Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Te bintik la yichʼ albeyel skʼoplal ta tsoblej yuʼun jujun jaʼbil ta 2014

Tsʼakajix cien jaʼbil te ayix ta mantalteswanej te Ajwalinel yuʼun te Diose

Te bintik la yichʼ albeyel skʼoplal ta tsoblej yuʼun jujun jaʼbil ta 2014

Ta 4 yuʼun octubre 2014, kʼotik 19,000 ta tul hermanoetik ta tsoblej yuʼun jujun jaʼbil te número 130 yuʼun te Watch Tower Bible and Tract Society of Pennsylvania. Te banti la yichʼ pasel te tsobleje, jaʼ ta sNail mukʼul Tsoblej yuʼun te stestigotak te Jehová ta Jersey City, ta Nueva Jersey, Estados Unidos sok la yichʼ kʼasesel ta yantik lumetik.

Te hermano Mark Sanderson, jaʼ jtul te Jtsojb Jwolwanejetik yuʼun te stestigotak te Jehová, jaʼ la swol te tsoblej ini. Jajch ta yalel te tulan skʼoplal te kʼajkʼal-abi, melel jaʼ skʼajkʼalel-a te bitʼil ayix cien jaʼbil yochel ta mantalteswanej te Ajwalil tsabil yuʼun te Dios te ay ta chʼulchane.

Te hermano Mark Sanderson la yalbey skʼoplal oxchajp te bintik juʼem yuʼun spasel te Ajwalinel yuʼun te Dios ta cien jaʼbil-abi:

  • Te aʼtelil yuʼun pʼijubtesel ta swolol Balumilal. Ta swenta te koltayel ya yakʼ te Jehovae, te Testigoetike spasojik tulan yuʼun ya yakʼik ta naʼel te lek yachʼil kʼop yuʼun te Ajwalinel yuʼun te Dios ta bayuk. Ta yaʼbilal 1914 jaʼnax ay chaʼoxmil ta tul jcholkʼopetik-a, jaʼukmeto ta yaʼbilal 2014 te yajtalul te jcholkʼopetik kʼax ta waxak millón ta tul. Maba ya kijkʼitaytik ta scholel te skʼop Dios sok sbujtsʼ koʼtantik jaʼto teme jaʼnix ya yal te Jehová te tsʼakajix ta pasele.

  • Te koltayel staojik te machʼatik yakʼoj sbaik ta wentainel yuʼun te Ajwalinel yuʼun te Diose. Te stestigotak te Jehová ay staojik tulan utsʼinel ta swenta te jwolwanejetik yuʼun relijionetik soknix te política. Ay bayal bintik spasojik yuʼun ya skʼan ya slajinik te testigoetike. Jaʼukmeto te Jehovae spisilnanix-ora skanantayoj ta stsojboltsob-a te j-abatetik yuʼune. Ta Tribunal Supremo de Estados Unidos sok ta Tribunal Europeo de Derechos Humanos bayal buelta yalojik te juecetik te jaʼ smelelil te bintik ya jpastike, jaʼ jich yakʼoj ta ilel te Jehová te skanantayejotike.

  • Te bitʼil junax ayik te ants winiketik te yanyantik stsʼumbalike. Te Ajwalinel yuʼun te Diose junax yakʼoj te ants winiketik manchukme yanyantik-a te bintik spasojik ta skuxlejalik ta namey, snacionik sok te bin kʼopil ya xkʼopojike soknix skoltaylanoj ta stsalel biluk wokoliletik. Ta swenta-abi, te hermano Mark Sanderson jich la yal: «Jaʼnax te Jehová ya xjuʼ ya spas ini». Sok la yalxan te jaʼ jun majtʼanil ta stojol te machʼatik kʼotik ta tsoblej-abi, te kʼax mukʼ skʼoplale.

Te videoetik Amigoina te Jehová.

