Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Te graduasion 133 ta swenta te Pʼijubtesel yuʼun sKʼop Dios ta Galaad

Sábado 8 yuʼun septiembre 2012

Te graduasion 133 ta swenta te Pʼijubtesel yuʼun sKʼop Dios ta Galaad

Te kʼalal laj yichʼbelik te pʼijubtesel te jalaj joʼeb u, 48 ta tul te machʼatik la yichʼik Pʼijubtesel yuʼun sKʼop Dios ta Galaad yuʼun te Watchtower, la smulanik te graduasion yuʼunik ta banti snail pʼijubtesel yuʼun stestigotak Jehová te ay ta Patterson (Nueva York). Te programa la yilik 9,694 ta tul, ay kʼotik yamigotakik, sfamiliaik sok yantikxan te kʼotik ta yakʼel mukʼul oʼtanil.

kʼalalto ta yaʼbilal 1943, kʼaxem ta 8,000 ta tul j-abatetik te bayalix jaʼbil ya scholik skʼop Dios, yichʼojikix pʼijubtesel yuʼun ya x-ochik ta misionero. Te Biblia jaʼ te libro te ya stuuntesik te kʼalal ya yichʼik pʼijubtesele, jaʼ yuʼun ya yichʼxan yip schʼuunel yoʼtanik sok ya staik lekil taleliletik te ya xkoltayotik yuʼun te kʼalal ya staik wokolil ta scholel te skʼop Diose.

«Nopilanaik ta lek te bintik tʼujbil skʼoplale». Te machʼa la sjach te programa jaʼ te hermano Anthony Morris te ochem ta Jtsojb Jwolwanejetik yuʼun te stestigotak Jehová. Te sjajchibal te sdiscurso lokʼem ta Filipenses 4:8, Xchʼul Cʼop Dios ta Tzeltal, te jich ya yal «Jaʼ me xbajtʼ ta awoʼtanic snaʼulayel spisil te bila [...] ay yutsile».

Te hermano Morris la yalbey skʼoplal te bin ya skoltayotik yuʼun ma xchebaj koʼtantik ta swenta te bintik chopol ay ta balumilal ini, jaʼ te ya jnopilan ta koʼtantik te bintik ay yutsile, o te bin ya skoltayotik ta yakʼel ta ilel kʼuxul oʼtanile. Jaʼ yuʼun te hermano la yal: «Ilawilik ta lek te bintik ya xkʼot ta pasele sok leaik te bintik ay yutsile, jaʼnix jich te jaʼexe ayukme yutsil awoʼtanik».

Ta swenta-abi, jpisiltik ya skʼan ya stij koʼtantik skʼayinbeyel stalel te jTatik te ay ta chʼulchane, te machʼa maba jaʼ ya xbajtʼ ta yoʼtan yilel te jmultike (Salmo 130:3). Te hermano Morris la yakʼ te yan tsitsel ini: «Mame jaʼuk xbajtʼ ta awoʼtanik yilel te banti ya xchʼayik te ajoʼtakike, pasaik tulan ta yakʼel ta ilel kʼuxul oʼtanil yuʼun jich ya awichʼik kʼuxultayel-euk».

«Akʼa toyukxan te apʼijilike, jaʼukmeto mame kʼax tojuk xa-awakʼ abaik.» Jaʼ te discurso la skʼases te hermano Harold Corkern, te ochem ta Komite yuʼun Sucursal ta Estados Unidos, banti la yalbey skʼoplal te Eclesiastés 7:16. Te Diose ya skʼan te yakuk xtoy te jpʼijiltike, jaʼukmeto maba ya skʼan te «ya jtoy jbatik yuʼune».

