Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

La yichʼ pasel mukʼul tsoblejetik ta «Swolol Balumilal» ta jaʼbil 1963

La yichʼ pasel mukʼul tsoblejetik ta «Swolol Balumilal» ta jaʼbil 1963

Ayix tal cincuenta jaʼbil, 583 ta tul testigoetik yuʼun Jehová bajtʼik lajuneb semana ta namal beel ta bayuk lugar ta swolol Balumilal. Ma jaʼuknax bajtʼik ta paxial yuʼun sbujtsʼ kʼinal, te bin swentaile jaʼ te ya sjokin sbaik sok yermanotakik ta mukʼul tsoblejetik te la yichʼ pasel ta jaʼbil 1963 te la sbiilin «Lek yachʼil kʼop swenta sbajtʼel kʼinal». Te testigoetik ini la yulaʼtayik kʼaxem ta jtab nasionetik, jaʼ yuʼun la yichʼ naʼbeyel sba jich bitʼil mukʼul tsoblejetik te la yichʼ pasel ta «Swolol Balumilal».

Te bin kʼax ta mukʼul tsoblej te ma xchʼay ta oʼtanile, jaʼ te discurso te la sbiilin «Te kʼalal ya x-och ta Ajwalil ta swolol Balumilal te Diose». Te Nathan Knorr, te jaʼ la yil te aʼtelil yuʼun te stestigotak Jehová ta swolol Balumilal, jteb ma spisiluk ta mukʼul tsoblejetik-abi jaʼ la skʼases te discurso ini. La yalbey skʼoplal te tulan wokolil yak ta kʼaxel ta swolol Balumilal sok la spajbey skʼoplal te bin ya jmaliytik ta pajel chaʼbej te kʼalal pastajemix ta nichimal kʼinal te Balumilale. Ta swolol Balumilal, 580,509 ta tul ants winiketik la yaʼiyik stojol te discurso ini.

Lajuneb semana ta «Swolol Balumilal»

Te mukʼul tsoblejetik ini jajch yichʼ pasel ta lum Milwaukee, (Wisconsin, ta Estados Unidos). Teyto-abi, beenik bael kʼalal ta este. Te kʼalal laj te mukʼul tsoblej ta Nueva York, bajtʼik ta Inglaterra, Suecia, Alemania sok Italia. Ta bayuk lugar te banti kʼaxike la scholbeyik yaʼiy te ants winiketik te lek yachʼil kʼop te ay ta Bibliae.

Bayal ants winiketik la yalbeyik wokol te testigoetik yuʼun te la slokʼes stiempoik ta scholel skʼop Dios. Jtul achʼix te ay slumal ta Estocolmo (Suecia) jich la yal: «Maʼyuk bin-ora ya xchʼay ta koʼtan te la awulaʼtayonike. [...] ¡Ma schʼuun koʼtan yaʼiyel te bitʼil namal talex yuʼun ya acholbonik kaʼiy te schʼuunel awoʼtanik ta stojol te Diose! Ta melel, chajp ya kil-a».

Jaʼukmeto te kʼalal kʼotik ta Atenas (Grecia), ay bin kʼot ta pasel te la smel yoʼtanik yuʼune. Te ajwalil ta lum-abi jaʼ la schʼuun te bin la yal te sacerdoteetik, melel ma la yakʼix permiso te ya yichʼ pasel te mukʼul tsoblej ta estadio yuʼun Panathinaikos. Jaʼukmeto te Testigoetike maba chebaj yoʼtanik. Ta slajibal agosto, jteb ma sta lajunmil ta tul ants winiketik la yaʼiyik stojol te programa te la yichʼ kʼasesel ta skongregasionik soknix ta yantik naetik.

Te kʼalal lokʼik bael ta Atenas, te jtsojb testigoetik-abi la yulaʼtayik te Líbano, Jordania, Israel, sok Chipre. Te yermanotakik soknax slekil yoʼtanik ikʼotik ta snaik. Jich bitʼil jtul Testigo la schol te ay bin chajpnax kʼot ta pasel ta stojol ta Nicosia (Chipre): «Spisil-ora te kʼalal ya xkʼoon ta sna te hermano te banti jilone, ya jlokʼes te jtepe [...], kʼalal ya kilxan maʼyukix tey-a [...], jaʼukmeto te kʼalal ya xkʼax joʼeb minuto kusbilix ta lek-a sok xlemetnax ta ilel».

