Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Jun-nax ayik ta swenta kʼuxul oʼtanil ta mukʼul tsoblej ta Alemania

Jun-nax ayik ta swenta kʼuxul oʼtanil ta mukʼul tsoblej ta Alemania

Te titulo yuʼun te periodiko Frankfurter Rundschau jich la yal: «Jich yilel te bitʼil jun familia te la spasik kʼine». Spisil te machʼatik kʼotik ta mukʼul tsobleje, jich la yalik-euk.

Te Karla te ay slumal ta Puerto Rico, jich la yal: «Jich la kaʼiy jba te ayon ta jnae».

Te Sara te ay slumal ta Australia, jich la yal: «Jich la kaʼiy te bitʼil boon ta yulaʼtayel te jfamiliae, jaʼnax yuʼun te ay ta yan nasione».

¿Bin yuʼun te jich la yaʼiy sbaik-abi? Jaʼ yuʼun te ayik ta mukʼul tsoblej internacional yuʼun te stestigotak Jehová te la yichʼ pasel ta 18 kʼalal 20 yuʼun julio 2014 ta estadio Commerzbank-Arena de Fráncfort del Meno (Alemania). Kʼotik 37,000 ta tul ants winiketik.

Te bin swentaile, jaʼ te ya snopik te bin ya yal te Bibliae. Te bin kʼax ta programae la yichʼ kʼoponel te Biblia, kʼayojiletik, skʼoponel Dios, ay cheb bin la yichʼ akʼel ta ilel señail sok discursoetik te lokʼem ta Biblia te ya yakʼ smukʼul oʼtanile.

Te machʼatik kʼotike, jaʼik te testigoetik yuʼun Jehová ta Alemania sok ayniwan 3,000 ta tul Testigoetik te talemik ta Australia, Estados Unidos, Gran Bretaña, Grecia, Líbano, Serbia sok Sudáfrica. Jaʼnix jich kʼotik 234 ta tul Testigoetik te talemik ta 70 nasionetik te ya x-aʼtejik spisil-ora ta spasbeyel yaʼtel te Diose, jich bitʼil aʼtelil ta misionero.

Ay discursoetik te la yichʼ kʼasesel ta Internet ta 19 ta chajp lumetik yuʼun Alemania sok yantikxan lumetik yuʼun Austria sok Suiza. Ta spisil-abi, ay 204,046 ta tul ants winiketik la yilik sok la yaʼiyik stojol te programae.

Maʼyuk bin ya xatotik

Ta Frankfurt, la yichʼ kʼasesel te programa ta kʼopil alemán, griego sok ta inglés. Ta yantik lugar, te discursoetik la yichʼ kʼasesel ta 17 ta chajp kʼopil ta jun-nax yorail, jich bitʼil árabe, chino, tamil, turco sok ta chaʼchajp kʼopil seña.

Manchukme yanyantik snasionik, stalelik, skʼopik te Testigoetike maba xatoj sbaik. Jun-nax ayik yuʼun te kʼuxul oʼtanile (Juan 13:34, 35). Jich ya yil sbaik te bitʼil yermano sbaike.

Te Tobías te ay slumal ta Gran Bretaña, jich la yal: «Kilojkotik te yuʼun-nix jfamilia jbakotik ta swolol Balumilal-ae. Maʼyuk bin ya xatotik».

Te Davianna te ay slumal ta Puerto Rico, jich la yal: «Ya jnaʼbey sba Testigoetik ta kʼaxem ta 20 nasionetik. Te bin jun-nax ya xkʼootik yuʼune, jaʼ te skʼuxul koʼtantik ta stojol Jehová soknix ta stojol te yantike».

Te Malcom te ay slumal ta Australia, jich la yal: «Tutnax te lum te banti ochon ta Testigoe. Spisil-ora jkʼoponoj articuloetik soknix kiloj videoetik ta swenta te kermanotaktik ta swolol Balumilal. Jaʼukmeto, ta mukʼul tsoblej ini kʼotix ta koʼtan te bin-nix yaʼiyel-a te ayotik ta familia ini. La yakʼbonxan yip te schʼuunel koʼtane».

Ma xchʼay ta oʼtanil te slekil oʼtanile

Testigoetik te ayik ta 58 kongregasionetik ta Frankfurt soknix te kongregasionetik te nopol ayike, la schajpanik majtʼaniletik soknix te bintik la skʼasesik kʼajkʼal-a te machʼatik kʼotik ta mukʼul tsoblej te talemik ta yantik nasione.

Te Cynthia te ay slumal ta Estados Unidos, jich la yal: «La yakʼik ta ilel skʼuxul yoʼtanik sok slekil yoʼtanik, maʼyuk bin-ora ya xchʼay ta koʼtan te skʼuxul yoʼtanik, yutsil yoʼtanik sok te slekil yoʼtanik te kermanotaktike».

Te Simon te ay slumal ta Alemania, jich la yal: «Bayuk chiknaj ta ilel te kʼuxul oʼtanile, te tseʼeje sok te skʼuxul yoʼtan te kermanotaktike. Bayal bin la jnoptik ta swenta te stalelik ta jujuntule».

Te Amy te kʼalalto ta Australia tale, jich la yal: «Te bintik la schajpanik ta tibiltike chiknaj ta ilel te ma yuʼunuk jkʼaxel maʼyuk bin ya jmulantik spasel te bitʼil testigootik yuʼun Jehovae. Te joʼotike ya jnaʼtik te bintik lek ya jkʼasestik kʼajkʼal-ae».

Te bintik la yichʼ pasel te ma xchʼay ta koʼtantike

Ma jaʼuknax jun mukʼul tsoblej la yichʼ pasel ta Frankfurt, melel la yichʼ pasel yantik mukʼul tsoblej internacional ta balunchajp nasion ta swolol Balumilal.

Te kʼalal la yichʼ jojkʼoybeyel jtuluk te machʼa kʼot ta mukʼul tsoblej te bin yaʼiyel la yaʼiy sbae, jich la yal: «Nopa awaʼiy te ay jtul afamilia, jich bitʼil awijtsʼin o abankil te ma anaʼojbey sba-ae. Te kʼalal ya awile ya yikʼat ochel ta sna soknix ya sjambat-euk te yoʼtane. ¿Mabal jichuk te ya yakʼ tseʼel-oʼtanil-abi? Ta ora ini nopanax awaʼiy te tseʼel-oʼtanil la yaʼiyik te 37,000 ta tule. Jaʼ jich la kaʼiy jba-abi».

Naʼbeyaxan skʼoplal

¿Machʼaonkotik-a te stestigotak te Jehovae?

¿Jayeb ta jtul testigoetik yuʼun Jehová ya anaʼbey sba te jaʼate? ¿Yanixbal anaʼbon jbakotik ta lek-a?

¿Bin-a te skʼanojel yoʼtan te Diose?

Te bin ya skʼan te Diose jaʼ te ya yichʼ naʼel ta swolol Balumilal te skʼanojel yoʼtane. ¿Bin utʼil-abi, sok machʼatik-a te yakik ta snojptesel te ants winiketike?