Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Te J-ilkʼinal ta toyol (te ya yichʼ nopel)  |  Junio yuʼun 2016

Maba ya kakʼ jkʼojchin jbatik yuʼun te bintik maba lek ya spas te yantike

Maba ya kakʼ jkʼojchin jbatik yuʼun te bintik maba lek ya spas te yantike

«Talel cʼaxel [...] pasbeya abahic perdón.» (COLOSENSES 3:13)

KʼAYOJIL 121 SOK 75

1, 2. ¿Bin la yalbey jilel skʼoplal te Jehová ta swenta te ya xchʼi te lum yuʼune?

TA ORA ini ay jtsob ants winiketik te kʼux ta yoʼtanik te Dios sok ya skʼan ya x-abatinik ta stojol. Naʼbilik sba jich bitʼil stestigotak Jehová. Ta melel aynix te banti ya xchʼayike, jaʼukmeto te Jehová ya stojobtes sok ya yakʼbey bendision sok schʼul espiritu. Kiltik bin-utʼil spasoj.

2 Ta yaʼbilal 1914, jtebnax ants winiketik ya yichʼik ta mukʼ-a te Jehová. Jaʼukmeto jich bitʼil yakʼoj bendision te Jehová ta swenta scholel skʼop Dios, bayal miyon ta tul snopojik te smelelil kʼop yuʼun te Biblia sok yakʼoj sbaik ta testigo yuʼun Jehová. Ta swenta te ya xchʼi te lum yuʼun te Diose, jich la yal te albilkʼop ini: «Te machʼa tut, ta mil ya xcʼoht; te ihtsʼinal ya xcʼoht ta jun nación te ay yip. Hoʼon Jehovahon, ta yorahil ya jcʼohtes ta pasel ta ora» (Isaías 60:22). Schʼuunej koʼtantik-abi te jich yak ta kʼoel ta pasel ta ora ini. Te lum yuʼun te Jehová pajal sok jpam mukʼul nasion te kʼaxem ta ocho miyon ants winiketik. Jaʼ yuʼun jaʼ bayaloktikxan-a te bitʼil tsobol nasionetik.

3. ¿Bin-utʼil yakʼoj ta ilel kʼuxul oʼtanil te lum yuʼun te Diose?

 3 Ta slajibal kʼajkʼal te ayotike, te Jehová skoltayoj te j-abatetik yuʼun swenta ya stsakxan yip te bitʼil kʼux ya yaʼiy sbaike. «Jcʼuxul-oʼtanil stuquel te Diose» sok ya skʼan te bitʼil te j-abatetik yuʼun ya stʼumbeyik te stalele (1 Juan 4:8XCD). Te Jesús la yal ta mantal ta stojol te jnopojeletik yuʼun te kʼuxuk ya yaʼiy sba ta yoʼtanik. Sok jich la yal: «Hich ya snaʼic spisil ants-winiquetic te haʼex jnopojelex cuʼun teme talel cʼaxel cʼux yac awaʼiy aba ta awoʼtanique» (Juan 13:34, 35). Ta ora ini, te lum yuʼun Jehová yakʼoj ta ilel te kʼuxul oʼtanil manchukme ay guerraetik. Jich bitʼil, ta 2 Guerra Mundial jteb ma sta 55 miyon ants winiketik lajik yuʼun-abi. Jaʼukmeto te Testigoetik maʼyuk machʼa la smil stukelik ta guerra-abi (kʼopona te sjun Miqueas 4:1, 3). Jaʼ-abi ya xkoltayotik yuʼun te maba ya xkʼot ta swentaik te schʼichʼel spisil te ants winiketike (Hechos 20:26).

4. ¿Bin yuʼun chajpnax ta ilel-a te bitʼil yak ta chʼiel te lum yuʼun te Diose?