Te bin kʼax-xan skʼoplal ta tsoblej-abi, jaʼ te videoetik yuʼun alaletik te ayix cheb jaʼbil te yak ta pasele. Te hermano Sanderson, nail la yakʼ ta ilel jun video te banti la yichʼ nujpʼsitayel chaʼoxtul alaletik ta swolol Balumilal, te banti la yalbeyik skʼoplal te bintik snopojike. Ta swenta te bin jamal la yalik te alaletik sok te bin yaʼiyel ya yaʼiy sbaike, tijbot yoʼtanik yuʼun te machʼatik tey-ayik-ae.

Ta patil la yichʼ akʼel ta ilel jun yachʼil video te sbiilinej «Te Jehová ya yakʼbat yip awoʼtan» te ya xjalaj lajchayeb minuto te banti ya yakʼ ta ilel ta swenta jtul tut achʼix israel te sok yip yoʼtan la yalbey yaʼiy ta swenta Jehová te yinam Naamán (2 Reyes 5:1-14). Te video-abi la yichʼ pukbeyel skʼoplal ta página jw.org ta lunes 6 yuʼun octubre ta 2014 sok yichʼoj pasel kʼaxem ta 20 ta chajp kʼopil.

Te programa JW Language.

Te hermano Sanderson la yalbey skʼoplal ta swenta jun yachʼil programa yuʼun celular, computadoraetik sok tabletas ta swenta koltayel yuʼun te machʼatik ya skʼan ya snopik yan kʼopil yuʼun ya skoltayik te ants winiketik te kʼalal ya scholik te skʼop Diose. Te programa-abi yichʼoj 4,000 ta pʼal kʼopetik sok majkʼ kʼopetik te ay 18 ta chajp kʼopiletik. Sok yakto ta chajpanel yuʼun ya yichʼ otseselxan bayal kʼopiletik sok jmajkʼ kʼopiletik swenta ya yichʼ tuuntesel ta scholel te skʼop Dios sok yantikxan.

Te JW Broadcasting.

Te machʼatik kʼotik ta tsobleje chamnax la yaʼiyik te kʼalal la yichʼ alel te ay yachʼil canal yuʼun televisión te stestigotak te Jehová te ya xjuʼ ta ilel ta Internet. Jaʼnax jun prueba te ay ta kʼopil inglés. Teyto te banti ya yichʼ ilel yaʼtel te stestigotak te Jehová ta Brooklyn Nueva York, Estados Unidos, ta canal ini ya yichʼ kʼasesel videoetik, música sok te skʼoponel Biblia te pasbil ta audiodrama. Jaʼnix jich ta jujun u ya xkʼax jun programa te jaʼ ya skʼases jtul ta spisil te Jtsojb Jwolwanejetik o jtul jkoltaywanej yuʼunik.

Te hermanoetike la yilik jtebuk te bintik yichʼoj te programa ya yichʼ kʼasesel ta jujun ue, jaʼ la yakʼ ta ilel te hermano Stephen Lett, jaʼ jtul ta spisil te Jtsob Jwolwanejetik, sok la yakʼ ta ilel jtebuk te bintik la yichʼ pasel ta swenta te canal-abi. Te programa JW Broadcasting jach ta ilel ta 6 yuʼun octubre ta 2014 soknix ya xjuʼ ta ilel ta tv.jw.org.

Te Ajwalinel yuʼun te Dios te ayix cien jaʼbil yuʼun sok te jaʼbil yato xtale.

Te hermano Samuel Herd, jaʼ jtul ta spisil te Jtsob Jwolwanejetike, jaʼ la scholbey skʼoplal ta jun video te bin-utʼil te Ajwalinel yuʼun te Dios jaʼ slekubtesoj ta kʼunkʼun te scholel skʼop Diose. Te video ini ay yichʼoj lokʼombaetik ta swenta te bintik kʼoem tal ta pasele, fotoetik sok ay chaʼoxtul Testigoetik la scholik te bintik kʼoem tal ta pasele. Jaʼnix jich la yalbey skʼoplal te bintik yichʼoj pasel ta swenta te scholel skʼop Diose, jich bitʼil te la yichʼ pasel sok pukbeyel skʼoplal te «Foto-Drama de la Creación», gramófonos, tarjetas de testimonio, sok la yichʼik ta beel pancartas sok carroetik te la skuch altavoces yuʼun la yakʼik ta aʼiyel ta tulan te discursoetike. Soknix la yalbey skʼoplal te escuelaetik ta swenta te pʼijubtesel yuʼun scholel te skʼop Diose.

