Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

¿Bin-yuʼun te maba ya schʼik sbaik ta política te stestigotak te Jehovae?

¿Bin-yuʼun te maba ya schʼik sbaik ta política te stestigotak te Jehovae?

Te stestigoonkotik yuʼun te Jehová ay chaʼoxchajp te bin jchʼuunejkotik te lokʼem ta Biblia, yuʼun jich maba ya jchʼikbakotik ta política. Maba ya jtsobajkotik ta spasel kʼop ta swenta política, maba ya jpastik votar ni junuk partido o candidato, maba ya xbootik ta banti ya yichʼ pasel votación yuʼun ya jpastik jun aʼtelil tey-a sok maba jachtik kʼop yuʼun te yakuk yichʼ jeltayel te machʼatik yichʼoj mukʼ yaʼtelike. Jtaojkotik ta Biblia te bin swentail te maba ya jchʼikbakotik ta politicae:

  • Jaʼ ya jtʼunkotik te stalel te Jesús te maba la skʼan te ya yichʼ akʼbeyel yaʼtel ta política (Juan 6:15). Te Jesús la yalbey te jnopojeletik yuʼun te jaʼnix jich manchuk ya yakʼ sbaik ta «scuenta bahlumilal» ta swenta-abi maba la skʼan la skoltayik junuk partido político (Juan 17:14, 16; 18:36; Marcos 12:13-17).

  • Jun koʼtankotik ta stojol te Ajwalinel yuʼun te Diose, jaʼ te wentainel te la yalbey skʼoplal te Jesús te kʼalal la yal: «Ya me xpuhc ta halel ta swohlol bahlumilal scʼoblal te lec yachʼil cʼop yuʼun te cuentahinel yu’un Dios» (Mateo 24:14). Ta swenta te bitʼil ya jcholbeykotik skʼoplal te nopol ya xtalix te Ajwalinel yuʼun te Diose, maba ya jchʼikbakotik ta política ta spisil te nacionetik ni jaʼuk ta jlumalkotik (2 Corintios 5:20; Efesios 6:20).

  • Te bitʼil maba ya jchʼikbakotik te politicae, maʼyuk bin ya smakonkotik ta scholel te lek yachʼil kʼop ta stojol te ants winiketik chikan biluk yilel te snopjibal yuʼunike. Ta swenta te bin ya jpaskotike sok te bin ya kalkotike, ya jpastik tulan te ya kakʼkotik ta ilel te ay smukʼul koʼtankotik ta stojol te Ajwalinel yuʼun te Dios te jaʼ ya schajpan spisil te kʼopetik ta swolol te Balumilale (Salmo 56:11).

  • Te yakuk jchʼikbakotik ta politicae, yame xchʼay te bitʼil jun ayonkotik sok te machʼatik jun schʼuunel koʼtankotik sok ta swolol Balumilale (Colosenses 3:14; 1 Pedro 2:17). Spisil te relijionetik te ya schʼik sbaik ta politicae, xatoj sbaik (1 Corintios 1:10).

Ya kichʼkotik ta mukʼ te ajwaliletike. Manchukme maba ya jchʼikbakotik ta política, ya kichʼkotik ta mukʼ te machʼatik mukʼ yaʼtelike. Jich ya jpaskotik te mantalil ya yal te Biblia ta Romanos 13:1: «Spisilic acʼa yacʼ sbahic ta cuentahinel yuʼun te machʼatic mucʼ yaʼtelic». Ya jchʼuunkotik spasel te mantaliletik, ya tojkotik patanetik sok ya xkoltaywanonkotik ta swenta te bin ya staik ta nopel te ajwaliletik ta swenta slekilal te jlumalkotike. Maba ya jpejkʼanbeykotik skʼoplal te machʼatik mukʼ yaʼtelike, melel jaʼ jchʼuunejkotik te mantalil te ay ta Biblia te ya jkʼoponbeytik Dios te «ajwaliletic soc spisil machʼatic ay yaʼtelic», sok jaʼ ya jpaskotikxan-a te kʼalal ay bin ya snopik spasel te ya smak te bitʼil libre ayotik ta schʼuunel te Diose (1 Timoteo 2:1, 2).

Soknix ya kichʼkotik ta mukʼ te tulutul te bin ya staik ta nopel ta swenta te politicae. Melel maba ya jmakotik te bitʼil ya spasik votar sok maʼyuk bin ya kalbeykotik teme ay machʼa ya skʼan ya spas votar.

¿Yachʼiltonaxbal chiknajem te bitʼil maba ya jchʼikbakotik ta politicae?. Maʼuk. Te jpuk-kʼopetik sok yantik jchʼuunjeletik yuʼun Cristo ta sbabial siglo maba la xchʼik sbaik ta política-euk. Ta swenta ini jun libro ya yal: «Manchukme snaʼojik-a te ya skʼan ya yichʼik ta mukʼ te machʼatik mukʼ yaʼtelike, te sbabial jchʼuunjeletik yuʼun Cristo maba la skʼanik te ya xchʼik sbaik ta política» (Beyond Good Intentions—A Biblical View of Politics [Ayto bin la skʼan spasikxan. Te bin ya yal te Biblia ta swenta te política]). Jaʼnix jich te teólogo, te sbiil Orígenes te kuxin ta siglo II sok III jich la stsʼibay: «Te jchʼuunjeletik yuʼun Cristo maba ya skʼanik te ya staik mukʼ yaʼtelik ta stojol ajwaliletik».

¿Yuʼunbal ya skʼan ya yal te ya jkʼan jachkotik kʼop te bitʼil maba ya jchʼikbakotik ta politicae? Maʼuk. Te machʼatik mukʼ yaʼtelike maba ya skʼan ya xiwik ta swenta-abi, melel te joʼonkotike lamalnax koʼtankotik. Akʼa kiltik jun informe te la yichʼ lokʼesel ta yaʼbilal 2001 yuʼun te Academia Nacional de Ciencias de Ucrania. Ta swenta te maba ya jchʼikbakotik ta politicae jich la yal: «Bayalniwan te machʼatik ma lekuk ya yilik te stestigotak te Jehová ta swenta te maba ya xchʼik sbaik ta politicae. Ta melel, jaʼnix ta skaj-abi te la yichʼik chukel yuʼun te politicoetik yuʼun nazi jich bitʼil te comunista». Te informe la yalxan ta swenta te bitʼil la yichʼik utsʼinel yuʼun te comunista, te Testigoetik «spisil ora la yichʼik ta mukʼ te mantaliletik yuʼun te ajwaliletike», melel «spisil ora leknax la spas te yaʼtelik sok stsʼeel yoʼtan aʼtejik ta granjaetik soknix ta fabricaetik» sok «maʼyuk bin ora te ay bin chopol la spasik ta stojol te ajwalil comunista». Te informe la yalxan ta swenta te bintik schʼuunejik sok te bintik ya spasik te stestigotak te Jehová ta kʼajkʼal ini, «ni jpam nación ya skʼan ya sjinbey te bitʼil jun yoʼtan kuxulik sok te jun ayik te ants winiketike».

Naʼbeyaxan skʼoplal

¿Bin yuʼun te ma xbajtʼik ta guerra te stestigotak te Jehovae?

Bayal ants winiketik ya snaʼik te ma xbajtʼik ta guerra te stestigotak te Jehovae. Ilawil te yuʼune.

Ya xchiknaj ta ilel te smelelil kʼuxul oʼtanil kʼalal ay wokolil

Bayal ta pam nasionetik te stestigotak Jehová ya yakʼik koltayel ta yorail wokol.