4 Ta ora ini te lum yuʼun te Dios yak ta chʼiel manchukme ay jtul skontra te bayal yuʼele. Te kontra ini jaʼ te Satanás «te dios yuʼun te bahlumilal ini» (2 Corintios 4:4). Te Satanás jaʼ ya swentain spisil te organisasionetik ta swenta politika soknix te Internet, telebision sok yantikxan, ta swenta-abi ya skʼan ya skom te scholel skʼop Diose. Jaʼukmeto ma xjuʼ yuʼun skomel te aʼtelil-abi. Snaʼoj «te nopol ya xlaj ora yuʼun», jaʼ yuʼun yak ta spasel tulan swenta ya kijkʼitaytik te bitʼil ya x-abatinotik ta stojol te Jehovae (Apocalipsis 12:12).

¿JUNBAL KOʼTANTIK YA KAKʼ JBATIK KʼALAL AY YA XCHʼAYIK TE YANTIKE?

5. ¿Bin yuʼun ya xjuʼ ay bin chopol ya spasbotik te yantike? (Ilawil te lokʼomba ta sjajchibal te articulo.)

5 Te j-abatotik yuʼun Dios jnaʼojtik te tulan skʼoplal te kʼuxuk ta koʼtantik te Dios sok te yantik ants winiketik. Te Jesús jich la yal: «Cʼux laj me xawaʼiy te Cajwaltic Dios ta spisil awoʼtan, ta spisil achʼuhlel soc ta spisil apʼijil. Ha te shahchibal mandaril soc te ha mucʼ scʼoblal. Te schebal ha nix hich pajal soc: Cʼux me xawaʼiy ta awoʼtanic apat-axuhc hich te bin utʼil cʼux yac awaʼiy aba» (Mateo 22:35-39). Jaʼukmeto te Biblia ya yalbotik te maba tojotik ta skaj te mulil la spas te Adán (kʼopona te sjun Romanos 5:12, 19). Jaʼ swentail-abi te ayniwan jtul hermano ta kongregasion ya spas o ya yal te bin maba lek ya kaʼiy jbatik yuʼune. ¿Bin ya jpastik ta swenta-abi? ¿Tulanbal ya x-ayin te skʼuxul koʼtantik ta stojol te Jehovae? ¿Junbal koʼtan ya kakʼ jbatik ta stojol Jehová sok ta stojol te lum yuʼune? (Ilawil te recuadro «¿Bin ya skʼan ya yal?»). Te Biblia ya yalbey skʼoplal chaʼoxtul j-abatetik yuʼun Dios te ay bin la yalik o la spasik te maba lek la yaʼiy sbaik yuʼun te yantike. Kiltik te bintik ya xjuʼ ya jnoptik ta swenta te bin kʼax ta stojolike.

¿Binwan yaʼiyel la kaʼiy jbatik yuʼun te ayuklaj kuxinotik ta Israel ta skʼajkʼalel te Elí sok te snichʼnabe? (Ilawil te parrafo 6)

6. ¿Bin-a te maba lek la spas te Elí?

6 Jnop kaʼiytik te bin kʼax ta stojol te Elí. Jaʼ mukʼul sacerdote ta Israel-a, te chaʼtul snichʼnab maba la schʼuunik spasel te mantaliletik yuʼun te Jehovae. Te Biblia ya yal te chopolik te snichʼnab te Elí sok maba ya yichʼik ta mukʼ te Jehovae (1 Samuel 2:12). Te Elí snaʼoj te yakik ta spasel te bin kʼax chopol te snichʼnabe. Jaʼukmeto maba lek te bin la spas te bitʼil maba la stsits te snichʼnab te bitʼil ya skʼan pasele. Ta patil, te Jehová la yakʼbey kastigo te Elí sok te chaʼtul snichʼnabe. Soknix, ni jtuluk te stsʼumbal la yichʼ akʼbeyel yuʼun ya xkʼot ta mukʼul sacerdoteil (1 Samuel 3:10-14). Jnop kaʼiytik te ayotik ta kuxinel ta skʼajkʼalel te Elí sok ya jnaʼtik te maba ya skom te snichʼnab ta spasel te bintik kʼax maba leke. ¿Bin ya jpastik? ¿Yabal kakʼ xpejkʼaj schʼuunel koʼtantik ta stojol Jehová sok yabal kijkʼitaytik?

