Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Te Graduasion yuʼun te Pʼijubtesel yuʼun sKʼop Dios ta Galaad 138

Te Graduasion yuʼun te Pʼijubtesel yuʼun sKʼop Dios ta Galaad 138

Ta sábado 14 yuʼun marzo 2015, te Pʼijubtesel yuʼun sKʼop Dios ta Galaad 138 yuʼun te Watchtower, la yichʼ pasel ta banti snail pʼijubtesel yuʼun stestigotak Jehová te ay ta Patterson (Nueva York). Te programa la yilik kʼaxem ta 14,000 ta tul ants winiketik, tey ochem-euk-a te machʼatik la yilik ta video ta yantik lugar. Te kʼalal jtebxanix skʼan xjajch-a te programa, la yichʼ tijel skʼinul chaneb yachʼil kʼayojiletik soknix la skʼayojtayik ta patil. *

Te hermano Geoffrey Jackson, te ochem ta Jtsojb Jwolwanejetik yuʼun te stestigotak Jehová, jaʼ la sjach te programa. Te bin la yal ta sjajchibale, jaʼ te la yakʼbey smukʼul yoʼtan te machʼatik la yichʼik pʼijubtesel te manchuk stukel ya stuuntesik te pʼijubtesel la yichʼike, melel ya skʼan te yakuk stuuntesik ta swenta skoltayel te yantike (2 Timoteo 2:2).

Te hermano Jackson la yalbey skʼoplal te bin la spas te Moisés. Bayal jaʼbil la yichʼik ta mukʼ Jehová ta Nailpakʼ yuʼun te j-alwanej ini. Jaʼukmeto kʼalal juʼ ta pasel te Nailpakʼ templo, tey la yichʼikix ta mukʼ-a te Jehovae. Te Moisese maniwan la yichʼ akʼel ochel ta yutil te Nailpakʼ templo te ya yichʼ naʼbeyel sba jich bitʼil Mero Chʼul Awilal, melel jaʼnax ya xjuʼ ya x-och tey-a te mukʼul sacerdotee. Ta swenta-abi, maʼyuk banti ya yal ta Biblia te bitʼil ma la smulan te Moisese. Jun yoʼtan la skoltay te Aarón te bitʼil jaʼ ay ta swenta te aʼtelil yuʼun te mukʼul sacerdotee (Éxodo 33:7-11; 40:34,35). ¿Bin ya yakʼ jnoptik te stalele? Te hermano Jackson jaʼnix la yakʼbey la sujtib: «Bayalukme skʼoplal ta awoʼtanik te aʼtelil awuʼunike, jaʼukmeto mame xa-akuyik te atukel awuʼunike».

«¿Yabal xiwex ta swentanax te bitʼil ya stij sba te yaʼbenal teʼe?» Jich sbiil te sdiscurso te hermano Kenneth Flodin, te jaʼ jkoltaywanej yuʼun te Komite yuʼun Pʼijubtesel yuʼun te jtsob Jwolwanejetik. La yalbey te machʼatik la yichʼik pʼijubtesel te ayniwan ya xbajtʼ staik tulan wokolil, jich bin-utʼil te nutsel o aʼtelil te tulan ta pasele. Jaʼ yuʼun la stuuntes te kʼop te ya xchiknaj ta Levítico 26:36 yuʼun jich ya yichʼik albeyel te yakuk yilik te wokolil te bitʼil takin yaʼbenal teʼ, te manchuk jich ya yilik te bitʼil tulan wokolil te ma xjuʼ ta sitintayele. Ta patil la yalbey mukʼ skʼoplal te bin lek la spas te jpuk-kʼop Pablo, ta swenta te bitʼil la yakʼ smukʼul yoʼtan ta stojol Diose, koltayot ta stsʼikel bayal wokoliletik (2 Corintios 1:8, 10).

«¿Bin-a te ya aleike?» Te Mark Sanderson, te ochem ta Jtsojb Jwolwanejetik, kʼopoj ta stojol te machʼatik kʼotik ta tsoblej ini. La yalbey skʼoplal te bin ya yal te Proverbios 13:12 te jich ya yale: «Teme ma xtal te bin ay ta mahliyel, ya xwocolij oʼtanil yuʼun». Ta kʼajkʼal ini, bayal machʼatik chebajem yoʼtanik melel ma staojik te mukʼ skʼoplalik ta stojol ants winiketik sok te kʼulejalil te spasojik tulan ta sleele.

