Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Te stestigotak Jehová, ¿yabal sujik ta sjelel srelijionik te ants winiketike?

Te stestigotak Jehová, ¿yabal sujik ta sjelel srelijionik te ants winiketike?

Maʼuk, maʼyuk machʼa ya jsujkotik ta sjelel srelijionik. Ta melel, te La Atalaya, te revista kuʼunkotik te bayal skʼoplale jich la yal: «Teme ya sujtik te ants winiketik ta sjelel te srelijionike ma lekuk». *Te bin swentail te maba jich ya jpaskotike jaʼik ini:

  • Te Jesús maʼyuk bin-ora la suj te ants winiketik ta schʼuunel te bintik la yakʼ ta nopele. Melel snaʼoj ta lek-a te maʼyuk bayal ants winiketik ya schʼam yaʼiyik te bin ya yale (Mateo 7:13, 14). Ta jun buelta te kʼalal ay chaʼoxtul jnopojeletik ijkʼitayot yuʼun ta skaj te maba la schʼuunik jun nojptesel yuʼune, la yakʼ bael maba la suj te xtʼunotik yuʼune (Juan 6:60-62, 66-68).

  • Te Jesús la yakʼbey snop te jnopojeletik yuʼun te manchuk ya sujik te ants winiketik ta sjeltayel te bintik schʼuunejike. Melel jaʼ la skʼan te yakuk spasik tulan ta sleel te ants winiketik te jun yoʼtan ya skʼan ya schʼam yaʼiyik te skʼop Diose (Mateo 10:7, 11-14).

  • Teme ay machʼa ya jsujtik ta sjeltayel te srelijionike maʼyuk bin lek ya xlokʼ-a. Melel te Diose jaʼ ya skʼan te spisiluk yoʼtan ya x-ichʼotik ta mukʼ yuʼun te ants winiketike, ma jaʼuk te sujbilik ta spasele (Deuteronomio 6:4, 5; Mateo 22:37, 38).

¿Jkʼaxelbal ya jkʼankotik te ya x-ochik ta jnopojel spisil te ants winiketike?

Melelnix-a te ya kakʼkotik ta nopel te bin ya yal te Biblia «cʼalal ta stiʼil bahlumilal» sok te ya jpaskotik ta «comonsitil soc ta jujun na», jich bitʼil ya yal te sJun Diose (Hechos 1:8; 10:42; 20:20). Jichnix bitʼil kʼot ta stojolik te sbabial jchʼuunjeletik yuʼun Cristo ay ya kichʼkotik albeyel te jaʼ ya kakʼkotik ta chʼuunel te jrelijionkotike (Hechos 18:12, 13). Jaʼukmeto, te bintik ya yichʼ alel-abi ma smeleliluk. Ya kichʼkotik ta mukʼ te bin ya skʼan ya schʼuunik ta tulutule. Te bin-nax ya jkʼankotike jaʼ te yakuk snaʼik te ants winiketik te bin ya yal te Biblia yuʼun jich ya stsaik te bin relijion ya skʼanike.

Maba ya jsujkotik te yantik ta schʼuunel bin jchʼuunejkotike. Soknix maba ya jtuuntes te jrelijionkotik ta yakʼel ta nopel te politika, sok maʼyuk machʼa ya japbeykotik takʼin o yantik biluketik swenta ya x-ochik ta Testigo yuʼun Jehová. Maba jichonkotik te bitʼil ay machʼa ya skuy sbaik ta jchʼuunjel yuʼun Cristo jaʼukmeto maba jich ya spasik te bin la yakʼ ta nopel te Cristoe. *

¿Yabal xjuʼ ya sjel srelijion te jtul ants winike?

Te j-alwanej Abrahán la yijkʼitaybey te srelijion te smeʼ state

Te Biblia ya yal te yake, melel ay bayal ants winiketik ya yalbey skʼoplal ta Biblia te la staik ta nopel te yichʼel ta mukʼ te smelelil Diose jich la yijkʼitaybeyik te srelijion te smeʼ statike. Jich bitʼil te Abrahán, Rut, sok chaʼoxtul ants winiketik ta Atenas sok te jpuk-kʼop Pablo (Josué 24:2; Rut 1:14-16; Hechos 17:22, 30-34; Gálatas 1:14, 23). Jaʼnix jich, te Biblia ya yal te tulutul ya staik ta nopel teme ay machʼa ya skʼan ya yijkʼitay jilel te relijion te lek ya yil te Diose (1 Juan 2:19).