7. 1) ¿Bin tulan mulil la spas te David? 2) ¿Bin la spas te Dios ta stojol?

 7 Kalbeytik skʼoplal ta swenta te David. Kʼax kʼux aʼiybil ta oʼtanil yuʼun te Jehová, melel ay lekil taleliletik yuʼun-a (1 Samuel 13:13, 14; Hechos 13:22). Jaʼukmeto te David la spas tulan muliletik. Jich bitʼil, ta jun buelta la sjokin ta wayel te yinam jtul soldado yuʼun, te Urías sbiil te ay ta jun guerra-a. Te antse la sta yal. Te David ma la skʼan te ay machʼa ya snaʼ te bin la spase, jaʼ yuʼun la stikun ta ikʼel te Urías yuʼun ya yalbey te akʼa bajtʼuk ta sna. Te bin la skʼan te David ta stojol te Urías jaʼ te yakuk sjokin ta wayel te yiname. Jich te ants winiketik ya skuyik-a te jaʼ snichʼan te Uriase. Jaʼukmeto te Urías ma la skʼan bael ta sna. Jaʼ yuʼun te David ay bin la spas yuʼun jich ya yichʼ milel ta yan guerra te Uriase. Te David sok te sfamiliae, bayal la sta swokolik yuʼun te tulan mulil la spase (2 Samuel 12:9-12). Jaʼukmeto te Jehová la snaʼbey yoʼbolil sba sok la spasbey perdon. Snaʼoj te ya skʼan ya spas te bin lek te Davide (1 Reyes 9:4). Ayuklaj te bitʼil kuxinotik ta skʼajkʼalel te Davide, ¿bin-utʼil la kaʼiy jbatik yuʼun te bin la spas te David te jichuke? ¿Labal kijkʼitaytik te bitʼil ya x-abatinotik ta stojol te Jehovae?

8. 1) ¿Bin-a te jamal la yal te Pedro te maba la skʼotes ta pasele? 2) ¿Bin yuʼun te Jehová la yakʼbeyxan aʼteliletik manchukme la spas te bin maba leke?

8 Te yan ejemplo ya yal te Biblia jaʼ ta stojol te jpuk-kʼop Pedro. Te Jesús la stsa yuʼun ya xkʼot ta jtul jpuk-kʼop yuʼun. Jaʼukmeto te Pedro ay baeltik la yal o la spas te bintik maba leke. Jich bitʼil, ta jun buelta la yal ta jamal te maʼyuk bin-ora ya yijkʼitay te Jesuse, manchukme te yantik jich ya spasik (Marcos 14:27-31, 50). Jaʼukmeto te kʼalal la yichʼ tsakel bael te Jesuse, spisil te jpuk-kʼopetik la yijkʼitayik jilel, jaʼnix jich ijkʼitaywan te Pedroe. Ta patil oxeb buelta  la smuk ta yoʼtan te Jesuse (Marcos 14:53, 54, 66-72). Kʼaxto la smel yoʼtan yuʼun te bin la spase. Jaʼ yuʼun te Jehová la spasbey perdon sok la yakʼbeyxan aʼteliletik ta patil. Ayuklaj te jnopojelotik-a ta kʼajkʼal-abi sok te la kaʼiytik te bin la spas te Pedro, ¿labal smukʼulinxan koʼtantik te Jehovae?

Schʼuunej koʼtantik te bitʼil te Jehová ya spas te bin toj sok te leknax te bin ya spase

9. ¿Bin yuʼun ya awakʼ smukʼul awoʼtan ta stojol Dios te bitʼil spisil-ora toj te bin ya spase?

