Ochan ta banti te bintik yichʼoje

Ochan ta banti bintik jujunchajp yichʼoje

sTestigotak te Jehová

tseltal

Te testigoetik yuʼun Jehová, ¿yabal yijkʼitayik ta skʼoponel te machʼatik maba ayikix ta srelijionike?

Te testigoetik yuʼun Jehová, ¿yabal yijkʼitayik ta skʼoponel te machʼatik maba ayikix ta srelijionike?

Maba ya kijkʼitaykotik ta skʼoponel te machʼatik yichʼojik jaʼ jich bitʼil testigoetik yuʼun Jehová ta swentanax te ya yijkʼitayik ta scholel skʼop Dios sok te tsoblejetik ya jpaskotik ta congregacione. Ya jpaskotik tulan yuʼun ya jmukʼubtesbeytik te schʼuunel yoʼtanike sok te yakuk sujtik tal ta congregacione.

Te kʼalal jtul Testigo te yichʼoj jaʼ te ya spas tulan mulile, ya xjuʼ ya yichʼ lokʼesel ta congregación. Jaʼ-abi ma orauknax jich ya yichʼ pasel. Teme kʼayemix ta skʼaxuntayel te mantaliletik yuʼun te Biblia sok teme maba ya sujtes yoʼtane ya yichʼ lokʼesel ta congregación, jich maba ya yichʼix kʼoponel-a. Te Bibliae jich jamal ya yal: «Loqʼuesa ta awohlilic te machʼa cʼax chopol bin spasoje» (1 Corintios 5:13).

¿Bin ya xkʼot ta pasel teme ay jtul winik te ya yichʼ lokʼesel ta congregación, jaʼukmeto testigo yuʼun Jehová stukel te yinam sok te yal snichʼnabe? Manchukme maba junax ayikix ta swenta te schʼuunel yoʼtanike, yan stukel te bitʼil ya yil sbaik jich bitʼil familia maba ya xjelon stukel. Te bitʼil ya yil sba sok te yiname soknix te yal snichʼnab maba ya xjelon.

Te machʼatik yichʼoj lokʼesel ta congregacione ya xjuʼ ya xkʼotik ta tsoblejetik kuʼunkotik, jaʼnix jich ya xjuʼ ya yichʼ akʼbeyel koltayel yuʼun te ancianoetik ta congregación teme jich ya skʼanike. Te bin swenta-abi, yuʼun jich ya xjuʼ ya spasxan te bintik ya yichʼ kʼambeyel swenta ya xchaʼoch ta testigo yuʼun Jehová. Te machʼatik lokʼesbil ta congregación te ya yijkʼitayik ta spasel te bintik chopole sok te ya yakʼik ta ilel ta skuxlejal te mantaliletik yuʼun te Bibliae, jichme xjuʼ ya xchaʼoch tal ta congregación.