¿Bintik lek ya jtatik yuʼun te kʼalal ya jnaʼulan ta koʼtantik te bintik juʼem yuʼun spasel te Ajwalinel yuʼun te Dios ta cien jaʼbile? Jaʼ te ya xkʼotxan lek ta koʼtantik te yuʼunix smelelil-a te Ajwalinel yuʼun te Diose sok ya smukʼubtesxan te schʼuunel koʼtantik ta swenta te bin yakotik ta smaliyele.

Kʼayojiletik ta swenta yichʼel ta mukʼ te Jehová.

Te machʼatik kʼotik ta tsobleje kʼaxto akʼbot sbujtsʼ yoʼtanik kʼalal te hermano David Splane, jaʼ jtul ta spisil te Jtsob Jwolwanejetik te bitʼil la yal te ya xchaʼyichʼ ilel ta lek te sjunal jkʼayojtik Cantemos a Jehová. Jich bitʼil te música mukʼ skʼoplal ta yichʼel ta mukʼ te Diose, jaʼ yuʼun te sjunal jkʼayojtike kʼax lek ya yichʼ pasel. Jichme ya yichʼ pasel te bitʼil spat te yachʼil Bibliae sok ya yichʼ bonel ta kolor plata te tiʼiltiʼile.

Te hermano Splane jaʼnix jich la yalxan te ya yichʼ akʼbeyelxan yachʼil kʼayojiletik. Jaʼukmeto ma puersauk ya jmaliytik te ya yichʼ pasel imprimir te yachʼil sjunal jkʼayojtike, melel te kʼalal pasbilikix-ae ya yichʼ akʼel ta página jw.org.

Ta tsoblej yuʼun te jujun jaʼbile la yichʼ kʼajintayel oxeb kʼayojiletik te ayix jun semana yakik ta snopel-a te familia Betele. Te hermano Splane jaʼ la swol te coro te banti la skʼajintayik te kʼayojil te sbiilinej ¡Qué venga el Reino establecido por Dios!, te la yichʼ pasel ta swenta te bitʼil ayix cien jaʼbil ta mantalteswanej te Ajwalinel yuʼun te Diose. Ta patil spisil te machʼatik tey ayik-ae kʼajinik sok te coro. Sok la yichʼxan kʼajintayel te yan yachʼil kʼayojil te sbiilinej Danos fuerzas y valor.

Te snupʼsitayel chaʼoxtul hermanoetik.

Te hermano Gerrit Lösch, jaʼ jtul ta spisil te Jtsob Jwolwanejetike, ta jun video te pasbilix grabar la yakʼ ta ilel te la snupʼsitay oxtul hermanoetik sok te yinamik te ayix bayal jaʼbil yakik ta aʼtel ta Betel. Jaʼ la yalbeyik skʼoplal te bayal bintik jelonem ta lum yuʼun te Dios te jayeb jaʼbil kʼaxemix tale, jaʼ-abi ya yakʼ ta ilel te maba komen te aʼtelile. Te hermano Gerrit Lösch la yal te bitʼil yaloj te Biblia te ay bayal bintik ya xbajtʼ lekubxan ta swenta te organización yuʼun te Jehová sok la yalxan te junuknax ya x-aʼtejotik sok te lum yuʼune (Isaías 60:17).

Te bintik kʼot pasel ta namey sok te bin ya skʼan ya yal ta patil.

Te hermano Splane la yal ta sdiscurso te bin yuʼun maʼyuk ya yichʼix cholbeyel skʼoplal ta junetik kuʼunkotik ta swenta bintik kʼot pasel ta namey sok te bin ya skʼan ya yal ta patile.