Te Testigoetik ini bajtʼikxan ta nasionetik te ayik ta Oriente sok ta Pacífico. La sjokinik bayal ta mil yermanotakik ta mukʼul tsoblej te la yichʼ pasel ta India, Birmania (ta ora ini Myanmar), Tailandia, Hong Kong, Singapur, Filipinas, Indonesia, Australia, Taiwán, Japón, Nueva Zelanda, Fiyi sok Corea. Bayal ants winiketik la sjelik te bin kʼajkʼal ya x-aʼtejik yuʼun jich ma schʼayik-a te programae. Ay chaʼtul te machʼa snopoj ya xnujpunike te ay slumalik ta Yokosuka (Japón) ay bin mukʼ skʼoplal la spasik. Te jchʼiel kereme la skʼan permiso ta yaʼtel yuʼun ya xbajtʼ ta mukʼul tsoblej ta lum Kioto, te yajwal aʼtel la yal te jaʼnax ya x-akʼbot permiso teme yuʼun ay machʼa laj o ta jun nujpunel. Jich bitʼil te snopojiknanix-a te ya xnujpunike, la snaʼiltesbeyik skʼajkʼalel te nujpunel yuʼunike. Jaʼukmeto maʼyuk banti bajtʼik ta paxial te kʼalal nujpunike, melel kʼax yuʼunik ta mukʼul tsoblej.

Te namal beel ini laj ta sjajchibal septiembre ta Hawai sok ta California (Estados Unidos). Te jayeb machʼatik kʼotik ta slajibal mukʼul tsoblej ta lum californiana de Pasadena kʼaxemto jich-a te bitʼil smaliyojike. Te kʼalal nopol ya xlajix-ae, noj ta karroetik te karreterae sok la scholan sbaik ta bayal. Ta swenta-abi te jolol yuʼun polisia jich la yal ta jun periodiko: «Maʼyuk jich kiloj jun mukʼul tsoblej te banti leknax stalelik te ants winiketike».

Te bintik ma schʼay ta oʼtanile

Te bin kʼax skʼoplal ta mukʼul tsoblejetike, maba chʼayem ta oʼtanil ta kʼajkʼal ini. Ta yorail-abi la yichʼ lokʼesel te Libro «Toda Escritura es inspirada de Dios y provechosa», te yakto ta tuuntesel ta tsoblejetik yuʼun te stestigotak Jehová ta ora ini.

Te Harold King te kʼalal lokʼelto ta chukel-ae

Jaʼnix jich, ta mukʼul tsoblej te la yichʼ pasel ta Nueva York la yichʼ kʼayojtayel yachʼil kʼayojil, te sbiil «De puerta en puerta». La schajpan jtul Testigo te sbiil Harold King, te och ta chukel ta China. Ta jaʼbil 1963 lokʼ ta chukel. Te kʼalal ochem ta chukel-ae la schajpan te tʼujbil kʼayojil ini. Ta kʼajkʼal ini, te Testigoetik ya skʼayojtayik jun kʼayojil te sbiil «De casa en casa».

Ta kʼajkʼal ini, te tsoblejetik yuʼun te stestigotak Jehová maba pajal sok te bitʼil ta nailale. Te bitʼil ya yichʼix pasel ta bayal lugaretik sok ay tutnax te banti ya yichʼ pasele, jtebnax yajtalul te machʼatik ya xkʼotik tey-ae sok maba namal ya xbeenikix. Ta swenta-abi, skoltayoj te ants winiketik yuʼun ya schʼam yaʼiyik ta lek te programae. Kʼaxem ta jukeb miyon stestigotak Jehová sok yantikxan ants winiketik ya xkʼotik ta mukʼul tsoblejetik ta jujun jaʼbil. ¿Yabal amulan ya ajokinotik ta jaʼbil ini? Akʼbeya clic liʼ ini yuʼun jich ya ale te banti ya yichʼ pasel te mukʼul tsoblej te nopol ya xjil awuʼune.

 

 

Naʼbeyaxan skʼoplal

¿Bin yuʼun te ya jtsob jbakotik ta mukʼul tsoblejetike?

Ta jujun jaʼbil ya jtsob jbatik oxeb buelta. ¿Bin lek ya ata teme ya xbaat ta mukʼul tsoblejetike?