Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

¿Bin yuʼun te stestigotak Jehová yan bitʼil ya spasik te Weʼel Uchʼel yuʼun Kajwaltik te bitʼil yantik relijione?

¿Bin yuʼun te stestigotak Jehová yan bitʼil ya spasik te Weʼel Uchʼel yuʼun Kajwaltik te bitʼil yantik relijione?

Te joʼonkotike jaʼ jtʼunojkotik te bin ya yal te Biblia ta swenta te bitʼil ya skʼan pasel te Snaʼojibal slajel te Jesuse, jaʼnix jich ya yichʼ naʼbeyel sba jich bitʼil «Weʼel Uchʼel yuʼun Kajwaltik» o smesa kajwaltik (1 Corintios 11:20). Jaʼukmeto, te bintik schʼuunejik sok te kostumbreetik yuʼun te yantik relijione maba lokʼem ta Biblia.

¿Bin yuʼun te ya yichʼ pasele?

Ya jpaskotik te Weʼel Uchʼel yuʼun Kajwaltik ta swenta te bitʼil la yakʼ sba ta lajel ta jtojoltik te Jesuse sok jich ya kakʼkotik ta ilel te ya kalkotik wokol yuʼune (Mateo 20:28; 1 Corintios 11:24). Te bin ya yichʼ pasel-abi, maba ya skʼan ya yal te chʼultesbile ni jaʼuk te ya yakʼbotik jun majtʼanil jich bitʼil te ya kichʼtik pasbeyel perdon yuʼun te jmultike. * Te Biblia ya yal te jaʼnax ya spasbotik perdon yuʼun jmultik te Dios teme ya kakʼtik schʼuunel koʼtantik ta stojol te Jesús, ma jaʼuk te kostumbreetik yuʼun te relijione (Romanos 3:25; 1 Juan 2:1, 2).

¿Jayjayeb buelta ya yichʼ pasel?

Te Jesús la yalbey ta mantal te jnopojeletik yuʼun te yakuk spasik te Weʼel Uchʼel yuʼun Kajwaltik, jaʼukmeto maba la yal te jayjayeb buelta ya yichʼ pasele (Lucas 22:19). Ay ants winiketik ya yalik te ya la skʼan ya yichʼ pasel ta jujun u, ay yantik ya yalik te jujun semana, jujun kʼajkʼal, cheʼoxeb buelta ta jun kʼajkʼal o jaʼ chikan te jayeb buelta ya skʼan ya spas te ants winike. Jaʼukmeto ay bin ya skʼan te ya kichʼtik ta wentae.

Te Jesús la spas te Weʼel Uchʼel yuʼun Kajwaltik ta skʼajkʼalelnix te kʼalal ya yichʼ pasel te kʼin Pascuae; cheʼoxeb ora ta patil la yichʼ milel (Mateo 26:1, 2). Jaʼ-abi ma jichuknax kʼot ta pasel. Te Biblia ya spajaltay sok te slajel te Jesús sok te tumin chij yuʼun Pascua (1 Corintios 5:7, 8). Te kʼin Pascua ya yichʼ pasel jun buelta ta jun jaʼbil (Éxodo 12:1-6; Levítico 23:5). Te sbabial jchʼuunjeletik la spasik te Snaʼojibal slajel te Jesús jun buelta ta jun jaʼbil, te testigoonkotik yuʼun Jehová jaʼnix jich ya jpastik-euk, melel jaʼ ya jtʼunkotik te bitʼilnix ya yal te Bibliae. *

Fecha sok ora

Jich te bin-utʼil la spas te Jesuse ma jaʼuknax ya skoltayotik ta snaʼel te jayjayeb buelta ya yichʼ pasele, jaʼnix jich ya yakʼ jnaʼtik te bin kʼajkʼal sok te jayeb ora ya yichʼ pasele. Te Jesús la spas ta 14 yuʼun nisán ta jaʼbil 33 te kʼalal yakix ta ijkʼubel-a te kʼinale, jichnix bitʼil ta kalendario yuʼun u te ay ta Bibliae (Mateo 26:18-20, 26). Te testigoonkotik yuʼun Jehová ya jpaskotik jun buelta ta jun jaʼbil te Snaʼojibal slajel te Jesuse, jaʼnix ya jtʼunkotik te bitʼil la spasik te sbabial jchʼuunjeletike. *

