Ochan ta banti te bintik yichʼoje

Ochan ta banti bintik jujunchajp yichʼoje

sTestigotak te Jehová

tseltal

Te Graduación yuʼun te Pʼijubtesel yuʼun sKʼop Dios ta Galaad 136

Te Graduación yuʼun te Pʼijubtesel yuʼun sKʼop Dios ta Galaad 136

Te kʼalal laj yichʼbelik te pʼijubtesel te jalaj joʼeb u, te clase 136 yuʼun te Pʼijubtesel yuʼun skʼop Dios ta Galaad, la yichʼ pasel te graduación ta sábado 8 yuʼun marzo ta 2014. Te bin swentail te eskuela ini, jaʼ te ya schajpan te stestigotak Jehová te ayix bayal jaʼbil yakik ta scholel skʼop Dios yuʼun jich lek ya spasxan te yaʼtelik sok yakʼbeyel yip yoʼtanik te yermanotakike. Te tsoblej ini la yilik 11,548 ta tul ants winiketik. Bayal machʼatik la yilik teynix te banti la yichʼ pasele, jaʼ ta snail pʼijubtesel yuʼun te stestigotak Jehová ta Patterson (Nueva York), sok ay yantik te la yilik te programa ta Internet te pasbilix grabar jich bitʼil ta Canadá, Estados Unidos, Jamaica sok Puerto Rico.

«Hichuc me awoʼtanic te bin utʼil yoʼtan te Cristo Jesús.» Te David Splane, te ochem ta Jtsojb Jwolwanejetik yuʼun te stestigotak Jehová jaʼ la skʼases te discurso ini te lokʼem ta sjajchibal kʼopiletik yuʼun Filipenses 2: 5-7 te ya yal: «Hichuc me awoʼtanic te bin utʼil yoʼtan te Cristo Jesús.» Te kʼalal ay ta Balumilal-a te Jesuse maba jaʼ bajtʼ ta yoʼtan te bitʼil mukʼ yaʼtel yichʼoje, la yakʼ ta ilel te pekʼel yoʼtan sok jaʼ bajtʼ ta yoʼtan spasel ta aʼtelil akʼbil yuʼun te Diose.

Jaʼnix jich, te hermano Splane la yakʼ ta ilel te bitʼil bayal skʼoplal ta yoʼtan Jesús te yantik j-abatetik yuʼun te Diose. Jich bitʼil te oxeb buelta kʼan yichʼ sujel ta mulil yuʼun te Pukuj ta jochol takin kʼinal, te Jesús jich la sut «hich ts’ihbabil» sok jaʼ la stuuntes te kʼopiletik la yal te Moisés kʼalal la skʼopon te lum Israele (Mateo 4:4, 7, 10; Deuteronomio 6:13, 16; 8:3). Jich bitʼil te jaʼ sNichʼan Dios sok jaʼ te Mesiase, te lajuk skʼane la yalbey te Pukuj te bin snaʼoj ta stukele. Jaʼukmeto sok spekʼelil yoʼtan la yakʼ ta ilel te bayal skʼoplal ta yoʼtan te yaʼtel yichʼoj te Moisese. Jaʼnix jichotik-euk ya skʼan te bayaluk skʼoplal ta koʼtantik te kʼalal ay bintik ya snaʼik spasel te yantike sok te yakuk kutsil kʼoptaytik spisil-ora yuʼun te aʼtelil ya spasike.

Te hermano Splane mukʼ skʼoplal la yalbey te lekil talelil yuʼun Jesús te la yakʼ ta ilel ta slajibal skuxlejal ta Balumilal. Ta skʼoponel Dios, te Jesús jich la yalbey te sTate: «La jcacʼ ta ilel awutsilal liʼ ta bahlumilali, yuʼun huʼix cuʼun te aʼtel la awaʼbon jpas. Yoʼtic, Jtat, aʼbon quichʼ xan cutsilal ta atojol, ha te utsilal ay cuʼuntic te cʼalal ma to ayuc a te bahlumilale» Juan 17:4, 5. Te Jesuse maba la skʼan te ya xtoyxan yaʼtel te kʼalal ya sujt bael ta chʼulchane, melel jaʼnax la skʼan te yakuk x-akʼbot te yaʼtel yichʼoj ta sjajchibale. Te machʼatik la yichʼik pʼijubtesel ta Galaad yame skʼayinbeyik stalel te Jesús teme jaʼ ya xbajtʼ ta yoʼtanik spasel te aʼtelil akʼbilike, ma jaʼuk te toyol yaʼtel ya yichʼike. Jichme tseʼelnax yoʼtanik ya xbajtʼik te banti ya yichʼik tikunel, manchukme maba ya yichʼik akʼbeyelxan mukʼ yaʼtelik.

