Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Tsʼakajix setenta jaʼbil sjajchel te Pʼijubtesel yuʼun sKʼop Dios ta Galaad

Tsʼakajix setenta jaʼbil sjajchel te Pʼijubtesel yuʼun sKʼop Dios ta Galaad

Ta 1 yuʼun febrero ta jaʼbil 1943 jajch te sbabial pʼijubtesel ta escuela yuʼun estado Nueva York te maʼyuk jich chiknajeme. Jaʼto-abi te Pʼijubtesel yuʼun sKʼop Dios ta Galaad yuʼun te Watchtower te jich sbiil ta ora ini, ay yichʼojik pʼijubtesel kʼaxem ta waxakmil tul antsetik sok winiketik ta swolol Balumilal.

Ta ajkʼol: Te yochibal te banti ay te Pʼijubtesel yuʼun sKʼop Dios ta Galaad South Lansing (Nueva York). Ta alan: Jtul jpʼijubteswanej yuʼun te Galaad yak ta kʼop ta stojol te clase 31 ta anfiteatro

Te hermano Jonathan te jaʼ jtul te mato ayuk bayal tiempo la yichʼ pasel graduar ta swenta te pʼijubtesel-abi, jich la yal: «Jich bitʼil te spisil lokʼem ta Biblia te bin la jnoptike, ya xjuʼ ya jpastik ta jkuxlejaltik bayuk ya xbootik manchukme yanyantik-a te stsʼumbal te ants winiketike». Te yinam Jonathan te Marnie sbiile jich la yal: «Koʼtanukix ya jkoltay te ants winiketik te yakuk yichʼik ta wenta te jaʼ kʼax lekxan te spasbeyel skʼanojel yoʼtan te Jehová te Jpaswanej kuʼuntike. Kʼoem ta koʼtan teme la snaʼbeyik sba te Jehová ya xlekub te skuxlejalike».

Te machʼatik ya x-ochik ta Pʼijubtesel yuʼun sKʼop Dios ta Galaad te ya xjalaj joʼeb u maba ya stojik. Tey ta pʼijubtesele jaʼ ya yichʼ albeyel bayal skʼoplal te Bibliae sok te bitʼil tulan skʼoplal te scholel te skʼop Diose. Te bin swentail te pʼijubtesel-abi jaʼ te bitʼil te machʼatik ya yichʼik pʼijubtesele ayuk yuʼunik te talelil te bitʼil ya skʼan te Diose sok te ya yichʼik chajpanel ta lek swenta ya yakʼbey yip te j-abatetik yuʼun te Diose soknix yakuk snaʼik sitintayel te wokoliletik ya xtal ta stojolike. Jaʼnix jich ya yichʼ ilel textoetik yuʼun Biblia tey-a te ya smukʼubtesxan te bitʼil lek ya yil sbaik sok te Diose.

Ta ajkʼol: Te Albert Schroeder yak ta stuuntesel jun lokʼomba yuʼun te Nailpakʼ templo yuʼun ya spʼijubtes te machʼatik ayik ta pʼijubtesel ta 1958. Ta alan: Ulysses Glass yak ta spʼijubtesel te clase 46 ta 1968

Te machʼatik ya yichʼik pʼijubtesel ta Galaad jaʼ hermanoetik te nujpunemik te yakʼoj sbaik ta spasbeyel skʼanojel yoʼtan te Dios ta spisil-ora. Te kʼalal la yichʼikix pasel graduar ayniwan ya yichʼik tikunel bael te banti yakik ta scholel skʼop Dios-ae o ayniwan ya yichʼik tikunel bael ta yan nasion. Ay chaʼoxtul te ya yichʼik tikunel bael ta aʼtel ta naetik yuʼun Betel te kʼaxem ta noventa te jaʼ yuʼunik te stestigotak te Jehová. Ay bayal ya yichʼik tikunel bael ta lumetik te banti ay bayal swinkilele, melel jaʼ te banti bayal ya xjuʼ x-aʼtejik ta scholel te skʼop Diose.

Te banti aynanix-a te Pʼijubtesel yuʼun sKʼop Dios ta Galaad jaʼ ta estado yuʼun Nueva York. Nail ayin ta Hacienda del Reino, te jaʼ yuʼunik te stestigotak Jehová te ay ta South Lansing. Ta jaʼbil 1961 jajch ta akʼel te pʼijubtesel ta banti ya yichʼ ilel te aʼtelil yuʼunik te stestigotak te Jehová ta Brooklyn. Ta jaʼbil 1988 kʼalal ta 1995 ayin ta Wallkill te banti ay te Haciendas Watchtower. Ta patil ta jaʼbil 1995 la yichʼ akʼel te banti ay ta ora ini: ta Centro yuʼun Pʼijubtesel yuʼun Watchtower ta Patterson. Te graduación yuʼun te clase 134 kʼot ta pasel ta marzo yuʼun 2013.

Ta ajkʼol: Te machʼatik ayik ta clase 116 ta 2003 ta jun salon. Ta alan: Ayik ta biblioteca te machʼatik ayik ta pʼijubtesel yuʼun Galaad ta 2011

Jich bitʼil kʼaxemix tal setenta jaʼbile, te machʼatik la yichʼikix pasel graduar ta Pʼijubtesel yuʼun sKʼop Dios ta Galaad yuʼun te Watchtower jich juʼem yuʼunik te jun-nax yoʼtanik yakʼojik ta naʼel ta lek ta swenta te Dios kuʼuntik te jaʼ te Jehovae.