Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

TE J-ILKʼINAL TA TOYOL (TE YA YICHʼ NOPEL) MAYO 2016

¿Yaktobal ta sjeltaybel atalel te Bibliae?

¿Yaktobal ta sjeltaybel atalel te Bibliae?

«Yanuc awilelic ta scuenta yachʼubtesel te snopojibal awuʼunic.» (ROMANOS 12:2)

KʼAYOJIL 61 SOK 52

1-3. 1) ¿Bintikwan tulan ya kaʼiytik ta sjeltayel ta jtaleltik te kʼalal kichʼojtikix jaʼ-ae? 2) Teme kʼax tulan yakotik ta yaʼiyel sjeltayel te jtaleltike, ¿bin jojkʼoyel ya jpasbey jbatik yuʼun? (Ilawil te lokʼomba ta sjajchibal te articulo.)

KʼALAL mato jaʼuk testigo yuʼun Jehová te Kevin, ay bayal jaʼbil te tajin ta swenta te takʼin, la snukʼ may, la yaʼiy yakubel, sok la snukʼ drogaetik [1] (ilawil te nota ta slajibal te articulo). Te kʼalal la snop ta swenta te Jehovae, tal ta yoʼtan te ya yamigoine. Jaʼukmeto te kʼalal mato yichʼojuk jaʼ-ae ay bayal te bintik ya skʼan ya sjeltay ta swenta te skuxlejale. Juʼ yuʼun sjeltayel te skuxlejal ta skaj te koltayel yuʼun Jehovae sok ta swenta yip te sKʼop, jaʼ te Bibliae (Hebreos 4:12).

2 Te kʼalal yichʼojix jaʼ-a te Kevin ayto bayal bin ya skʼan ya sjeltay ta skuxlejal swenta jich ya xkʼot ta lekil j-abat yuʼun te Diose (Efesios 4:31, 32). Jich bitʼil, mato lekubenuk-a te stalele, oranax ya x-ilin. Sok yan-nax la yil-a te wokol ya yaʼiy skomel te skʼajkʼal yoʼtane. Te Kevin la yal te manchukme aylaj bayal bintik chopol ya spas te kʼalal mato xyichʼ jaʼ-ae, jaʼukmeto jaʼlaj kʼaxto wokol la yaʼiy skomel te skʼajkʼal yoʼtane. Jich yuʼun  la skʼanbey bayal wokol te Jehová sok la skʼan snop ta lek te Bibliae. Ta swenta-abi, juʼ yuʼun sjeltayel te schopol talele.

3 Te kʼalal mato kichʼojtik jaʼ-ae, jaʼnix jich bayal la jeltay te jtaleltike. Jaʼ jich la jkʼotestik ta pasel te bin ya yal te Bibliae. Jaʼukmeto yaniwan kiltik te yato skʼan ya jpastikxan tulan ta stojobtesel te bin maba lek ta jtaleltik yuʼun jich ya jlokʼtaybeytik stalel te Dios sok te Cristoe (Efesios 5:1, 2; 1 Pedro 2:21). Ayniwan ya kiltik te maʼyuk bin ya jmulantik te ya spas te yantike o maba lek skʼoplal kuʼuntik te yantike. O ayniwan maba ya jpastik te bin lek ta skaj te ya jxiʼtik te bintik ya yalik o ya snopik te yantike. Ayniwanix bayal jaʼbil te yakotik ta spasel tulan ta yijkʼitayel-abi, jaʼukmeto maʼyuk juʼem kuʼuntik yijkʼitayel. Jaʼ yuʼun ayniwan jich ya jojkʼoybey jbatik: «¿Bin yuʼun te wokol ya kaʼiy yijkʼitayel te bintik maba lek ya jpase? ¿Bin ya skʼan ya jpasxan swenta ya xlekub te jtalel jich bitʼil ya yal te Bibliae?».

YA XJUʼ LEK YA YILOTIK TE JEHOVAE

4. ¿Bin yuʼun ma spisiluk-ora lek yoʼtan kuʼuntik te Jehová ta swenta te bin ya jpastike?

