Ochan ta banti te bintik yichʼoje

Ochan ta banti bintik jujunchajp yichʼoje

sTestigotak te Jehová

tseltal

Jun aʼtelil te bayal sjelojbey skuxlejal ants winiketik

Jun aʼtelil te bayal sjelojbey skuxlejal ants winiketik

Te stestigotak Jehová ta España, yakik ta yulaʼtayel 68 chukjibaletik sok yakik ta spʼijubtesel ta swenta te Biblia 600 ta tul jchukeletik.

Ta spisil te Testigoetik te ya xbajtʼik ta ulaʼtaywanej te chukjibaletike, ya xbajtʼ-euk te Miguel te la yichʼ chukel lajchayeb jaʼbil te kʼalal mato yakʼoj sba ta stojol-a te Diose. Ta ora ini ta jujun semana ya xbajtʼ ta ulaʼtaywanej te banti la yichʼ chukel ta nameye. Jaʼukmeto, ¿bin yuʼun? Swenta ya skoltay yantik ants winiketik ta sjelel te skuxlejalike, jich bitʼil te la yichʼ koltayel-euke.

Te Miguele ayix waxakeb jaʼbil te yak ta yakʼbeyel snop Biblia bayal ta tul jchukeletik. Jich la yal: «Tseʼel koʼtan ta skoltayel te jchukeletik te banti la kichʼ chukel nameye. Ya yakʼbon sbujtsʼ koʼtan te kʼalal ya kil te sok spisil yoʼtanik ya skʼan ya yijkʼitayik te bintik chopol ya spasike».

Te kʼalal aytonax chaneb yaʼbilal-a te Miguele, jtul winik te yak ta stijel scarro-a te yuchʼoj tragoe, kʼax stenbey stat te Miguel te jich laje. Jaʼ yuʼun jajch ta tulan aʼtel te smeʼe swenta ya yakʼbey te bintik ya xtuun yuʼun te sfamiliae.

Te Miguel sok te sbankile maba kajik ta bael ta eskuela sok kajik ta ochel ta yutil na sok ta yutil carroetik ta yelkʼanel biluketik. Te kʼalal ayix lajchayeb yaʼbilal-a te Miguele, bayal bintik chopol ya spasix-a. Te kʼalal ayix joʼlajuneb yaʼbilal-ae bayal ya staix takʼin ta swenta schonel drogaetik-a. Jaʼukmeto maba tikʼ ya xlokʼ stojol yuʼun ta smanel te heroína sok te cocaína te kʼayemix ta stuuntesel-ae, jaʼ yuʼun spisilnanix-ora ya x-elkʼaj-a. Te kʼalal ayix waklajuneb yaʼbilal-ae ya xlokʼ x-och ta chukel sok maba ya xiwix ta spasel-a te bintik chopole. Te Miguele jich la yal: «Ayix ta koʼtan-a te tey ya xlajon-a ta banti chukjibale o jaʼniwan teme ay jelaw ta tuuntesel kuʼun te drogae. Jich la kaʼiy jba te bitʼil jkojt us lapʼal te banti sjaloj sna te ame».

Jaʼukmeto ta yaʼbilal 1994 te kʼalal chukulto-a te Miguele, ay tul yamigo la skʼanbey jtul testigo yuʼun Jehová te yakuk stsʼibaybey jun karta ta stojol te yamigo Miguele. Te testigo yuʼun Jehová tey la stsʼibaybey-a te bin skʼanojel yoʼtan te Dios jaʼ te ya spas ta nichimal kʼinal te Balumilale sok te yakuk sjel te skuxlejal swenta ya xjuʼ xkuxin tey-a. Jich la yal te Miguele: «Kʼot ta koʼtan te bintik la stsʼibaybon tale. Jelon te snopjibal kuʼun te kʼajkʼal-abi. Jaʼ yuʼun la kakʼ ta koʼtan snopel te Bibliae, manchukme jnaʼoj te wokol ta pasele».

Jich la yal-abi, melel kʼax kʼayem ta stuuntesel-a te maye sok te drogae, jaʼik-abi maba wokol ta tael ta yutil chukjibal. Ma jaʼuknax-abi, te sjoy ta chukele jujun kʼajkʼal ya xjapbot droga. Jaʼukmeto te Miguele spisil-ora la skʼanbey Dios te yakuk x-akʼbot yip ta stsalel te bintik kʼayem ta tuuntesel-ae, jich juʼ yuʼun yijkʼitayel.

Oxeb u ta patil, te Miguel jajch ta yalbeyel yaʼiy te yantik jchukeletik ta swenta te schʼuunel yoʼtane. Jun jaʼbil ta patil la yichʼ akʼel ta libre sok la yichʼ jaʼ yuʼun jich och ta testigo yuʼun Jehová. Te kʼalal kʼax te kʼajkʼale la sta slekol sok jajch ta schajpanel te bitʼil ya xnujpune. Jaʼnax yuʼun te chiknaj tal yan kʼope: junxan u ya skʼan ya xnujpun-a te la yichʼ ikʼel ta stojol juez ta swenta chaʼoxchajp mulil te maba chajpajem-ae, ta swenta-abi, lajuneb jaʼbil la yichʼxan chukel yuʼun. Jaʼukmeto, oxeb jaʼbil sok olil ta patil la yichʼ akʼel ta libre ta swenta te bitʼil lek te stalele, jich nujpun ta patil. Maʼyuk bin-ora la schaʼpasxan te bintik chopol te Miguele.

 

Naʼbeyaxan skʼoplal

LEK YACHʼIL KʼOP TE TALEM TA STOJOL DIOS

¿Bin-a te skʼanojel yoʼtan Dios ta swenta te Balumilale?

Te Biblia ya schol te bin yuʼun la spas Balumilal te Diose, sok te bin ora ya xlaj te wokolile, sok bin ya xkʼot ta pasel ta pajel chaʼbej soknix ta swenta te machʼatik ya xkuxinik tey-ae.