Ta nailto la yichʼ alel te aylaj bayal ta tul j-abatetik yuʼun Dios ta namey kʼinal te ay bin ya skʼan ya yal ta stojol te j-abatetik yuʼun te Dios ta kʼajkʼal ini. Jaʼnix jich jchʼuunejtik-a te bintik ya yal te Biblia te aylaj bin ya skʼan ya yal ta stojol te testigoetik yuʼun Jehová ta ora ini. Jnaʼojtik stojol te kʼax tʼujbil ta nopel-abi. Jaʼukmeto, ¿bin yuʼun te junetik kuʼunkotik maba ya yalbeyix skʼoplal ta swenta te bintik kʼot pasel ta namey sok te bin ya skʼan ya yal ta patile?

Melelnix-a te ya yalbey skʼoplal te Biblia ta swenta chaʼoxtul ants winiketik sok te bintik kʼoem ta pasel te ay bin ya skʼan ya yakʼ ta naʼel o te ay machʼa mukʼ yuʼune. Te kʼalal ya yakʼ kiltik te Biblia te jaʼ jun albilkʼope, ya jchʼuuntik. Jaʼukmeto te hermano Splane jich la yal: «Teme maʼyuk bin ya yalbey skʼoplal te Bibliae, maʼyuk bin ya xjuʼ ya kaltik yuʼun-euk». Jich yuʼun maba ya x-och jlebeytik swentail te aʼyejetik ya scholbey skʼoplal te Bibliae. Melel teme jich ya jpastike ya xchʼay skʼoplal ta koʼtantik te bin-nix ya yakʼ jnoptik-a te aʼyejetik ya yal te Bibliae, chikan teme yakotik ta smaliyel kuxlejalil ta chʼulchan o ta Balumilal (Romanos 15:4). *

Wikʼilukme asitik.

Ta sdiscurso te hermano Lett la scholbey lek skʼoplal ta swenta te bin- utʼil kʼoem ta koʼtantik te lokʼombakʼop yuʼun te lajuntul achʼixetik te maba tabilik ta winike (Mateo 25:1-13). Ta swenta te lokʼombakʼop-abi, kʼotix ta koʼtantik te jaʼ lekolil te Jesuse, te achʼixetik te maba tabilik ta winike, jaʼik skʼoplal te jtsʼaklinwanejetik yuʼun Jesús te tsabilik yuʼune (Lucas 5:34, 35; 2 Corintios 11:2). Te lokʼombakʼope jaʼ ya yalbey skʼoplal te slajibal kʼajkʼal soknix te bin ya xkʼot ta pasel te kʼalal yak ta kʼaxel-a te tulan wokolile. Te kʼalal ya yal te Jesús te ay joʼtul achʼixetik te maba pʼijike, maba la skʼan la yal te ay bayal maba jun yoʼtan ya yakʼ sbaik te machʼatik tsabilik sok te ya yichʼik lebeyel sjelolike. Te bin-nix la skʼan la yal-ae, jaʼ te yakuk stsajtay sbaike. Ta jujuntul te machʼatik tsabilik te ya xbajtʼik ta chʼulchane ay cheb te bin ya xjuʼ ya stsaike: jaʼ te chapalukik sok te wikʼiluk sitik jich bitʼil te joʼtul achʼixetik te pʼijike o maba jun yoʼtan ya yakʼ sbaik jich bitʼil te joʼtul achʼixetik te maba pʼijike.

Ta swenta te bin la yichʼix alel ta yan discursoe, ma skʼan te ya jlebeytik bintik ya skʼan ya yal te lokʼombakʼop ini. Jaʼ lekxan te jaʼuk ya xbajtʼ koʼtantik ta yilel te bintik ya jnoptik yuʼune. Ta jpisiltik manchukme joʼotik te machʼatik tsabilotike o teme joʼotik te «yantic tuminchijetic», jpisiltik ay ta jwentatik yakʼel ta ilel te sakal kʼinal ta stojol te yantike soknix te wikʼiluk jsitike (Juan 10:16; Marcos 13:37; Mateo 5:16). Yame skʼan te jujuntul jun koʼtan ya kakʼ jbatike, melel maʼyuk machʼa jich ya xjuʼ ya spas ta jwentatik. Joʼotiknixme ya jtsatik te kuxlejalile. ¿Bin-utʼil? Jaʼ te wikʼiluk jsitik soknix te ya jcholtik te skʼop Dios sok sbujtsʼ koʼtantik.