4 Kʼux ta koʼtantik Dios te machʼatik ya x-abatinotik ta stojol sok spisil koʼtantik ya jpastik te bin ya skʼanbotike. Jaʼukmeto ma spisiluk-ora ya xjuʼ kuʼuntik ta skaj te maba tojotike. Bayal buelta jich ya kaʼiy jbatik bitʼil te jpuk-kʼop Pablo te la yal te yoʼtanuk ya spas te bintik leke, jaʼukmeto ma spisilik-ora ya xjuʼ yuʼun (Romanos 7:18; Santiago 3:2).

5. 1) ¿Bintik-a te la kijkʼitaytik spasel swenta jich la kichʼtik jaʼe? 2) ¿Bin-utʼil yak yutsʼinbelotik te bitʼil maba lek te jtaleltike?

5 La kijkʼitaytik jilel spasel te bintik ya yilay te Jehová swenta jich la kichʼtik jaʼ sok jich kʼootik ta testigo yuʼun Jehová (1 Corintios 6:9, 10). Jaʼukmeto ta skaj te maba tojotike, ay bayal ya xchʼayotik manchukme ayix bayal jaʼbil kichʼojtik te jaʼe (Colosenses 3:9, 10). Ayniwan baeltik ya xtal ta koʼtantik spasel te bintik chopol o te bin maba lek ya kaʼiy ta koʼtantike, o ayniwan wokol ya kaʼiytik skomel te jtaleltike. Ta melel ayniwan bayalix jaʼbil te yakotik ta spasel tulan ta yijkʼitayel te banti ya xchʼayotik bayal bueltae.

6, 7. 1) Manchukme maba tojotik, ¿bin yuʼun te ya xjuʼ ya kamigointik te Jehovae? 2) ¿Bin yuʼun maba ya skʼan te jkom jbatik ta skʼanbeyel perdon te Jehovae?

6 Manchukme maba tojotik ya xjuʼ ya kamigointik te Jehová sok ya xjuʼ x-abatinotik ta stojol. Mame xchʼay ta koʼtantik te ya xjuʼ ya kamigointik te Dios, melel ay bintik lek la yilbotik sok jaʼ la skʼan te ya jnaʼbeytik sbae (Juan 6:44). Snaʼoj ta lek te yuʼun-nix maba tojotik-ae, sok jaʼ yuʼun ay bayal te bin maba lek ta jtaleltik sok ya xchʼayotik. Manchukme jich-abi, te Jehová la skʼan te ya kamigointike.

7 Ta swenta te kʼax kʼuxotik ta yoʼtane, la yakʼbotik jun majtʼanil te kʼax mukʼ skʼoplale. La stikun tal ta Balumilal te jip jtul sNichʼan swenta tal yakʼ skuxlejal ta jtojoltik sok jich la stoj te jmultike (Juan 3:16). Te kʼalal ya xyalotik ta spasel te bin chopol ya yile, ya skʼan ya jkʼanbeytik perdon te Jehovae. Ta swenta te la yakʼ sba ta lajel te Jesuse, ya spasbotik perdon te Dios sok ya yakʼ kamigoinxan jbatik sok (Romanos 7:24, 25; 1 Juan 2:1, 2). Juluk ta koʼtantik te laj Jesús ta swenta te jmulawiletik te ya sujtes yoʼtanike. Jich yuʼun teme ya kaʼiytik te kʼax chopol te bin la jpastike, maba jkom jbatik ta skʼanbeyel Jehová te ya spasbotik perdon. Teme maba ya jkʼantik perdon, jaʼme pajal sok te maba ya jkʼan ya jpok jkʼabtik te kʼalal ay bayal yabakule. ¿Mabal jichuk te ya jkʼantik lek yoʼtan kuʼuntik te Jehová ta swenta te ya yakʼ kamigoin jbatik sok manchukme maba tojotike? (Kʼopona te 1 Timoteo 1:15.)

8. ¿Bin yuʼun ya skʼan ya jpastik tulan ta stojobtesel te banti maba lek te jtaleltike?