9 ¿Bin ya snojptesotik te ejemploetik-abi? Te ay chaʼoxtul j-abatetik yuʼun Jehová te ay spasojik te bin maba lek te jich yakʼojbeyik swokol te yantike. Teme jich ya xkʼax ta ora ini, ¿bin ya jpastik? ¿Yabal jkom jbatik ta stsobilanel jbatik sok yabal kijkʼitaytik te Jehová sok te lum yuʼune? ¿O yabal xjul ta koʼtantik te ya snaʼbey yoʼbolil sba Jehová te ants winik sok te yak ta yakʼbeyel tiempo yuʼun ya sujtes te yoʼtane? Jaxan ¿teme maba ya sujtes yoʼtan ta swenta te tulan mulil spasoje? ¿Yabal kakʼ smukʼul koʼtantik ta stojol Jehová te snaʼoj te bin yak ta kʼaxel sok te ya schajpan kʼalal jich ya skʼan pasele? Te Jehová ya xjuʼ ya slokʼes ta kongregasion te ants winik teme jich ya skʼan pasele. Jaʼukmeto spisil-ora ya skʼan smukʼulin koʼtantik Jehová te ya spas te bin toj sok te leknax te bin ya spase.

SPISILKUK-ORA JUNUK KOʼTANTIK

10. ¿Bin kʼot ta naʼel yuʼun Jesús ta swenta te bin maba lek la spas te Judas Iscariote sok te Pedroe?

10 Te Biblia ya yalbey skʼoplal bayal ta tul j-abatetik yuʼun Dios te jun yoʼtan la yakʼ sbaik ta stojol sok te lum yuʼune manchukme ay yantik te la spasik tulan muliletik. Te machʼa kʼax lekil ejemplo yuʼun-abi, jaʼ te Jesuse. Kʼalal och stsa te jpuk-kʼopetik yuʼune, sjunal ajkʼabal la skʼanbey koltayel te sTate. Jaʼukmeto akʼot ta kʼabal yuʼun jtul jpuk-kʼop, jaʼ te Judas Iscariote. Jaʼnix jich, te jpuk-kʼop Pedro la yal te maba ya snaʼbey sba te Jesuse (Lucas 6:12-16; 22:2-6, 31, 32). Te Jesús snaʼoj te ma jaʼuk smul te Jehová sok te yantik jnopojeletik te bin la spas te Judas Iscariote sok te Pedroe. Jaʼ yuʼun te Jesús nopol la yakʼ sba ta stojol te sTate sok jun yoʼtan la yakʼ sba ta abatinel ta stojol. Jaʼ yuʼun te Jehová la yakʼbey smajtʼan kʼalal la schaʼyakʼbey skuxlejal sok ta patil la yakʼ ta Ajwalil yuʼun te Ajwalinel yuʼun ta chʼulchan (Mateo 28:7, 18-20).

11. ¿Bin la yalbey jilel skʼoplal te Biblia ta swenta te j-abatetik yuʼun Dios ta ora ini?

11 Te ejemplo yuʼun te Jesús ya snojptesotik te jun koʼtan ya kakʼ jbatik ta stojol te Jehová sok te lum yuʼune. Sok ay cheʼoxeb swentail te bin yuʼun jich ya jpastike. Ya xjuʼ ya kiltik bitʼil te Jehová yak ta stojobtesbelotik ta slajibal kʼajkʼal ini. Ya skoltayotik ta scholel te smelelil kʼop ta swolol balumilal. Ta melel joʼotiknax te jich yakotik ta spasele. Jaʼnix jich jun-nax ayotik sok tseʼel koʼtantik ta swenta spisil te bin ya yakʼ jnoptik te Diose. Te Biblia la yalbey jilel skʼoplal ta swenta te j-abatetik yuʼun Dios te ya xbajtʼ sta stseʼelil yoʼtanik ta skaj te «yutsil yoʼtanic» (Isaías 65:14).

Maba lek sok maba stojiluk ta pasel te ya kijkʼitaytik te Jehová sok te lum yuʼun ta skaj te ay machʼa ay bin ya yal o ya spas te maba leke

12. ¿Bin-utʼil ya skʼan ya kiltik te bin maba lek ya spas te yantike?

