Ochan ta banti te bintik yichʼoje

Ochan ta banti bintik jujunchajp yichʼoje

sTestigotak te Jehová

tseltal

Te la Armada la stsob ants winiketik te ya skʼanik te libre ya yaʼiy sbaike

Te la Armada la stsob ants winiketik te ya skʼanik te libre ya yaʼiy sbaike

Ta 6 kʼalal ta 16 yuʼun junio 2013, bayal millón ta tul ants winiketik ta swolol Balumilal la stsob sbaik ta puerto yuʼun Ruán te ay ta norte yuʼun Francia, ta yilel te bitʼil la stsob sbaik te mukʼul barcoetik te chajpnax ta ilel-ae jaʼ te: la Armada.

Beenik 120 kilómetro (75 millas ) ta mukʼul jaʼ Sena, te ya xkʼax ta Normandía, te mukʼul barcoetik sok te kʼax tʼujbilike la scholan sbaik 7 kilómetro (4 millas) te banti chapal yuʼunik te xkʼot-a te barcoetike. Ta lajuneb kʼajkʼal, te machʼatik kʼotik ta ulaʼtaywaneje la yichʼik albeyel te ya xjuʼ ya xmoik ta chaʼoxchajp te 45 mukʼul barcoetik te la stsob sbaike.

¿Bin-a te ikʼbot yoʼtan yuʼun te ants winiketike? Jich la yal te machʼa la schajpan sok te machʼa la sjach te la Armada, te kʼalal ya yilik ta nopol te mukʼul barcoetik ini ay bin ya xtal ta yoʼtanik yuʼun. Jteb ma spisiluk te ants winiketik jich bitʼil jchʼieletik sok te machʼatik ayix yaʼbilalik, te kʼalal ya yilik te mukʼul barcoetike ya snopik te yakiklaj ta beel ta lumetik te namal ayike sok te libre ya yaʼiy sbaike.

Bayal mil ta tul ants winiketik te yan slumalik te kʼotik tey-ae, la yaʼiybeyik yan skʼoplal te bin libre ya xkʼotik yuʼune , jaʼ te ya jtatik te kʼalal ya jnoptik te bin smelelil ya yal te Bibliae (Juan 8:31, 32). Ta tut calleetik ta tʼujbil lum Ruán te ayix bayal ta cien jaʼbil chiknajeme, ya xbeenik bayal ta tul ants winiketik tey-a, soknix la yilik te banti ya yichʼ akʼel ta ilel junetik te lokʼemik ta Biblia yuʼun te stestigotak te Jehová te la schajpanik ta kʼajkʼalil-abi. Te kʼalal ay jtul ants winik te yan slumal o jtij barcoetik te ya xnoptsaj te banti ya yichʼ akʼel ta ilel te junetik te lokʼemik ta Bibliae, la yichʼik albeyel te yakuk yichʼik bael biluk junetik te maba tojbile. Bayal machʼatik la smulanik te La Atalaya te lokʼ ta junio yuʼun 2013, te banti ya yal te tema: «¿Cuándo desaparecerán los prejuicios?». Jaʼnix jich la yichʼik ikʼel te machʼatik ya skʼan ya yaʼiyik stojol jun discurso te lokʼem ta Biblia ta kʼopil francés, inglés o español.

Ay chaʼoxtul ants winiketik te kʼotik tey-ae kʼax lek ya yilik te bitʼil ya spasik tulan te stestigotak te Jehová ta spasel te aʼtelil ini. Jtul winik chajpnax la yil-a te bitʼil yakik ta scholel skʼop Dios ta calle te chaʼoxtul stestigotak te Jehovae, jich la yal: «¡Ya jmulan te bitʼil liʼ ayexe! Ma pajaluk te bin jchʼuunejtike, jaʼukmeto ya jmulan te bitʼil jun awoʼtanik ya awakʼik ta naʼel te bintik achʼuunejike». Chaʼtul winiketik te ayix yaʼbilalike jich la yalbeyik te chaʼtul jchʼiel Testigoetike: «Ya skʼan te lekuknax ya awaʼiy abaik yuʼun te bin ya apasike».