Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Videoetik te lokʼem bayal ta cien kʼopiletik

Videoetik te lokʼem bayal ta cien kʼopiletik

Te stestigotak Jehová ya skʼasesik junetik te lokʼemik ta Biblia ta bayal ta chajp kʼopiletik. Ta noviembre yuʼun 2014 yichʼojix kʼasesel-a te Biblia, ta 125 kʼopiletik sok ta 742 kʼopiletik te junetik te lokʼemik ta Bibliae. Jaʼnix jich ya skʼasesik ta yan kʼopil-euk te videoetike. Kʼalalto tal ta enero yuʼun 2015, te video, ¿Bin ya yichʼ pasel ta tsoblejetik kuʼunkotik? la yichʼ kʼasesel ta 398 kʼopiletik sok te video ¿Bin yuʼun ya skʼan ya jnoptik te Bibliae? ta 569 kʼopiletik. ¿Bin yuʼun te la yichʼ pasele? ¿Bin-utʼil juʼ ta pasel?

Ta marzo yuʼun 2014, te Jtsojb Jwolwanejetik yuʼun te stestigotak Jehová la skʼanbey te jayeb sucursal ay ta swolol Balumilal te yakuk skʼasesik te videoetik chikan jayebto ta chajp kʼopiletik, yuʼun jich stijbey yoʼtan-a te ants winiketik ta snopel te Bibliae.

Te bitʼil ya yichʼ kʼasesel te videoetike ay cheʼoxeb te bin ya skʼan pasele. Ta sbabial, te jtsojb jkʼasesej yan kʼopiletike ya skʼasesik te bin ya yal te guion. Ta patil ya yichʼ tsael te machʼa ya xkʼopoj ta kʼopil-abi yuʼun ya spas grabar te bintik ya xkʼax ta videoe. Jaʼ yuʼun te machʼatik ay ta swentaik te audio sok video jaʼ ya spasik grabar te bin ya yal te guione, sok ya schajpanik te grabasion sok te texto te ya xchiknaj ta pantallae. Ta slajibal, ya yichʼ chajpanel spisil te archivo yuʼun ya yichʼ pukbeyel skʼoplal ta Internet.

Ay chaʼoxchajp sucursal te ay snail grabasion yuʼunik soknix ay ants winiketik te chapalik ta lek ta spasel te aʼtelil ini. Jaʼukmeto, ¿Bin-utʼil la yichʼ pasel te videoetik ta kʼopiletik te la yichʼ kʼasesel ta lumetik te namal ayike?

Ta swolol Balumilal, te tecnicoetik yuʼun audio la stuuntesik aparatoetik yuʼun grabasion te ya xjuʼ ta ichʼel bael ta bayuk. Ta swenta jun micrófono, jun laptop sok jun programa yuʼun grabasion ta audio, la skʼatpʼunik ta snail grabasion jun oficina, sNail Tsoblej o biluk na yuʼun tey aʼtejik junchebuk kʼajkʼal-a. Te ants winiketik te ya snaik te kʼopil te yak ta pasel grabar-a te videoetike jaʼnix la spasik grabar, ochik direktor yuʼun grabasion soknix ta yilel te bitʼil ya yichʼ kʼoponel te guione. Kʼalal lajix-a te grabasion sok te kʼalal la yichʼix alel-a te lek jile, te tecnico yuʼun audio ya stsob te bintik tuune yuʼun ya xbajtʼ spas grabar ta yan lugar.

Te bitʼil jich la yichʼ pasel ini. Te yajtalul te kʼopiletik te yak ta lokʼesel-a te videoetike oxebto buelta mo te yajtalule.

Te videoetik ini bayal ya smulanik. Bayal ants winiketik te jaʼ sbabial buelta te jich la yilik ta sbatsʼil kʼopike.

Jun kʼopil te la yichʼ pasel grabar te videoetik jaʼ te pitiantiatiara, te ay ta Australia te kʼaxem ta 2,500 ta tul ants winiketik ya xkʼopojike. Jaʼ ini la yichʼ pasel grabar ta Alice Springs (ta norte yuʼun te lume). «Bayal la smulanik te videoetike, jich la yal te Callan Thomas, te jaʼnix koltaywan ta spasel te videoe. Te ants winiketike la stʼojan sitik ta yilel te video ta tableta sok la sjojkʼoybey sbaik te banti ya xjuʼ ya staikxan yantik videoetik. Jich bitʼil te wokol ta tael junetik te lokʼemik ta Biblia ta kʼopil pitiantiatiara, chajpnax ya yilik-a te kʼalal ya yaʼiyik stojole, soknix te kʼalal ya yilik, te bin lokʼem ta sbatsʼil kʼopike.»

Chaʼtul Testigoetik yuʼun Jehová ta Camerún beenik ta kanoa teʼ ta yolil te mukʼul jaʼe. Kʼaxik ta tut lum pigmea, kʼopojik sok jtul jwolwanej te jaʼ maestro yuʼun eskuela ta slumalnix. Te kʼalal la snaʼik te ya xkʼopoj ta kʼopil bassa, te Testigoetik ini la yakʼbeyik yil ta jun tableta te video, ¿Bin yuʼun ya skʼan ya jnoptik te Bibliae?

Ta tut lum yuʼun Indonesia, jtul jwolwanej yuʼun relijion te teynix slumal-ae, ma lekuk ya yil te Testigoetik yuʼun Jehovae, la schikʼ spisil te junetik te lokʼemik ta Biblia te la yichʼ pukel ta slumale. Sok ay chaʼoxtul ants winiketik la yalik te yalaj schikʼik-euk te sNail Tsobleje. Jaʼnix jich, chantul polisiaetik kʼotik ta sna te jtul ants te jaʼ Testigo yuʼun Jehová yuʼun ay bin ya sjojkʼoybeyik sok te sfamiliae. Kʼan snaʼikxan ta swenta te bin ya yichʼ pasel ta sNail Tsobleje, jich yuʼun la yakʼbey yil te video ¿Bin ya yichʼ pasel ta tsoblejetik kuʼunkotik? te lokʼem ta kʼopil indonesio.

Te kʼalal laj yoʼtanik ta yilel te videoe, ay jtul polisia te jich la yale: «Ta ora ini kʼotix ta koʼtan ta manix yuʼunuk ya snaʼbeyex abaik ta smelelil-a te ants winiketike». Ay yan polisia te jich la sjojkʼoye: «Te video ini ya yakʼ ta ilel te machʼaex ta smelelile. ¿Yabal xjuʼ ya awakʼbon te video yuʼun ya kakʼbey yil-euk te yantike?». Te polisiaetike yanajemix te bin ya snop ta swenta te Testigoetike, ta ora ini yakʼbeyikix kanantayel ta stojolik.

¿Labal awilix-euk te videoetik ini? Ilawil te videoetik te lokʼem ta kʼopil ya xkʼopojate.

Naʼbeyaxan skʼoplal

¿Bin-utʼil ya yakʼik te nojptesel yuʼun Biblia te testigoetik yuʼun Jehová?

Sujtib te jojkʼoyeletik te bayal ya yichʼ pasel ta swenta te bin-utʼil ya kakʼkotik te nojptesel yuʼun te Bibliae.

¿Bin utʼil ya yichʼ tsʼibayel sok kʼasesel ta yan kʼopil te junetik lokʼem ta Bibliae?

Ya jlokʼeskotik junetik lokʼem ta Biblia te kʼaxemto ta seiscientos ta chajp kʼopiletik. ¿Bin yuʼun te ya jpastik tulan ta spasel te mukʼul aʼtelil ini?