Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Yame kikʼatkotik ta yulaʼtayel te Betel yuʼun te stestigotak te Jehová ta Estados Unidos

Yame kikʼatkotik ta yulaʼtayel te Betel yuʼun te stestigotak te Jehová ta Estados Unidos

«¡Yato xjul ta koʼtankotik te kʼalal la kulaʼtaykotik te Betel! ¡Maʼyuk bin ora ya xbajtʼ chʼayuk ta koʼtankotik!» Jaʼ ini jich la yalik te jun familia te nainemik ta Vanuatu te kʼalal la yulaʼtayik te Betel yuʼun te stestigotak te Jehová ta Estados Unidos. Jichnix ya yalik-euk te kʼaxemto ta 70,000 ta tul ants winiketik te ya yulaʼtayik ta jujun jaʼbile.

¿Aybal awulaʼtayojix te oxchajp Betel te ay ta Estados Unidos? Teme maʼuke yame kikʼatkotik yuʼun ya awulaʼtay.

¿Bin ya xjuʼ ya yichʼ ilel tey-a ta jujunchajp te Betel ini?

Te banti ya yichʼ ilel spisil te aʼtelil yuʼun te stestigotak te Jehová ta swolol Balumilal ta Brooklyn (Nueva York). Te kʼalal ya awulaʼtay ya xjuʼ ya anop ta swenta te bitʼil ya yichʼ chajpanel soknix te bitʼil ya yichʼ pasel te aʼtelil yuʼun scholel te lek yachʼil kʼop ta swolol Balumilal. Jaʼnix jich ay bin cheb ya yichʼ cholbeyel skʼoplal tey-a. Te sbabiale jich sbiil: «Ants winiketik te yichʼojbeyik sbiil te Jehová», jaʼ ini ya scholbey skʼoplal ta swenta te j-abatetik yuʼun te Jehová ta sbabial siglo kʼalalto ta kʼajkʼal ini. Te schebale jich sbiil: «Te Biblia sok te sbiil te Diose», tey ini ya xjuʼ ya awil chaʼoxchajp Bibliaetik te yichʼojbey sbiil te Dios te jaʼ te Jehová.

Te banti ya yichʼ akʼel pʼijubtesel yuʼun skʼop Dios ta Patterson (Nueva York). Naʼbeya sba te chaʼoxchajp pʼijubtesel te ya yichʼ akʼel tey ini, jich bitʼil te Pʼijubtesel yuʼun sKʼop Dios ta Galaad yuʼun te Watchtower soknix te Pʼijubtesel ta swenta Comiteetik yuʼun Betel sok Yinamik. Jaʼnix jich ya xjuʼ ya awil te aʼtelil ya spasik ta Departamento yuʼun spasel Lokʼombaetik, Departamento yuʼun Schajpanel Kʼopetik ta swenta Legal, Departamento yuʼun Servicio sok ta Departamento yuʼun Grabación.

Te imprenta sok te Departamento yuʼun stikunel biluketik ta Wallkill, (Nueva York). Te kʼalal ya awulaʼtay ya xjuʼ ya awil te bitʼil ya yichʼ pasel imprimir, te bitʼil ya yichʼ pasel libroetik sok te bitʼil ya yichʼ tikunel Bibliaetik sok junetik sok yantik te bintik lokʼem ta Biblia ta congregacionetik yuʼun Estados Unidos, ta Caribe sok yantikxan nacionetik.

¿Jayeb hora ya xjalaj te yulaʼtayel te Beteletik ini?

Te yulaʼtayel te Betel ta Brooklyn, jteb ma sta jun hora, ta Patterson, jteb ma sta cheb hora, sok ta Wallkill, jteb ma sta jun hora sok olil.

¿Machʼatik ya scholbeyik skʼoplal te bintik ya yichʼ ilel ta Betel?

Jaʼiknix te machʼatik ya x-aʼtejik ta Betel ya scholbeyik skʼoplal te bintik ya yichʼ ilel tey-ae. Te kʼalal jich ya spasike jich ya yaʼiy sbaik te yakik ta skoltayel-euk te scholel skʼop Dios te ya spasik te stestigotak te Jehovae. Ta mayo yuʼun 2014, kʼaxemto ta 5,000 ta tul ants winiketik yakik ta aʼtel ta yoxebal te Beteletik, sok kʼaxemto ta 3,600 ta tul te la yichʼik nojptesel te bitʼil ya skʼan cholbeyel skʼoplal te bintik ya yichʼ ilel tey-ae. Jteb ma sta 40 kʼopiletik ya yichʼ cholbeyel skʼoplal.

¿Jayeb stojol te kʼalal ay machʼa ya scholbat awaʼiy te bintik ya yichʼ ilel tey-ae?

Maba tojbil.

¿Jaʼnaxbal ya xjuʼ ya yulaʼtayik Betel te machʼatik stestigotak te Jehovae?

Maʼuk. Bayal machʼatik te maba stestigotak te Jehová ya yulaʼtayik te Betel. Manchukme maba testigoat yuʼun Jehová teme ya awulaʼtay te Betel ya xjuʼ ya xkʼot ta awoʼtan ta lek te bin swentail te aʼtelil ya yichʼ pasel tey-ae, te jaʼ ta swenta skoltayel te scholel skʼop Dios te spasik te stestigotak te Jehová ta swolol Balumilal.

Jtul ants musulmán te ay slumal ta India la yulaʼtay te Betel ta Patterson, jich la yal te kʼalal la yichʼ cholbeyel yaʼiy te bintik ya yichʼ pasel tey-ae: «Ya jmulan te yakuk x-aʼtejon tey ini. Ya kalbeyex wokol yuʼun te leknax la awilonike».

Yak. Te yulaʼtayel te Beteletik ini, bayal ya xkoltayotik yuʼun te alaletike. Jtul ulaʼtaywanej te John sbiil te ay slumal ta Estados Unidos jich la stsʼibay: «Jaʼtonix-a te kʼalal sujtonkotik bael ta jnae maba skomoj sbaik te alaletik ta yalbeyel skʼoplal te bintik la yilik tey-ae. Te kʼalal mato jkulaʼtaykotik-a te Betel, maba snaʼojik ta lek-a te bintik aʼtelil ya yichʼ pasel tey-ae. Jaʼukmeto yalaj skʼan ya x-aʼtejik ta Betel te kʼalal ya xmukʼubike.

¿Yabal xjuʼ ya kulaʼtaytik te Beteletik te ayik ta yantik nacionetike?

Yak. Ya xjuʼ ta ulaʼtayel te Beteletik te ay ta yantik nacionetik. Swenta ya xjuʼ ya anaʼ te banti xjil te Beteletik, baan te banti ya yal «Yulaʼtayel te Beteletik». Yame kikʼatkotik ta yulaʼtayel biluk Beteletik.

Naʼbeyaxan skʼoplal

¿Bintik ya yichʼ pasel ta Betel?

Tseʼelme koʼtantik yuʼun te jayeb machʼatik ya skʼan ya xtalik ta yilel te Betel. ¡Yame kikʼex te yakuk achapik te ya xtalexe!