Jaʼnix jich te hermano Corkern la yal te mukʼ skʼoplal te ya kakʼtik ta ilel kuxul oʼtanil te kʼalal ya kakʼtik tsitsele. Te Jehová ya snaʼ banti kʼalal ya xjuʼ kuʼuntik spasele, jaʼ yuʼun ma skʼan te ya jkʼanbeytik te bin ma xjuʼ yuʼunik spasel te kermanotaktike. Te hermano Corkern la yal: «Teme lek ya atuuntesik te spʼijil awoʼtanike, te bin anopojik sok te bin ya anaʼike, jichme ya awichʼik kʼuxultayel yuʼun te hermanoetike.»

«Mame xchʼay ta awoʼtanik te bin spasoj te Diose.» (Salmo 78:7.) Te hermano Guy Pierce, te jaʼnix jich ochem ta Jtsojb Jwolwanejetike, ta sjajchibal te sdiscurso la yal te kʼalal lek o maba lek stalel te jtul tut kereme ya yichʼ alel te yuʼun pajal stalel sok te smeʼ state (Proverbios 20:11). Jaʼnix jichotik-euk, teme lek te jtaleltike lek ya yichʼ albeyel skʼoplal te Jehová, te Dios kuʼuntik sok jTatik. «Hich ya xchicnaj machʼatic a te yal-snichʼnab Dios soc machʼatic a te yal-snichʼnab te pucuje: Spisil machʼa ma ba ya spas te bin toj ta pasel soc te ma cʼuxuc ya yaʼiy ta yoʼtan te yermano, ma yuʼunuc Dios stuquel.» (1 Juan 3:10.)

Te hermano Pierce la sjultesbey ta yoʼtan spisil te machʼatik kʼotik ta Pʼijubtesel yuʼun Galaad, te la yichʼik ikʼel ta swenta te lek stalelike, jich bitʼil te spekʼelil yoʼtanike, sok la yichʼik albeyel te manchuk ya schʼay yuʼunik te pekʼel oʼtanile. Te pʼijubtesel la yichʼike ma jaʼuk mukʼxan skʼoplal ya xkʼotik ta stojol te yantike, melel ta swenta bin la snopike ya xkoltaywanik yuʼun junuknax ya x-ayinik te kermanotaktik ta swolol Balumilal soknix te jaʼuk ya yakʼik ta ilel te pekʼel oʼtanile (Salmo 133:1). Te hermano Pierce la yal: «Ta ora ini la awichʼikix nojptesel ta lek bin-utʼil ta pasel: mame xa akom abaik ta snopelxan ta swenta Jehová sok naʼbeyaikxan sba ta lek».

«Jaʼnax la jpaskotik te bin ay ta jwentakotik spasel.» Te hermano William Samuelson, te machʼa ya yil te Pʼijubtesel ya yichʼ pasel ta Patterson, la sjojkʼoy: «¿Binwan yaʼiyel ya skʼan ya kaʼiy jbatik te kʼalal ya kichʼtik akʼbeyel jun aʼtelil te maba ya jmulantik ta lek spasele?». Akʼa kiltik te bin ya yakʼ ta nopel te kʼopetik te ay ta Lucas 17:7-10: «Teme la apasic spisil te bin halbotex, hich me yac awalic: Ma xtuhunotcotic ta aʼbatinel, ha nax la jpascotic te bin ay ta jcuentacotic spasel». Ta melel, teme ya jpaj jbatik sok te Kajwaltik Jehová, te joʼotike «Ma xtuunotik».

Te machʼatik la yichʼik pʼijubtesele, bayal semana la snop sjunik ta snail pʼijubtesel. Sok ay chaʼoxtul te machʼatik tulan la yaʼiyike. Jaʼukmeto te hermano Samuelson la yal: «Spisil la apasik te bin la skʼan la apasike, ta ora ini, te bitʼil la awilikix te bintik lekilal la ataik yuʼune, la yichʼxan yip te schʼuunel awoʼtanike.» Ta slajibal te sdiscurso jich la yal: «Te bitʼil jun koʼtantik ya kakʼ jbatik ta abatinel ta stojol te Kajwaltik te jaʼ yuʼun spisil te bintik ay ta chʼulchan sok ta Balumilal, jaʼukme jun mukʼul majtʼanil ya awilik te jaʼexe».

