Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Ya x-lokʼik bael te machʼatik ayik ta nainel tey ta Hotel Bossert

Ya x-lokʼik bael te machʼatik ayik ta nainel tey ta Hotel Bossert

Mato jaluk te lokʼik bael te machʼatik ayik ta nainel tey ta Hotel Bossert te ay ta Brooklyn (Nueva York) te jaʼik te stestigotak Jehová, la schonik ta jaʼbil 2012 sok la yakʼbeyik jilel te yabe te machʼa ya x-kʼot ta yajwale. Te stojol te na-abi ya yichʼ tuuntesel ta swenta te aʼtelil ta swolol balumilal ta swenta nojptesel yuʼun te Biblia.

Te bin swentail te la schonik jilel te mukʼul na te yichʼoj 14 pisos sok te jich pasbil bin utʼil namey naetik ta Italia, jaʼ yuʼun te ya sjelbeyik yawil te banti ya yichʼ ilel te yaʼtelik ta swolol Balumilal te stestigotak te Jehová, te ay ta Brooklyn, ya skʼasesik ta jun yachʼil kʼinal ta Warwick (Nueva York). Yaniwan xjalaj bayal jaʼbil te bin-utʼil ya yichʼ bael kʼasesele.

Ayix cien jaʼbil skʼoplal

Te Louis Bossert, jaʼ jtul winik te mukʼ skʼoplal tey ta industria yuʼun teʼ tey ta Nueva York, jaʼ te machʼa la spas te hotel ini ta jaʼbil 1909. Te bin la snope jaʼ te ayuk machʼatik ya skʼasesik cheʼoxebuk ajkʼabal tey-a o te ay machʼatik ya xjilik ta nainel tey-ae. Jich bitʼil te oranax ya xnoj-a te Mukʼul nae, ta jaʼbil 1914 la yichʼ mukʼubtesel te jteb ma la sta te bitʼilnix smukʼul-ae. Ta yaʼbilal 1916 la yichʼ pasel te restaurante Marine Roof tey ta sba te nae.

Tey ta yaʼbilal 1980 te stestigotak Jehová la smanik te mukʼul na ini sok la yachʼubtesik yuʼun jich ya xjilik ta nainel-a te machʼatik ya x-aʼtejik tey ta banti ya yichʼ ilel te aʼtelil ta swolol Balumilale. Tey ta yamakʼul te banti ya yaʼiyik ajkʼote la skʼatpʼunik ta weʼibal na sok te restaurante la skʼatpʼunik ta banti ya skux yoʼtanik te machʼatik nainemik tey-ae soknix te ulaʼetike.

Kʼalalto ta jaʼbil 2010, te mukʼul na ini la yichʼ tuuntesel yuʼun ya xjilik-a te stestigotak te Jehová te talemik ta swolol Balumilal te ya xkʼotik ta yuʼlatayel te banti ya yichʼ ilel te aʼtelile.

Te machʼa yajwal ya xjilix te nae yak ta snopel te ya schaʼyachʼubtes yuʼun jich ya yichʼ paselxan ta jun hotel. Jaʼukmeto wokolyal te leknax ay te nae, maba wokol ya yilik ta skʼatpʼunel ta lekil kuartoetik sok ta jun o cheb naetik ta lujo

Te bin-utʼil tʼujbil la yichʼ paselxan

Kʼalal mato kʼaxemik bael-a te stestigotak te Jehová tey ta hotel Bossert, te mukʼul na ini kʼax tsʼiʼlajemix-a. Te spat te na te bombil ta sake kʼax bayal yabakul sok maba lekix ta ilel, sok te mukʼul stiʼtiʼil te sba te na yuʼun terracota ton la sjat sba ta olil sok jteb ma xchʼayix koel-a. Te bentanaetik kʼax ma lekix ta ilel sok ma xmajkix ta lek-a, te yajwal te mesaetik tey ta restaurante Marine Roof jaik te tsumutetike. Jaʼ yuʼun te stestigotak te Jehová ochik ta tulan aʼtel. Bayal te machʼa te talemik ta yanyantik lum tey ta Estados Unidos la slokʼes sba ta yoʼtanik ta spasel te tulan aʼtelil ini, jich juʼ ta pasel ta jaʼbil 1991.

Te aʼtelil yuʼun xchaʼpasele, te stestigotak te Jehovae la skusik, la schaʼpasik ta lek te spajkʼul te na te pasbil ta caliza ton. Sok la sjeltaybeyik te mukʼul stiʼtiʼil sba na yuʼun terracota ton ta yan te pajal sok te pasbil ta fibra de vidrio te maba kʼax ale. Soknix la yakʼbeyik yachʼil bentanaetik te pasbil ta caoba teʼ.

Jichnix te yutil te mukʼul na spisil la yichʼ achʼubtesel, sok te yochibale tʼujbil la yichʼ paselxan. Yuʼun jich ya xjuʼ ta paselxan ta mármol te spajkʼul te nae, la yichʼ leel te cantera original ta Italia. Sok te schʼalil te sba na te pasbil ta yeso te tsʼiʼlajem yuʼun te jaʼe la yichʼ achʼubtesel-euk.

Te aʼtelil te kʼax wokol la yichʼ pasele jaʼ te schaʼpasel te mukʼul yoyal na te ay ta yochibal te pasbil ta hierro. Te yoyal na bayal buelta yichʼoj bonel ta pintura jich maba chikan ta ilel te bin pasbil-ae, yichʼoj te scagliola (pajal yilel sok te mármol). Ta skaj te maʼyuk machʼa ya sna te bin-utʼil ta pasel te bin ya yichʼ tuuntesele, la yichʼ lebeyel sjunil banti ya scholbey skʼoplal. Ta Biblioteca yuʼun jun universidad te nopol aye, la yichʼ tael jun libro banti ya scholbey skʼoplal te bin-utʼil ta pasele, te kʼalal la yichʼ kʼoponele, jtsojb j-aʼteletik juʼ yuʼunik schaʼpasel te yoyal te nae. Te kʼalal kʼax bael bayal semanae, juʼ yuʼunik spasel te bin-utʼil yichʼoj pasel ta snailale.

Te Kʼalal juʼ ta pasel te aʼtelil ta jaʼbil 1991, te Bossert kʼatpʼuj ta jun tʼujbil mukʼul na te leknax ayinel tey-ae. Jaʼ swentail te la yichʼ akʼbeyel te Premio Lucy G. Moses, te jaʼ ya yichʼik akʼbeyel te machʼatik ya spasik tulan yuʼun ma slajinbeyik skʼoplal te tʼujbil antiguo naetike.