Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Achʼix keremetik ya skoltay te sjoʼtakik ta sitintayel te utsʼinel ta eskuela

Achʼix keremetik ya skoltay te sjoʼtakik ta sitintayel te utsʼinel ta eskuela

Mato ayuk bayal tiempo, jun organisasion te ya yakʼ koltayel ta Inglaterra, la yakʼbey jun premio Diana jtul tut kerem te Hugo sbiil te aytonax lajuneb yaʼbilal, ta swenta te la skoltay te yantik jnopjunetik ta sitintayel te utsʼinel ta eskuela.

Te Hugo jich ya yal: «Te premio te la yakʼbonike jaʼ ta swenta te video Cómo defenderte sin dar un solo golpe. Wokolyal te bin la jnop ta video ini te ay ta jw.org, kʼoemon jich bitʼil jkoltaywanej ta skomel te utsʼinel ay ta eskuela».

Te utsʼinel ta eskuela «jaʼ jun wokolil te ya xkʼax yuʼunik ta jujun kʼajkʼal te alaletik sok jchʼieletik ta swolol Balumilal [...] Pero ay bin ya xjuʼ ya apas ta swenta-abi». (Jmajkʼ te bin yichʼoj te video Cómo defenderte sin dar un solo golpe)

Kʼalal te Hugo laj yoʼtan ta yakʼbeyel yil video te maestroetik yuʼune, la schapbeyik skʼoplal yuʼun jich spisil te jnopjunetik ya xjuʼ ya x-ochik ta pajina yuʼun Internet te jaʼ yuʼun te stestigotak Jehovae. Ta ora ini bayal ta tul te sjoʼtak te Hugo te ayik ta waxakeb sok ta lajuneb yaʼbilalike spisil ora ya x-ochik ta pajina-abi. Te sjoʼtake ya yalik te ma jaʼuknax ya xkoltayotik ta swenta te utsʼinel ta eskuelae, jaʼnix jich ya xkoltayotik ta stabeyel sujtib jojkʼoyeletik te tulanik skʼoplale. Jich bitʼil, ¿bin-utʼil ya xjuʼ ya jtsa te machʼatik lek ya jokin jba soke?

Te bintik lek ya xjuʼ ta pasel te ya skoltay te jchʼieletike

Ta yan eskuela ta Inglaterra, ay jtul tut kerem te ay waxakeb yaʼbilal te sbiil Elijah te jaʼnix jich ya yichʼ utsʼinel ta eskuela-ae. La yil sok sfamilia te video Cómo defenderte sin dar un solo golpe, ta patil la snopik te bin ya xjuʼ ya yal sok bin ya spas te kʼalal ya sta utsʼinele. Ta swenta ini akʼbot yip yoʼtan yuʼun jich ya sitintay te wokolile. Kʼalal kʼax te tiempo, ta semana te kʼalal yak spasbel tulan ta sitintayel te utsʼinel ta eskuelae, te smaestro la yakʼbey yil spisil jnopjunetik te videoe.

Jaʼukmeto, te wokolil ta swenta te utsʼinel ta eskuela ma jaʼuknax ya xkʼot ta pasel ta Inglaterra, jaʼnix jich ta swolol Balumilal. Te video Cómo defenderte sin dar un solo golpe yak ta skoltayel bayal jchʼieletik ta bayuk.

Ta Estados Unidos ay jtul tut achʼix te ay ta lajuneb yaʼbilal te Ivie sbiil bayal xiʼoj jtul sjoy ta nop jun te ya x-utsʼinot yuʼun-ae. Kʼalal la yil te video Cómo defenderte sin dar un solo golpe, jich la stsal te xiwele. Jaʼnix jich kʼopoj sok te smaestra te jaʼ koltayot yuʼun ta schajpanel te wokolil staoje. Te sjoy ta nopjune kʼanbot perdon yuʼun, ta ora ini leknax ya yil sbaik.

Te testigoonkotik yuʼun Jehová bayal skʼoplal ta koʼtankotik te lekuk ayik te jchʼieletike. Jaʼ yuʼun maba ya jkom jbatik ta spukbeyel skʼoplal te bintik ya xkoltayotik ta stsalel te wokolil ya staik ta jujun kʼajkʼal jich bitʼil te utsʼinel ta eskuelae.