«Slokʼombakʼop yuʼun talentoetik».

Ta patil te hermano Anthony Morris, te jaʼ jtul ta spisil te Jtsojb Jwolwanejetike, koltaywan ta yakʼel ta naʼel ta swenta te lokʼombakʼop yuʼun te talentoetike (Mateo 25:14-30). Kʼotix ta koʼtantik te machʼa-a te ajwalil te ya yalbey skʼoplal ta lokʼombakʼop (Jesús) te ya xbajtʼ yakʼbey smajtʼan te j-abatetik yuʼun (te machʼatik tsabilik te jun yoʼtan yakʼoj sbaik liʼ ta Balumilal) ta pajel chaʼbeje, jaʼ-abi, jaʼ te kuxlejalil ya yichʼik akʼbeyel ta chʼulchane. Te kʼalal la yalbey skʼoplal Jesús ta swenta te bin ya xkʼot ta stojol te chopol j-abat sok te chʼaje, maba la skʼan la yal te ay bayal ta tul te maba jun yoʼtan ya yakʼ sbaik te machʼatik tsabilik ya xbajtʼik ta chʼulchane. Jaʼ yak ta yalel-a te yakuk jtsajtay sbaike, manchuk ya xchʼajubik ta aʼtel sok manchuk ya snopik chopol talelil.

¿Bin ya yakʼ jnoptik te lokʼombakʼop-abi? Te ajwalile ay tulan aʼtelil la yakʼbey jilel ta skʼab te j-abatetik yuʼune. Jaʼnix jich te Jesuse ay tulan aʼtelil la yakʼbey jilel ta skʼab te j-abatetik yuʼune, jaʼ te scholel skʼop Dios sok te yotsesel ta jnopojeletik te ants winiketike. Ya skʼan te jpisiltikuk ya jpastik tulan ta spasel te aʼtelil-abi, jaʼ chikan te banti kʼalal ya xjuʼ kuʼuntike. Ta slajibal, te hermano Morris la yalbey lek skʼoplal te machʼatik tey-a ayik-ae ta swenta te sok sbujtsʼ yoʼtanik yakik ta spasel te aʼtelil yuʼun te Ajwalinel yuʼun te Diose.

«¿Machʼa-a te nopol ya yutsʼin te lum yuʼun te Diose?»

Jich sbiil te slajibal discurso te la skʼases te hermano Geoffrey Jackson, jaʼ jtul ta spisil te Jtsob Jwolwanejetik, ta swenta-abi spisil te machʼatik tey ayik-ae yoʼtanuk la skʼan snaʼikix stojol. Tey la yalbey skʼoplal-a te Gog talem ta Magog te jaʼ kʼaxto ya xbajtʼ yutsʼin ta pajel chaʼbej te lum yuʼun te Diose (Ezequiel 38:14-23).

Ta nailto jchʼuunejtik-a te Gog jaʼ te Satanás kʼalal la yichʼ chʼojel koel tal ta Balumilale. Jaʼukmeto te hermano Jackson la yal te chiknaj tulan jojkʼoyeletik yuʼun-abi. Te Jehová la yal ta swenta te Gog kʼalal yichʼojix lajinel-ae ya yichʼ «tiʼel yuʼun spisil ta chajp mutetic te ya stiʼic baqʼuet, soc te haʼmal tiʼawal chambahlametic» (Ezequiel 39:4). Te Jehová jaʼnix jich la yal ta swenta «te Gog soc spisil te soldadohetic yuʼune» yalaj yichʼik mukel liʼ ta Balumilal (Ezequiel 39:11). Jich yuʼun, ¿yabal xjuʼ ya yichʼ pasbeyel jun espíritu-abi? Te Satanase yame yichʼ chʼojel ochel ta xaab mil jaʼbil, maʼyuk machʼa ya xweʼot yuʼun sok maʼyuk machʼa ya xmukot yuʼun (Apocalipsis 20:1, 2). Ta slajibal te mil jaʼbile yame xchaʼyichʼ koltayel lokʼel tal te Satanás ta xaabe sok ya «xlocʼ sloʼloylan te nacionetic ayic ta schanxuhcul bahlumilal, ha te Gog soc Magog» (Apocalipsis 20:7, 8). Jamal chikan ta ilel, te Satanase ma xjuʼ ya sloʼlay te Gog teme jaʼnix Gog te Satanase.

