Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Yulaʼtayel te bintik kʼoem tal ta pasele

Yulaʼtayel te bintik kʼoem tal ta pasele

Jaʼto tal ta octubre yuʼun 2012, te machʼatik ya yulaʼtayik te banti ya yichʼ ilel yaʼtel te stestigotak Jehová ta Brooklyn (Nueva York), ya smulanik yilel te bintik yachʼil ya yichʼ akʼel ta ilel tey-ae. * Te bintik ya yichʼ ilele, tey ya xchiknaj-a te wokoliletik, te bintik tulan la staik sok te bintik juʼ yuʼunik spasel te machʼatik la spasik tulan ta schʼuunel te Diose soknix te bintik spasojik tal te stestigotak Jehová.

Te bintik ya yichʼ ilel tey-ae xatbil ta chanchajp te ya yakʼ ta ilel ta yilojibal ajtal te ya xjajch tal ta yaʼbilal 33 jaʼto ta jkʼajkʼaleltik. Te stituloil te jujunchajpe lokʼesbil tal ta Biblia sok ya xjajch sok jmajkʼ video ta inglés te yichʼoj subtitulo ta wakchajp kʼopil jich bitʼil coreano, español, francés, italiano, japonés sok portugués.

Te bin chanchajp ya yichʼ ilele

Te stituloil te sbabiale jich ya yal: «Te ants winiketik jaʼ bayalxan la smulanik te ijkʼal kʼinale», lokʼem skʼoplal ta sjun Juan 3:19 te jaʼ jich la yal te Jesuse. Albil jilel ta Biblia te ya xchiknaj chopol winiketik te «ya yaqʼuic ta nopel lotil cʼopetic» ta swenta sloʼlayel te ants winiketike (Hechos 20:30). Tey ta yilojibal ajtal ay bintik jamal ya yakʼ ta ilel ta swenta te bintik chopol la spas te winiketik-abi.

Te stituloil te schebale jich ya yal: «Sakubuk kʼinal te banti ay ijkʼal kʼinale», lokʼem skʼoplal ta 2 Corintios 4:6. Ta swenta-abi, te yilojibal ajtal ya yalbotik te smakojbey skʼoplal ta nopol yaʼbilal 1879 jaʼto kʼalal ta 1914 kʼalal mato xjajch-a te sbabial guerra kʼax ta swolol Balumilal. Jaʼnix jich tey ya xchiknaj skʼoplalik-a te jtsojb winiketik te kaj yilik te bin-nix ya yal-a te Bibliae, ma jaʼuk te snopjibal yuʼunike. Jaʼnix jich ya scholbotik te bin-utʼil bayal la snaʼbeyik swentail te smelelil kʼope sok te bitʼil kaj ta moel te yajtalul te machʼatik la snopik te Bibliae.

Jaʼnix tey ya xchiknaj-a te «Foto-Drama de la Creación» jaʼ jun pelikula te bayal la yichʼ mulanele. Ta 1914 te machʼatik la snopik te Bibliae te jich sbiilik-a te stestigotak Jehovae, la yakʼik ta ilel te lokʼombaetik te bontiklanbil ta sba cristal te pajal la yichʼ tijel sok grabasionetik, jaʼnix jich la yakʼik ta ilel pelikulaetik. Te jaʼbil tal ta patile bayal miyon ta tul ants winiketik bajtʼ yilik. Teynix-abi ya yichʼ ilel chaʼoxchajp lokʼombaetik te la yichʼ tuuntesel ta nameye sok kʼaxem ta quinientos lokʼombaetik te bontiklanbil ta sba cristal te yanyantik sbonile, jaʼnix jich ay jun video te ya yalbey skʼoplal te bintik ya yichʼ ilele.

Te yoxebale jich ya yal: «Te dragón bayal ilin», lokʼem skʼoplal ta sjun Apocalipsis 12:17. Tey ya yalbey skʼoplal-a te bin-utʼil la yichʼik utsʼinel bayal ta tul jchʼuunjeletik ta yaʼbilal bael 1950 sok ya scholbey skʼoplal te maba la yakʼik koltayel ta yorail-a te guerra. Ay jun video ta swenta te Remigio Cuminetti, jaʼ jtul testigo yuʼun Jehová te maba la skʼan la slap te kʼuʼul yuʼun te soldadoetik yuʼun Italia swenta ya xbajtʼ ta sbabial guerra te kʼax ta swolol Balumilale. Ay yan video te ya yalbey skʼoplal ta swenta te hermano Alois Moser te jaʼ slumal Australia ta skaj te maba la skʼan la yal te spatjibal oʼtanil te jich ya yichʼ alele «¡Heil Hitler!», la yichʼ tenel lokʼel ta yaʼtel sok la yichʼ chukel ta lum Dachau.

La yichʼ pasel jich bitʼil jun chukjibal te banti la yichʼ akʼel fotoetik yuʼun stestigotak Jehová te la yichʼik chukel ta swenta te schʼuunel yoʼtanik tey ta Grecia, Japón, Polonia sok Serbia.

Te schanebale jich ya yal: «Lek yachʼil kʼop ta stojol spisil nasionetik», lokʼem skʼoplal ta sjun Mateo 24:14. Tey ya xchiknaj ta ilel-a te aʼtelil yakik ta spasel te stestigotak Jehová jaʼto tal ta yaʼbilal 1950 kʼalal ta ora ini. Tsobol ta chajp fotoetik ya yakʼ ta ilel te ay oxchajp te bin mukʼ skʼoplal yakik ta spasel te stestigotak Jehová jich bitʼil te oranax toy te yajtalule, te ma xkomik ta scholel te skʼop Diose sok te bitʼil talel kʼaxel kʼux ya yaʼiy sbaike.

Te kʼalal mato xlokʼik bael-a te j-ulaʼtaywanejetike ya xjuʼ ya yilik ta pantaya te ya yichʼ pikel te banti ya yakʼ ta ilel te Casa Bíblica sok te Tabernáculo de Brooklyn te jich sbiilik-a te naetik ta namey te ayix cien jaʼbil la yichʼ tuuntesel te banti aʼtejik te hermanoetike.

¿Bin yuʼun la yichʼ pasel te bintik ya yichʼ akʼel ta ilele?

Jalaj jun jaʼbil te la yichʼ nopel te bitʼil ya yichʼ pasel-abi sok la skʼanxan bayal tiempo yuʼun la yichʼ chajpanel ta lek. Ay chaʼoxtul testigoetik yuʼun Jehová ta swolol Balumilal la stikunik bael te sbilukik te namey skʼejojikixe yuʼun ya yichʼ akʼel ta ilel.

¿Bin yuʼun te la yichʼ pasel bayal aʼtelile? Te kʼalal la yichʼ jojkʼoybeyel jtul hermano te ochem ta Jtsob Jwolwanejetik yuʼun te stestigotak Jehová te bin yuʼun bayal skʼoplal te Testigoetik ya skʼan ya yulaʼtayik te bintik akʼbil ta ilele, te hermano jich la yal: «Ma xjuʼ ya anaʼ te banti ya xbaat, teme maba anaʼoj te banti talemate».

^ párr. 2 Ya xjuʼ xkʼot spisil ants winiketik ta lunes kʼalal ta viernes ta waxakeb ora ta sab kʼalal ta joʼeb ora mal kʼajkʼal ta numero 27, kaye yuʼun Columbia Heights. Maba tojbil te ochibale.