Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

TE J-ILKʼINAL TA TOYOL (TE YA YICHʼ NOPEL) JUNIO 2016

¿Yakbal kakʼbeltik slekubtes jtaleltik te Mukʼul Jpakʼojom kuʼuntike?

¿Yakbal kakʼbeltik slekubtes jtaleltik te Mukʼul Jpakʼojom kuʼuntike?

«Hich te bin utʼil te ahchʼal ay ta scʼab te jpacʼojom, hich ayex ta jcʼab.» (JEREMÍAS 18:6)

KʼAYOJIL 60 SOK 22

1, 2. 1) ¿Bin yuʼun kʼux ta oʼtanil yuʼun Dios te Daniel? 2) ¿Bin ya xjuʼ ya jpastik swenta spisil-ora ya jchʼuuntik mantal jich bitʼil te Daniele?

KʼALAL ayik ta chukel ta Babilonia te judioetike la yilik te nojel ta lokʼombaetik sok ants winiketik te ya yichʼik ta mukʼ te chopol espirituetike. Jaʼukmeto ay judioetik te jun yoʼtan la yakʼ sbaik ta stojol Jehová sok maba la yakʼ sbaik ta jeltayel stalelik yuʼun te ants winiketik ta Babiloniae. Tey ayik-a te Daniel sok te oxtul yamigotake (Daniel 1:6, 8, 12; 3:16-18). Te chantul keremetike jich la yilik bitʼil Jpakʼojom yuʼunik te Jehová sok jaʼnax la yichʼik ta mukʼ. Manchukme te Daniel jteb ma spisiluk kʼajkʼal kuxin ta yolil te chopol lum Babilonia, jtul chʼul-abat yuʼun Dios la yal te bayal kʼux ta oʼtanil o te mukʼ skʼoplale (Daniel 10:11, 19).

2 Ta namey kʼinal, te jpakʼojome ya xjuʼ ya yotses ta swotsʼojibal ajchʼal swenta ya spas-a te bin yilel ya smulane. Ta ora ini, te smelelil j-abatotik yuʼun te Jehová ya jnaʼtik te jaʼnax ay ta swenta slekubtesbeyel stalel te ants winiketik ta spisil nasion, melel jaʼ Ajwalil yuʼun te chʼulchan sok te Balumilale (kʼopona te sjun Jeremías 18:6). Jaʼnix jich ay ta swenta slekubtesel te jtaleltik ta jujuntule. Jaʼukmeto maba ya sujotik ta sjeltayel te jtaleltike. Te bin ya smulane, jaʼ te joʼotiknix ya jtatik ta nopel teme ya jkʼantik ya kakʼ jbatik ta lekubtesel jtaleltik yuʼune. Ta articulo ini, yame kiltik bin-utʼil  spisil-ora ya xjuʼ te jichotik bitʼil ajchʼal te kʼun ta wotsʼel yuʼun te Jehovae. Yame kakʼbeytik sujtib te oxeb jojkʼoyel ini: ¿Bin-a te maba ya skʼan ya jpastik swenta jich maba ya jpʼajtik te tsitsel yuʼun Dios sok ma xkʼatpʼujotik jich bitʼil ajchʼal te wokol ta wotsʼele? ¿Bin-utʼil ya xjuʼ ya jchʼijtestik taleliletik te ya skoltayotik swenta spisil-ora ya jchʼuuntik te mantal sok te jichukotik bitʼil ajchʼal te kʼun ta wotsʼele? ¿Bin-utʼil jun-nax ya x-aʼtejik te meʼil tatiletik sok te Jehová te kʼalal ya slekubtesbey stalelik te yal snichʼanike?

¿BIN MABA YA SKʼAN YA JPASTIK YUʼUN JICH MABA YA XTULANUB TE KOʼTANTIKE?

3. ¿Bintik-a te ya xjuʼ ya stulantes te koʼtantike? Ala junuk ejemplo.