Ta skʼajkʼalel te Jesús, ay chaʼoxtul ants winiketik yan-a te bin snopojik ta swenta te bin la spas te Juan J-akʼ-ichʼjaʼe (Lucas 7:24-28). Jich bitʼil ay chaʼoxtul smaliyojik-a te ya xtal jich bitʼil jtul jpʼijubteswanej te ya yikʼbey yoʼtan te ants winiketik ta swenta te bintik kʼax chujkʼul ta nopele. Teme jich la skuyik-abi, kʼax chebaj yoʼtanik melel te Juan jaʼ la yakʼ ta nopel te bin smelelil tsʼibaybil ta sJun Diose. Ay yantik te laniwan skuyik te kʼax lekil pakʼ ya slape, jaʼukmeto jich la slap skʼuʼ spakʼ te bitʼil meʼbae. Yan te machʼatik smaliyojik jtul j-alwanej maba chebaj yoʼtanik stukel, melel te Juane jaʼ jtul j-alwanej te kʼax mukʼ skʼoplale, jaʼ la schajpan te be te kʼalal jul te Jesuse (Juan 1:29).

Ta swenta te bin ya yakʼ jnoptik ini, te hermano Sanderson la yalbey te machʼatik la yichʼik pʼijubtesel te manchuk kʼejelukto ya xbajtʼ te spensarike. Te manchuk jaʼuk ya xbajtʼ ta yoʼtanik te mukʼ skʼoplalike sok te ya skʼanik te kʼax lek ya yichʼik ilel te banti ya yichʼik tikunele, yame skʼan ya stuuntesik te bintik la snopik ta skoltayel te hermanoetik, yakʼbeyel yil te bintik la snopik ta Galaad, yakʼbeyel yip schʼuunel yoʼtanik sok yakʼbeyel yil te skʼuxul yoʼtanike. Te hermano Sanderson la yal: «Akʼa abaik ta abatinel ta stojol te hermanoetik sok spekʼelil awoʼtanik, pasaik tulan ta spasel te skʼanojel yoʼtan Jehová, jich maʼyuk bin-ora ya xchebaj awoʼtanik».

«¿Yabal awakʼbeyik sweʼel te machʼatik ayik ta wiʼnale?» Jich sbiil te sdiscurso te hermano James Cauthon te jpʼijubteswanej yuʼun te Pʼijubtesel ya yichʼ pasel ta Patterson. Te hermano Cauthon mukʼ skʼoplal la yal te bitʼil ya jkʼantik te kʼuxuk ya kichʼtik aʼiyele sok te ayuk jkʼoplaltik ta yoʼtan te yantike. Te Jesús jichnix la skʼan-euk, jaʼ yuʼun te Jehová la yakʼbey te kʼalal la stuuntes utsil kʼopetik ta yorail te la yichʼ jaʼe (Mateo 3:16, 17).

Te Jehová ta jujuntul yakʼojbotik te majtʼanil yuʼun te yakʼel mukʼul oʼtanil sok yip-oʼtanil ta swenta te jkʼoptike, sok ya skʼan te yakuk jtuuntestike (Proverbios 3:27). Te hermano Cauthon la yal: «Pasaik tulan ta sleel te bintik lek ya spasik te yantike sok albeyaik te lekil talelil ay yuʼunike». Teme ya awalbeyik utsil kʼopetik te kermanotaktike jichme ya snaʼik-a te bayal skʼoplal te bintik ya spasike.

«Pasaik jaʼto te banti kʼalal ya xjuʼ awuʼunike.» Te hermano Mark Noumair jtul jkoltaywanej ta Komite yuʼun Pʼijubtesel jaʼ la skʼases te yan discurso ini. La yalbey skʼoplal ta swenta te bitʼil la slokʼes sba ta yoʼtan te jpuk-kʼop Pablo, yuʼun ya yakʼbey smukʼul yoʼtan-a te machʼatik la yichʼik pʼijubtesel te manchuk jaʼnax ya spasik te bin ya xjuʼ yuʼunik spasele. Jich bitʼil te jpuk-kʼop Pabloe, ya staik tseʼel-oʼtanil te kʼalal ya skoltayik te yantik jaʼto te banti kʼalal ya xjuʼ yuʼunike (Filipenses 2:17, 18).