8 Ta melel, ma xjuʼ te ya jpejkʼantesbeytik skʼoplal te bin maba lek ta jtaleltike. Te Jehová yalojbotik te bin yilel stalel ya skʼan te machʼatik ya yamigoine (Salmo 15:1-5). Jich yuʼun teme ya jkʼantik ya kamigointike, ya skʼan ya jpastik tulan ta skʼayinbeyel stalel sok te sNichʼane. Jaʼnix jich ya skʼan ya jpastik tulan ta skomel jbatik ta swenta te bin ya xbikʼtaj koʼtantik yuʼune sok jkʼaxel ya skʼan ya jlokʼes ta koʼtantik. Chikan te jayebix jaʼbil kichʼojtik jaʼe, yame skʼan ya jlekubtestikxan te jtaleltike (2 Corintios 13:11).

9. ¿Bin yuʼun ya jnaʼtik te ya xjuʼ ya jlaptik kʼoem te yachʼil kuxlejalile?

 9 Te jpuk-kʼop Pablo la yakʼ te tsitsel ini: «Cholahic loqʼuel te apocoʼ-talelic te bin utʼil ayex ta nahil to, te yac ta bohlobel ta scaj loʼloyel ta mulil». Jich la yalxan: «Achʼubenuc me apensaric, soc lapahic me te yachʼil cuxlejal, te hich pasbil te bin utʼil ay te Diose, te toj bin ya spas soc te chʼultesbil ta smelelil» (Efesios 4:22-24). Jaʼ-abi ya skʼan ya yal te ya jpastik tulan ta slekubtesel te jtaleltik sok ya jlaptik kʼoem «te yachʼil cuxlejal». Jich yuʼun chikan te jayebix jaʼbil yakotik ta abatinel ta stojol te Jehovae, spisil-ora ya xjuʼ ya jkʼayinbeytik stalel. Te Biblia ya xjuʼ ya skoltayotik ta slekubtesel te jtaleltik swenta jich ya kakʼtik ta ilel te bitʼil stalel te Jehovae.

¿BIN YUʼUN TE WOKOL TA PASELE?

10. 1) ¿Bin ya skʼan ya jpastik swenta ya skoltayotikxan te Biblia ta sjeltayel te jtaleltike? 2) ¿Bin jojkʼoyeletik ya jpastik yuʼun?

10 Jpisiltik ya jkʼan jchʼuuntik te bin ya yal te Bibliae. Jaʼukmeto teme ya jkʼantik te maba ya jkom jbatik ta sjeltayel te jtaleltike, yame skʼan ya jpastik tulan. ¿Bin yuʼun te ya skʼan ya jpastik tulane? ¿Mabal ya xjuʼ yuʼun Jehová te ayuk kʼun ya kaʼiytik spasele?

11-13. ¿Bin yuʼun ya skʼan Jehová te ya jpastik tulan ta yijkʼitayel te banti maba lek te jtaleltike?

11 Te kʼalal ya jnop ta koʼtantik spisil te bintik spasoj te Jehovae, teyme ya jnaʼtik ta lek-a te jaʼnax stukel ay yuʼel ta spasel te biluk ya skʼan yoʼtane. Jnop kaʼiytik ta swenta te Kʼajkʼale. Ta jujun segundo bayal ya xtoy te skʼixinale. Jtebnax te skʼixinal kʼajkʼal ya xjul ta Balumilal, jaʼukmeto jaʼnax jich yipal ya xtuun swenta jich ay kuxlejalil-a (Salmo 74:16; Isaías 40:26). Te Jehová ya yakʼbey yip te j-abatetik yuʼun te kʼalal ya xtuun yuʼunike (Isaías 40:29). Jaʼ yuʼun ayniwan ya sjojkʼoybey sba te ants winiketik bin yuʼun maba ya yakʼ Jehová te kʼunuk ya kaʼiytik stojobtesel jbatik ta swenta te banti ya xchʼayotike.