12 Kʼax tseʼelnax koʼtantik, melel te Jehová ya stojobtesotik sok ya skoltayotik ta spasel bayal te bintik lek ta pasele. Te ants winiketik yuʼun te balumilal yuʼun Satanás maba tseʼel yoʼtanik stukel sok maʼyuk bin lek ya smaliyik ta pajel chaʼbej. Jich yuʼun te kʼalal ta kongregasion ay  machʼa ay bin maba lek ya spase, jnoptik te bin-utʼil ya skʼan ya kiltik sok bin yaʼiyel ya kaʼiy jbatik yuʼun. Ma jaʼuk yuʼun ya skʼan ya kijkʼitaytik te Jehová sok te lum yuʼune. Jaʼ-abi maba lek sok maba stojiluk ta pasel. Jaʼ ya skʼan te junuk koʼtan ya kakʼ jbatik ta stojol te Jehová sok akʼa jtʼuntik te tojobtesel yuʼune. Kiltik bin-utʼil ya xjuʼ ya jpastik.

¿BIN YAʼIYEL YA SKʼAN YA KAʼIY JBATIK YUʼUN?

13, 14. 1) ¿Bin yuʼun ya skʼan lamaluk koʼtan ya kakʼ jbatik sok te yantike? 2) ¿Bin-a te yaloj ta jamal Jehová te ya skʼan ya xjul ta koʼtantike?

13 ¿Bin ya skʼan ya jpastik teme jtul hermano ay bin ya yal o ya spas te ya slajinotike? Te Biblia ya yal te maba ya skʼan ya x-ilinotik ta oranax (Eclesiastés 7:9). Jpisiltik maba tojotik sok ay ya xchʼayotik. Jaʼ yuʼun ya skʼan lamaluk koʼtantik ta stojol te kermanotaktik sok akʼa juluk ta koʼtantik te aynix bin ya yalik o ya spasik te maba leke. Jaʼnix jich maba lek te spisil-ora ya jnaʼulantik te banti ya xchʼay te yantike, melel yaniwan xchʼay stseʼelil koʼtantik te bitʼil ya x-abatinotik ta stojol Jehová. Te binxan mel-oʼtantik sbae, jaʼ te ya xjuʼ xpejkʼaj schʼuunel koʼtantik ta stojol sok yaniwan kijkʼitaytik te organisasion yuʼun te Jehovae. Jich maba ya x-abatinotikix ta stojol sok maba ya jmaliytikix te bitʼil ya xkuxinotik ta achʼ balumilale.

14 Jich yuʼun ¿bin ya xjuʼ ya skoltayotik swenta ya x-abatinotik ta stojol Dios sok stseʼelil koʼtantik kʼalal ay bin chopol ya spasbotik te yantike? Ya skʼan te spisiluk-ora juluk ta koʼtantik te bin yaloj ta jamal Jehová te ya yakʼ mukʼul-oʼtanil te jich ya yal: «Ya jpas yachʼil chʼulchan soc yachʼil bahlumilal. Te bin ay ta nahil mayuquix ta naʼel, jcʼaxel ma xnaʼotix» (Isaías 65:17; 2 Pedro 3:13). Te Jehová ya yakʼbotik te bendisionetik-abi teme jun koʼtan ya kakʼ jbatik ta stojole.

15. ¿Bin la yal te Jesús te ya skʼan ya jpastik te kʼalal ay bin maba lek ya yalbotik o ya spasbotik te yantike?

15 Ta melel mato ayotik ta kuxinel ta achʼ balumilal. Jaʼ yuʼun teme ay machʼa ay bin chopol ya yalbotik o ya spasbotike, akʼa jnop ta koʼtantik te bin ya skʼan Jehová te ya jpastike. Jich bitʼil, te Jesús la yal: «Como teme yac apasbeyic perdón te machʼatic ay smulic ta atojolic, ha nix hich ya spasbeyex perdón te Atatic ay ta chʼulchan. Pero teme ma ba yac apasbeyic perdón te machʼatic ay smulic ta atojolic, ha nix hich ma ba ya spasbeyex perdón yuʼun amulic te Atatique». Sok kʼalal te jpuk-kʼop Pedro la sjojkʼoybey te Jesús teme ya skʼan ya jpastik perdon «huqueb buelta», te Jesús jich la sjakʼ: «Ha to huqueb buelta ta lajlajuneb schanwinic». Te Jesús la snojptesotik te spisil-ora ya skʼan ya jpasbeytik perdon te yantike (Mateo 6:14, 15; 18:21, 22).

