Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Te Testigoetik ya sjelbeyik yawil te banti ya yichʼ ilel te yaʼtelik ta swolol Balumilal

Te Testigoetik ya sjelbeyik yawil te banti ya yichʼ ilel te yaʼtelik ta swolol Balumilal

Ta julio yuʼun 2009, te stestigotak Jehová la smanik 102 ektarea kʼinal ta Nueva York, yuʼun tey ya sjelbeyik yawil-a te banti ya yichʼ ilel te aʼtelil yuʼunik ta swolol Balumilal. Te kʼinal ini, 80,000 metro yiloj sba ta noroeste yuʼun Brooklyn te banti ya yichʼ ilel te aʼtelil yuʼunik kʼalalto tal ta jaʼbil 1909.

Ayniwan ochocientos ta tul testigoetik yuʼun Jehová ya xbajtʼ nainukik sok ya x-aʼtejik ta yachʼil naetik, te banti ya yichʼ pasel jun mukʼul na yuʼun ofisinaetik, jun mukʼul na banti ya x-ayin te bintik ya xtuun yuʼunik te familia Betel sok chaneb mukʼul wayibal naetik. Jaʼnix jich jun museo te banti ya yichʼ akʼel ta ilel te bin-utʼil aʼtejemik talel te stestigotak Jehová kʼalalto ta kʼajkʼal ini.

Te banti ya yichʼ pasel te mukʼul naetike, jaʼnax 18 ektarea ya yichʼ tuuntesel, yuʼun jich maba ya yichʼ lajinel-a te teʼtikile sok te pampam jaʼetik te ay ta sjoyobale. Jaʼnix jich maba ya x-ayin bayal akiltik, melel ya xbajtʼ stsʼunik nichimetik te tʼujbil ya xjil sok te teʼetike.

Ay jtsojb arquitectoetik spasojik ta jun dibujo te bitʼil ya xjil te mukʼul naetik te banti ma bayal ya slajin lus sok yantikxan te bintik ya yichʼ tuuntesele, jaʼnix jich ma bayal ya yichʼ utsʼinel-a te teʼtikile sok te bintik kuxajtik tey-ae, soknix ma bayal ya yichʼ lajinel takʼin ta swenta te bintik ya yichʼ tuuntesele. Ta sba te mukʼul naetik ya yichʼ tsʼunel nichimetik te ma wokoluk ta kanantayel sok te ya yuchʼik te yaʼlel jaʼale, jaʼ yuʼun ma bayaluk kʼajkʼal sok sik ya x-ayin ta yutil te mukʼul naetike. Ta yutil ofisinaetik ma bayal ya yichʼ tuuntesel te luse, melel ya yichʼ tuuntesel ta lek te sakal kʼinale. Jaʼnix jich tey ta yachʼil naetik ya yichʼ tuuntesel ta lek te jaʼe.

Jaʼukmeto, ¿Bin yuʼun te ya sjelbeyik yawil te banti ya yichʼ ilel te aʼtelil yuʼunike? Ta namey talel ay jun imprenta yuʼunik ta Brooklyn, tey la yichʼ lokʼesel-a te Bibliaetik sok yantikxan junetik te ya xtuun yuʼunik te stestigotak Jehová ta swolol Balumilal. Ta ora ini ay yantik sucursal te ya xkoltaywanik ta spasel te aʼtelil-ini, melel ayix imprenta yuʼunik. Ta jaʼbil 2004, te aʼtelil yuʼun spasel imprimir sok stikunel junetik tey ta Estados Unidos jajch yichʼ pasel ta Wallkill (Nueva York), te ay ta 145,000 metro ta noroeste yuʼun Brooklyn.

Te yan swentaile, jaʼ ta skaj te kʼax bayal takʼin ya yichʼ lajinel ta spasel spisil te aʼtelil sok ta skanantayel ta lek te mukʼul naetik ta Brooklyn. Te bitʼil ta junax lugar ya yichʼ pasel spisil te mukʼul naetike, jich ya yichʼ tuuntesel ta lekxan te takʼin ta swenta te aʼtelil yuʼun te nojptesel yuʼun Bibliae.

Swenta ya yakʼik te permiso yuʼun spasel te mukʼul naetike, ta nail te j-aʼtelpatanetik ya yilik ta lek teme ma bayal ya yichʼ utsʼinel te teʼtikile sok te bintik kuxajtik tey-ae. Teme lek lokʼ spisile, yame xjajch ta pasel te aʼtelil ta 2013, ta chaneb jaʼbil ya xlaj ta pasel te mukʼul naetike.

Te stestigotak Jehová ma jaʼuknax ay yuʼunik te imprenta ta Wallkill, jaʼnix jich ay jun snail pʼijubtesel yuʼunik ta Patterson (Nueva York) sok bayal sucursal ta yantik nasion. Ta spisil, kʼaxemix ta siete miyon sok olil stestigotak Jehová ta swolol Balumilal.