Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

TE J-ILKʼINAL TA TOYOL (TE YA YICHʼ NOPEL) JUNIO 2016

Jun talelil yuʼun te j-abat yuʼun Dios te mukʼxan skʼoplal-a te bitʼil diamante

Jun talelil yuʼun te j-abat yuʼun Dios te mukʼxan skʼoplal-a te bitʼil diamante

Te ants winiketik mukʼ skʼoplal yuʼunik te tʼujbil ton te diamante sbiile te ya stuuntesik ta takʼin chikinil, chʼokowil sok yantikxan. Bayal miyon ta dolar stojol. Jaʼukmeto te Dios ay bin kʼax mukʼxan skʼoplal ya yil te bitʼil te diamante o yantikxan. ¿Bin-a?

 Te Haykanush jaʼ jtul ants te ay ta nainel sok smamlal ta mukʼul lum Armenia. Te schebalik ya scholik skʼop Dios jaʼukmeto mato yichʼojik jaʼ-a. Ta jun buelta te antse la stam jun pasaporte ta stsʼeel sna. Ta yutil te pasaporte ay tarjetaetik yuʼun banco sok bayal takʼin. La yalbey smamlal te bin la stae.

Ayik ta wokol ta swenta te maʼyuk stakʼinik sok ay sbetik. Manchukme jich-abi maba la yichʼik jilel te takʼine, bajtʼ yijkʼitayik ta dirección te tsʼibaybil ta pasaporte. Te yajwal yuʼun te bintik la yichʼ tael sok te sfamiliae maba la schʼuunik yaʼiyel. Te Haykanush sok te smamlal la scholbeyik te yakik ta snopel te Bibliae sok te snopojikix te maba lek te elekʼe. Jich la scholbeyik skʼoplal te machʼatik-a te stestigotak Jehovae sok la yijkʼitaybeyik junetik te lokʼemik ta Bibliae.

Te familiae la skʼan yakʼbey takʼin te Haykanush, jaʼukmeto maba la skʼan stsak. Ta yan kʼajkʼal, te yinam te machʼa ay bin chʼay yuʼune la yulaʼtay te Haykanush sok te smamlal. Swenta jich ya yakʼ ta ilel te ya yal wokol yuʼune, la skʼanbey te Haykanush te akʼa stsak jun chʼokowil te yichʼoj diamante.

Jich bitʼil te familia-abi, ay bayal ta tul ants winiketik te chajpnaxniwan ya yaʼiy sbaik yuʼun te talelil te la yakʼ ta ilel te Haykanush sok te smamlale. Jaʼukmeto, ¿chajpnaxbal ya yil-a te Jehovae? ¿Bin ya snop ta swenta te kʼalal ya jpastik te bintik leke? ¿Lekbal lokʼ yuʼunik-a te bitʼil maba la yaʼiyik elekʼe?

TALELILETIK TE MUKʼXAN SKʼOPLAL-A TE BITʼIL BILUKETIKE

Te sujtib te jojkʼoyeletik-abi maba wokol ta tael. ¿Bin yuʼun? Melel te j-abatetik yuʼun Dios snaʼojik te slokʼtaybeyel te taleliletik yuʼune, jaʼ mukʼxan skʼoplal ya yil Jehová te bitʼil te oro, te diamante o yantikxan biluketik. Te Jehová ay bin mukʼxan skʼoplal ya yil te ma jichuk ya yil stukel te jteb ma spisiluk te ants winiketike (Isaías 55:8, 9). Kʼax mukʼ skʼoplal ya yil kʼalal ya spasik tulan te j-abatetik yuʼun ta slokʼtaybeyel te taleliletik yuʼune.

Jich bitʼil, kiltik te bin ya yal te Biblia ta sjun Proverbios 3:13-15 ta swenta te machʼa ya snaʼ stsajtayel sba sok te machʼa ay spʼijil yoʼtan, jich ya yal: «Bayel yutsil te machʼa ya sta spʼijil yoʼtan, te machʼa ya sta te bin ay ta naʼel, como te bin ya sta a cʼax hich a te bin utʼil plata, te sit cʼax hich a te bin utʼil lequil oro. Cʼax hich yutsil a te bin utʼil tʼujbil tonetic; spisil bintic ya scʼan awoʼtan, ma pajaluc soc». Chikan ta ilel ta lek te bitʼil mukʼxan skʼoplal ya yil Jehová te taleliletik-abi te bitʼil yantikxan kʼulejalil.

¿Bin ya kalbeytik skʼoplal ta swenta te loʼlaywaneje?

