Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

TE J-ILKʼINAL TA TOYOL (TE YA YICHʼ NOPEL) JUNIO 2016

Te winik te yichʼoj te aʼtejibal yuʼun tsʼibajel jaʼ skʼoplal te Jesús. Jaʼ te machʼa ya yakʼbey seña kʼoem te ants winiketik te ya xkolik jilele

Te bintik ya sjojkʼoyik te machʼatik ya skʼopon te june

Te bintik ya sjojkʼoyik te machʼatik ya skʼopon te june

Ta jun najalsitil, te Ezequiel la yil jtul winik te yichʼoj ta skʼab aʼtejibal yuʼun tsʼibajel sok waktul winiketik te yichʼojik aʼtejibal yuʼun jinel. ¿Machʼatik skʼoplal-abi?

Jaʼ skʼoplal te jtsob chʼul-abatetik te la sjinik te Jerusalén te jaʼnix jich ya sjinik spisil te bintik ay ta skʼab te Satanás ta Armagedón. Te bin ya yichʼ albeyel skʼoplal-abi yachʼilto. ¿Bin yuʼun la jeltik te bin la yichʼ albeyel skʼoplal ta nail talele?

Jteb ma sta te jaʼbil 607 te kʼalal mato jaʼuk jkʼajkʼaleltik-ae (m.j.jkʼ.), te Jehová la yakʼbey yil te Ezequiel te bin ya xkʼax ta stojol te lum Jerusalén kʼalal mato yichʼoj lajinel-ae. Ta najalsitil-abi, te Ezequiel la yil te ants winiketik yakik ta spasel te bin  chopole. Ta patil la yil waktul winiketik te «yichʼoj ta scʼabic yaʼtejibic yuʼun jinel». Soknix la yil «jtuhl winic te slapoj saquil lino-pacʼ, ay aʼtejibal yuʼun tsʼihbajel» (Ezequiel 8:6-12; 9:2, 3). Te Jehová jich la yalbey te winike: «Cʼaxan ta yohlil te pueblo, ha te Jerusalén, aʼbeya seña ta stiʼba te machʼatic ya xʼahcanajic soc ya xʼawonic ta scaj spisil te bintic ilobtic sba te ya yichʼ pasel tey a». Jichnix te waktul winiketik te yichʼojik aʼtejibal yuʼun jinel la yichʼik albeyel yuʼun Jehová te akʼa smilik spisil te machʼatik maba yichʼojik seña ta stiʼbaike (Ezequiel 9:4-7). ¿Bin ya jnoptik ta swenta te najalsitil-abi? ¿Machʼa-a te winik te yichʼoj aʼtejibal yuʼun tsʼibajele?

Te albilkʼop-abi jaʼ la yal te Ezequiel ta yaʼbilal 612 (m.j.jkʼ.). Joʼeb jaʼbil ta patil kʼot ta pasel ta sbabial buelta, kʼalal te Jehová la yakʼ ta jinel te Jerusalén ta skʼab te Babilonia. Jich te Dios la stuuntes te lum Babilonia yuʼun ya yakʼbey kastigo te lum yuʼun te maba ya schʼuunik mantale (Jeremías 25:9, 15-18). Jaʼukmeto ¿bin kʼot ta stojol te judioetik te jun yoʼtan yakʼoj sbaik ta stojol Dios te ya x-awunik ta skaj te bintik chopol yak ta kʼaxel ta Jerusalene? Te Jehová ay bin la spas swenta jich kolik jilel-a.

Ta najalsitil-abi, te Ezequiel maʼyuk machʼa la yakʼbey seña ta smelelil sok maba koltaywan ta slajinel te Jerusalene. Melel jaʼik te chʼul-abatetik te la swentainik te jinel-abi. Jich yuʼun te albilkʼop-abi ya yakʼ kiltik te bin ya xkʼax ta chʼulchane. Te Jehová la yalbey te chʼul-abatetik te akʼa swentainik te ya yichʼik lajinel te machʼatik maba jun yoʼtan ya yakʼ sbaik ta stojol Dios sok te ya yilik te machʼatik jun yoʼtan ya yakʼ sbaik swenta maba ya yichʼik lajinel. *

Te albilkʼop-abi ya xkʼot ta pasel ta schebal buelta. ¿Bin-utʼil sok bin-ora ya xkʼot ta pasel? Ta nailto talel, te junetik te lokʼemik ta Biblia kuʼunkotike, ya scholbeyik skʼoplal-a te bitʼil te winik yichʼoj te  aʼtejibal yuʼun te tsʼibajel jaʼlaj ya skʼan ya yal te jtsojb te machʼatik tsabilik ya xbajtʼik ta chʼulchan te ayikto liʼ ta Balumilale. Jichnix ya scholbeyik skʼoplal-a te ya yichʼik te seña ta stiʼba te ants winiketik swenta skolelik te kʼalal ya schʼam yaʼiyik sok ya smulanik te lek yachʼil kʼope. Jaʼukmeto la kiltikix te ya skʼan ya jeltaytik te bitʼil ya yichʼ cholbeyel skʼoplale. ¿Bin yuʼun? Melel mato jaluk la jnoptik te bin ya yal te sjun Mateo 25:31-33 sok la kiltik te jaʼ Jesús te machʼa ya yichʼ ta kʼop te ants winiketike, te jaʼnix jich ya spas ta pajel chaʼbej kʼalal ya xtal te tulan wokolile. Ta yorail-abi, ya yil machʼatik-a te jich kʼoem te bitʼil tuminchijetik sok tentsunetik. Te tuminchijetik kuxul ya xjilik stukel, jaʼukmeto te tentsunetik ya yichʼik lajinel.