«Lokʼesa abaik ta awoʼtanik mame x-anaʼik te bin la awijkʼitayik jilele.» Te William Malenfant, te jaʼ jkoltaywanej ta Komite yuʼun Pʼijubtesel yuʼun Jtsojb Jwolwanejetik, la yakʼbey smukʼul yoʼtan te machʼatik la yichʼik pʼijubtesel te yakuk skʼayinbeyik stalel te jpuk-kʼop Pablo te bayal bintik la yijkʼitay jilel swenta ya x-och ta abatinel ta stojol te Diose. Te Pablo maba la snaʼulan te bintik la yijkʼitaye. Jich la yal ini: «Ya jchʼay ta coʼtan te bin hilix ta jpat, ha ya cahnutay te bin ma to ba jtahoj, ya jtojlin bahel te banti yacon ta bahele» (Filipenses 3:13, 14).

Teme spisil-ora ya slokʼes sbaik ta yoʼtanik ta spasel te aʼtelil te machʼatik la yichʼikix pʼijubtesele, yakikme ta skʼayinbeyel stalel te j-abatetik yuʼun Dios ta namey kʼinal sok ta kʼajkʼal ini te jun yoʼtan la yakʼ sbaike. Te hermano Malenfant la yalbey skʼoplal te Clara Gerber Moyer, te kaj ta abatinel ta stojol Dios te kʼalal tut achʼixto-ae. Jich la stsʼibay: «Jaʼ jun majtʼanil ya kaʼiy te kʼalal ya jnaʼulan te 80 jaʼbil te kakʼoj jba ta stojol te Diose, sok maba la kil jich bitʼil jun wokolil. Te yakuk xjuʼ ya jsujtesxan te jkuxlejale, jichnix ya jpas ta yan buelta te bin jpasojixe.

«Albeyaik skʼoplal te Ajwalinel yuʼun Dios sok te chʼul-abatetik jichnix te bitʼil ya spasik-euke.» Te Gerrit Lösch, te jaʼnix jich ochem ta Jtsojb Jwolwanejetik, la yakʼbey snop ta yoʼtanik te machʼatik la yichʼik pʼijubtesel ta swenta cheb majtʼanil te yichʼojik te jcholkʼopetike. Ta sbabial, te kʼalal ya scholik te lek yachʼil kʼop yuʼun te Ajwalinel yuʼun te Diose, jich yakik ta spasel te bitʼil chʼul-abatetike, melel te kʼopil «chʼul-abat» te ay ta Biblia lokʼem tal ta kʼopil griego sok hebreo te ya skʼan ya yal «jpuk-kʼop». Te schebale, te chʼul-abatetike jaʼiknix ya xtojobteswanik ta spasel te aʼtelil ini, jich bitʼil la yichʼ tojobtesel te jnopojel Felipe (Hechos 8:26-35).

Jaʼnix jich te hermano Lösch la scholbey skʼoplal cheʼoxeb te bin kʼoem ta pasel ta scholel skʼop Diose. La yalbey skʼoplal ta swenta te Gabino jtul Testigo yuʼun Jehová ta México te jaʼnax ya stij te tiʼna jun o cheb buelta te kʼalal ya schol skʼop Diose. Jaʼukmeto ta jun na la stij chaneb buelta. Lokʼ talel jtul winik, jich albot yuʼun: «¿Yabal awil te chʼajan te jokʼole? Te kʼalal la atij ta schanebal buelta te stiʼ jnae, jxojojix ta jnukʼ-a. Jaʼukmeto la jlokʼes yuʼun te tal jam te tiʼnae. Wokolawal yuʼun te maba la akom aba ta stijel te jnae, te manchuke la jojkʼan jba».

Manchukme chapal yuʼunik yilel te jich kʼot ta pasele, jaʼukmeto ma jichuk. Jaʼ ini ya yakʼ ta ilel te bitʼil jaʼ ya xtojobteswan te chʼul-abatetik yuʼun Dios ta scholel te skʼop Dios ta swolol Balumilal.

