Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Skoltaylanel jnopjunetik ta Tailandia

Skoltaylanel jnopjunetik ta Tailandia

Kʼalalto ta diciembre yuʼun 2012 te stestigotak te Jehová ta Tailandia bajtʼik ta yuʼlatayel te eskuelaetik ta swenta yakʼbeyel koltayel te jnopjunetik yuʼun yakuk yakʼbeyikxan yipal te snopel june. Ay jtab ta tul testigoetik yuʼun Jehová te ayikix yaʼbilalik bajtʼ yulaʼtayik te eskuelaetik ta Bangkok. La stsob sbaik sok te director yuʼun te jujun eskuelaetike sok la yakʼbeyik te revistaetik ¡Despertad! yuʼun octubre ta 2012 te maestroetik sok te jnopjunetike. Te sbabial pajina yuʼun te revista-abi, jich la yal: «Cómo aprovechar al máximo la escuela» (Te bin-utʼil ya xjuʼ ya awakʼbeyxan yipal te snopel june).

Kʼax lek bintik lokʼ-a te bitʼil jich la spasik te Testigoetike, ta patil jich la spasik ta spamal te nacione. Te kʼalal yak ta kʼaxel bael-a te yan jun jaʼbil sok olile la yulaʼtayik 830 eskuelaetik, jaʼnix jich te bitʼil bayal la smulanik te revista ¡Despertad! te maestroetik sok te jnopjunetike, la yichʼxan pasel imprimir oxeb buelta swenta ya yakʼbeyik te machʼatik la skʼane. Te jayeb la yichʼ pasel imprimir ta sbabial buelta te revista ¡Despertad! yuʼun octubre ta 2012 jaʼ 30,000 ta wel. Jaʼukmeto kʼaxto la yichʼ mulanel te bin la yalbey skʼoplal te revista jaʼ swentail te la yichʼ pukel kʼaxem ta 650,000 ta wel.

Te directoretik yuʼun te eskuelaetik sok te maestroetik la yilik te kʼax bayal skʼoplal te revista ¡Despertad! Jtul maestro jich la yal: «Te revista ini ya xbajtʼ skoltay bayal te jnopjunetik swenta ya xnoptsajikxan ta stojol te sfamilia sok te yakuk snaʼik stsael ta lek te bintik ya spasike». Ay chaʼoxchajp eskuelaetik te la stuuntesik te revista ta klase. Ay yantik la stuuntesik te revista ta swenta snopel skʼoponel ta lek te june. Ay jun eskuela te banti la yichʼik kʼanbeyel te jnopjunetik te yakuk stsʼibayik te bin kʼot ta yoʼtanik ta swenta te revista sok la yichʼik akʼbeyel smajtʼanik te machʼatik lek la spasik te yaʼtelike.

Jtul achʼix te ay ta nop jun kʼaxto la smulan te artículo «Cómo ganarle la batalla a la obesidad infantil y juvenil» (Te bin-utʼil ya xjuʼ ya xko yalalik te alaletik sok te jchʼieletike) te la yalbey skʼoplal te revista ini. Te achʼixe la yal te bayuk pujkʼem te chamel ta swenta te jujpʼelile sok te malaj lek ya yaʼiy sbaik te yamigotak te kʼalal ya yalbeyik skʼoplal-abi. Jich la yal ini: «Wokolawalik te bitʼil ya awakʼbonkotikik tsitsel te maba tulanik ta naʼbeyel swentaile sok ta pasele».

Jaʼnix jich te meʼil tatiletike bayal smulanojik te bin ya yal te revistae. Ay jtul nanil te jich la yal wokol yuʼun te revista te la yichʼ akʼbeyel ta sna yuʼun jtul Testigo. Jich la yal: «Bayal lekil tsitseletik yichʼoj te ya xbajtʼ koltayotuk yuʼun te kantsil al swenta ya yakʼbeyxan yipal te snopel june».

Te winik Pichai Petratyotin te jaʼ jtul jkʼasesej kʼop yuʼun te stestigotak te Jehová ta Tailandia, jich la yal: «Te revista ¡Despertad! ya yakʼ ta ilel te tsitseletik ya yakʼ te Biblia te slekubtesojbey skuxlejal te ants winiketik ta kʼajkʼal ini. Te testigootik yuʼun Jehová bayal skʼoplal ta koʼtantik te snopel june, jaʼ yuʼun ya yakʼ sbujtsʼ koʼtantik ta yakʼbeyel te ants winiketik te revista ini, te maba ya yichʼ tojele.»