Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

¿Bin yuʼun te maxa awichʼik te chʼichʼe?

¿Bin yuʼun te maxa awichʼik te chʼichʼe?

Te bintik ya yichʼ alel sok te bin smelelil

Te bintik ya yichʼ alel: Te testigoetik yuʼun Jehová ma skʼanik poxtayel ta doctoretik melel ma stuuntesik poxiletik.

Te bin smelelil: Te stestigoonkotik yuʼun Jehová ya jpaskotik tulan ta sleel lekil poxiletik. Te kʼalal ya stsakotik chamel te joʼonkotike o te jfamiliatik sok teme ya skʼan ya yichʼ pasel operación, ya jlekotik doctoretik te ya snaik pasel ta lek te yaʼtelike sok te maba ya stuuntesik te chʼichʼe. Ya kalkotik wokol yuʼun te bintik staojik ta nopel ta swenta te poxtayel te ma puersa ya yichʼ tuuntesel te chʼichʼe. Te poxtayel ya yichʼik te stestigotak te Jehová te ma puersauk ya yichʼ tuuntesel te chʼichʼe, ya stuuntesik-euk ta yantik nacionetik ta swenta xpoxtayel yantik ants winiketik. Ta kʼajkʼal ini machʼauk ya xjuʼ ya skʼanikix poxtayel te ma puersauk ya yichʼik te chʼichʼe, jich maba ya staik chamel ta swenta te chʼichʼ, jich bitʼil te ay machʼa ya x-utsʼinot teme ya x-och yan chʼichʼ ta sbakʼetale, soknix te ay ma xyilik te ma pajaluk te chʼichʼe.

Te bintik ya yichʼ alel: Te stestigotak te Jehová ya xkolik ta chamel ta swenta schʼuunel yoʼtanik.

Te bin smelelil: Te joʼonkotike ma jichuk jchʼuunejkotik te bitʼil ta swentanax schʼuunel koʼtantik ya xkolotik ta chamele.

Te bintik ya yichʼ alel: Te poxtayel te banti ma xyichʼ tuuntesel te chʼichʼe kʼax toyol stojol.

Te bin smelelil: Te poxtayel te ma puersa ya yichʼ tuuntesel te chʼichʼe, jaʼ bayalxan lekilal ya jtakotik-a, manchukme toyol jtebuk te stojole. *

Te bintik ya yichʼ alel: Bayal testigoetik yuʼun Jehová sok alaletik ya xlajik ta jujun jaʼbil ta swenta te bitʼil ma xyichʼik te chʼichʼe.

Te bin smelelil: Te bintik ya yichʼ alel ini tojol kʼopetiknax. Ta kʼajkʼal ini ay doctoretik te ma stuuntesik chʼichʼ te kʼalal ya spasik operación te kʼax chujkʼul ta pasele, jich bitʼil spasel te operación ta swenta oʼtanil o jbakeltik sok te sjeltayel ta yachʼil te bintik ay ta jbakʼetaltike (trasplante). * Te jchameletik te ma skʼanik te chʼichʼe pajal o jaʼ lek ya xlekubxan-a te bitʼil yantik te ya skʼanik te chʼichʼe, jichnix ta swenta-euk te alaletike. * Soknix maʼyuk machʼa ya xjuʼ ya snaʼ te ya xlaj jtul jchamel teme ma skʼan te chʼichʼe o te ya xkuxin teme ya skʼan te chʼichʼe.

¿Bin yuʼun te ma xyichʼik yichʼ te stestigotak te Jehovae?

Jaʼ ta swenta te bin jchʼuunejkotik ta Bibliae ma jaʼuk ta swenta te poxtayele. Te antiguo Testamento sok te Yachʼil Testamento ya yal te mantalil te manchuk ya jtuuntestik te chʼichʼe (Génesis 9:4; Levítico 17:10; Deuteronomio 12:23; Hechos 15:28, 29). Te Diose ya yal te jaʼ jkuxlejaltik te chʼichʼe (Levítico 17:14). Te testigoonkotik yuʼun te Jehová maba ya kichʼkotik te chʼichʼe, melel ya kichʼkotik ta mukʼ te mantalil ya yal te Biblia soknix te Dios te jaʼ la yakʼbotik te jkuxlejaltike.

Te bintik yachʼil yichʼoj nopele

Ta ora ini ya xjuʼ ta pasel operación te kʼax chujkʼultik te ma xyichʼ tuuntesel te chichʼe

Ay jun tiempo te la snopik te doctoretik ta swenta te poxtayel te ma yichʼ tuuntesel te chʼichʼe te kʼax chujkʼul ta pasele sok la yalik te yuʼunlaj ya skʼan ya smil sbaik te machʼatik ma skʼanik te chʼichʼe. Jaʼukmeto te bin la snopik ini ma jichuk ya snopikix ta kʼajkʼal ini. Jich bitʼil ta jaʼbil 2004 ay jun revista yuʼun poxiletik te jich la yal: «Bayal ta chajp te bitʼil ya yichʼ akʼel te poxtayel ta stojol te stestigotak te Jehová jaʼme ya xbajtʼ yichʼ tuuntesel ta yantik jaʼbiletik bael». * Ta jaʼbil 2010 te libro Medicina transfusional la yal te jaʼ wokolyal te poxtayeletik ini, «jich ya yichʼix ilel te operación te ma xyichʼ tuuntesel te chʼichʼe te bitʼil ya yichʼ pasel operación ta hospitaletike».

Bayal ta mil doctoretik ta swolol Balumilal yakik ta stuuntesel te poxtayeletik te banti ma smalik bayal te chʼichʼ yuʼun jich ya spasik operación te kʼax chujkʼul ta pasele te ma stuuntesik te chʼichʼe. Te poxtayeletik-abi yame yichʼ pasel-euk ta nacionetik te maʼyuk lek stakʼinike sok bayal ants winiketik te ma jaʼuk testigoetik yuʼun Jehová ya skʼanik-euk te poxtayel-abi.

^ párr. 8 Medicina transfusional, página 14; Transfusion and Apheresis Science, volumen 33, número 3, página 349.

^ párr. 10 Revista Española de Cardiología, volumen 59, número 5, páginas 507 a 509; Acta Médica Colombiana, volumen 26, número 5, página 261; The Journal of Thoracic and Cardiovascular Surgery, volumen 134, número 2, páginas 287 y 288; Texas Heart Institute Journal, volumen 38, número 5, página 563; Basics of Blood Management, página 2; Continuing Education in Anaesthesia, Critical Care & Pain, volumen 4, número 2, página 39.

^ párr. 10 Revista de la Federación Argentina de Cardiología, volumen 34, número 3, páginas 407 y 408; Revista Española de Cardiología, volumen 60, número 7, páginas 727 a 731.

^ párr. 14 Continuing Education in Anaesthesia, Critical Care & Pain, volumen 4, número 2, página 39.