Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

TE J-ILKʼINAL TA TOYOL (TE YA YICHʼ NOPEL) MAYO 2016

Akʼa jtuuntestik ta lek te weʼelil kʼoem te ya yakʼbotik Jehová ta swenta te sKʼope

Akʼa jtuuntestik ta lek te weʼelil kʼoem te ya yakʼbotik Jehová ta swenta te sKʼope

«Hoʼon Jehovahon, te Dioson awuʼun, te ya caʼbat anop te bin lec ya xcʼohat yuʼun.» (ISAÍAS 48:17)

KʼAYOJIL 117 SOK 114

1, 2. 1) ¿Bin yilel ya kiltik te Biblia te testigootik yuʼun Jehovae? 2) ¿Banti ya amulanxan ta swenta te Bibliae?

TE TESTIGOOTIK yuʼun Jehová mukʼ skʼoplal kuʼuntik te Bibliae. Ya yakʼ smukʼul kʼinal kaʼiytik, ay bin ya yakʼ jmaliytik sok ya yakʼ tojobtesel te ya smukʼulin koʼtantike (Romanos 15:4). Te bin ya yale maba lokʼem tal ta yoʼtan ants winiketik. Jaʼ «scʼop Dios» (1 Tesalonicenses 2:13).

2 ¿Banti ya amulanxan ta swenta te Bibliae? Ta melel, ta jpisiltik ayniwan te banti kʼax ya jmulantike. Ay chaʼoxtul te jaʼ bayal ya smulanik te sjun Mateo, Marcos, Lucas sok Juan, melel te bin ya yalbey skʼoplal ta swenta te Jesús tey-ae ya xkoltayotik ta snaʼel te tʼujbil talelil yuʼun te Jehovae (Juan 14:9). Ay yantik te jaʼ ya smulanik te sjun te Apocalipsis, te yichʼoj tal albilkʼopetik yuʼun «te bila ya xcʼot ta pasel ta ora naxe» (Apocalipsis 1:1, XCD). Ay yantik te ya x-akʼbot smukʼul yoʼtanik te bin ya yal te sjun Salmos, sok ay yantik ya smulanik te tʼujbil tsitsel ya yakʼ te sjun Proverbios. Te Bibliae jaʼ jun libro te pasbil ta swenta spisil te ants winiketike.

3, 4. 1) ¿Bin yilel ya kiltik te junetik lokʼemik ta Bibliae? 2) ¿Bin junetik chajpanbil ta swenta te jujuntsojb ants winiketike?

3 Jich bitʼil te bayal skʼoplal ta koʼtantik te Bibliae, jaʼnix jich-euk te junetik ya kichʼtik te lokʼemik ta Bibliae. Te libroetik, foyetoetik, revistaetik sok te yantik junetike jaʼik weʼelil kʼoem te yakʼojbotik Jehová ta swenta te sKʼope (ilawil te recuadro «¿Bin ya skʼan ya yal?»). Ya skoltayotik swenta ya  kamigointik ta lek te Diose sok ya stulantes te schʼuunel koʼtantike (Tito 2:2).

4 Te bayal junetik lokʼem ta Bibliae, jaʼ pasbil ta swenta spisil te stestigotak Jehová. Ay yantik junetik la yichʼ pasbeyel ta swenta jtsojb ants winiketik, jich bitʼil te jchʼieletik o meʼil tatiletik. Jteb ma spisiluk te articuloetik sok videoetik te ayik ta pajina kuʼunkotik ta Internet jaʼ pasbil ta swenta te machʼatik maba Testigoetike. Ta swenta te bayal ta chajp junetik lokʼemike, ya yakʼ ta ilel te kʼoem ta pasel te bin yaloj ta jamal Jehová jaʼ te ya yakʼbey bayal weʼelil kʼoem ta spisil te ants winiketik ta swenta te sKʼope (Isaías 25:6).

5. ¿Bin-a te ya skʼan ayuk ta koʼtantike?

