Ochan ta banti te bintik yichʼoje

Ochan ta banti bintik jujunchajp yichʼoje

sTestigotak te Jehová

tseltal

Ulaʼtayel te maʼyuk bin-ora ya xchʼay ta oʼtanil

Ulaʼtayel te maʼyuk bin-ora ya xchʼay ta oʼtanil

Ta jujun jaʼbil, bayal mil ta tul ants winiketik ya yulaʼtayik te mukʼul naetik te banti ta yichʼ ilel te yaʼtel te stestigotak te Jehová sok te na Betel yuʼunik ta Estados Unidos te ay ta estado yuʼun Nueva York. Te mukʼul naetik-abi jaʼnix jich sbiilinej Betel jaʼ jpʼal kʼop te talem ta hebreo kʼop te ya skʼan ya yal «sNa Dios». Ay nopol talemik te machʼatik ya xtalik ta ulaʼtaywaneje, jaʼukmeto ay yantik te kʼax namal ya xtalike. Ya skʼan ya yilik te bin-utʼil ya yichʼ pasel te junetike sok te bin-utʼil chajpanbil te aʼtelil ya yichʼ pasele o ta yulaʼtayel yamigotakik te yakik ta aʼtel tey-ae. Mato ayuk bayal tiempo te ay machʼa sok spisil yoʼtan la skʼan tal ta ulaʼtaywaneje.

Te hermano Marcellus jaʼ jtul testigo yuʼun Jehová te ay ta nainel ta Anchorage (Alaska, Estados Unidos) te ma xjuʼ ya xkʼopoj ta lek ta swenta te bitʼil ayix tal cheʼoxeb jaʼbil te kom jtsʼinuk ta aʼtel te sjole, jaʼ utsʼinot yuʼun-abi, jaʼ yuʼun jkʼaxel ma xjuʼ ya stejkʼanix sba te jich ay ta silla de ruedas. * Jaʼ yuʼun te ya skʼan koltayel ta swenta te bintik ya skʼan pasel ta jujun kʼajkʼale. Manchukme ay ta wokol, jaʼukmeto yoʼtanuk ya xbajtʼ ta yulaʼtayel te na Betel. Kʼot ta pasel jich te bitʼil skʼanoje.

Maba la skom sba ta sjojkʼoyel, xchi te Corey jaʼ yamigo te hermano Marcellus te machʼa la skoltay ta schajpanel te bitʼil ya xbajtʼik ta ulaʼtaywaneje. Ta jujun kʼajkʼal la skʼoponon ta teléfono swenta ya kakʼbey snaʼ te bitʼil yak ta bael te bintik yakotik ta schajpanel-ae. Jich yuʼun la jpasbey jojkʼoyeletik swenta ya jnaʼ-a te bin ya skʼane, melel jaʼnax ya xjuʼ ya yal “yak” o “maʼuk”. Te bitʼil kʼopojike jich yaʼiyel ini:

—¿Yabal akʼan te xbajtʼ kilat ta anae?

—Maʼuk.

—¿Yabal akʼan te ya jkʼopon bael te doctore?

—Maʼuk.

—¿Yabal akʼan ya anaʼ stojol te bitʼil yak ta bael te bitʼil ya xbootik ta Betele?

—Yak.

«Jaʼ yorail-a te ya jcholbey yaʼiy te bitʼil yak ta bael te bin yakotik schajpanel-ae, xchi te Corey. Kʼaxto la yakʼbon sbujtsʼ koʼtan yuʼun te bitʼil kʼot ta spasel te bin ya skʼan yoʼtane.»

Te hermano Marcellus bayal la sitintay wokoliletik, melel maʼyuk bayal te bitʼil ya sta te takʼine. Jich yuʼun cheb jaʼbil la stsob te stakʼin swenta jich juʼ yuʼun stojel-a te spasaje te ayniwan 5,400 kilómetro (3.400 millas) kʼalal ta Nueva York. Jich bitʼil te ay ta chamel te hermano Marcellus la sle te machʼa jokinot bael swenta ya xkoltayot yuʼun. Ta patil la skʼanbey permiso te doctor swenta ya xjuʼ ya xbajtʼ te banti ya skʼane, la yichʼ akʼbeyel te permiso te kʼalal junchebxan kʼajkʼal ya skʼan ya xlokʼ bael-a te avione.

Te kʼalal ayix ta Nueva York-a te hermano Marcellus kʼaxto bayal la smulan te yulaʼtayel te mukʼul naetik te Brooklyn, Patterson sok ta Wallkill. La yil te bin-utʼil ya yichʼ pasel imprimir te Bibliaetik sok te junetik ta mukʼul maquinaetik te ya spas imprimir ta oranaxe soknix la yil te bin-utʼil ya yichʼ chajpanel spisil te aʼtelil ya jpastike. Jaʼnix jich kʼax tey-a te banti ya yichʼ cholbeyel skʼoplal ta swenta «te Biblia sok te sbiil Diose» sok te «ay jun lum yuʼun te yichʼojbey sbiil te Jehová». Jaʼnix jich bayal machʼatik la snaʼbey sba sok la sta bayal yamigotak. Kʼax maʼyuk bin-ora ya xchʼay ta yoʼtan te bitʼil xtaluk ta ulaʼtaywaneje.

Te machʼatik ya xtalik ta ulaʼtaywaneje ma snaʼik te bin-utʼil ya yalik te stseʼelil yoʼtanik yuʼun te la snaʼbeyik sba te Betele. Jaʼukmeto te kʼalal la yichʼ jojkʼoybeyel te hermano Marcellus teme la smulan te xtaluk ta ulaʼtaywaneje, sok stseʼelil yoʼtan jich la yal: «¡Laj, laj, laj!».

Te kʼalal ya xtal awulaʼtay te Betele yaniwan smukʼubtesbat kʼinal awaʼiy sok te afamiliae, jich bitʼil te la yaʼiy sba te hermano Marcellus. Te testigootik yuʼun Jehová ay bayal Betel kuʼuntik ta swolol Balumilal sok sbujtsʼ koʼtantik ya kakʼbeytikex awilik te Betele. ¿Bin yuʼun te ma xtal awuʼlatayotike?

^ párr. 3 Te hermano Marcellus laj ta 19 yuʼun mayo ta 2014 te kʼalal nopol ya xlaj ta tsʼibayel-a te artículo ini.

Naʼbeyaxan skʼoplal

¿MACHʼATIK YA SPASIK TE SKʼANOJEL YOʼTAN TE JEHOVÁ TA KʼAJKʼAL INI?

¿Bin-a te Betele?

Jaʼnax ta Betel te banti ya yichʼ pasel te bintik kʼax bayal skʼoplale, maʼyuk yan. Nopaxan ta swenta te machʼatik ya x-aʼtejik tey-ae.

¿MACHʼATIK YA SPASIK TE SKʼANOJEL YOʼTAN TE JEHOVÁ TA KʼAJKʼAL INI?

¿Bintik ya yichʼ pasel ta Betel?

Tseʼelme koʼtantik yuʼun te jayeb machʼatik ya skʼan ya xtalik ta yilel te Betel. ¡Yame kikʼex te yakuk achapik te ya xtalexe!