«Yame yichʼik utsilal te machʼatik mukʼxan skʼoplalike.» Te Michael Burnett, jpʼijubteswanej yuʼun sKʼop Dios ta Galaad, la slokʼes te sdiscurso ta swenta stalel te Jabez, te jaʼ stsʼunbal Judá. Te Biblia ya yal te jaʼ «mucʼ xan scʼoblal cʼoht yuʼun te yermanotac». Ta jun buelta, te Jabez la skʼanbey te Dios te yakuk x-akʼbot utsʼilal, te yakuk xmukʼubtesbot te kʼinal smakoje, te yakuk xkoltayot yuʼun sok te yakuk xkanantayot ta swenta te wokolile (1 Crónicas 4:9, 10).

¿Bin-utʼil ya xjuʼ ya skʼayinbeyik stalel te Jabez te machʼatik la yichʼikix pʼijubtesel ta Galaad? Jaʼ te ya yalbeyik ta jamal te Dios te kʼalal ya skʼanbeyik koltayele. Te bin ya xjuʼ ya skʼanbeyike jaʼ te yakuk xkoltayotik ta spasel yuʼun te bin la snopik ta pʼijubtesele. Jaʼnix jich ya xjuʼ ya skʼanbeyik te yakuk xkanantayotike, ma jaʼuk te ya xkoltayotik ta jkʼaxel yuʼun te bintik chopole, jaʼ te yakuk xkujch yuʼunik te mel-oʼtan sok te yakuk x-akʼbot yipik ta sitintayel te wokoliletike. Jichnix bitʼil te Dios la yaʼiybey skʼop te Jabez, jaʼnix jich te machʼatik la yichʼik pʼijubtesel ta Galaad yame yichʼik aʼiybeyel skʼopik yuʼun te Diose.

«Mame xa awakʼik te ya xtupʼ te kajkʼe.» jich sbiil te sdiscurso te Mark Noumair, jpʼijubteswanej yuʼun sKʼop Dios ta Galaad sok jkoltaywanej ta Komite yuʼun Pʼijubtesel. Te banti la yichʼ lokʼesel te discurso ini jaʼ ta 1 Tesalonicenses 5: 16-19. La scholbey skʼoplal ta swenta te bitʼil ma xtupʼ te jun kʼajkʼe ay oxchajp te bin ya skʼane jaʼ te: siʼul, yikʼal sok skʼajkʼal. Jichnix-euk te machʼatik la yichʼik pʼijubtesele ay oxchajp te bin ya xtuun yuʼunike swenta ma xchʼay te stseʼelil yoʼtanike.

Ta sbabial, ya skʼan te ayuk yuʼunik te sbujtsʼ-oʼtanile. «Ayuc me sbujtsʼ awoʼtanic spisil ora» jich ya yal te 1 Tesalonicenses 5:16, [XCD]. Swenta ayxan sbujtsʼ yoʼtanik te machʼatik la yichʼik pʼijubtesele ya skʼan te ya snopilan ta yoʼtanik te bintik lekilal staojik ta swenta te lek ilbilik yuʼun te Jehovae. Jich bitʼil te siʼ ya yakʼbey yip te kʼajkʼe, jaʼnix jich te sbujtsʼ-oʼtanile jaʼ ya xkoltayotik yuʼun te tseʼeluknax yoʼtanik ta aʼtele. Te schebale, jaʼ te skʼoponel Dios. Te versiculo 17 [XCD] ya yal: «Cʼoponaic Dios spisil ora». Te skʼoponel Dios jich kʼoem te bitʼil ikʼ te ya yakʼbeyxan yip te kʼajkʼe. Kʼax lek te yakuk xjalajotik ta skʼoponel te Diose sok te yichʼojuk swentail te bin ya kalbeytike, te yakuk jambeytik koʼtantik te Jehovae. Te yoxebale, jaʼ te bin ya yal te versiculo 18 [XCD] «Albeyaic wocol Dios yuʼun te bila ya xcʼot ta awentaique». Te yalel wokole jaʼ skʼajkʼal kʼoem swenta ma xtupʼ te kʼajkʼ yuʼun te sbujtsʼ-oʼtanile. Te kʼalal ya kaltik wokole jich maba ya sikub te jun koʼtantik sok te Jehová sok te kermanotaktike. Te hermano Noumair jich la yalbey te machʼatik la yichʼik pʼijubtesele: «Mame xa akom abaik ta yalel wokol, jichme maba ya xjajchex ta kʼop yuʼun teme ay bin ma la amulanike.»