16. ¿Bin lekil talelil la yakʼ ta ilel te José?

16 Te bin kʼax ta stojol te José ya yakʼ jnoptik te bin-utʼil ya skʼan ya kaʼiy jbatik kʼalal ay machʼa ay bin chopol ya spasbotike. Te José sok te yijtsʼine jaʼiknax te chaʼtul snichʼnab te Jacob te la sta sok te Raquele. Te Jacob ayxan lajuntul snichʼnab, jaʼukmeto jaʼ kʼux-xan ta yoʼtan  te José te bitʼil yantike. Jaʼ yuʼun te sbankiltak te José tal sbikʼtal yoʼtanik yuʼun. Kʼaxto jich la yilayik te la schonik bael jich bitʼil jtul moso. Ikʼot bael ta Egipto yuʼun te yajwale. Kʼalal kʼaxemix bayal jaʼbile, te ajwalil yuʼun Egipto la yakʼ ta schebal ajwalil te José te bayal yip te mantaltesel yuʼun ta spisil te lume. Te ajwalil chajpnax la yil-a te José ta swenta te bintik lek spasoje. Kʼalal kʼax bael te jaʼbile, te sbankiltak te José kʼotik ta smanel weʼelil tey ta Egipto ta skaj te maʼyuk weʼelil tey ta lum banti ayik ta kuxinele. Maba la snaʼbeyik sba te José te kʼalal la yilike. Jaʼukmeto te José la snaʼbey sba te sbankiltake. Manchukme ay bin chopol la yichʼ pasbeyel yuʼun te sbankiltake, maba la yakʼtiklanbey kastigo. Jaʼnax la yakʼ ta prueba te sbankiltak yuʼun jich ya yil teme jelonix ta melel te stalelike. Kʼalal la yil te jelonemix stalelike, la yakʼ sba ta naʼel ta stojol te sbankiltak te jaʼ José te yijtsʼinike. Bayal jaʼbil ta patil, la yakʼbey smukʼul yoʼtanik sok jich la yal: «Ma me xiwex; hoʼon ya jmacʼlinex ta apisilic soc awal-anichʼanic» (Génesis 50:21).

17. ¿Bin yaʼiyel ya awaʼiy aba yuʼun te kʼalal ay machʼa ay bin ya yal o ya spas te maba leke?

17 Juluk ta koʼtantik te ya xchʼayotik ta jpisiltik, jaʼnix jich ay bin ya kaltik o ya jpastik te maba lek ta stojol te yantike. Jaʼ yuʼun, teme jnaʼojtik te ay machʼa ay bin chopol la jpasbeytike, akʼa jtʼuntik te tsitsel yuʼun te Biblia. Jkʼantik perdon sok jpastik tulan ta slekubtesbeyel yoʼtan (kʼopona te sjun Mateo 5:23, 24). ¿Mabal jichuk te ya jmulantik te kʼalal ya kichʼtik pasbeyel perdon? Jaʼ yuʼun ya skʼan ya jpastik perdon-euk. Te sjun Colosenses 3:13 ya yakʼbotik te tsitsel ini: «Talel cʼaxel cuhchuc awuʼunic soc pasbeya abahic perdón teme ay ya xhahch cʼop awuʼun soc te yane». Teme melel kʼux ta koʼtantik te kermanotaktike, maba chopol ya kaʼiyix jbatik yuʼun te bin maba lek la kichʼtik pasbeyele (1 Corintios 13:5). Teme ya jpastik perdon, jaʼnix jich ya spasbotik perdon te Jehovae. Jaʼ yuʼun, akʼa jnaʼbeytik yoʼbolil sba te yantike, jich bitʼil te Jehová ya snaʼ yoʼbolil jbatik-euke (kʼopona te sjun Salmo 103:12-14).