«Julukme ta awoʼtanik te bintik yaloj Jehová te kʼalal ya ataik tulan wokolile». Te hermano Sam Roberson, te ya xkoltaywan ta yilel te Pʼijubtesel ya yichʼ pasel ta Patterson, la yalbey te machʼatik la yichʼik pʼijubtesel te aynix ya xbajtʼ chebajuk yoʼtanike. Te kʼalal jich ya xkʼax ta stojolike la yalbey te yakuk snopbeyik skʼoplal te j-abatetik ta namey kʼinal te jamal albotik yuʼun Dios te ya yichʼik koltayel yuʼune. Jich bitʼil te Moisés jamal la yalbey te Josué: «Te Jehová [...] ya sjoquinat, ma ba ya yihquitayat soc ma ba ya spihtesat» (Deuteronomio 31:8). Te kʼalal nopol ya xlajix-a te Josué, jich la yal: «Ma ba chʼay ni jpʼahluc cʼop yuʼun spisil te lequil cʼopetic la yalbeyex te Jehová te Dios awuʼunique» (Josué 23:14).

Te Jehová jamal ya yalbey te j-abatetik yuʼun: «Ma jaymehl ya jpihtesat; mayuc bin ora ya quihquitayat» (Hebreos 13:5). Ya yal ta jamal te ya skʼotes ta pasel te bin ya skʼan ya yal te sbiile («Jaʼme jich ya xkʼoon te bin-utʼil ya jkʼane»), jich yuʼun te Jehová yame spas spisil te bintik ya skʼan yuʼun ya skoltay te j-abatetik yuʼune. Te hermano Roberson la yal chaʼoxpʼal kʼopetik te ya yakʼ mukʼul oʼtanile, jich la yal: «Mame xchebaj awoʼtanik, mame xlujbex, ma xa awakʼ abaik ta tsalel. Julukme ta awoʼtanik te ma jaymel sok maʼyuk bin-ora ya yijkʼitayex te Jehovae».

«Puhquem ta spahmal bahlumilal te cʼop yuʼunic.» (Romanos 10:18.) Te hermano Mark Noumair, jpʼijubteswanej yuʼun sKʼop Dios ta Galaad, jaʼ la skʼases jun parte te programa banti te machʼatik la yichʼik pʼijubtesel te talemik ta yantik nasion la scholik te bin lek kʼax yuʼunik ta scholel skʼop Dios ta nopol Patterson. Jich bitʼil jtul nujpunel te talemik ta Sudáfrica, tseʼelnax yoʼtanik yuʼun te la staik oxtul antsetik te pajal slumal soke, la skʼopon ta kʼopil zulú sok xhosa. Sok jtul nujpunel te talem Sri Lanka la sta jtul winik te ay slumal ta India, te yinam sok te yantsil nichʼane ayik ta nainel ta Sri Lanka. Te winike maʼyuk yiloj junuk buelta-a te Bibliae, jich yuʼun te nujpunel ini la yijkʼitaybeyik jpajkuk Biblia.

«Chapalik ta spasel spisil lekil aʼteliletik.» Te hermano Gene Smalley, te jaʼ jkoltaywanej yuʼun te Komite yuʼun Tsʼibajel, la snujpʼsitay chaʼtul te machʼatik nujpunemik te la spasik graduar. Te machʼatik talemik ta Sierra Leona la scholik te jujun kʼajkʼal ya slikik jaʼ kʼalal ta snaik. Jaʼukmeto te bitʼil staojik mukʼul majtʼanil ta swenta yakʼbeyel snopik Biblia 50 ta tul ants winiketik, la yalik te malaj jaʼuk jun wokolil ya yilik. Ta schanebalik la yalik wokol yuʼun te nojptesel la yichʼike, melel la yichʼik chajpanel ta «spasel spisil lekil aʼteliletik» ta pajel chaʼbej (2 Timoteo 3:16, 17).