Te Jehová maba ya xloʼlaywan stukel. Te Biblia ya yal «te ma xyaʼiy lot» (Tito 1:2). Jaʼnix jich ay bin la yakʼbey stsʼibay te jpuk-kʼop Pablo ta stojol te jtsob jchʼuunjeletik te jich la yal: «Cʼopombotcotic Dios; jnaʼojcotic te mayuc bin ya yalbotic te coʼtancotic, yuʼun ya jcʼancotic te lec spisil bintic ya jpascotique» (Hebreos 13:18).

Te Jesús jaʼ jun lekil ejemplo ta swenta-abi. Ta jun buelta, jich albot yuʼun te mukʼul sacerdote: «Hala caʼiycotic ta scuenta te cuxul Dios teme haʼat nix a te Cristohat, te Snichʼanat te Diose». Te Jesús maba la spas lot, la yal ta jamal te jaʼ te Cristo o te Mesiase. La yal te bin smelelil manchukme snaʼoj te bitʼil te Sanedrín yuʼun judioetik ya xjuʼ xlebot smul te yak ta sbolkʼoptayel te Dios, te jich ya yakʼik ta milel-a (Mateo 26:63-67).

¿Jaxan te joʼotike? ¿Bin ya jpastik teme ya xjuʼ te ay bin lek ya xlokʼ kuʼuntik-a teme maba ya kaltik te smelelil o ya jelbeytik jtebuk skʼoplal? ¿Spisilbal-ora ya kaltik te bin smelelile?

¿BIN YUʼUN WOKOL TA PASEL TE BINTIK LEKE?

Te bitʼil ayotik ta slajibal kʼajkʼale, wokolniwan ya kaʼiytik spasel te bintik leke, melel bayal ants winiketik ay sbikʼtal yoʼtanik sok jaʼ baem ta yoʼtanik te takʼine (2 Timoteo 3:2). Te kʼalal maʼyuk takʼin o wokol ta tael aʼtele, bayal ta tul te maba chopol ya yilik te elekʼ, te loʼlaywanej o yantikxan te bin maba lek ta pasele. Te chopol talelil-abi bayuk ya yichʼ pasel te jich bayal ya skuyik te jichnax ya xjuʼ ya staik te bin ya skʼanike. Jaʼnix jich ay chaʼoxtul j-abatetik yuʼun Dios te jich spasojik-euke. Ta swenta-abi, maba lekix skʼoplalik ta kongregasion (1 Timoteo 3:8; Tito 1:7).

Jteb ma spisiluk te j-abatetik yuʼun Dios jaʼ  ya stʼunbeyik stalel te Jesuse, ma spasik te bin maba leke. Snaʼojik te yakʼel ta ilel te taleliletik yuʼun Dios jaʼ mukʼxan skʼoplal yuʼun-a te biluk kʼulejalil o te bin lek ya xlokʼ yuʼunik-ae. Jaʼ yuʼun te jchʼieletik te ayik ta eskuela maba ya spasik lot swenta lek ya xlokʼ yuʼunik-a te examen ya spasike (Proverbios 20:23). Ta melel, ma spisiluk-ora ya kichʼtik majtʼantesel kʼalal ya jpastik te bin lek te bitʼil te Haykanush. Jaʼukmeto, te Dios ya yalbotik te jaʼ lek te ya jpastik te bin leke. Jich maʼyuk bin chopol ya yalbotik te koʼtantike, te jaʼ kʼax mukʼ skʼoplale.

Te bin la spas te Gagik jichnix ya yakʼ kiltik te jaʼ lek kʼalal ya jpastik te bin leke. Kʼalal mato ochem ta Testigo-ae, ya x-aʼtej ta jun mukʼul empresa. Swenta maba ya stojik patanil, te yajwal empresa jaʼnax jteb ya yakʼ ta naʼel te takʼin te ya yichʼ pasel ganare. Jich bitʼil te Gagik jaʼ te direktor, akʼbot ta swenta yakʼbeyel takʼin te supervisor te tikunbil yuʼun te ajwalil yuʼun jich maba ya yichʼ naʼbeyel skʼoplal-a te bitʼil ya xloʼlaywan te empresae. Te bin kʼot ta stojol te Gagik, jaʼ te maba lekix skʼoplal la yichʼ naʼbeyel sba-e. Jaʼukmeto la snop te smelelil ta swenta Biblia jich maba la skʼan ya yaʼiyix loʼlaywanej, manchukme toyol stojol ya spas ganar-ae. Te bin la spase jaʼ te la sjach jun negosio yuʼun. Ta sjajchibalto, la schajpanbey sjunil te empresa yuʼune sok la stoj spisil te patanil te ya skʼan te leye (2 Corintios 8:21).