3 Te sjun Proverbios 4:23 ya yal te bin-a te tulanxan skʼoplal ya skʼan kanantayele, jaʼlaj te koʼtantik melel tey ya xtal-a te jkuxlejaltike. Swenta maba ya xtulanub te koʼtantike, yame skʼan maba ya jpastik te bintik chopole, jich bitʼil te toybail, spasel mulil sok te maʼyuk schʼuunel koʼtantike (ilawil te recuadro «¿Bin ya skʼan ya yal?»). Teme maba ya stsajtay jbatik ta swenta-abi, maniwan jchʼuuntikix mantal sok jkʼaxuntayej kʼop ya xkʼootik (Daniel 5:1, 20; Hebreos 3:13, 18, 19). Jaʼ jich kʼax ta stojol jtul ajwalil ta Judá te Uzías sbiile (kʼopona te 2 Crónicas 26:3-5, 16-21). Ta sjajchibal, te Uzías jchʼuunej mantal-a sok lek yamigoinej sba sok te Diose. Jaʼ yuʼun te Jehová la yakʼ te jaʼuk jtul ajwalil te ay yip te mantaltesel yuʼune. Jaʼukmeto «te cʼalal la sta yip, la stoy sba». Kʼaxto la stoy sba te jich bajtʼ ta templo ta schikʼel pom. Te kʼalal albot yuʼun te sacerdoteetik te jaʼnax ay ta swentaik spasel-abi, te Uzías jajch skʼajkʼal yoʼtan yuʼun. Jaʼukmeto la yichʼ pejkʼanel yuʼun Jehová sok la yichʼ kastigo jaʼ te la sta kʼaʼel chamel te jich la yil swokol te jayeb kʼajkʼal kuxine (Proverbios 16:18).

4, 5. ¿Binwan ya xkʼot ta pasel teme maba ya jtsajtay jbatik yuʼun te toybaile? Ala junuk ejemplo.

4 Teme maba ya jtsajtay jbatik yuʼun te toybaile, ya xjuʼ ya jkuy jbatik te jaʼ mukʼxan jkʼoplaltik ta stojol te yantik sok ya jpʼajtik te tsitsel te ya kichʼtik akʼbeyel ta Bibliae (Proverbios 29:1; Romanos 12:3). Kiltik bin kʼot ta stojol jtul anciano yuʼun kongregasion te Jim sbiile. Te kʼalal jun buelta stsoboj sbaik sok te yantik ancianoetik yuʼun te skongregasione, ay banti maba akuerdo ay sok te bin la yichʼ tael ta nopel te ya yichʼ pasele. Jich la yal: «La kalbey te maba yakik ta yakʼel ta ilel kʼuxul oʼtanil, jich lokʼon bael ta tsoblej-abi». Wakeb u ta patil kʼax bael ta yan kongregasion, jaʼukmeto maba la yichʼ yaʼtel jich bitʼil anciano tey-a. Kʼaxto maba lek la yaʼiy sba yuʼun te bin yak ta kʼoel ta pasele sok schʼuunej te jaʼ lek te bin yak ta spasele, jich maba lokʼix ta scholel skʼop Dios sok la yijkʼitay stsobilanel sba lajuneb jaʼbil. Ta ora ini jamal ya yal te la stoy sbae sok te jajch smulinbey Jehová yuʼun te bin kʼot ta pasele. La yichʼ ulaʼtayel bayal jaʼbil yuʼun hermanoetik, jaʼukmeto maba la skʼan koltayel.

5 Te Jim la yal te spisil-ora la snopilan ta yoʼtan te bitʼil maba lek te bin ya spasik te yantike. ¿Bin ya yakʼ jnoptik te ejemplo-abi? Teme ya jtoy jbatike ya yakʼ te lek ya kiltik te bin yakotik ta spasel kʼalal ay bin maba lek ya jpastike. Teme jich yak ta kʼoel ta pasel ta jtojoltike, maniwan jichotikix bitʼil ajchʼal te kʼun ta wotsʼele (Jeremías 17:9). Teme ay jun buelta ay bin maba lek la spasbotik jtul hermano o chʼay kuʼuntik jun tulan aʼtelil te kichʼojtik ta kongregasione, ¿bin-utʼil la kakʼtik ta ilel te jtaleltike? ¿Labal jtoy jbatik, o kʼotbal ta koʼtantik te jaʼ tulanxan skʼoplal te lamaluk koʼtantik sok te hermanoetik sok te junuk koʼtantik ta stojol te Jehovae? (Kʼopona te sjun Salmo 119:165 sok Colosenses 3:13).

6. ¿Binwan ya xkʼot ta pasel teme yakotik ta spasel mulile?

