Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Mukʼul tsoblejetik yuʼun te stestigotak Jehová te la yichʼ pasel ta jukchajp nasionetik

Mukʼul tsoblejetik yuʼun te stestigotak Jehová te la yichʼ pasel ta jukchajp nasionetik

Te stestigotak Jehová la spasik cheʼoxeb mukʼul tsoblejetik ta yanyantik nasion jich bitʼil ta Brasil, Costa Rica, Hong Kong, Irlanda, Israel, Nueva Zelanda sok Suecia. Te sbabiale la yichʼ pasel ta Suecia ta julio yuʼun 2012, te yantik oxebxan la yichʼ pasel ta slajibale jaʼ ta Costa Rica sok ta Nueva Zelanda ta enero yuʼun 2013.

Jichnix bitʼil ya yichʼ pasel ta mukʼul tsoblejetik yuʼun oxeb kʼajkʼal te ya spasik te stestigotak Jehová ta jujun jaʼbil, te mukʼul tsoblejetik te mukʼ skʼoplal ini jaʼnix jich ya yichʼ akʼel discursoetik, ay bintik ya yichʼ akʼel ta ilel soknix ay bin ya yichʼ akʼel ta ilel señail te lokʼem ta Biblia.

Ta mukʼul tsoblejetik-abi, kʼotik testigoetik yuʼun Jehová te talemik ta yanyantik nasionetik. Te kʼalal mato xjajch-a sok te kʼalal lajix-a te mukʼul tsobleje, te Testigoetik te ulaʼtaywanike la yichʼik ikʼel bael ta paxial ta lugaretik ta naʼbil sbaik ta leke, jaʼ-abi bayal tiempo la yichʼ tal chajpanel.

Ay jtul Testigo te kʼot ta mukʼul tsoblej ta Brasil jich la yal: «Kʼax bayal la yakʼbon stseʼelil koʼtan te kʼalal la kil te skʼuxul yoʼtan te kermanotaktik sok ta swenta te slekil yoʼtanike. Jich la kaʼiy te ajkʼnax mukʼub te jfamiliae».

Ay yanxan te kʼot ta mukʼul tsoblej te la yichʼ pasel ta Hong Kong jich la yal: «Kʼaxto la stijbon koʼtan te kʼalal la kil te kermanotaktik te bin-utʼil okʼik sok sbujtsʼ yoʼtanik kʼalal la stsakik te yachʼil junetik te lokʼ ta kʼopil mandarín».

Te stestigotak Jehová ya spasik mukʼul tsoblejetik ta jujun jaʼbil ta swolol Balumilal sok bayal miyon ta tul te machʼatik ya xkʼotike.

Te machʼatik ya xkʼotik-a te mukʼul tsoblejetik ini, ya xjuʼ ya yakʼik ta ilel skʼuxul-oʼtanil, tseʼel-oʼtanil sok te lamalkʼinal te ya xchiknaj ta ilel ta stojol te kermanotaktik ta swolol Balumilal. Jaʼ jich ya xkʼot ta pasel ta mukʼul tsoblejetik ini te mukʼik skʼoplale soknix ta mukʼul tsoblejetik yuʼun internacional. Ta olil kʼajkʼal, te machʼatik ya xkʼotik ta tsobleje kʼax lek te bintik ya yalbeyik skʼoplale, junax ya xweʼik, ay bin ya skʼebanbey sbaik, ya yakʼbey sba sdireccionik, ya slokʼes sfotoik sok ya spet sbaik sok sbujtsʼ yoʼtanik.

Ta spisil te mukʼul tsoblejetik ya yichʼ pasele, jaʼnix jich sok yutsil koʼtantik ya kiltik te machʼatik ya xkʼotik te maba testigoetik yuʼun Jehová.

 

Naʼbeyaxan skʼoplal

¿Bin yuʼun te ya jtsob jbakotik ta mukʼul tsoblejetike?

Ta jujun jaʼbil ya jtsob jbatik oxeb buelta. ¿Bin lek ya ata teme ya xbaat ta mukʼul tsoblejetike?