12 Te Jehová yakʼojbotik te joʼotiknix ya jtatik ta nopel te bin ya jpastik ta jkuxlejaltike. Jaʼ ya yakʼ jnoptik teme ya jchʼuuntik o teme maʼuke. Te kʼalal ya jtatik ta nopel te ya jkʼan ya jchʼuunbeytik te smantal  sok te ya jpastik tulan ta spasel te bin ya smulane, jich ya kakʼbeytik yil te kʼux ta koʼtantik sok te ya jkʼantik lek yoʼtan kuʼuntike. Te Satanase ya yal te maʼyuk ta swenta Jehová te ya xmantalaj ta jtojoltike. Jaʼukmeto te kʼalal ya jchʼuunbeytik te smantal Diose, jich ya kakʼtik ta ilel te jaʼ ya jkʼantik ya xmantalaj ta jtojoltike. Te jTatik te kʼax kʼuxotik ta yoʼtane, bayal skʼoplal ta sit te kʼalal ya jpastik tulane (Job 2:3-5; Proverbios 27:11). Ta swenta te maba ya yakʼ Jehová te kʼun ya kaʼiytik yijkʼitayel te banti maba lek te jtaleltike, te kʼalal ya jpastik tulan ta spasel te bin ya skʼan yoʼtane, jich ya kakʼtik ta ilel te ya jkʼantik jun koʼtantik ta stojol sok te jaʼ ya xmantalaj ta jtojoltike.

13 Te Jehová ya yalbotik te ya skʼan ya jpastik tulan ta skʼayinbeyel te lekil taleliletik yuʼune (Colosenses 3:12; kʼopona te 2 Pedro 1:5-7). Jaʼ ya skʼan te ya jnaʼtik skomel jbatik ta swenta te bin ya jnoptik ta joltik sok te bintik ya kaʼiy ta koʼtantike (Romanos 8:5; 12:9). Teme ya jpastik tulan ta sjeltayel te jtaleltik sok teme juʼ kuʼuntike, kʼax tseʼelme koʼtantik yuʼun.

AKʼA KAKʼ JBATIK TA KOLTAYEL YUʼUN TE BIBLIA SWENTA YA XJELON TE JTALELTIKE

14, 15. ¿Binwan ya xjuʼ ya jpastik swenta ya jchʼijtestik taleliletik te lek ya yil te Jehovae? (Ilawil te recuadro « Te Biblia sok te skʼoponel Dios jeltaybot te stalelike».)

14 ¿Bin ya skʼan ya jpastik swenta jich ay kuʼuntik te lekil taleliletik ya smulan te Jehovae? Maba ay ta jwentatik stael ta nopel te bintik ya skʼan ya jeltaytik ta swenta te jtaleltike. Jaʼ ya skʼan ya kakʼ jbatik ta tojobtesel yuʼun te Jehovae. Te sjun Romanos 12:2 jich ya yal: «Ma me xapajbeyic stalel te bahlumilal, yanuc awilelic ta scuenta yachʼubtesel te snopojibal awuʼunic, scuenta yuʼun hich yac anaʼic a te bin ya scʼan yoʼtan te Dios, te ha ay yutsil soc te cʼax leque». Teme ya jkʼan ya jnaʼtik te bin lek ya yil te Jehovae, ya skʼan ya jtuuntestik ta lek te koltayel ya yakʼbotike. Yame skʼan ya jkʼopontik te Biblia ta jujun kʼajkʼal, ya jnopilan ta koʼtantik te bin ya jnoptik tey-ae sok ya jkʼanbeytik te schʼul espiritue (Lucas 11:13; Gálatas 5:22, 23). Teme jich ya jpastike yame skoltayotik ta spasel te bin ya skʼan yoʼtan te Jehová sok jich ya jnoptik-euk te bin ya snop yoʼtane. Te bin lek ya xlokʼ kuʼuntik ta swenta-abi, jaʼ te lek ya yil te bin ya jnoptik sok te bin ya kaltike. Jaʼukmeto yame skʼan ya jpastikxan tulan ta stojobtesel te banti ya xchʼayotike (Proverbios 4:23).

Akʼa jkʼejtik cheʼoxebuk articulo o textoetik yuʼun Biblia te ya skoltayotik ta stojobtesel te bin maba lek ta jtaleltike, yuʼun jich ya jkʼopontikxan te kʼalal ya xtuun kuʼuntike (Ilawil te parrafo 15)

15 Ma jaʼuknax ya jkʼopontik te Biblia ta jujun kʼajkʼale, jaʼnix jich te kʼalal ya jnoptik te sKʼop Dios ya skʼan ya kakʼ skoltayotik te yantik junetik jich bitʼil Te J-ilkʼinal ta toyol sok te ¡Despertad! Bayal te junetik-abi ya yalbey skʼoplal bintik-utʼil ya xjuʼ ya jkʼayinbeytik stalel te Jehová sok te bintik-utʼil ya xjuʼ kuʼuntik stojobtesel te banti ya xchʼayotike. Ayniwan cheʼoxebuk articulo o textoetik yuʼun Biblia te jaʼ ya xtuun kuʼuntik ta yorail-abi. Ya xjuʼ ya jkʼejtik ta lek swenta ya jkʼopontikxan te kʼalal ya xtuun kuʼuntike.