Te hermano Jackson la scholbey skʼoplal ta swenta te Gog talem ta Magog te albil skʼoplal ta sjun Ezequiel, ma jaʼuk skʼoplal te Satanás, jaʼ skʼoplal spisil te nacionetik te junax yakʼoj sbaik te ya skʼan ya slajinik te lum yuʼun Dios ta pajel chaʼbeje. Ta spisil-abi ya yakʼ ta ilel te Gog te ya yutsʼin te lum yuʼun te Diose, jaʼnix skʼoplal te «ajwalil ta norte» soknix te «ajwaliletic ayic ta bahlumilal» (Daniel 11:40, 44, 45; Apocalipsis 17:12-14; 19:19).

Jaʼukmeto, ¿machʼa-a te «ajwalil ta norte»? Ya skʼan ya jmaliytik swenta ya jnaʼtik machʼa-a. Manchukme jich-abi, te kʼalal ya kiltik te bin-utʼil yakotik ta snaʼbeyelxan skʼoplal te bintik yato xkʼot ta pasel ta pajel chaʼbej te nopol ya xkʼotix ta pasele, ya yakʼbotik smukʼul koʼtantik. Te lum yuʼun te Diose maba ya xiʼik te tulan utsʼinel ya yichʼ tal te Gog talem ta Magog, melel snaʼojik te bin-ora jich ya xkʼot ta pasele, te Gog ya yichʼ lajinel ta jkʼaxel. Yan te joʼotike yame jta jkuxlejaltik ta sbajtʼel kʼinal. *

Ta slajibal.

Te hermano Sanderson la yalbey skʼoplal ta swenta te Traducción del Nuevo Mundo te xchaʼilbilix ta leke, jaʼnixlaj jich ya yichʼ pasel ta tut. Sok la yalbey skʼoplal te yaklaj ta pasel grabar te Bibliae. Ta swenta-abi la yal te ya yichʼ tuuntesel bayal ta tul hermanoetik yuʼun ya spasbeyik grabar te snukʼilal skʼopik te jayeb machʼatik ya xchiknaj skʼoplalik ta Bibliae. Te grabacionetik-abi yame yichʼ akʼel ta página jw,org, jaʼ nail ya yichʼ pasel te sjun Mateo.

Sok la yichʼ albeyel skʼoplal ta swenta te texto yuʼun te jaʼbil ini, jaʼ te Salmo 106:1: «¡Halbeyahic wocol te Jehová, como lec yoʼtan [...]!». Jich yuʼun te hermano Sanderson la yalbey spisil te machʼatik ayik ta tsobleje te yakuk sleik te bintik yuʼun ya skʼan ya kalbeytik wokol te Jehová ya spisil-orae.

Te kʼalal laj te tsobleje, te Jtsob Jwolwanejetik te juktulik la sjokinik te coro yuʼun jich junax kʼajinik sok te machʼatik ayik ta tsobleje, te sbiil te kʼayojile jaʼ El gran nombre de Jehová. ¡Kʼax snupʼ te jich la yichʼ pasel ta slajibal te tsoblej-abi, melel maʼyuk bin-ora ya xchʼay ta oʼtanil!

^ párr. 22 Te discurso ini sok te chebxane ya scholbey skʼoplal te La Atalaya 15 yuʼun marzo ta 2015.

^ párr. 30 Te discurso ini ya scholbey skʼoplal te La Atalaya 15 yuʼun mayo ta 2015.

Naʼbeyaxan skʼoplal

Ayix cien jaʼbil yak ta ichʼel ta mukʼ te Dios sok kʼayojiletik

¿Bitʼil stuuntesoj te stestigotak Jehová te kʼayojiletik ta yichʼel ta mukʼ Dios?