Te 14 yuʼun nisán ta jaʼbil 33 kʼot skʼajkʼalel ta viernes, jaʼukmeto ma pajaluk skʼajkʼalel ya xkʼot ta jujun jaʼbil. Swenta ya jnaʼtik te bin kʼajkʼal ya xkʼot te 14 yuʼun nisán, te testigoonkotik yuʼun Jehová jaʼ ya jtuunteskotik te bitʼil la yichʼ tʼunel te ajtal ta skʼajkʼalel te Jesuse, ma jaʼuk te kalendario yuʼun judioetik ta kʼajkʼal ini. *

Te pan sok vino

Te bin yachʼil la yichʼ pasel ini, te Jesús la stuuntes te pan te ma yichʼoj levadura sok te tsajal vino te sobrail weʼelil yuʼun te kʼin Pascua (Mateo 26:26-28). Ta swenta-abi, te joʼonkotike ya jtuunteskotik te pan te ma yichʼoj levadura sok te maʼyuk bin kapbil-ae, soknix te tsajal vino, te ma jaʼuk te yaʼlel tsʼusub te ma pajubtesbile ni jaʼuk te vino te yichʼoj asukar, trago, jaʼmaletik o yantikxan spoxil.

Ay relijionetik te ya stuuntesik pan te pajubtesbile. Jaʼukmeto, te levadura bayal buelta ya yalbey skʼoplal ta Biblia te jaʼ señail mulil sok te bin boloben skʼoplale (Lucas 12:1; 1 Corintios 5:6-8; Gálatas 5:7-9). Jaʼ yuʼun te pan te ma yichʼoj levadura sok te maʼyuk bin kapbil-ae, jaʼ señail sbakʼetal te Jesús te toj stukele (1 Pedro 2:22). Ay yantik relijion te ya stuuntesik yaʼlel tsʼusub ma stuuntesik te tsajal vinoe, jaʼukmeto ma jichuk ya yal te Bibliae. Jich ya spasik ta skaj te ya yalik te malaj xjuʼ ta uchʼel te vino, jaʼ-abi maba jich ya yakʼ ta nopel te Bibliae (1 Timoteo 5:23).

Jaʼnax jun señail, manix jaʼuk-a te sbakʼetal sok schʼichʼel te Jesuse

Te pan te ma yichʼoj levadura sok te tsajal vino te ya yichʼ tuuntesel ta Snaʼojibal slajel te Jesuse, jaʼnax jun señail te sbakʼetal sok schʼichʼel te Jesuse. Maba ya xkʼatpʼuj ta sbakʼetal sok ta schʼichʼel te Jesús jich bitʼil ya snopik chaʼoxtul ants winiketik. Jaʼnix jich maba ya skap sba te sbakʼetal sok te schʼichʼele. Akʼa kiltik te bin ya yal te Biblia ta swenta-abi.

  • Te lajuk yalbey ta mantal Jesús te jnopojeletik yuʼun te ya yichʼ uchʼbeyel te schʼichʼele, jich kʼoem te la yakʼ skʼaxuntaybeyik smantal Dios ta swenta te ma xjuʼ ta tuuntesel te chʼichʼe (Génesis 9:4; Hechos 15:28, 29). Jaʼ-abi ma snujpʼuk ta pasel, melel te Jesús maba ya yakʼ ta kʼaxuntaybeyel smantal Dios ta swenta te chʼichʼ te chʼultesbile (Juan 8:28, 29).

  • Te jpuk-kʼopetike manix jaʼuk la yuchʼbeyik-a te schʼichʼel te Jesús ta ajkʼabal-abi, jaʼnix la yal te Jesús te ya yichʼ malbeyel te schʼichʼele, la yakʼ ta naʼel te mato yichʼojuk milel-ae (Mateo 26:28).

  • Te Jesuse «jmehl nax xtaluc» yakʼ sba ta lajel (Hebreos 9:25, 26). Te yuʼunuk ya xkʼatpʼuj ta sbakʼetal sok ta schʼichʼel te pan sok te vino te kʼalal ya yichʼ pasel ta jujun buelta te Weʼel Uchʼel yuʼun Kajwaltike, te machʼatik ta sweʼik te pan sok te ya yuchʼik te vinoe jich kʼoem te ya yakʼulanik ta lajel jujun buelta te Jesuse.

  • Te Jesús la yal: «pasahic ini scuenta jnaʼojibal», maba la yal «pasaik ini yuʼun jich ya awakʼulanonik ta lajel» (1 Corintios11:24).