6 Teme yakotik ta spasel mulil sok te muken ya jpastike, tulan-niwan ya kaʼiytik schʼuunel  te tsitsel yuʼun te Diose. Jich yuʼun kʼunkʼun bael maba wokol ya kiltik spasel te mulile. Jtul hermano te ya spas-a te bintik chopol ya yal te kʼunkʼun maʼyuk bin ya x-albotix yuʼun te yoʼtane (Eclesiastés 8:11). Jtul hermano te ay jun tiempo la skʼaytes sba ta yilel pornografía la yal te maba la snaʼ bitʼil kʼunkʼun jajch schopolkʼoptay te ancianoetike. Ta swenta-abi, utsʼinot te bitʼil yamigoinej sba ta lek sok te Jehovae. Te kʼalal la snaʼik te yantike, la skʼan te koltayel akʼbot yuʼun te ancianoetike. Melelnix-a te maba tojotik sok te ay banti ya xchʼayotike. Jaʼukmeto teme ya jchopolkʼoptaytik te machʼa ya stsitsotik o teme ya jletik te bin ya jmak jbatik sok-ae, ya xjuʼ xtulanubuk te koʼtantike. Te bin ya skʼan ya jpastike, jaʼ te ya jkʼanbeytik te akʼa spasbotik perdon te Dios sok te akʼa skoltayotike.

Te israeletik lajik ta jochol takin kʼinal ta skaj te la yakʼik te tulanubuk te yoʼtanike sok te maba la yakʼikix ta ilel schʼuunel yoʼtanik

7, 8. 1) ¿Bin-utʼil ya yakʼ ta ilel te bin kʼax ta stojol te israeletik te ya xjuʼ xtulanub koʼtantik teme maʼyuk schʼuunel koʼtantike? 2) ¿Bin ya yakʼ jnoptik-abi?

7 Kʼalal lokʼik bael ta Egipto te israeletike, la yilik bin-utʼil te Jehová la spas bayal milagroetik te chajpiknax-ae. Manchukme jiche, tulanub te yoʼtanik te kʼalal nopol ayikix ta Kʼinal te Albil skʼoplal ya yichʼike. ¿Bin yuʼun? Melel maba tulan te schʼuunel yoʼtanik ta stojol te Diose. Maba la smukʼulin yoʼtanik te Jehovae, och xiwelik sok jajchik ta wulwunel ta swenta te Moisese. La yalik te ya skʼan ya sujtik bael ta Egipto, te banti mosoinbilik-ae. Jaʼ-abi ejchʼentesbot yoʼtan te Jehová te jich la sjojkʼoy te binto-ora ya x-ichʼawan ta mukʼ te lum yuʼune (Números 14:1-4, 11; Salmo 78:40, 41). Te israeletik-abi lajik ta jochol takin kʼinal ta skaj te la yakʼik te tulanubuk te yoʼtanike sok te maba la yakʼikix ta ilel schʼuunel yoʼtanik ta stojol te Jehovae.

8 ¿Bin ya yakʼ jnoptik-abi? Ta ora ini kʼax nopol ayotikix ta achʼ balumilal, te jich ya yichʼ pasel ta prueba te schʼuunel koʼtantike. Kʼax mukʼ skʼoplal te ya kiltik teme tulan te schʼuunel koʼtantike. ¿Bin-utʼil? Jnoptik te bin jamal la yal te Jesús ta sjun Mateo 6:33 sok akʼa jojkʼoybey jbatik ini: «¿Yabal yakʼ ta ilel te bintik ya jkʼan ya jpas sok te bintik jtaoj ta nopel ya jpas te jchʼuunej te bin jamal la yal te Jesús-abi? ¿Mabal xkʼoonix ta tsoblej o ta scholel skʼop Dios ta skajnax te ya jkʼan spaselxan ganar takʼin? ¿Bin ya jpas teme maba ya yakʼbonix tiempo o ya slajinbon kip te kaʼtele? ¿Yabal kakʼ te ya swotsʼon kʼoem te balumilal ini te jich ya smakon ta yichʼel ta mukʼ te Jehovae?».

9. 1) ¿Bin yuʼun ya skʼan te ya jtsajtay kiltik teme ay schʼuunel koʼtantike? 2) ¿Bin-utʼil ya xjuʼ ya jpastik-abi?

9 ¿Yabal jchʼuuntik te bin ya yal te Biblia ta swenta te chopol amigoetike, te kʼalal ay machʼa ya yichʼ lokʼesel ta kongregasion o ta swenta te bintik ya jkʼasestik kʼajkʼal-ae? Teme maba ya jpastike yaniwan xtulanub te koʼtantike. Teme jich ya xkʼot ta pasel ta jtojoltike, tulan skʼoplal te oranax ya kichʼtik ta mukʼ te tsitsel ini: «Haʼex nix xatsahtay awilic teme ay schʼuhunel awoʼtanic; haʼex nix xatsahtay awilic» (2 Corintios 13:5). ¿Bin-utʼil ya xjuʼ ya jtsajtay kiltik te schʼuunel koʼtantike? Jaʼ te kʼalal maba ya jloʼlay jbatik ta jtukeltike sok te kʼalal spisil-ora ya jtuuntestik te Biblia ta stojobtesel te jpensartike.