«Junax albeyaik yutsil te Jehová sok te chʼulchane.» Te Sam Roberson, jpʼijubteswanej yuʼun sKʼop Dios la sjach te sdiscurso sok te kʼopiletik te lokʼem tal ta cheʼoxeb versiculoetik te ya yal ta swenta te Kʼajkʼal, te U sok te ekʼetik te ya yalbeyik yutsilal te Jehovae (Salmo 19:1; 89:37; 148:3). Te kʼalal la scholbey skʼoplal-abi, te machʼatik la yichʼik pʼijubtesele la yichʼik albeyel te yichʼojik jun mukʼul majtʼanil ta swenta yalbeyel yutsilal te Jehová ta scholbeyel te skʼope, te hermano Roberson la yal te yakuk yakʼik ta ilel te bintik lek la staik te kʼalal la scholik te skʼop Diose. Ay jtul te machʼa la yichʼ pʼijubtesel, la skojtan skarro yuʼun jich ya sol kʼaxel ta kaye jtul winik te ay ta silla de ruedas. Te winik-abi la yal wokol yuʼun, ta patil la schʼataxan sok la yichʼ utsil kʼoptayel te hermano ta swenta te lek stalele. Ta swenta-abi jajchik ta aʼyej, jich te winike la skʼan te ya yichʼ nojptesel ta Biblia. Te kʼalal ya xbajtʼ yakʼ te nojptesel yuʼun te Biblia ya scholbey skʼop Dios-euk te machʼatik ya xkʼot ta ulaʼtayel yuʼun te winike. Ta spisil ay juktul te machʼatik jajch snopik te Biblia ta swentanax te bitʼil jajchik ta aʼyeje.

«Tuuntesaik te pʼijubtesel yuʼun Dios yuʼun jich ay yip awoʼtanik.» Te Donald Gordon, jkoltaywanej yuʼun te Komite yuʼun Junetik, la snujpʼsitay chaʼtul hermanoetik te nujpunemik. Ay jtul hermano la schol te bitʼil mukʼ skʼoplal la yichʼ alel te kʼopiletik te lokʼem ta Efesios 3:16-20. La snopik teme pekʼel yoʼtanik sok teme maba wokolukik ta kʼoponel soknix teme ya snaʼik te ayto bayal aʼtelil yuʼun te Jehová ta stojol te j-abatetik yuʼune, jaʼme ya x-akʼbot yip yoʼtanik yuʼun. Jtul hermana bayal la smulan te lokʼomba kʼop te la stuuntes jtul jpʼijubteswanej. La yalbey te machʼatik la yichʼik pʼijubtesel te jichukik te bitʼil tut chay ta mar, ma jaʼuk te bitʼil mukʼul chay te tutnax yawil te banti ma xjuʼ ya xchʼiike. Te hermana jich la yal: «Jaʼ ini ya yakʼbon jnop teme jun koʼtan te pekʼel ya kakʼ jba ta organisasion yuʼun te Jehová, yame yakʼ xchʼi te schʼuunel koʼtane».

«Akʼame snaʼex te Jehová ta swenta awutsil alekilik.» Te Mark Sanderson, te ochem ta Jtsojb Jwolwanejetik, jaʼ la skʼases te discurso te mukʼ skʼoplal ta stojol te machʼatik la yichʼik pʼijubtesele. Te titulo yuʼun te discurso lokʼem tal ta kʼopiletik yuʼun te Nehemías te kʼalal jich la yalbey te Diose. Jich la stsʼibay: «Dios cuʼun, naʼawon scuenta cutsil jlekil» (Nehemías 5:19; 13:31). Ma yuʼunuk la xiʼ te Nehemías te xchʼayot yoʼtan te Dios soknix te aʼtelil la spase. Jaʼ la skʼanbey te Dios te yakuk xnaʼot sok slekil yoʼtan sok te yakuk x-akʼbot utsilale.