Te jpuk-kʼop Pablo maʼyuk bin-ora tsalot yuʼun te wokolil la stae. La spas tulan jaʼto te banti kʼalal juʼ yuʼun kʼalal ta slajibal skuxlejal, jaʼ yuʼun jich la yal: «La jcaʼbeyix te lequil tsaltamba, huʼix cuʼun te ahnimal» (2 Timoteo 4:6, 7). Te hermano Noumair la yakʼbey smukʼul yoʼtan te machʼatik la yichʼik pʼijubtesel te yakuk skʼayinbeyik stalel te jpuk-kʼop Pablo te kʼalal ya scholik te skʼop Dios te banti ya yichʼik tikunele.

Te bintik lek kʼax yuʼunik ta scholel skʼop Dios. Te hermano Michael Burnett, jpʼijubteswanej yuʼun sKʼop Dios ta Galaad, jaʼ la skʼases te yan discurso ini, te banti la yakʼik ta ilel chaʼoxtul te bin kʼax yuʼunik ta scholel skʼop Dios ta Patterson.

Bayal bintik lek lokʼ yuʼunik-a te bitʼil chapal la yakʼ sbaik ta scholel skʼop Dios ta bayuke, sok te chapal ayik ta yakʼel ta nopel te bin ya yal te Biblia ta stojol te ants winiketik te ya xkʼopojik ta sbatsʼil kʼopike. Jich bitʼil ay jtul te machʼa la yichʼ pʼijubtesel la sna te ya xkʼopojik ta español te banti ya xbajtʼ schol kʼop Diose. Jaʼ yuʼun kʼalal mato xbajtʼ-ae la snop chaʼoxmajkʼ kʼopetik ta kʼopil-abi sok te aplicación JW Language. Ta kʼajkʼal abi, la skʼopon jtul winik te la snaʼbey sba tey ta kaye sok te bin jtebnax snopoje. Ta ora ini te winik sok chantul te machʼatik ay yuʼune, yakik ta snopel te Bibliae.

Nujpʼsitayel. Ta patil te hermano William Turner te jaʼ jkoltaywanej ta Komite yuʼun Scholel skʼop Dios yuʼun Jtsojb Jwolwanejetik, la snujpʼsitay chantul te machʼatik la yichʼik pʼijubtesele. La yichʼik jojkʼoybeyel te bin kʼax yuʼunik kʼalal mato xkʼotik ta Galaad sok te bin kʼax yuʼunik ta swenta te pʼijubtesel la yichʼike.

Te machʼatik la yichʼik nujpʼsitayele, la yalbeyik skʼoplal chaʼoxchajp te lekilal la staike. Jich bitʼil ay jtul la yalbey skʼoplal te bin bayal la snop ta swenta te kapitulo 10 yuʼun te Lucas. Te 70 ta tul jnopojeletik yuʼun te Jesús te la stikun bael ta scholel skʼop Diose, tseʼelnax yoʼtan sujtik talel ta swenta te bin lek lokʼ yuʼunike. Manchukme te Jesús akʼbot stseʼelil yoʼtan-euk, la yalbey te jnopojeletik yuʼun te manchuk jaʼnax tseʼel yoʼtanik yuʼun te bin lek ya staike, te jaʼuk tseʼel yoʼtanik yuʼun te lek ya yil Dios te tulan aʼtel la spasike. Jaʼ ini ya yakʼ jnaʼtik te smelelil sbujtsʼ kʼinale, maba ya jtatik kʼalal ay bin lek ya xlokʼ kuʼuntik, melel jaʼ ta swenta te lekuk ya kichʼtik ilel yuʼun te Jehovae.

Te hermano Turner la yalbey te machʼatik la yichʼik pʼijubtesel te bin ya yal te Filipenses 1:6 sok la yal ta jamal bitʼil te Jehová sjachojix jun lekil aʼtelil ta stojolik sok te yananix spasik bael-ae.

