaʼbil te jaʼ bayal te bintik tsʼibaybil tey-ae sok jtebnax lokʼombaetik yichʼoj, ay baeltikto te ya yichʼ tal lokʼombaetik o fotoetik te mato ayuk skoloril-ae.

Ta ora ini, bayal junetik kuʼunkotik te nojel ta lokʼombaetike. Te kermanotaktik te ya spasik sok ya sbonik te lokʼombaetik sok te ya slokʼesik fotoetik jaʼ jteb ma spisiluk ya spasik spisil te ya xchiknaj ta junetik kuʼuntik sok ta pajina kuʼuntik ta Internet. Ta swenta te bitʼil lek ya yichʼ ilel sok ta leel te lokʼombaetike jaʼ ya xkoltaywanik ta yakʼel ta nopel ta lek te smelelil kʼope sok te bintik kʼot tal ta pasel ta nameye.

Jich bitʼil te lokʼomba yichʼoj te articulo ini sok te chiknaj ta sbabial buelta ta kapitulo 19 yuʼun te libro «Testimonio cabal» del Reino de Dios. Te banti kʼot ta pasel ini, jaʼ ta antiguo lum Corinto. Jich bitʼil ya yal te sjun Hechos kapitulo 18, te jpuk-kʼop Pablo ay ta stojol te juez-a. Te machʼatik ya yilbeyik lek skʼoplal te informasion ta swenta te bintik kʼoem ta pasel ta namey sok te bintik mukajtik yichʼoj taele, la yakʼbeyik snaʼ te machʼatik la sbonik te lokʼombaetik ta swenta te bitʼil ay-a te plataforma te pasbil ta mármol soknix te bin yilel-a te sbonil te banti la yichʼ ichʼel ta kʼop te jpuk-kʼop Pabloe. Jaʼnix jich la yichʼik akʼbeyel snaʼik bin yilel-a te kʼuʼul la stuuntesik ta Roma ta sbabial siglo. Jaʼ jich juʼ ta bonel te bin yilel-a te ajwalil Galión te ay ta yolil te lokʼomba te slapoj skʼuʼ yuʼun ajwalil, jun najtʼil kʼuʼul te jokʼol ta snejkʼel te tsajtsajtik stiʼile sok xanabil te najtʼ snukʼe. Swenta ya snaʼik jtebuk te bin yilel-a te xojobil kʼinale, te machʼatik ya yilbeyik lek skʼoplal te informasione la yalbeyik te bin yilel-a te plataforma sok yakniwan ta yilel bael ta noroeste-a te Galione.

Jun carpeta te chajpanbil ta lek sok te oranax ta tael te bin yichʼoje

Te bin ya yichʼ ilbeyel lek skʼoplale jun-nax ya yichʼ kʼejel sok te lokʼombaetike, ta jujunchajp ya yichʼ kʼejel swenta ya xjuʼ ta tael-a te kʼalal ya yichʼ tuuntesele. Bayal jaʼbil la yichʼ kʼejel ta mukʼul sobreetik te lokʼombaetik jaʼ chikan te banti junil la yichʼ akʼel ta ilel soknix la yichʼ kʼejel te fotoetik te snitojbey sba skʼoplal te banti temail la yichʼ tuuntesele.

Ta yaʼbilal 1991 juʼ ta pasel jun programa te banti ya xjuʼ ya jletik ta oranax te bintik ya xtuun kuʼuntike. Te sbiile jaʼ Image Services System ta ora ini yichʼoj kʼaxemto ta 440,000 lokʼombaetik. Soknix tey ay-a te chiknajemikix ta junetik kuʼuntike, ay jkʼejojtikix bayal ta mil fotoetik te ya xbajtʼ jtuuntestik ta pajel chaʼbeje.

Te archivos bayal ta cien bintik yichʼoj, jich bitʼil, bin-ora sok banti la yichʼ tuuntesel te jujun lokʼombae, bin sbiil te machʼa la yichʼ lokʼtayele soknix te bin tiempoil smakojbey skʼoplale. Te kʼalal ya xjuʼ ta tael ta oranax te lokʼombaetik te ya yichʼ tuuntesele, jaʼ jun koltayel te kʼalal yak ta pasel yachʼil junetike.

Aynix ya jtuuntestik fotoetik te tulanik skʼoplal te yantik machʼa slokʼesojike. Jich bitʼil teme ya jtuuntestik jun foto ta swenta te anillos de Saturno ta jun articulo yuʼun te revista ¡Despertad!, te kermanotaktik te ay ta swentaik yilel-abi ya sleik jun foto te ya skʼan tuuntesele, ta patil ya skʼoponbeyik te yajwal yuʼun ya skʼanbeyik permiso yuʼun ya yichʼ tuuntesel. Ay chaʼoxtul te maba ya skʼanbotik stojol ta skaj te bitʼil majtʼanil ya kakʼtik ta nopel te Biblia ta swolol Balumilale. Ay yantik te ya skʼan ya jtojbeytike o ya skʼanik te ya jpukbeytik skʼoplalike. Te kʼalal chajpajix kuʼuntik-ae, ya yichʼ tuuntesel te lokʼomba ta junetik kuʼuntik sok ya yichʼ kʼejel ta banti te programa kuʼuntike.

Ay junetik kuʼuntik ta ora ini te ya yichʼ tal bayal lokʼombaetik jaʼ jtebnax te bintik tsʼibaybile. Jich bitʼil te aʼyejetik te lokʼem ta Biblia yichʼoj bayal lokʼombaetik te ya xchiknaj ta pajina kuʼunkotik ta Internet. Tey ya ataxan yantik junetik-a te bayal slokʼombail te bonbilik ta lek te ay bin tulan skʼoplal ya yakʼ jnoptik ta chaʼoxpʼalnax kʼop, jich bitʼil te foyeto Chʼama awaʼiy te bin ya yal te Diose. Spisil te junetik kuʼunkotik te yichʼoj pasel imprimir sok te ayik ta pajina jaʼ ya spukbey skʼoplal te bin ya yal te Bibliae.