5 Jteb ma jpisiltikuk ya jkʼantik bayal tiempo swenta ya jkʼopontik te Biblia sok te yantik junetike. Maniwan ya xjuʼ pajal ya kakʼbeytik tiempo ta skʼoponel spisil te junetik ya kichʼtike. Jaʼukmeto ayuk ta koʼtantik te kʼax lek ya yil Jehová te kʼalal ya jtuuntestik ta lek te tiempo ta skʼoponel sok ta snopel te Biblia sok te yantik junetike (Efesios 5:15, 16). Jaʼukmeto yame skʼan ya jtsajtay jbatik ta swenta te bin maba lek ta pasel. Kiltik bin-a.

6. ¿Binwan ya xjuʼ ya smakotik te maba ya jtuuntestik ta lek te weʼelil kʼoem ya yakʼbotik Jehová ta swenta te sKʼope?

6 Teme maba ya jtsajtay jbatike yaniwan jnoptik te ay chaʼox-xajtʼ te bin tsʼibaybil ta Biblia sok te yantik junetik te maʼyuk bin mukʼ skʼoplal ya snojptesotik ta swenta te jkuxlejaltike. Jich bitʼil, ¿bin ya jnoptik teme ay jxajtʼ te bin ya yal ta Biblia maʼyuk ya yalbey skʼoplal ta swenta te bin yak ta kʼaxel ta jtojoltike? ¿O bin ya jpastik teme maba jaʼ pasbil talel ta jwentatike? ¿Jaʼbal te maʼyuk swentail ta koʼtantik te kʼalal ya jkʼopontike? ¿O jkʼaxel maba ya jkʼopontik? Teme jich ya jpastik-abi, bayalme bin mukʼ skʼoplal yakotik ta schʼayel te ya xjuʼ ya slekubtesbotik te jkuxlejaltike. ¿Bin ya skʼan ya jpastik swenta ma jichuk ya xkʼot ta jwentatik? Julukme ta koʼtantik te junetik ya kichʼtike talem ta stojol Jehová. Te Biblia jich ya yal: «Hoʼon Jehovahon, te Dioson awuʼun, te ya caʼbat anop te bin lec ya xcʼohat yuʼun» (Isaías 48:17). Ta articulo ini, yame kiltik oxchajp te bin ya skʼan ya jpastik swenta ya jtuuntestik ta lek spajkal te Biblia. Jaʼnix jich yame kiltik te bin-utʼil ya jtuuntestik ta lek te weʼelil kʼoem ya yakʼbotik Jehová ta swenta te sKʼope.

¿BIN-UTʼIL YA JMULANTIK TA LEK TE SKʼOPONEL BIBLIAE?

7. ¿Bin yuʼun ya skʼan maba ya jtsatik te banti ya jkʼopontik te Bibliae?

7 Manchuk ya jtsatik te banti ya jkʼopontik te Biblia. Melelnix-a te ay chaʼox-xajtʼ te bin ya yal ta Biblia la yichʼ tsʼibayel ta swentanax jtul o bayal ta tul ants winik. Jaʼukmeto te 2 Timoteo 3:16 ya yal ta jamal te «spisil te bin tsʼihbabil hilel ta Shun hich nix la scʼan Dios te ya yichʼ tsʼihbayel, soc ya xtuhun». Jaʼ yuʼun ya skʼan te manchuk ya jtsatik te banti ya jkʼopontik te Bibliae (ilawil te recuadro «¿Bin ya skʼan ya yal?»). Jich bitʼil ay jtul hermano la yal te yalaj spas tulan ta sjultesel ta yoʼtan te aylaj bayal bintik ya x-akʼbot snop te jxajtʼ bin ya skʼopon ta Bibliae. Jaʼ-abi yalaj xkoltayot ta stael te bintik ya snop ta swenta te bin la skʼopon te ay maba chikanik ta ilel ta oranaxe. Jich yuʼun te kʼalal mato xjajchotik ta skʼoponel-a te Bibliae, akʼa jkʼanbeytik Jehová te yakuk skoltayotik te manchuk tsabiluknax kuʼuntik te banti ya jkʼopontike sok te yakuk yakʼbotik jpʼijiltik ta stael ta ilel te bin ya skʼan yoʼtan ya jnoptike (Esdras 7:10; kʼopona te sjun Santiago 1:5).

