Ochan ta banti te bintik yichʼoje

Ochan ta banti bintik jujunchajp yichʼoje

sTestigotak te Jehová

tseltal

Ay kʼaxemix ta 165,000 yilojibal junetik te ya xjuʼ ta jochele

Ay kʼaxemix ta 165,000 yilojibal junetik te ya xjuʼ ta jochele

Ta spisil-ora ya yichʼik ilel te stestigotak Jehová te ya scholik skʼop Dios ta nanatik. Jaʼukmeto jaʼnix jich ya yichʼikix ilel ta lugaretik te banti ya xkʼax bayal ants winiketik sok te yilojibal junetike.

Mato ayuk bayal tiempo te jich jajch ta cholel te skʼop Diose. Jaʼ ini jajch ta pasel ta noviembre 2011 ta mukʼul lum Nueva York. Jtsob Testigoetik ay bin la stuuntesik chaʼoxchajp te bin-utʼil la yakʼik ta ilel junetik yuʼun jich ya yakʼbeyik snaʼ te ants winiketik te bin ya yal te Bibliae. Te bitʼil jich la spasik-abi bayal bintik lek lokʼ yuʼunik-a, jich yuʼun la yichʼ alel te akʼa yichʼ pasel ta yantik lumetike.

Ta marzo yuʼun 2015 la yichʼix akʼel ta kongregasionetik yuʼun te stestigotak te Jehová ta swolol Balumilal 165,390 yilojibal junetik te ya xjuʼ ta jochele, sok bayal ta mil te ma xyichʼ jelbeyel yawil jich bitʼil mesaetik sok quioscoetik.

Te scholel skʼop Dios ta nanatik jaʼnanix mukʼ skʼoplal ta yoʼtanik-a te stestigotak Jehová yuʼun ya yakʼbeyik snaʼ te ants winiketik te bin ya yal te Bibliae. Jaʼukmeto te stuuntesel te yilojibal junetik bayal bintik lek kʼoem ta pasel yuʼun. Akʼa kiltik cheʼoxebuk.

Ta Perú, ay jtul winik te Raúl sbiil noptsaj ta stojol te stestigotak Jehová te ayik te banti ay te yilojibal junetike jich la yal: «¿Banti ayex-a? Ayix oxeb jaʼbil te yak jlebelexe. Te kʼalal la kil te yilojibal junetik awuʼunike la kalbey wokol Dios yuʼun».

Te Testigoetike ya scholikix skʼop Dios-a te banti ay ta nainel te Raule, jaʼukmeto ma x-ayin ta sna sjunal kʼajkʼal soknix ta slajibal semana. Te Raúl la yal te aylaj snopojix-a te Biblia sok te stestigotak Jehová sok te yalaj skʼan ya schaʼnopxane. Jich yuʼun la schapik te bin-ora ya snopik te Bibliae.

Ta Bulgaria ay jtul jchʼiel winik sok yinam, tejkʼajik ta yilel te yilojibal junetik sok la yichʼik bael jun libro El secreto de la felicidad familiar. Jun semana ta patil sujtik tal sok la yichʼikxan bael cheb libro jaʼ te Aʼyejetik te lokʼem ta Biblia sok te Aprendamos del Gran Maestro. Te Testigo te yak ta skanantayel te yilojibal junetike la sjojkʼoybey te jchʼiel winik te jayeb ta tul yal snichʼnabike. Jich la yalik: «Mato ayuk jtuluk, jaʼukmeto teme ay bin-ora la jtatike ya jkʼantik te yakuk snaʼbeyik sba te Diose. Jaʼme ya xbajtʼ skoltayotik te libroetik ini».

Ta Ucrania, jtul winik te slapojbey skʼuʼ soldado la skʼopon te Testigoetik te yakik ta skanantayel te yilojibal junetik sok jich la yal: «Achʼixetik albonik kaʼiy te bin-ora ya xtal te Armagedone». Te winik-abi mato ayuk bayal tiempo-a te xkʼotuk ta guerra te kʼax ta Ucrania. Ta swenta te bintik yak ta kʼoel ta pasel ta swolol Balumilale kʼotxan lek ta yoʼtan te nopolix te Armagedón sok ya sjojkʼoybey sba-a te bin yuʼun maba skomoj Dios te chopolile. Te chaʼtul Testigoetike la scholbeyik yaʼiy te bin ya yal te Biblia ta swenta te bitʼil mato ayuk bin spasoj te Diose, jaʼukmeto la yalbeyik te nopol ya slajinbey skʼoplal te bintik chopole. Te winik-abi la yichʼ bael te revista La Atalaya sok te ¡Despertad!, soknix te libro ¿Existe un Creador que se interese por nosotros?

Ta Macedonia te kʼalal yakik ta scholel skʼop Dios-a te Testigoetik sok te yilojibal junetik te ya xjuʼ ta jochel, albotik yuʼun jtul kerem te lalaj skʼoponix te revistaetike sok la yal te ya skʼanix te libro ¿Bin ya yakʼ ta nopel ta smelelil te Bibliae? Te kʼalal la yakʼbeyik te libroe, albotik yuʼun te yalaj xbajtʼ ta biblioteca ta skʼoponel ta oranax.

Te kʼalal kʼaxix cheb ora-ae sujt talel te kereme sok skʼoponojix tal-a te libro ta pajina 1 kʼalal ta 79 soknix jich la yal: «Te libro ini ya sjel kuxlejalil. La kilix te bayal ma smeleliluk te bintik jchʼuuneje. Ya kil te yuʼunix jich-a te bintik ya yal te libro ini. Ta ora ini jelonix te bin ya jnop ta swenta te kuxlejalile».