JICHUKOTIK SPISIL-ORA BITʼIL AJCHʼAL TE KʼUN TA WOTSʼELE

10. ¿Bin ya xjuʼ ya skoltayotik te jichukotik bitʼil ajchʼal te kʼun-nax ta skʼab te Jehovae?

10 Swenta ya skoltayotik te jichukotik spisil-ora bitʼil ajchʼal te kʼune, te Diose  yakʼojbotik te Biblia, te kongregasion sok te scholel skʼop Dios. Te skʼoponel te Biblia sok te snopilanel ta jujun kʼajkʼal te bin ya yale ya xjuʼ ya skoltayotik te jichukotik bitʼil ajchʼal te kʼun-nax ta skʼab te Jehovae. La spas ta mantal te ajwaliletik yuʼun Israel te akʼa skʼasesik ta yan jun te Leye sok te akʼa skʼoponik ta jujun kʼajkʼal (Deuteronomio 17:18, 19). Te jpuk-kʼopetike snaʼojik te tulan skʼoplal skʼoponel sok snopilanel ta yoʼtanik te sJun Dios swenta ya scholik skʼop Diose. Jich yuʼun te kʼalal la stsʼibayik te Escrituras Griegas, bayal buelta la yalbeyik skʼoplal te bintik tsʼibaybil ta Escrituras Hebreas. Jich te kʼalal la scholik skʼop Dios la yalbeyik te ants winiketik te akʼa skʼoponik te sJun Diose (Hechos 17:11). Jichnix te joʼotike, bayal skʼoplal kuʼuntik skʼoponel sok snopilanel ta koʼtantik te bin ya yal te Bibliae (1 Timoteo 4:15). Jaʼ-abi ya skoltayotik te pekʼeluk te koʼtantike sok ya yakʼ te ya swotsʼotik kʼoem te Jehovae.

Akʼa jtuuntestik spisil te bin ya yakʼbotik te Dios yuʼun jich ya xkʼootik bitʼil ajchʼal te kʼun ta wotsʼele (Ilawil te parrafo 10 kʼalal ta 13)

11, 12. Cholbeya skʼoplal sok junuk ejemplo, ¿bin-utʼil ya stuuntes Jehová te kongregasion yuʼun ya swotsʼotik kʼoem ta swenta te bin ya xtuun kuʼuntik ta jujuntule?

11 Te Jehová ya snaʼ te bin ya xtuun kuʼuntik ta jujuntule, jaʼ yuʼun ya stuuntes te kongregasion yuʼun ya swotsʼotik kʼoem. Jchaʼiltik te bin kʼax ta stojol te Jim te la kalbeytik skʼoplal ta parrafo 4. Jajch sjeltay stalel kʼalal jtul anciano la yakʼ ta ilel te ay skʼoplal ta yoʼtane. Te Jim jich la yal: «Maʼyuk bin-ora la schopolkʼoptayon ni maba la yal te jaʼ jmul te bitʼil ayone. Te bin la spase, jaʼ te kʼax lek te snopjibal ta jtojole sok te la yal ta jamal te ya skʼan ya skoltayone». Oxeb u ta patil, ikʼot bael ta tsoblej yuʼun te ancianoe. Te Jim ya yal te sok skʼuxul yoʼtanik ilot yuʼun te hermanoetik te kʼalal kʼot ta tsobleje. Ta swenta-abi koltayot ta sjeltayel te bin ya snop yoʼtane. La yil te bitʼil ma jaʼuk tulan skʼoplal te bin yaʼiyel ya yaʼiy sbae. Sok la yichʼ mukʼubtesbeyel yoʼtan  yuʼun te ancianoetik sok te yiname, jich kʼunkʼun jajch ta abatinel yan buelta ta stojol te Jehovae. Jaʼnix jich la sta koltayel te kʼalal la skʼopon te articuloetik «Jehová no tiene la culpa» sok «Sirva a Jehová lealmente» yuʼun te La Atalaya 15 yuʼun noviembre 1992.

