Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Te Jtsojb Jwolwanejetik la yakʼbey smukʼul kʼinal yaʼiyik te stestigotak te Jehová ta Rusia sok ta Ucrania

Te Jtsojb Jwolwanejetik la yakʼbey smukʼul kʼinal yaʼiyik te stestigotak te Jehová ta Rusia sok ta Ucrania

«¡La kaʼiykotik te skʼuxul yoʼtanik ta jtojolkotike!» Jich la yal jtul ants te jaʼ slumal te Ucrania te kʼalal la yaʼiy stojol te la yichʼ kʼoponel jun karta te bayal skʼoplal yuʼun te Jtsojb Jwolwanejetik yuʼun te stestigotak te Jehová. Te Stephen Lett, te jaʼnix Jtsojb Jwolwanejetik, la skʼopon te karta ini te kʼalal la yulaʼtay te Ucrania ta slajibal semana yuʼun te 10 sok 11 yuʼun mayo ta 2014. Ayniwan 165,000 ta tul stestigotak te Jehová la yaʼiyik stojol ini.

La yichʼ kʼoponel te karta ini sok chaʼoxchajp discursoetik te lokʼem ta Biblia la yichʼ kʼasesel ta joʼchajp kʼopiletik soknix la yichʼ kʼasesel ta 1,100 sNail Tsoblejetik yuʼun te stestigotak te Jehová ta spamal kʼinal yuʼun Ucrania.

Jaʼnix te slajibal semana-abi, te Mark Sanderson, te jaʼnix Jtsojb Jwolwanejetik, la skʼopon te karta-abi te kʼalal la yulaʼtay te Rusia. Te programa la yichʼ kʼasesel ta chanlajunchajp kʼopiletik sok 180,413 ta tul stestigotak te Jehová ta kʼaxemto ta 2,500 congregacionetik ta Rusia sok Bielorrusia la yaʼiyik stojol ini.

Te karta yuʼun te Jtsojb Jwolwanejetik jaʼ la yichʼik albeyel te congregacionetik ta Rusia sok ta Ucrania. Te kermanotik Sanderson la skʼopon te karta ini ta kʼopil ruso, sok te Betel yuʼun te stestigotak te Jehová ta Rusia jich la stsʼibay: «Te bitʼil la yakʼ ta ilel ta spisil congregacionetik ta jlumalkotik te bayal jkʼoplaltik ta yoʼtan te Jtsojb Jwolwanejetik, la yakʼbey smukʼul kʼinal yaʼiyik te kermanotaktike. Jich la kaʼiykotik te bayal skʼuxul yoʼtanik ta jtojolkotike».

Te bin swentail te karta ini jaʼ te yakʼbeyel smukʼul yoʼtan sok yip yoʼtanik te stestigotak te Jehová ta nacionetik ini, melel jaʼ te banti bayal ya sjachik kʼop ta swenta te politicae. La yakʼbey smukʼul kʼinal yaʼiyik te kermanotaktik te yakuk schʼuunik te mantalil ya yal te Biblia ta swenta te manchuk ya xchʼik sbaik ta politicae (Juan 17:16).

Ta swenta-abi te Jtsojb Jwolwanejetik la sjultesbey ta yoʼtanik te kermanotaktik te bayal skʼoplal te skʼoponel Dios, te skʼoponel te Biblia sok te ya snopilan ta yoʼtanike, yuʼun jich jun yoʼtanik ta stojol-a te Jehovae. Soknix la yalbey te yakuk smukʼulin yoʼtanik ta swenta te bin ya yal te Dios ta Isaías 54:17 te jich ya yale: «Mayuc aʼtejibal yuʼun guerra te ya xhuʼ ya stsalat».

Ta slajibal te karta jich la yalxan: «Bayal kʼuxex ta koʼtankotik ta apisilik. Ya xjuʼ ya anaʼik te maʼyuk bin ora chʼayemex ta koʼtankotik sok te spisil ora ya jkʼoponkotik te Jehová ta atojolike».

Te Betel yuʼun te stestigotak te Jehová ta Ucrania jich la yal ta swenta te bitʼil la yichʼ ulaʼtayele: «Te kermanotaktik bayal stseʼel yoʼtanik ta swenta te skʼuxul yoʼtan te la yakʼ ta ilel te Jtsojb Jwolwanejetik ta stojolike. Te bitʼil la yulaʼtay te Rusia te kermanotik Sanderson ta slajibal semana-abi te bitʼilnix la yulaʼtay te Ucrania te kermanotik Lett, chiknaj ta ilel te yuʼunix junax ayik-a te lum yuʼun te Diose, soknix la yakʼ ta ilel te bayal kʼanbil te kermanotaktik yuʼun te Jehová sok te Jesús. Jich la kaʼiykotik ta jpisiltik te la yakʼbotik bayal yip koʼtankotik te ulaʼtayel ini. Ta ora ini ayix bayal yip koʼtankotik ta spasel te yaʼtel te Jehová sok ta sitintayel biluk wokolil te ya xtal ta jtojolkotike».

Naʼbeyaxan skʼoplal

¿Bin-yuʼun te maba ya schʼik sbaik ta política te stestigotak te Jehovae?

¿Yuʼunbal ya skʼan ya yal te ya jkʼan jachkotik kʼop te bitʼil maba ya jchʼikbakotik ta politicae?