«Kujchuk awuʼunik kʼalal ta slajibal sok ta patilxan bael.» Te hermano Gerrit Lösch te ochem ta Jtsojb Jwolwanejetik, ta sjajchibal te sdiscurso te mukʼ skʼoplal la schol ta swenta te machʼatik ya stsal sbaik ta animal ya sleik te bitʼil ya xjuʼ ya x-animajik yuʼun jich ya xkujch yuʼunik-a. Manchukme ta spisil te machʼatik ya stsal sbaik ta animale jtulnax te machʼa ya sta spremio, jaʼukmeto te machʼatik ya x-animajik ta swenta spasel te yaʼtel Diose, spisil ya sta spremioik te machʼatik ya xkujch yuʼunik kʼalal ta slajibal.

Te jchʼuunjel yuʼun Cristo, yame xkujch yuʼun teme maba ya skom sba ta spasbeyel yaʼtel te Diose, teme ma jaʼuk ya yakʼ xlajinbot smukʼul yoʼtan yuʼun te wokoliletik, nutsel, tsajel o te ay bin ya xkʼot ta pasel te ya yakʼ mel-oʼtane. Te Jesús jich la yal: «Te machʼa ya xcuhch yuʼun c’alal ta slajibal, ha me ya xcol stuquel» (Mateo 24:13). ¡Bayal ya yakʼ smukʼul koʼtantik te bitʼil ya jnaʼtik te Jehová sok te Jesús tseʼel yoʼtanik yuʼun te ya xkujch kuʼuntike! Ta patil, te hermano Lösch la yal chaʼoxchajp te bintik ya skoltayotik yuʼun ya xkujch kuʼuntik te wokoliletike. Akʼa kiltik chaʼoxchajpuk:

  • Te skʼoponel Dios, «te ya yacʼ te ya xcuhch cuʼuntic» sok te «jujun cʼahcʼal ya yichʼbotic quihcatstic» (Romanos 15:5; Salmo 68:19).

  • Junukme koʼtantik akʼa kakʼ jbatik, ya skʼan te ma schʼay ta koʼtantik te «stalel jun yoʼtan ta jtojoltic te Diose, ma ba ya yacʼ te yac awichʼic tsajel te ma xcuhch awuʼunic, ha pajal ya yacʼ soc te tsajel te bin utʼil ya xhuʼ ya xloqʼuex ta stojol te tsajel, scuenta yuʼun ya xcuhch awuʼunic a» (1 Corintios 10:13).

  • Ayukme ta koʼtantik te bin ya jmaliytik ta pajel chaʼbeje. Te bitʼil jaʼ ya jtʼunbeytik stalel te Jesuse, te Biblia jich ya yal ta stojol: «ha te machʼa la scʼases swocol ta [teʼ] yuʼun la sna’ te ya sta bayel yutsil yoʼtan ta patil» (Hebreos 12:2).

Te hermano Lösch la yal te mukʼ skʼoplal te ma skʼan ya xlujbotik, melel nopol ya xkʼootikix ta slajibal. «Junuc coʼtantic ac’a ahnumajucotic bahel te banti bahel yacotic.» (Hebreos 12:1.)

Kʼax tʼujbil te bitʼil laj te programae, melel ay jtul te machʼa la yichʼ pʼijubtesel la skʼopon jun karta ta komon sitil, te banti spisil te machʼatik la spasik graduar la yalik wokol yuʼun te lekil nojptesel te la yichʼike. Te karta la yal ta swenta te bitʼil chajpanbil ta lek te bitʼil la snopik te Bibliae, ma jaʼuknax kʼot ta yoʼtanik ta lek te bintik smakoj te skʼanojel ta yoʼtan te Diose, melel la yichʼxan yip te schʼuunel yoʼtanike. Te karta la yalxan: «La kakʼix ta koʼtantik spasel ta jkuxlejaltik spisil te bintik lek la jnoptike.»