Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Ya xchiknaj ta ilel te smelelil kʼuxul oʼtanil kʼalal ay wokolil

Ya xchiknaj ta ilel te smelelil kʼuxul oʼtanil kʼalal ay wokolil

Kʼalal ya xkʼax tulan wokolil, te stestigotak Jehová ya skoltay te yermanotakik sok yantikxan ants winiketik. ¿Bin yuʼun jich ya spasik? Jaʼ yuʼun te kʼux ya yaʼiy sbaike, te jaʼ jich ya yichʼ naʼbeyel sba te smelelil j-abatetik yuʼun Diose.(Juan 13:35).

Yame yichʼ albeyel chaʼoxchajp skʼoplal te koltayel la yakʼik ta swenta te tulan wokoliletik kʼax ta marzo yuʼun 2011 kʼalal ta olil jaʼbil yuʼun 2012. Te ants winiketik-abi la yichʼik koltayel ta swenta skʼop Dios sok mukʼubtesel kʼinal yaʼiyik. Te sucursaletik yuʼun te stestigotak Jehovae la schajpanik komite yuʼun koltaywanej yuʼun jaʼ ya yilik spisil te aʼtelil te ya yichʼ pasele, koltaywanik bayal kongregasionetik te banti kʼax te tulan wokolile.

Japón

Ta Japón. Ta 11 yuʼun marzo 2011, kʼax tulan nijkʼel sok jun tsunami (mukʼul olaetik ta mar) te la yakʼ bayal wokolil ta norte yuʼun Japón. Bayal ta mil te machʼatik la staik wokole. Te Testigoetik yuʼun Jehová ta swolol Balumilal koltaywanik soknix la yakʼ stakʼinik ta schʼapasel te naetik te jinik jilele. Yame kikʼatkotik ta yilel te video ta swenta te aʼtelil yuʼun koltaywanej te la yichʼ akʼel te kʼalal kʼax te tulan nijkʼel ini.

Ta Brasil. Nojel jaʼ, tujtsʼ koel lumetik sok te tujtsʼ koel bayal ajchʼal la smil bayal ta cien ants winiketik. Te stestigotak Jehová la stikunik bael weʼelil te banti kʼax te wokolile, 42 tonelada weʼelil te ma xbolob ta ora, 20,000 boteya jaʼ, lajuneb tonelada kʼuʼul pakʼal sok joʼeb tonelada te bintik ya xtuun ta swenta skusel biluketik jichnix bitʼil poxiletik sok yantikxan.

Ta República del Congo. Ay 32 ta jwol naetik yuʼun te stestigotak Jehová te jinik ta swenta te bintik tʼom ta yawil te tujkʼetike. Ay chanwol naetik te jin ta jkʼaxele. Te familiaetik te la staik wokole la yichʼik akʼbeyel weʼelil sok kʼuʼul pakʼal soknix la yichʼik ikʼel ta sna yantik testigoetik yuʼun Jehová.

Ta República Democrática del Congo. La yichʼik akʼbeyel poxiletik te machʼatik stsakotik ta cólera chamel, sok kʼuʼul pakʼal ta swenta te machʼatik la staik wokol yuʼun te nojel jaʼ ta skaj te tulan jaʼale. Soknix la yichʼik ilel yuʼun doktor, la yichʼ pukbeyel sit awal tsʼunubil sok bayal tonelada kʼuʼul pakʼal te machʼatik la yichʼik akʼel ta jun lugar te ma jaʼuk slumalike.

Ta Venezuela: Te kʼalal kʼax tulan jaʼal la yakʼ nojuk te jaʼ sok tujtsʼ koel tal te lume, te komite yuʼun koltaywanej la skoltayik 288 ta tul stestigotak Jehová te la staik wokole sok la spasik kʼaxem ta cincuenta naetik. Jaʼnix jich yakik ta skoltayel ants winiketik te la staik wokolil ta swenta te noj te mukʼul pamal jaʼ ta Valencia.

Filipinas

Ta Filipinas. Noj jilel ta jaʼ jun parte te lum te kʼalal kʼax tulan yikʼal jaʼale. Te sucursal la stikun kʼuʼul pakʼal ta swenta te machʼatik la staik wokole. Te kʼalal ko te nojel jaʼe te Testigoetik yuʼun Jehová te tey nainemik-ae koltaywanik ta skusel lokʼel te bintik la yijkʼitay te nojel jaʼe.

Ta Canadá. Ta tut lum yuʼun Alberta lokʼ kʼajkʼ, la yakʼbey swokol te kongregasion ta Slave Lake. Te kongregasionetik te nopol ayik tey-ae la stikunik takʼin yuʼun ya smanik te bintik ya xtuun ta swenta skusel biluketik. Te bitʼil ma la yichʼ lajinel bayal takʼin ta swenta-abi, te kongregasion jteb ma oliluk la yakʼik ta majtʼanil te takʼin ta swenta skoltayel te ants winiketik ta yantik nasion te banti ay kʼax wokolile.

Ta Costa de Marfil. Ta nail, ta yorail sok ta patil te kʼalal ay guerra ta lum-abi, la yichʼik akʼbeyel weʼelil, na te banti ya xjilik sok la yichʼik ilel yuʼun doktor te machʼatik ay swokolike.

Ta Fiyi: Te nojel jaʼ ta swenta tulan jaʼal la yakʼbey swokol 192 ta tul familiaetik yuʼun te stestigotak Jehová. Jteb ma spisiluk chʼay te granja yuʼunik te tey ya staik takʼin-ae, ta swenta-abi la yichʼik akʼbeyel weʼeliletik.