Te Declaración Universal de Derechos Humanos, te bitʼil ya yal te ONU jaʼ te «banti jajchem tal te mantaliletik te ay ta swolol Balumilal yuʼun te derechos humanos», ya yal te «jpisiltik ya xjuʼ ya jel jrelijiontik o te bin jchʼuunejtike». Jaʼnix jich ya yal te spisil ants winiketik ya xjuʼ ya sleik, ya yichʼik sok ya spukbeyik skʼoplal te bin schʼuunejike. Teynix ochem skʼoplal-euk-a te bintik jchʼuunejtik ta jrelijiontike. * Ta swenta-abi, te bitʼil jich ya xjuʼ ya jpastik-abi, ya skʼan ya jnaʼtik te ay ta swentaik te yantik ta skoltayel ta kʼop te bin schʼuunejik sok ta spʼajel te bin jchʼuunejtike.

¿Yabal skʼan ya yal te ma xkichʼtik ta mukʼ jfamiliatik teme ya jel jrelijiontike?

Ma jichuk ya skʼan ya yal. Te Biblia ya yalbotik te ya skʼan ya kichʼtik ta mukʼ spisil ants winiketike, chikan bin relijion ayik (1 Pedro 2:7). Jaʼnix jich, te stestigotak Jehová ya schʼuunik te mantalil ya yal te Biblia ta swenta te yichʼel ta mukʼ te smeʼ statike, manchukme maba pajal schʼuunel yoʼtanik sok (Efesios 6:2, 3).

Jaʼukmeto, ma spisiluk te ants winiketik jich ya snopik te bitʼil ya yal te Bibliae. Jich bitʼil jtul ants te chʼi ta lum Zambia jich ya yal: «Te ants winiketik ta jlumale, teme ay machʼa ya sjel srelijione jich ya yilik [...] te ya spʼaj te sfamilia sok te slumale». Manchukme jich-abi, te kʼalal jchʼiel achʼixonto-ae jajchon ta snopel te Biblia sok te stestigotak Jehová sok la jnop te ya jel te jrelijione. «Yato xjul ta koʼtan te bayal buelta la yalbon te jmeʼ jtat te bayal ilinemik ta jtojole sok te lalaj kakʼbey smel yoʼtanike. Jaʼ-abi tulan la kaʼiy melel bayal skʼoplal ta koʼtan te bitʼil lek ya yilonike. [...] Te bitʼil jun koʼtan ta stojol te Diose te ma jaʼuk ta stojol te kostumbreetik yuʼun te relijione maba ya skʼan ya yal te ma junuk koʼtan ta stojol te jfamiliae.» *

^ párr. 8 Jich bitʼil, te kʼalal nopol sta te jaʼbil 785, te ajwalil Carlomagno la sjach jun mantalil te ya yichʼ milel spisil te ants winiketik ta slumal Sajonia te machʼatik ma skʼan ya yichʼik jaʼ ta católico. Te yane jaʼ te Paz de Augsburgo, jaʼ te bin la schapik sok te la spasik firmar ta jaʼbil 1555 te chaʼtsob ants winiketik te la sjachik guerra ta Sacro imperio Ramano. Te bin la schapike jaʼ te jujun ajwalil ay cheb te bin ya xjuʼ ya spasike: te ya x-ochik ta católico o luterano. Te ants winiketik te swentaineje sujbil ya x-ochik-a te relijion te la stsa te ajwalil yuʼunike. Te kʼalal ma la schʼuunike la yijkʼitayik jilel te slumalike.

^ párr. 11 Mantaliletik jich bitʼil ini lokʼ ta Carta Africana de Derechos Humanos y de los Pueblos, te Declaración Americana de los Derechos y Deberes del Hombre, te Carta Árabe de Derechos Humanos de 2004, te Declaración de Derechos Humanos de la Asociación de Naciones del Sudeste Asiático, te Convenio Europeo de Derechos Humanos sok te Pacto Internacional de Derechos Civiles y Políticos. Jaʼukmeto ma spisiluk te nasionetik ya schʼuunik spasel te mantaliletik ini.

^ párr. 14 Te Biblia ya yal te jaʼ Jehová sbiil te smelelil Diose.

Naʼbeyaxan skʼoplal

Te stestigotak te Jehová, ¿yabal xat te familiaetike o ya yakʼ te junax ya x-ayinike?

Te stestigotak te Jehová ay ya yichʼik kujchinel ta xatel te familiaetike. Jaʼukmeto, ¿jaʼiknixbal-a te ya xatwanike?

¿Bin ya yal te Biblia ta swenta te bin ya xkʼot ta stojol te religionetik ta pajel chaʼbeje?

¿Yabal sta yorail te junax ya x-ayinik te ants winiketik ta yichʼel ta mukʼ te smelelil Diose?