Jaʼ yuʼun, ¿bin ya jnoptik ta swenta te najalsitil yuʼun te Ezequiel? Kiltik joʼchajp te bin ya snojptesotike:

  1. Kʼalal mato yichʼoj lajinel-a te Jerusalene, te Jehová la stuuntes te Ezequiel, Isaías sok te Jeremías te jich kʼotik bitʼil jkananetik swenta ya sjultesbey ta yoʼtanik te ants winiketik te bin ya xkʼot ta pasel ta stojol te lum-abi. Ta ora ini, te Jehová ya stuuntes chaʼoxtul te machʼatik tsabilik ya xbajtʼik ta chʼulchan swenta ya snojptes te j-abatetik yuʼun sok ya sjultesbey ta yoʼtan te ants winiketik te bin ya xkʼot ta pasel, jich bitʼil te mato xjajch te tulan wokolile. Ta melel, te aʼtelil yuʼun sjultesbeyel ta yoʼtan te ants winiketik jaʼnix jich ya spasik-euk te machʼatik ayik ta sna te Cristo, te jaʼik spisil te j-abatetik yuʼun Diose (Mateo 24:45-47).

  2. Te Ezequiel maba la yakʼbey junuk seña ta stiʼba te ants winiketik te ya sta skolelike. Jaʼnix jich ta ora ini, te j-abatetik yuʼun Dios maba ya yakʼbeyik seña ta stiʼba te ants winiketike. Jaʼnax ya scholik skʼop Diose sok ya sjultesbey ta yoʼtanik ta swenta te bin ya xkʼot ta pasel ta pajel chaʼbeje. Ya yichʼik koltayel yuʼun te chʼul-abatetik ta spasel te aʼtelil-abi ta swolol balumilal (Apocalipsis 14:6).

  3. Ta skʼajkʼalel te Ezequiel, te machʼatik kolik jilel maba yichʼojik jun seña ta smelelil ta stiʼbaik. Ta ora ini te machʼatik ya xkolik jilel ta tulan wokolile, jichnix maba ya yichʼik jun seña ta smelelil ta stiʼbaik. ¿Bin ya skʼan ya spas te ants winiketik yuʼun jich ya xkolik jilel? Kʼalal ya yichʼik albeyel te bin ya xkʼot ta pasele, ya skʼan ya snopik stʼunel te ejemplo yuʼun Cristo, yakʼel sba ta abatinel ta stojol Dios sok skoltayel te machʼatik tsabilik te ya xbajtʼik ta chʼulchan ta scholel te lek yachʼil kʼop yuʼun te Ajwalinele (Mateo 25:35-40). Kʼalal yak ta kʼaxel-a te tulan wokolile, te ants winiketik-abi ya yichʼik te seña kʼoem, te ya skʼan ya yal te ya yichʼik tsael yuʼun ya xkolik jilele.

  4. Te winik te yichʼoj te aʼtejibal yuʼun tsʼibajel jaʼ skʼoplal te Jesús. Te kʼalal yak ta kʼaxel-a te tulan wokolile, ya yakʼbey seña kʼoem te machʼatik ochem tey ta ipal ants winiketik kʼalal ya yichʼ ta kʼop sok te ya yal te jaʼ tuminchijetike. Jich yuʼun, yame xjuʼ staik skuxlejalik ta sbajtʼel kʼinal liʼ ta Balumilale (Mateo 25:34, 46). *

  5. Ta ora ini, te waktul winiketik te yichʼojik aʼtejibal yuʼun jinel jaʼ skʼoplal te jtsob chʼul-abatetik te swoloj te Jesuse. Jaʼik te machʼatik nopolix ya slajinik spisil te nasionetik sok ya slajinbeyik skʼoplal te bintik chopole (Ezequiel 10:2, 6, 7; Apocalipsis 19:11-21).

Te joʼchajp te bintik la kiltikixe, ya skoltayotik ta yakʼel smukʼul koʼtantik ta stojol Jehová te maba ya slajin te j-abatetik te jun yoʼtanik ta stojol jich bitʼil ya slajin te chopol ants winiketike (2 Pedro 2:9; 3:9). Sok ya yakʼ juluk ta koʼtantik te kʼax mukʼ skʼoplal te ya jcholtik skʼop Dios ta ora ini. Spisil te ants winiketik yame skʼan ya yaʼiyik te bin ya xkʼot ta pasel jich bitʼil te mato talem te slajibal te bintik chopole (Mateo 24:14).

^ párr. 6 Te chaʼoxtul machʼatik kuxul jilike jaʼik te stsʼumbal Recab, Ébed-mélec te etíope-winik sok Baruc te jtsʼibajel yuʼun Jeremías (Jeremías 35:1-19; 39:15-18; 45:1-5). Jaʼukmeto maba la yichʼik seña ta smelelil ta stiʼbaik. Melel te seña la yichʼik kʼoeme, jaʼ la skʼan la yal te maba la yichʼik lajinele.

^ párr. 12 Te machʼatik tsabilik ya xbajtʼik ta chʼulchan te jun yoʼtan la yakʼ sbaik ta stojol Dios maba puersa ya yichʼik te seña kʼoem swenta ya xkolik jilel. Stukelike ya yichʼik te slajibal sello kʼalal mato lajemik-ae o ya yichʼik kʼalal mato xjajch-a te tulan wokolile (Apocalipsis 7:1, 3).