Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Te jkʼasesejkʼopetik yuʼun junetik ta español bajtʼik ta España

Te jkʼasesejkʼopetik yuʼun junetik ta español bajtʼik ta España

Te Jesuse la yal te ya yichʼ pukel te lek yachʼil kʼop yuʼun te Ajwalinel yuʼun te Dios ta spisil nacionetik (Mateo 24:14). Swenta ya yichʼ koltayel te ants winiketik ta snaʼbeyel skʼoplal te lek yachʼil kʼop ta skʼopiknix, te testigootik yuʼun Jehová ya jkʼaseskotik ta yantik kʼopiletik te junetik te lokʼemik ta Biblia te nail yichʼoj tsʼibayel ta kʼopil inglés. Ta yaʼbilal 1909 jajchonkotik ta skʼasesel ta kʼopil español te junetike, melel jaʼ kʼoem ta schebal lugar te bayal ta tul ants winiketik ya xkʼopojik ta español, te kʼopil te ay ta sbabial lugare jaʼ te kʼopil chino. Ta kʼajkʼal ini ay 500 millón ta tul ants winiketik te ya xkʼopojik ta español ta swolol Balumilal.

«Te kʼopil español jaʼ te kʼopil te ya yichʼ tuuntesel ta swolol Balumilal. Ya yichʼ tuuntesel bayal ta pam nacionetik te yanyantik stsʼumbalik», xchi te William, jaʼ jtul ta spisil te jkʼesesejkʼopetik yuʼun junetik ta español. Jich la yalxan: «Te bin ya jkʼantike, jaʼ te bin ya yichʼ kʼasesele yakuk xtijbot yoʼtanik yuʼun te machʼatik ya skʼoponik te junetike, chikan te bin yilel te stsʼumbalike, te bin nopjunil lajem yuʼunike o teme jkʼulejetik o maʼuke. Swenta ya xjuʼ ta pasel-abi, te jkʼasesejkʼopetik yuʼun junetik ta español ay talemik ta Argentina, Colombia, El Salvador, Estados Unidos, Guatemala, México, Puerto Rico, Uruguay, Venezuela sok España.

Bayal jaʼbil ayinik ta Estados Unidos te jkʼasesejkʼopetik yuʼun junetik ta español sok la yichʼik koltayel yuʼun te machʼatik ayik ta Argentina, España sok México te jaʼnix jich yaʼtelik-euke. Ta yaʼbilal 1993 te jkʼasesejkʼopetik yuʼun junetik ta español, la yichʼik ikʼel bael ta Puerto Rico yuʼun jich junax kajik ta aʼtel ta junax lugar.

Ta marzo yuʼun 2012 la yichʼ nopel ta lek yan buelta te ya yichʼik ikʼel bael te jkʼasesejkʼopetik yuʼun junetik ta español ta Betel yuʼun España. Te Edward te jaʼnix jich bajtʼ sok te machʼatik la yichʼik ikʼel bael ta España jich la yal: «Ma jaʼuknax la yichʼik ikʼel bael te jkʼasesejkʼopetik yuʼun junetik ta español, jaʼnix jich la yichʼik bael te sbilukik, smesaik sok yantikxan sbilukik, te bintik ya xtuun yuʼunik ta oficina, ma jaʼuknax-abi ayxan te bin tulan skʼoplal te la yichʼik baele, jaʼ te bibliotecae». Ta biblioteca-abi ayniwan yichʼoj 2,500 ta pajk junetik sok bayal ta pajk Bibliaetik ta español.

Te familia Betel yuʼun España kʼax bayal sbujtsʼ yoʼtanik yuʼun te kʼotik te jkʼasesejkʼopetik yuʼun junetik ta español

Te jkʼasesejkʼopetik yuʼun junetik ta español kʼotik ta 29 yuʼun mayo 2013 ta España. Te familia Betel yuʼun España kʼax bayal sbujtsʼ yoʼtanik yuʼun te kʼalal kʼotik te jkʼasesejkʼopetik yuʼun junetike. Te jkʼasesejkʼopetik, te libroetik, te mesaetik sok yantikxan biluk, te bintik ya xtuun ta oficina kʼaxik bael ta océano Atlantico, jaʼukmeto wokolayalik te machʼatik la schajpanik ta lek sok te machʼatik tulan aʼtejike, melel te machʼatik ya stuuntesik te junetik ta kʼopil españole lajnanix yichʼik ta yorail-a te sjunike. Te Edward jich la yalxan: «Jaʼ tulanxan skʼoplal te ya yichʼ cholbeyel skʼoplal te Ajwalinel yuʼun te Dios, sok jaʼ ya jkʼantik te yakuk xkʼot ta stojol spisil te ants winiketik te ya xkʼopojik ta kʼopil españole».