Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Jun folleto te bayal slokʼombail yak ta skoltayel bayal ants winiketik ta swolol Balumilal

Jun folleto te bayal slokʼombail yak ta skoltayel bayal ants winiketik ta swolol Balumilal

Te Odval jaʼ jtul ants te ay nainel ta lum Mongolia. Ma snaʼ ta lek te jayeb yaʼbilale melel ma snaʼ te bin jaʼbil ayine. Ya skuy te jaʼlaj ta jaʼbil 1921. Jaʼnix jich ma snaʼ skʼoponel jun melel jaʼnax jun jaʼbil la snop te june, sok tut-to-a te la skoltay te smeʼ stat ta skanantayel wakax. Jaʼukmeto mato ayuk bayal kʼajkʼal te la yichʼ akʼbeyel jun folleto te bayal yichʼoj lokʼombae, tey la snopxan ta swenta te Diose sok te bintik ya smaliyik ta pajel chaʼbej te machʼatik schʼuunbeyik sok te ya yaʼiybeyik te skʼope. Bayal la smulan te kʼalal la yaʼiybey skʼoplal ini.

Te folleto-abi lokʼ ta 2011, jaʼ spasojik te stestigotak te Jehová, lokʼem ta cheb versión. Schebal yichʼoj bayal lokʼombaetik, jaʼukmeto te bin ma pajaluk soke jaʼ te ay jun versión te maʼyuk bayal textoetik yichʼoje.

Te versión te bayal textoetik yichʼoje ya sbiilin Chʼama awaʼiy te bin ya yal te Diose jichme ya xkuxinat ta sbajtʼel kʼinal, te yane ya sbiilin Chʼama awaʼiy te bin ya yal te Diose. Ta schebal bayal ta chajp kʼopiletik yichʼojix kʼasesel. Te sbabiale nopol ya xbajtʼ yichʼ lokʼesel ta 583 ta chajp kʼopiletik, te schebale ta 483 kʼopiletik. Te folleto ini jaʼ bayalxan yichʼoj lokʼesel-a te bitʼil te Declaración Universal de Derechos Humanos, te stsʼibayoj te Naciones Unidas melel ta jaʼbil 2013 jaʼnax yichʼoj kʼasesel ta 413 ta chajp kʼopiletik. Jaʼnix jich te jayeb pukbil te folleto ta schebal version jteb ma staojix 80 millón.

Ta Brasil, ay chaʼoxtul stestigotak te Jehová la yakʼbeyik te folleto Chʼama awaʼiy te bin ya yal te Diose te jtul ants te ayix yaʼbilale. Bayal la smulan sok jich la yal: «¡Kʼax lek te ay machʼatik kʼux ta yoʼtanik te ants winiketik jich bitʼil te jaʼexe! Jich bitʼil ta ma jnaʼ skʼoponel te june maʼyuk jtsakoj jilel-a te libroetik awuʼunike. Jaʼukmeto te folleto ini ya kichʼ jilel».

Te Brigitte, jaʼ jtul ants te ay nainel ta Francia te jaʼnix jich ma sna skʼoponel june, jich la yal: «Jujun kʼajkʼal ya kil te lokʼombaetik yichʼoj te folleto ini».

Jtul testigo yuʼun Jehová ta Sudáfrica jich la yal: «Te bin ya kal te joʼone jaʼ te kʼax lek ta tuuntesel te folleto ini ta yakʼel ta nopel te smelelil kʼop ta Biblia ta stojol te ants winiketik te ya xkʼopojik ta kʼopil chino. Jtuuntesoj te folleto ini te kʼalal ya jnojptes te ants winiketik te ay carrera universitaria yuʼunik soknix te machʼatik ma snaʼik skʼoponel june. Te folleto Chʼama awaʼiy te bin ya yal te Diose jichme ya xkuxinat ta sbajtʼel kʼinal, skoltayejon ta yakʼel ta nopel te bintik smelelil ya yakʼ ta nopel te Biblia ta jtebnax tiempo. Ta olilnax hora ya xjuʼ ya xkʼot lek ta yoʼtan te ants winiketike».

Ta Alemania, chaʼtul jchol kʼop antsetik (precursoras) yuʼun te stestigotak te Jehová ya yakʼbeyik snop te Biblia jun nujpunel te ya snaʼik ta lek june. Te winike bayal la smulan te folletoe sok jich la sjojkʼoy: «¿Bin yuʼun te maʼyuk yichʼojbonik tal-a te folleto ini? Ta ora ini ya xkʼotix ta koʼtan te bintik tsʼibaybil jilel skʼoplal ta Biblia sok chaʼoxpʼal kʼopiletik te tsʼibaybil tey-ae».

Jtul ants ta Australia te makal schikin jich la yal: «Bayal jaʼbil ayinon tey-a te banti ayik te monjaetike. Sok jun koʼtan jba sok te machʼatik mukʼ skʼoplalik ta Iglesia. Jaʼukmeto maʼyuk jtuluk la snojptesonik ta swenta te bin-a te Ajwalinel yuʼun te Diose. Jaʼ wokol la yal te lokʼombaetik yichʼoj te folletoe, kʼot ta koʼtan te bin-nix ya skʼan ya yal-a te Mateo 6:10».

Te sucursal yuʼun te stestigotak te Jehová ta Canadá jich la stsʼibay: «Tey ta lum ini ay bayal ants winiketik te talemik ta Sierra Leona. Te kʼalal la yilik te folleto te kʼasesbil ta krío te jaʼ skʼopike, bayal machʼatik la yalik te yuʼun-nix ya spasik tulan-a te stestigotak te Jehová ta yakʼel ta nopel te smelelil kʼop ta Biblia ta stojol te ants winiketike. Ay chaʼoxtul te jich la yalike: “Te Jaʼexe yuʼun-nix ay jkʼoplalkotik ta awoʼtanik-a, manchukme bayal machʼatik ma jichuk ya spasik”».

Naʼbeyaxan skʼoplal

Te La Atalaya maʼyuk yan revista te ya xpajot yuʼun

Ya jpastik sok ya jpuktik te revista La Atalaya ta 190 ta chajp kʼopil. ¿Bin-utʼil maba pajal sok te yantik revistaetike?