Ta Ghana: Ta swenta te nojel jaʼ yuʼun te tulan jaʼal te kʼax ta slokʼib kʼajkʼal yuʼun te lume, la yichʼik akʼbeyel weʼelil, sit awal tsʼunubil sok la yichʼik pasbeyel yachʼil snaik te machʼatik la staik wokole.

Ta Estados Unidos: Te kʼalal kʼax te tulan sutuikʼ, la slajin jilel 66 naetik yuʼun te stestigotak Jehová ta oxpam lumetik sok lajchayeb ta wol naetik jinik ta jkʼaxel. Manchukme jteb ma spisiluk te machʼatik la staik wokole spasojikix contratar jun seguro, jaʼukmeto la yichʼik akʼbeyel koltayel ta schaʼpasel te snaike.

Ta Argentina. Ta sur yuʼun te nasion-abi, te stanul volcán la slajinlan te naetik. Te kongregasionetik yuʼun te stestigotak Jehová la yakʼik koltayel ta swenta.

Ta Mozambique. Kʼaxem ta jmil ta tul ants winiketik la staik wokol ta skaj te skʼepelal kʼinal la yichʼik akʼbeyel weʼelil.

Ta Nigeria: La yichʼik akʼbeyel koltayel ta takʼin kʼaxem ta jtab ta tul Testigoetik te ejchʼenajik ta swenta jun accidente ta autobús. Jaʼnix jich la yichʼ koltayel bayal ta tul te nainemik ta norte yuʼun te lume ta skaj te la yijkʼitayik jilel snaik yuʼun te jajch kʼop ta swenta tsʼumbalil sok relijion.

Ta Benín: Te machʼatik la staik wokolil ta swenta nojel jaʼ, la yichʼik akʼbeyel poxiletik, kʼuʼul pakʼal, smajkil us, jaʼ sok te banti la skʼasesik ajkʼabale.

República Dominicana

Ta República Dominicana. Te kʼalal kʼax te huracán Irene (tulan yikʼal jaʼal), bayal kongregasionetik la yakʼik koltayel ta stojol te machʼatik la staik wokol soknix koltaywanik ta schaʼpasel te naetike.

Ta Etiopía: Chaʼpam lumetik la staik wokol yuʼun te skʼepelal kʼinale, sok jpam lum yuʼun te nojel jaʼe. Ta yoxebal la yichʼik koltayel ta swenta takʼin.

Ta Kenia. Te machʼatik la staik wokol ta swenta te skʼepelal kʼinale, la yichʼik koltayel ta swenta takʼin.

Ta Malaui. La yichʼik koltayel te machʼatik ayik ta campo yuʼun Dzaleka te anemik lokʼel ta slumalike.

Ta Nepal. Te kʼalal tujtsʼ koel lum, jtul ants te Testigo yuʼun Jehová jin te nae. La yichʼ akʼbeyel jun sna te banti xjil jun chebuk kʼajkʼale, soknix te kongregasion te ay ta lugar-abi la yakʼik koltayel.

Ta Papúa Nueva Guinea. Chaʼoxtul te machʼatik chopol stalelik la xchikʼik Waxakwol naetik yuʼun stestigotak Jehová.

Ta Rumania. Ay chaʼoxtul stestigotak Jehová te laj ta nojel jaʼ te snaik la yichʼik koltayel ta schaʼpaselxan.

Ta Malí. Ta skaj te skʼepelal kʼinal, maba sitin te awaltsʼunubil ta lum-abi. Ta Senegal te nopol yiloj sba sok la yakʼik koltayel ta swenta te machʼatik maʼyuk sweʼel jilike.

Ta Sierra Leona. Doktoretik te jaʼik testigoetik yuʼun Jehová kʼotik ta Francia ta yilel te yermanotakik ta lumetik te banti la staik tulan wokolil yuʼun te guerrae.

Ta Tailandia. Te nojel jaʼ te laj kʼaxe, la sjin jilel bayal komunidadetik. Te jsojb jkoltaywanejetik la slokʼesik te abak sok la schaʼpasik 100 ta wol naetik sok wakeb sNail Tsoblejetik.

Ta Republica Checa. Te kʼalal kʼaxemix-a te nojel jaʼ te la slajinbey jilel sna bayal Testigoetike, te yermanotakik ta Eslovaquia te nopol yiloj sbaik soke, koltaywanik ta spasel te aʼtelil ini.

Ta Sri Lanka. Jteb ma spisiluk juʼix ta pasel te aʼtelil yuʼun koltayel te la yichʼ jachel ta skaj te kʼax jun tsunami.

Ta Sudán. La yichʼik akʼbeyel weʼelil, kʼuʼul pakʼal, tepiletik sok lonaetik te stestigotak Jehová te lokʼesbilik ta slumalik ta skaj tulan kʼop jajchem ta slumalike.

Ta Tanzania. Ta swenta te nojel jaʼ te kʼax ta lum-abi, chanlajuneb ta wol familiaetik laj sbilukik. Te Kongregasionetik ta lum-abi, la skʼebenik kʼuʼul pakʼal sok biluketik te ya xtuʼun ta yutil na. Soknix la schaʼpasik jwol na.

Ta Zimbabue. Ta jun lugar tey ta nasion-abi, te skʼepelal kʼinal la yakʼ jilel bayal wiʼnal. La yichʼik akʼbeyel weʼelil sok koltayel ta swenta takʼin te machʼatik la sta swokolike.

Ta Burundi. Te machʼatik anemik lokʼel ta slumalik yak yichʼbelikix ilel yuʼun doctoretik sok yantikxan koltayel.