16. ¿Bin yuʼun ya skʼan ma xchebaj koʼtantik teme ya kaʼiytik te maba ora ya xjelon te jtaleltik te bitʼil ya jkʼantike?

16 Ya yichʼ bayal tiempo swenta ya xjuʼ ya jtʼunbeytik te taleliletik yuʼun te Jehovae. Jaʼ yuʼun mame x-animaj koʼtantik. Mame xchebaj koʼtantik teme ya kaʼiytik te maba ora ya xjelon te jtaleltik te bitʼil ya jkʼantike. Ayniwan ya skʼan ya jpastik tulan  ta sjajchibal te bin ya yal te Bibliae. Jaʼukmeto te kʼalal ya jpastikxan tulan ta snopel sok spasel jich te bitʼil ya skʼan te Jehovae, jich maba wokol ya kaʼiytik snopel te bitʼil ya snop yoʼtan sok spasel te bintik leke (Salmo 37:31; Proverbios 23:12; Gálatas 5:16, 17).

JNOP TA KOʼTANTIK TE BIN KʼAX TʼUJBIL YAKOTIK TA SMALIYELE

17. Teme jun koʼtantik ta stojol te Jehovae, ¿bin ya jmaliytik ta pajel chaʼbej?

17 Koʼtantikukix te ya sta yorail te toj ya xkʼootik sok te ya x-abatinotik ta stojol te Jehová ta spisil-ora. Ta yorail-abi, maʼyuk ya kiltikix jwokoltik ta swenta te maba tojotike. Mame wokoluk ya kaʼiytikix-a te ya jkʼayinbeytik stalel te Jehovae. Manchukme maba tojotik ta ora ini, ya xjuʼ ya kichʼtik ta mukʼ ta skaj te la yichʼix tojel te jmultike. Teme ya jpastik tulan ta slekubtesel te jtaleltik sok ya jchʼuunbeytik te bintik ya yalbotik ta mantal te Jehová ta Biblia, ya xjuʼ lek yoʼtan kuʼuntik.

18, 19. ¿Bin ya yakʼ ta ilel te ay yuʼel te Biblia te yak ta sjeltayel te jtaleltike?

18 Ta sbabial talel parrafoetik la kalbeytik skʼoplal te Kevin, jaʼ jtul hermano te wokol la yaʼiy skomel te skʼajkʼal yoʼtane. Jaʼ la snopilan ta yoʼtan te bin la skʼopon ta Bibliae sok la spas tulan ta sjeltayel te stalele. Jaʼnix jich la yichʼ ta mukʼ te bin albot yuʼun te machʼatik pajal schʼuunel yoʼtan soke. Manchukme jalaj jtebuk jaʼbil ta slekubtesel sba, ta patil och ta siervo ministerial. Ayix 20 jaʼbil te yak ta aʼtel jich bitʼil anciano ta kongregasion. Jaʼukmeto yato yaʼiy sba te ya skʼan ya spas tulan ta stojobtesel te bin maba lek ta stalele.

19 Jich bitʼil te Kevin, ya xjuʼ ya jpastik tulan ta slekubtesel te jtaleltike. Teme jich ya jpastike, ya kamigointikxan ta lek te Jehovae (Salmo 25:14). Akʼa jpastik tulan te bantito kʼalal ya xjuʼ kuʼuntik spasel te bin ya smulane, jich ya skoltayotik. Jich ya xjuʼ ya schʼuun koʼtantik te ay yuʼel te Biblia yuʼun ya sjeltay te jtaleltike (Salmo 34:8).

^ [1] (parrafo 1): Yichʼoj jeltayel te biilile.