12 Ta patil bael, te Jim chaʼakʼbot yaʼtel jich bitʼil anciano. Teyto-abi skoltayoj yantik hermanoetik ta sitintayel kʼopetik te jich pajal te bitʼil kʼax ta stojole sok stulantesbeyoj schʼuunel yoʼtanik. Te Jim la skuy te yamigoinej sba ta lek sok te Diose, jaʼukmeto manix jichuk-a. Ya smel yoʼtan yuʼun te bitʼil ta skaj te toybail jaʼ bajtʼ ta yoʼtan yilel te banti ya xchʼay te yantike, ma jaʼuk la yil te bintik tulanik skʼoplale (1 Corintios 10:12).

Teme ya jlokʼtaybeytik stalel te Cristo kʼalal ya jcholtik skʼop Dios, te ants winiketik ya smulanik sok yaniwan xjelon stalelik

13. 1) ¿Bintik talelil ya skoltayotik ta stael te scholel skʼop Diose? 2) ¿Machʼa ya xtuun yuʼun te kaʼteltik ya jpastike?

13 Te scholel skʼop Dios jichnix ya xjuʼ ya swotsʼotik kʼoem sok ya skoltayotik yuʼun ya jlekubtestik te jtaleltike. ¿Bin yuʼun? Melel te kʼalal ya jcholtik te lek yachʼil kʼop yuʼun te Ajwalinel yuʼun te Diose, ya skʼan ya kakʼtik ta ilel pekʼel oʼtanil sok te lekil talelil te smakoj te sit te espiritue (Gálatas 5:22, 23). ¿Yabal xjuʼ ya jnop ta koʼtantik te bintik talelil kakʼojtik ta ilel kʼalal ya jcholtik skʼop Dios? Teme ya jlokʼtaybeytik stalel te Cristo kʼalal ya jcholtik skʼop Dios, te ants winiketik ya smulanik te lek yachʼil kʼope sok yaniwan xjelon te stalelik ta jtojoltik. Akʼa kiltik junuk ejemplo. Ta lum Australia, chaʼtul Testigoetik bajtʼ scholbeyik skʼop Dios ta sna jtul ants. Jaʼukmeto te antse bayal ilin sok chopol bin la spas ta stojol te hermanoetike. Manchukme jich kʼax-abi, te Testigoetike la schʼam yaʼiyik sok slekil yoʼtanik te bin la yal te antse. Ta patil, te antse la sujtes yoʼtan jich la stsʼibay bael jun karta ta sucursal swenta ya skʼan perdon. Jich la yal: «Maba la jnaʼ kʼinal ta stojol te cheb ants winiketik te yakik ta scholel te skʼop Diose sok te maba la jmulan te bin la yalbonike». Jaʼ-abi ya yakʼ jnoptik te kʼax tulan skʼoplal te lekuk te jtaleltik te kʼalal ya jcholtik skʼop Dios. Jich bitʼil ya kiltike, te kaʼteltik ya xtuun yuʼun te yantike, jaʼukmeto ya xtuun kuʼuntik-euk, melel ya skoltayotik ta slekubtesel te jtaleltike.

TE MEʼIL TATILETIK YA SKʼAN JUN-NAX YA X-AʼTEJIK SOK TE DIOS KʼALAL YA SWOTSʼIK KʼOEM TE YAL SNICHʼANIKE

14. ¿Bin ya skʼan ya spas te meʼil tatiletik teme ya skʼan lek bin ya xlokʼ yuʼunik-a te kʼalal ya swotsʼik kʼoem te yal snichʼanike?

14 Jteb ma spisiluk te alaletik ya yakʼik ta ilel pekʼel oʼtanil sok ya skʼanik nojptesel (Mateo 18:1-4). Jaʼ yuʼun te meʼil tatiletik ya skʼan ya skoltay te yal snichʼanik te bitʼil tutikto ta snopel te smelelil kʼop sok te mukʼuk skʼoplal ya skʼan ya yilike (2 Timoteo 3:14, 15). Teme ya skʼan lek ya xlokʼ yuʼunik te kʼalal ya swotsʼik kʼoem te yal snichʼanike, jaʼiknix ya skʼan mukʼuk skʼoplal ta yoʼtanik-euk te smelelil kʼop sok te ya schʼuunik spasel te bin ya yal te Bibliae. Jich yuʼun, te yal snichʼanike maba wokol ya yilik te mukʼ skʼoplal ya skʼan ya yakʼ ta yoʼtanik te smelelil kʼop sok ya xkʼot ta yoʼtanik te kʼalal ya yichʼik tsitsel yuʼun te smeʼ statik te kʼanbilik yuʼun soknix te Jehovae.

