Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Diecinueve mil boleto yuʼun abion: ¡Jaʼ jun mukʼul majtʼanil!

Diecinueve mil boleto yuʼun abion: ¡Jaʼ jun mukʼul majtʼanil!

Ta julio yuʼun 2013, te Jtsojb Jwolwanejetik yuʼun te stestigotak Jehová la stikunbey jun karta te akʼbot sbujtsʼ kʼinal yaʼiyik te misioneroetik sok te yantik j-abatetik te spisil-ora ya x-aʼtejik ta stojol Dios ta yanyantik nasion. Te karta la yal te ya yichʼik akʼbeyel koltayel swenta ya xbajtʼik ta mukʼul tsoblej internacional o yuʼun oxeb kʼajkʼal te la yichʼ pasel ta 2014 sok ta sjajchibal jaʼbil yuʼun 2015.

Te bin swentail te jich la yichʼ pasel-abi, ma jaʼuknax te ya xjuʼ xbajtʼik ta mukʼul tsobleje, jaʼnix jich ya xjuʼ ya yilik te sfamiliaik sok te yamigotakike. Te karta la yal te jaʼ ya xtojbot sboletoik yuʼun te organisasion te kʼalal xbajtʼik sok te kʼalal ya sujtik baele.

Manchukme aynix jich yichʼoj tal pasel-abi, jaʼukmeto maba pajal sok te bitʼil la yichʼ pasel ta jaʼbil ini. Ta swenta te Komite yuʼun Pʼijubtesel yuʼun te Jtsojb Jwolwanejetik, la yakʼik yachʼil departamento te banti ya xjuʼ ya xkʼopojik bael te hermanoetik ta swenta te sboletoik yuʼun abion.

Te kʼalal mato ayuk bayal kʼajkʼal-a te la yichʼ tikunel bael te kartae, kaj ta kʼoel bayal boletoetik yuʼun abion ta ofisina yuʼun departamento. Ta enero yuʼun 2014, te departamento-abi bayal aʼtelil la spasik. Te machʼatik ya x-aʼtejik tey-ae, jaʼ la sleik sok la smanik te boletoetik ta swenta te hermanoetik te ya scholik skʼop Dios ta spisil-ora ta yanyantik nasion.

Te kʼalal la yichʼ kʼanel te boletoetike, tulan la yilik. Melel ay chaʼoxtul te lokʼik tal ta Reykjavík (Islandia) bajtʼik ta Cochabamba (Bolivia); ay yantik te lokʼik tal ta Nouméa (Nueva Caledonia) bajtʼik ta Antananarivo (Madagascar). Sok ay yantik te lokʼik tal ta Port Moresby (Papúa Nueva Guinea) bajtʼik ta Seattle (Washington, Estados Unidos) sok ay lokʼik tal ta Ouagadougou (Burkina Faso) bajtʼik ta Winnipeg (Canadá).

Te joʼtul hermanoetik te ya x-aʼtejik ta departamento-abi, la smanik diecinueve mil boletoetik yuʼun abion ta swenta te ayniwan 4,300 ta tul hermanoetik te ayik ta 176 nasionetik. Juʼ ta pasel spisil ini, wokolayal te majtʼanil takʼin la yakʼik te kongregasionetik ta swenta-abi.

Ta swenta te majtʼanil ini la yalik bayal wokol yuʼun. Jtul hermano sok yinam te ochemik ta misionero jich la stsʼibay: «Ta ora ini ya sujtonkotik bael ta sureste yuʼun Asia te banti ayonkotik ta abatinel ta ora ini. Ya kalkotik bayal wokol yuʼun te koltayel la kichʼkotik akʼbeyel ta swenta te talotik ta Inglaterra, te jlumalkotike, sok jich la kilkotik te jfamiliakotik te ayix joʼeb jaʼbil te maʼyuk kilojkotik-ae. Te manchuk la kichʼkotik te koltayel ini maba juʼ kuʼuntik te jichuke. Ya kalkotik bayal wokol sok spisil koʼtankotik ta swenta te machʼatik la yakʼik te koltayel ini».

Jtul misionero te yak ta abatinel ta Paraguay, jich la stsʼibay: «Te joʼon sok te kiname ya kalkotik bayal wokol sok spisil koʼtankotik ta swenta te juʼ talonkotik ta mukʼul tsoblej internacional ta Nueva Jersey (Estados Unidos). Ta sjajchibal jaʼbil yuʼun 2011, jajch jtsobkotik te jtakʼinkotik yuʼun te ya xtalotik ta Estados Unidos ta yulaʼtayel te banti ya yichʼ ilel spisil te aʼtelil kuʼuntike. Jaʼukmeto ta junio yuʼun 2011, la kichʼkotik ikʼel ta yulaʼtayel te kongregasionetik ta kʼopil seña yuʼun Paraguay, jaʼ-abi ma junuknax te banti xbeenonkotike. Te kʼalal la jnopkotik ta lek te bin ya jpaskotike, jaʼ te maba ya xboonixkotik ta Estados Unidos yuʼun ya jmankotik jkojtʼ karro te ya xtuun kuʼunkotik ta swenta te banti la kichʼkotik tikunele. Jaʼukmeto la kichʼkotik ikʼel ta mukʼul tsoblej internacional. ¡Kʼot ta pasel te bin jkʼanojkotik-ae! Ya kalbeykotik wokol te Jehová ta swenta te yutsil yoʼtan sok te slekil yoʼtan te la yakʼbonkotik ta ilele».

«Jaʼnax la jkʼan jtikunbeyexkotik te correo electrónico ini yuʼun ya kalbeyexkotik, ¡kʼax wokolawalik!, jich la stsʼibay jtul hermano sok yinam te ayik ta Malaui. Maba ya jnaʼkotik jayebto aʼtelil, tiempo sok takʼin swenta la yichʼ pasel spisil ini». Ya kalkotik wokol yuʼun te tulan aʼtelil la apasike jaʼ kʼaxemtoxan-a te yutsil yoʼtan te organisasion yuʼun Jehová te bitʼil la kichʼkotik ikʼel ta mukʼul tsoblej internacional sok te la kil jbakotik sok jfamiliakotik soknix te kamigotak-kotike.»

Te hermanoetik te aʼtejik ta departamento-abi, bayal stseʼelil yoʼtan la spasik te yaʼtelike. Jtul hermana te sbiil Mileivi jich la yal: «Kʼax lek la kil te bitʼil la jkoltay te misioneroetik te tal yilik te sfamiliaik sok te yamigotakike». Jtul hermana te sbiil Dorise, jich la yalxan: «La kil ta smelelil te skʼuxul yoʼtan te organisasion yuʼun Jehová ta stojol te hermanoetik te ayik ta abatinel ta yantik nasione». Te hermano Rodney te jaʼ swentainej te departamento-abi, jich la yal: «Bayal yutsil la kaʼiy ta koʼtan te spasel te aʼtelil-abi».

Te stestigotak Jehová ta swolol Balumilal akʼbot stseʼelil yoʼtanik yuʼun te bitʼil la skoltayik te yermanotakik te slokʼesoj sba ta yoʼtanik sok te tulan yakik ta aʼtel te la yakʼbeyik sok skʼuxul yoʼtanik te majtʼanil-abi.

Naʼbeyaxan skʼoplal

¿Bin yuʼun te ya jtsob jbakotik ta mukʼul tsoblejetike?

Ta jujun jaʼbil ya jtsob jbatik oxeb buelta. ¿Bin lek ya ata teme ya xbaat ta mukʼul tsoblejetike?