Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Te La Atalaya lokʼ ta notisia yuʼun telebision ta kʼopil groenlandés

Te La Atalaya lokʼ ta notisia yuʼun telebision ta kʼopil groenlandés

Ta enero yuʼun 2013, te La Atalaya te ay ta kʼopil groenlandés tsʼakaj cuarenta jaʼbil te yak ta pasel imprimir. Te groenlandés jaʼ jun kʼopil te talem ta tsʼumbalil inuit te jaʼnax ay 57,000 ta tul ants winiketik te ya xkʼopojik-a te kʼopil-abi.

Ta Groenlandia ay kʼaxem jtebuk ta 150 ta tul stestigotak Jehová tey-a, jaʼukmeto te revista Napasuliaq Alapernaarsuiffik te jaʼ jich sbiil te La Atalaya ta kʼopil groenlandés ya yichʼ pasel imprimir 2,300 ta wel. Ta swenta-abi ya yakʼ kiltik te machʼatik ya skʼopon te revistae maba spisil testigoetik yuʼun Jehová.

Ta swenta te bitʼil lokʼix cuarenta jaʼbil yuʼun te bitʼil yak ta lokʼel te revistae, jtul reportero yuʼun telebision bajtʼ te banti ya yichʼ kʼasesel ta kʼopil groenlandés te junetik-abi te ay ta lum Nuuk swenta ya snujpʼsitay ta kʼop te machʼatik ya x-aʼtejik tey-ae. Te machʼa swentainoj te banti yak ta kʼasesel ta yan kʼopil te junetik-abi, jich la yal: «Bayal te machʼatik ya xkʼopojik ta kʼopil groenlandés ay skʼoplal ta yoʼtanik te bin ya yal te Bibliae, jaʼ yuʼun ya skʼoponik te revistae».

Kʼalal te reportero la sjojkʼoybey jtuluk te machʼatik ya skʼasesik ta kʼopil groenlandés ta swenta te bin-a te kʼaxto ya smulan ta swenta te revistae, te hermanae jich la yal: «Jaʼ te bintik lek ya snojptesotik ta spasel ta ora ini. Bayal skoltayejon te joʼone, lekuben te jkuxlejale sok ma stsakon lek chamel. Jich bitʼil te nameye xtometnax chʼail ta jniʼ yuʼun te maye, manchukme jnaʼoj te ya xjuʼ ya yutsʼinone. Jaʼukmeto ta banti te Bibliae la jnop tey-a teme ya jkʼantik te ma stsakotik lek chamele ya skʼan te ma jtuuntestik te bintik ya sbolobtes jbakʼetaltike».

Te bin la yichʼxan alel ta notisiae, jaʼ te bitʼil ta yolil yaʼbilal bael 1950 ayix testigoetik yuʼun Jehová ta Groenlandia-a sok bayal spukoj libroetik sok foyetoetik ta kʼopil groenlandés te organisasion yuʼunike. Te machʼatik ya skʼasesik ta kʼopil groenlandés te junetik te maba ya yichʼik tojele, talemik ta Dinamarca sok ta Groenlandia, te bin yakʼojnanix ta yoʼtanik-ae, jaʼ te spisiluk-ora kʼax chikan ta aʼiyel ta lek te bin ya skʼases ta skʼopike.

Jtul testigo yuʼun Jehová te ayix veinticinco jaʼbil te yak ta scholel skʼop Dios ta kʼopil groenlandés jich la yal: «Kilojix te bayal skʼoplal te ya japbeytik te ants winiketik te junetik te lokʼemik ta skʼopiknixe. Ay chaʼoxpam lumetik te namal ayik te aynax cheʼoxeb u ya x-och barcoetik tey-a sok ay ants winiketik tey-a te ya smulanik skʼoponel te revistae. Jich te kʼalal ya xbajtʼ kilulantike ya jtsʼibaylanbeytik karta sok kakʼbeytik jilel soknix te junetik kuʼunkotike».

Jaʼto tal ta enero yuʼun 2013 te machʼatik ya xkʼopojik ta groenlandés kaj yichʼik te La Atalaya te ya yichʼ akʼbeyel spisil te ants winiketike, melel ayix stukel-a te La Atalaya te ya yichʼ nopel ta kongregasione. Ta schebal ya xjuʼ ta pasel descargar ta pajina jw.org.