Te machʼatik la yichʼik pʼijubtesele yame xjuʼ ya snaʼik te spisil-ora ya xnaʼotik yuʼun te Jehová teme ya spas ta skuxlejalik te bintik mukʼ skʼoplal la snopike. Ay jchajp te bin la snopike, jaʼ te bin swentail te ya yakʼ sbaik ta abatinel ta stojol te Jehová jaʼ te skʼuxul ta yoʼtanik ta stojole (Mateo 12:30). La yalbey skʼoplal ta swenta te Abrahán, te kʼux la yaʼiy te Jehová ta spisil yoʼtan, jaʼnix jich-euk te Jehová la snaʼ sok slekil yoʼtan. Melel jmil jaʼbil ta patil te kʼalal lajemix-a te Abrahane, la yichʼ albeyel yuʼun te Jehová «te machʼa jun coʼtan soc».

Te hermano Sanderson la sjultesbey ta yoʼtanik te kʼuxuk ta yoʼtanik te spatxujkike, jaʼ mukʼxan skʼoplal te machʼatik pajal schʼuunel yoʼtanik soke (Marcos 12:31). Jich bitʼil te samaritano te jich la yil te bitʼil spatxujk te judío winik te la yichʼ utsʼinel yuʼun te j-elekʼetike, te machʼatik la yichʼik pʼijubtesele yame skʼan ya skoltayik-euk te machʼatik ya skʼanik koltayele (Lucas 10:36). Te hermano Sanderson, la yalbey skʼoplal te hermano Nicholas Kovalak te la yichʼ pʼijubtesel ta Galaad te kʼax ta superintendente yuʼun distrito, naʼbil sba ta swenta te slekil yoʼtan sok skʼuxul yoʼtan. Ta jun buelta la yakʼbey smukʼul yoʼtan te superintendente yuʼun circuito sok te yinam te yakuk yakʼikxan tiempo ta scholel te skʼop Diose, jich la yalbey ini: «Sab ta jujun kʼajkʼal, sab ta jujun semana, sab ta jujun u sok sab ta jujun jaʼbil». Jaʼukmeto mato ayuk bayal kʼajkʼal-a te kʼalal la yil te hermana, jich la yalbey: «Ma xa amel awoʼtan yuʼun te bin la kal te yan bueltae. Bayal yakatix ta aʼtel. Kojtesa jtebuk, jichme bayal jaʼbil ya xjalajat ta spasel te aʼtelil ini». Te kʼopiletik te ya yal sok slekil yoʼtan sok skʼuxul yoʼtan te hermanoe koltayot yuʼun te hermana ta spasel te aʼtelil ini ta bayal jaʼbil.

Ta slajibal, te hermano Sanderson la yalbey te machʼatik la yichʼik pʼijubtesel te yakuk snojptesik sok yakuk schajpanik yantik ta spasel te aʼtelil akʼbilike (2 Timoteo 2:2). Teme jich ya spasike yakikme ta spasel ta skuxlejalik te bintik la snopike: jaʼ te yakʼbeyel yip yoʼtan te yermanotakik sok skoltayel ta stulantesel schʼuunel yoʼtan te lum yuʼun te Diose sok te manchuk ya schʼay ta yoʼtanik te ya xnaʼotik yuʼun te Jehová ta swenta yutsil slekilik (Salmo 20:1-5).

Slajibal. Te kʼalal la yichʼik akʼbeyel te sdiplomaik, ay jtul te machʼa la yichʼ pʼijubtesel te la skʼopon jun karta ta komon sitil ta swenta yalel wokol. Ta slajibal te programa ay joʼlajuntul te la skʼayojtayik ta jichnax te kʼayojil 123 ta libro Cantemos a Jehová, te sbiilinej «Nuestros pastores son un regalo de Dios».

 

 

 

Naʼbeyaxan skʼoplal

¿MACHʼATIK YA SPASIK TE SKʼANOJEL YOʼTAN TE JEHOVÁ TA KʼAJKʼAL INI?

¿Bintik smakoj te aʼtelil yuʼun misioneroe?

¿Bintik smakoj te ya slokʼes sba ta yoʼtanike? ¿Bintik chajpambil yuʼun ya yichʼik pʼijubtesel ta lek?

DOCUMENTARIES

Kʼalalto ta stiʼil Balumilal

Te Pʼijubtesel yuʼun sKʼop Dios ta Galaad yuʼun te Watchtower ya schajpan ta lek te machʼatik yaʼtelinejik scholel te lek yachʼil kʼop yuʼun te Ajwalinel yuʼun te Diose. Ilawil te bin ya yalik chaʼoxtul misioneroetik ta swenta te pʼijubtesel ini.