Te ants winiketik te schʼuunejik te ya xkʼatpʼuj ta sbakʼetal sok ta schʼichʼel Jesús te pan sok te vinoe, jaʼ stʼunojik te bitʼil kʼasesbil cheʼoxeb textoetik yuʼun Biblia. Jun ejemplo, bayal versión yuʼun Biblia kʼasesbil ta swenta te bin la yal Jesús yuʼun te vinoe: «Ha jch’ich’el ini» (Mateo 26:28). Jaʼukmeto te kʼopetik la yal te Jesús ya xjuʼ ya yichʼ kʼasesel jich ini: «Jaʼ jchʼichʼel kʼoem ini» o «jaʼ señail jchʼichʼel ini». *Te Jesús la stuuntes señail kʼopetik jichnix bitʼil la stuuntes te kʼalal nojpteswane (Mateo 13: 34, 35).

¿Machʼatik ya sweʼik te pan sok ya yuchʼik te vinoe?

Te kʼalal ya spasik te Weʼel Uchʼel yuʼun Kajwaltik te stestigotak Jehovae, maʼyuk bayal ta tul te machʼatik ya sweʼik te pan sok ya yuchʼik te vinoe. ¿Bin yuʼun?

Ta swenta te la smal schʼichʼel te Jesuse la spas «yach’il chapbil-c’op» jaʼ sjelol kʼot te chapbilkʼop la spas Jehová sok te antiguo lum Israele (Hebreos 8:10-13). Te machʼatik ochemik ta chapbilkʼop ini jaʼnax ya sweʼik te pan sok ya yuchʼik te vino ta Snaʼojibal slajel te Jesuse. Ma spisiluk te j-abatetik yuʼun Dios te jich ya xjuʼ ya spasike, jaʼnax te «mach’atic ic’bilic» yuʼun te Diose (Hebreos 9:15; Lucas 22:20). Te j-abatetik yuʼun Dios ini yame sjokinik ta Ajwalinel te Jesucristo ta chʼulchan. Te Biblia ya yal te jaʼnax 144,000 ya yichʼik te majtʼanil ini (Lucas 22:28-30; Apocalipsis 5:9, 10; 14:1, 3).

Te «tut jtsohb» tuminchijetik yame sjokinik ta Ajwalinel te Jesuse, jaʼukmeto jteb ma jpisiltikuk tey ochemotik-a te banti «cʼax tsobolic» te ya xkuxinik jilel ta Balumilal ta sbajtʼel kʼinale (Lucas 12:32; Apocalipsis 7:9, 10). Manchukme te machʼatik ya xjilik ta Balumilal maba ya sweʼik te pan sok ya yuchʼik te vino, jaʼukmeto ya xkʼotik ta Snaʼojibal slajel te Jesuse yuʼun jich ya yakʼik ta ilel te ya yalik wokol yuʼun te laj ta jwentatik te Jesuse (1 Juan 2:2).

^ párr. 4 Te Libro El Espíritu Santo, la Iglesia y los sacramentos jich ya yal ta pajina 12: «Te Biblia maba ya stuuntes te kʼopil sacramento: ya yalbey skʼoplal te kʼopil misterio [...] Te Nuevo Testamento ma jichuk ya yal, jaʼukmeto ya yalbey skʼoplal misterio te bautismo sok te Eucaristía [Weʼel Uchʼel yuʼun Kajwaltik]».

^ párr. 7 Ilawil The New Schaff-Herzog Encyclopedia of Religious Knowledge, volumen IV, pajina 43-44, sok McClintock and Strong’s Cyclopedia, volumen VIII, pajina 836.

^ párr. 9 Ilawil The New Cambridge History of the Bible, volumen 1, pajina 841.

^ párr. 10 Te kalendario judío ta kʼajkʼal ini jaʼ ya yakʼ ta naʼel te bin kʼajkʼalil ya xkʼot te sbabial kʼajkʼal yuʼun te u nisán ta luna nueva astronómica (yuninal u), jaʼukmeto ma jaʼuk la stuuntesik ta sbabial siglo te kalendario-abi. Te judioetik ta namey kʼinal snaʼojik-a te ya xjajch te u nisán te kʼalal ya chiknaj te yuninal u ta Jerusalén, jaʼ-abi ya xjuʼ ya xkʼot ta pasel te kʼalal kʼaxemix cheʼoxeb kʼajkʼal-a ta luna nueva astronómica. Jaʼ jun swentail te bitʼil ma pajaluk ya xkʼot skʼajkʼalel te Snaʼojibal slajel te Jesús te ya spasik te stestigotak Jehová sok te kʼin Pascua yuʼun te judioetik ta kʼajkʼal ini.

^ párr. 20 Ilawil te Biblia ta yantik versión: A New Translation of the Bible, de James Moffatt; The New Testament—A Translation in the Language of the People, de Charles B. Williams; sok The Original New Testament, de Hugh J. Schonfield.