15, 16. Te kʼalal ya yichʼ lokʼesel jtul alnichʼanil ta kongregasion, ¿bin ya skʼan ya spas te meʼil tatiletik yuʼun jich ya yakʼik te ilel te ay smukʼul yoʼtanik te stojol te Diose?

15 Manchukme te meʼil tatiletik ya snojptesik  te yal snichʼanik ta swenta te smelelil kʼope, ay chaʼoxtul alnichʼanetik ya yijkʼitayik te Jehová o ya yichʼik lokʼesel ta kongregasion. Jaʼ-abi kʼax mel-oʼtantik sba ta stojol te familiae. Ta lum Sudáfrica, jtul hermana jich la yal: «Kʼalal la yichʼ lokʼesel ta kongregasion te jbankile pajal sok te bitʼil laj baele. Kʼax kʼux la kaʼiytik». Jaʼukmeto ¿bin la spas te hermana sok te smeʼ state? La spasik te bin ya yal te Bibliae (kʼopona te 1 Corintios 5:11, 13). Te meʼil tatiletik-abi snaʼojik-a te jaʼ lek schʼuunel spasel te tsitsel ya yakʼ te Diose. Kʼoem ta yoʼtanik te bitʼil ay machʼa ya yichʼ lokʼesel ta kongregasion, jaʼ jun tsitsel te ya yakʼ Jehová ta skaj te ay skʼuxul yoʼtan ta jtojoltike. Jich yuʼun jaʼnax ya xkʼopoj sok te yal snichʼanik te kʼalal ay bin mukʼ skʼoplal ya schajpanik ta yutil snaike.

16 ¿Bin-utʼil la yaʼiy sba te snichʼanike? Kʼalal kʼaxemix te tiempo-ae jich la yal: «Jnaʼoj te maba ya spʼajonik te jfamiliae. Yakiknax ta schʼuunbeyel smantal te Jehovae sok te organisasion yuʼune». Sok la yal te kʼalal la yil te jaʼnax Jehová te machʼa ya xjuʼ ya skʼanbey koltayel sok perdon, kʼot ta yoʼtan te bayal skʼoplal te ya x-ayin soke. Te kʼalal chaʼjajch ta abatinel ta stojol Jehová te jchʼiel-abi, te familia yuʼune kʼax tseʼel yoʼtan la yaʼiy sbaik yuʼun. Ta melel, teme spisil-ora ya jchʼuunbeytik smantal te Jehovae, lek ya xkʼootik ta lokʼel sok ya jtatik stseʼelil koʼtantik yuʼun (Proverbios 3:5, 6; 28:26).

Teme spisil-ora ay spekʼelil koʼtantik sok ya jchʼuunbeytik smantal te Jehovae, jich ya yilotik bitʼil ants winik te mukʼ jkʼoplaltike

17. 1) ¿Bin yuʼun spisil-ora ya skʼan ya kakʼ jbatik ta wentainel yuʼun te skʼanojel yoʼtan Jehovae? 2) ¿Bin lekilal ya jtatik yuʼun teme jich ya jpastike?

17 Te j-alwanej Isaías la yalbey jilel skʼoplal te bitʼil te judioetik te ayik ta Babilonia yalaj sujtes yoʼtanik sok jichlaj ya yalik: «Haʼat jtatatcotic, Jehová; hoʼotcotic ahchʼalotcotic, haʼat jpacʼojomat, ta jpisilcotic yaʼtelotcotic acʼab». Sok jich ya yalikxan: «Ma staleluc xanaʼbotic te jmulcotique. ¡Ilawotcotic, como pueblohotic awuʼun ta jpisilcotic!» (Isaías 64:8, 9). Spisiluk-ora ayuk spekʼelil koʼtantik sok te ya jchʼuunbeytik smantal te Jehovae. Spisiluk-ora akʼa kakʼ jbatik ta wentainel yuʼun te skʼanojel yoʼtan, teme jich ya jpastik ya yilotik bitʼil ants winik te mukʼ jkʼoplaltik, jich bitʼil te Daniele. Te Jehová ya swotsʼotikxan bael kʼoem sok te Biblia, te chʼul espiritu sok te organisasion yuʼune. Jich ta pajel chaʼbej ya xkʼootik ta tojil alnichʼanil yuʼun Dios (Romanos 8:21).