«Akʼa asitik ta stojol Jehová.» Te hermano Samuel Herd, te ochem ta Jtsojb Jwolwanejetik, la skʼases te discurso te mukʼxan skʼoplale. Ta discurso ini la yalbey skʼoplal te bin-utʼil ya xjuʼ ya kakʼ jsitik ta stojol Jehová manchukme maba ya xjuʼ ya kiltik.

Te bin-utʼil ya xjuʼ ya jpastike jaʼ te kʼalal ya kiltik spisil te bintik spasoje, jich bayal bin ya xjuʼ ya jnoptik ta stojol. Jaʼnix jich sjamojbotik koʼtantik te Jehovae (Efesios 1:18). Kʼalal bayalxan ya jkʼopontik te Bibliae, bayal bin ya jnoptik ta swenta te Jehovae. Soknix te kʼalal bayal ya jnoptikxan ta swenta te Jehová, ya xnoptsajotikxan ta stojol.

Te bin mukʼ skʼoplale jaʼ te ya skʼan ya kiltik ta lek te schanebal Evangelio, melel te skʼop Jesús sok te bintik la spase, ya yakʼ kiltik te bin yilel stalel te Diose. Te Jesuse la yakʼ te ilel ta lek te stalel Jehovae, jich yuʼun la yal: «Te machʼa yilojonix, ha nix yilojix te Tatile» (Juan 14:9).

Te hermano Herd la yalbey spisil te machʼatik kʼotik ta tsoblej ini te manchuk jaʼnax ya yilik te Jehová ta swenta te bin la spas te Jesuse, melel ya skʼan te ya jtʼunbeytik te bin la spase. Jich bin-utʼil te Jesús la spas tulan ta smakʼlinel te yantik ants winiketike, te joʼotike ya skʼan te ya jpastik tulan ta smakʼlinel kʼoem te yantik ta swenta te skʼop Diose.

Te kʼalal jich ya kakʼ jsitik ta stojol te Jehovae jich ya xjuʼ ya kaltik te bin-utʼil la yal te machʼa la stsʼibay te salmo ini: «Spisil ora nahil cacʼoj ta jtojol te Jehová; te bin utʼil ay ta jwaʼel, ma ba ya xyucʼoton» (Salmo 16:8).

Slajibal. Te kʼalal la yichʼik akʼbeyel te sdiplomaik, ay jtul te machʼa la yichʼ pʼijubtesel te la skʼopon jun karta ta komon sitil ta swenta yalel wokol. Te hermano Jackson la yalbey te machʼatik la yichʼik pʼijubtesel te manchuk ya skuyik te spisil yachʼil sok te kʼax chujkʼul ta naʼel te bin ya yakʼik ta nopele, melel te hermanoetike snopojikix-euk. Te hermano Jackson jaʼnix jich la yal te mukʼ skʼoplal te ya yakʼik ta ilel pekʼel-oʼtanil. Mame jaʼuk te jaʼnax ya yalbey sba skʼoplalik sok te ya yalbeyik skʼoplal te bin la snopik ta Galaad, ya skʼan te mukʼ skʼoplal ya yilik te Biblia sok te junetik te lokʼemik ta Biblia. Sok ya skʼan te maba ya xchebajtesbey yoʼtanik te hermanoetik te maniwan ayuk bin-ora ya xbajtʼik ta Galaad, ya skʼan ya skoltayik ta stuuntesel ta lek spisil te junetik ay yuʼunik ta swenta snopel te skʼop Diose. Kʼalal laj te tsobleje, spisilik te machʼa kʼotik tey-ae, tseʼelnax yoʼtan la yaʼiy sbaik sok la yakʼ ta yoʼtanik te ya skoltayik te yermanotakike.

^ párr. 2 Te machʼatik kʼotik ta programa la yichʼik akʼbeyel te yachʼil kʼayojil ta semana-abi.

^ párr. 32 Ma spisiluk liʼ ay sbiil te nasionetike.

Naʼbeyaxan skʼoplal

¿Bintik smakoj te aʼtelil yuʼun misioneroe?

¿Bintik smakoj te ya slokʼes sba ta yoʼtanike? ¿Bintik chajpambil yuʼun ya yichʼik pʼijubtesel ta lek?