Te Gagik ya yal te och spas ganar olil te bitʼil ya spas ganar ta nailtoe, wokol la yaʼiy yakʼbeyel  te bin ya xtuun yuʼun te sfamiliae. Jaʼukmeto kʼax tseʼel yoʼtan ya yaʼiy sba sok maʼyukix bin chopol ya x-albot yuʼun yoʼtan ta stojol Jehovae. Ya yakʼbey lekil ejemplo te chaʼtul yal snichʼane sok yichʼoj yaʼtel ta kongregasion. Soknix, lek skʼoplal ilbil yuʼun te supervisor te tikunbilik yuʼun te ajwalil sok te yantik ants winiketik te ya x-aʼtejik soke, melel snaʼojik te maba ya xloʼlaywane.

TE JEHOVÁ YA SKOLTAYOTIK

Te Jehová kʼux ta yoʼtan te machʼatik ya yichʼik ta mukʼ te kʼalal ya slokʼtaybeyik te tʼujbil taleliletik yuʼun jich bitʼil te maba ya spas lote (Tito 2:10). Jamal ya yalbotik te ya skoltayotik teme ya jlokʼtaybeytik te stalele. Kʼalal bayalix yaʼbilal-a te ajwalil David, te Jehová la yakʼbey stsʼibay ini: «Mayuc quiloj te pihtesbil te machʼa toj yoʼtan, soc mayuc quiloj te yac ta scʼanel pan te snichʼnabe» (Salmo 37:25).

Jun ejemplo ta swenta-abi jaʼ te bin kʼax ta stojol te Rut. Jaʼ jtul ants te jun yoʼtan la yakʼ sba ta stojol te yalib meʼel, melel maʼyuk bin-ora la yijkʼitay manchukme ayix bayal yaʼbilal. Te Rut bajtʼ ta nainel sok te Noemí ta Israel, te banti ya xjuʼ ya yichʼ ta mukʼ te smelelil Diose (Rut 1:16, 17). Jaʼ jtul ants te lek stalel te tulan ya x-aʼtej ta stsobel sit awal tsʼunubil te ya yichʼ ijkʼitayel ta swenta te pobreetik, jich bitʼil ya yal te ley yuʼun te Moisese. Te Jehová spisil-ora la skanantay te Rut sok te yalib meʼel, jich bitʼil la spas bayal jaʼbil ta patil sok te ajwalil Davide (Rut 2:2-18). Jaʼukmeto, ma jaʼuknax la yakʼbey te bin tuun yuʼun te Rute, melel ay bin kʼax lekxan la spas ta stojol. Jaʼ te bitʼil la stsa, yuʼun tey ta stsʼumbal ya chiknaj talel-a te David sok te Mesías te albil skʼoplale (Rut 4:13-17; Mateo 1:5, 16).

Ta ora ini, bayal ta tul j-abatetik yuʼun Dios wokol ya yilik spasel ganar lek takʼin swenta ya staik te bin ya xtuun yuʼunike. Jaʼukmeto maba ya spasik te bin kʼun ta pasel te jich ya x-elkʼajik sok te ya xloʼlaywanike. Ya spasik tulan yuʼun lekil j-aʼteletik ya xkʼotik. Jich ya yakʼik ta ilel te jaʼ mukʼxan skʼoplal te bitʼil yantik biluketik te taleliletik yuʼun Dios jich bitʼil spasel te bin leke (Proverbios 12:24; Efesios 4:28).

Ta swolol balumilal, te j-abatetik ya stʼunbeyik stalel te Rut sok ya yakʼik ta ilel te ya smukʼulin yoʼtanik te jaʼ ya xkanantayotik yuʼun te Diose. Jaʼ ya smukʼulin yoʼtanik te bin jamal yaloj te Jehová te jich ya yal: «Ma jaymehl ya jpihtesat; mayuc bin ora ya quihquitayat» (Hebreos 13:5). Bayal buelta te Jehová yakʼoj ta ilel te spisil-ora ya skoltay te machʼatik ya spasik te bin leke. Spisil-ora ya skʼotes ta pasel te bin jamal yaloj te ya yakʼbey te bin ya xtuun yuʼun te j-abatetik yuʼune (Mateo 6:33).

Te ants winiketik mukʼ skʼoplal yuʼunik te tʼujbil ton te diamante sbiile sok yantikxan biluketike. Jaʼukmeto te jTatik ay ta chʼulchan kʼaxemtoxan skʼoplal ya yil te bin lek ya jpastik sok te yantik taleliletik te bitʼil tʼujbil tonetik sok yantikxan.

Kʼalal ya jpastik te bin leke, maʼyuk bin ya yalbotik te koʼtantik kʼalal ya jcholtik skʼop Diose