Ochan ta banti te bintik yichʼoje

Ochan ta banti bintik jujunchajp yichʼoje

sTestigotak te Jehová

tseltal

Te letrero te kʼax mukʼ skʼoplal yuʼun te Watchtower ta Brooklyn

Te letrero te kʼax mukʼ skʼoplal yuʼun te Watchtower ta Brooklyn

Kʼaxemix ta 40 jaʼbil, te tsajal letrero te kʼax mukʼ te yichʼoj (4.6 metros [15 pies] snajtʼil) ya xchiknaj ta ilel ta mukʼul na te banti ya yichʼ ilel te aʼtelil yuʼunik te stestigotak Jehová sok bayal tuunem yuʼunik te machʼatik ayik ta nainel ta Nueva York yuʼun jich ya snaʼik-a te jayeb ora soknix te temperatura. Jaʼnix jich, kʼax tabil ta ilel yuʼun te mukʼul lume.

Te Eboni, ya sta ta ilel te letrero kʼalal ta sna te ay ta Brooklyn, jich ya yal: «Kʼax lek bitʼil ya jta ta ilel kʼalal ta jbentana te jayeb ora sok te jayeb temperatura te kʼalal ya xboon ta aʼtele. Jich ya jnaʼ-a te jayeb ora ya xboone sok te bin kʼuʼul ya jlap baele».

¿Teytobal ya x-ayinxan-a te letrero ta cuarenta jaʼbilxan bael? Ma xnaʼbaj ta lek, melel te stestigotak Jehová yakik ta snopel te ya sjeltayik te mukʼul na ini ta noroeste yuʼun te mukʼul lum Nueva York. Te machʼatik ya smanik te mukʼul na ini jaʼme ya snaʼik te bin ya spasik ta swenta te letrero ini.

Ta melel, te kʼaxemix tal ta setenta jaʼbile, te mukʼul na ini yan letrero yichʼoj-a. Te stestigotak Jehová la yotsesik te letrero ini te kʼalal la smanik te mukʼul nae ta jaʼbil 1969.

Te letrero ini ya skʼan kanantayel spisil-ora. Bayalix tal ta ay j-aʼteletik te jchʼieletike jaʼ ay ta swentaik yilel te aʼtelil ini, ta schaʼpasel te bintik ya xbolob sok chikan te jayeb ora-ae.

Jtul jkanan ta ajkʼabal ya xjul ta yoʼtan: «Ta jun ajkʼabal la skʼoponon te direktor yuʼun notisia ta jun canal yuʼun telebision. La yalbonkotik te yakuk jpajtik 15 segundo te reloje, sok la yal te orauk ya jpaskotike, melel ta ajkʼabal-abi yalaj xchiknaj ta programa yuʼun. Manchukme kʼubenix swayel-a te jtul técnico bajtʼ ta oranax ta spajel te reloje».

Te bayal jaʼbil kʼaxemix tale, te letrero ini yichʼojix lekubtesel ta lek. Jich bitʼil ta nailal, te ora jaʼnax yichʼoj te temperatura ta grados Fahrenheit, jaʼukmeto ta jaʼbil 1985 talel la yichʼ otsesel te temperatura ta Grados Celsius.

Jaʼnix jich ta 2009, la yichʼ jeltayel te tuboetik yuʼun néon ta diodos emisores de luz (LED) rojos, te lokʼeliktoe sok te ma toyemuk stojole, ma jaʼuknax te kʼax lekik sok te ya xjalaje, jaʼnix jich maba ya yichʼ lajinel 4,000 dolar ta jujun jaʼbil yuʼun te skanantayele. Ta ora ini jtebxanix ya slajin te yip lus te bitʼil ya slajin ta nailale, jaʼ yuʼun ya skʼatpʼun ta tsaj te letrero te jaʼnix jich «yaxe».