¿Yakotikbal smulanel ta lek te skʼoponel Bibliae? (Ilawil te parrafo 7)

8, 9. 1) ¿Bin jojkʼoyeletik ya xjuʼ ya jpasbey jbatik te kʼalal ya jkʼopontik te Bibliae? 2) ¿Bin ya yakʼ jnoptik ta swenta te bin ya yichʼ kʼanbeyel te ancianoetik ta kongregasione?

8 Jpasbey jbatik jojkʼoyeletik. Te kʼalal ya jkʼopontik te Bibliae, akʼa jpasbey jbatik te oxeb jojkʼoyeletik ini: «¿Bin ya yakʼbon jnop ta swenta Jehová ini? ¿Bin-utʼil ya xjuʼ ya jtuuntes ta jkuxlejal te bin la jnope? ¿Bin-utʼil ya xjuʼ ya jtuuntes swenta ya jkoltay yantik te bin la jnope?». Teme ya jnopilan ta koʼtantik te jojkʼoyeletik-abi, jichme ya jmulantik ta lek te bin ya jkʼopontik ta Bibliae. Kiltik junuk ejemplo. Te Biblia ya schol te bintik ya yichʼik kʼanbeyel te ancianoetik ta kongregasione (kʼopona te 1 Timoteo 3:2-7). Ta melel, maba jpisiltik ancianootik. Jaʼ yuʼun ayniwan ya xtal ta koʼtantik te maʼyuk skʼoplal te bin ya yal tey-ae. Jaʼukmeto ya jtuuntestik te oxeb jojkʼoyeletik te ay ta parrafo swenta jich ya kiltik bin-utʼil ya slekubtesotik ta jpisiltik te jxajtʼ bin yal te Bibliae.

 9 «¿Bin ya yakʼbon jnop ta swenta Jehová ini?». Te bin ya yichʼ kʼanbeyel te ancianoetik ya yakʼ kiltik te ya skʼan Jehová te ya schʼuunik te mantaliletik tulanik skʼoplale. ¿Bin yuʼun? Melel kʼax bayal skʼoplal ta yoʼtan te j-abatetik yuʼune. Te Biblia ya yal te jaʼnix Jehová «la sman ta scuenta schʼichʼel» te sNichʼane (Hechos 20:28). Jaʼ yuʼun te Diose jaʼ ya smaliy te lekuk ya yakʼ ta ilel stalelik te ancianoetike. Jaʼnix jich ya yilbey yaʼtelik ta jujuntul ta swenta te bitʼil ya yakʼik ta ilel stalelik ta stojol te kongregasione. Jaʼ yoʼtanuk te leknax ya kaʼiy jbatik te bitʼil ya skanantayotik te ancianoetike (Isaías 32:1, 2). Jich bitʼil la kiltikixe, te bin ya yichʼ kʼanbeyel te ancianoetike, ya yakʼ jnoptik te bayal jkʼoplaltik ta yoʼtan te Jehovae.

10, 11. 1) ¿Bin-utʼil ya xtuun kuʼuntik te ya jchaʼiltik te bintik ya yichʼ kʼanel ta swenta te ancianoetike? 2) ¿Bin-utʼil ya xjuʼ ya jtuuntestik swenta ya jkoltaytik te yantike?

10 «¿Bin-utʼil ya xjuʼ ya jtuuntes ta jkuxlejal te bin la jnope?». Teme ancianootik yuʼun kongregasion, ay baeltik ya skʼan ya jchaʼiltik te bintik ya kichʼtik kʼanbeyel sok ya jpastik tulan ta slekubtesel te jtaleltike. Teme maba ancianootik, jaʼukmeto teme jnopojtik te ya jkʼantik ya x-abatinotik ta ancianoile, yame skʼan ya jpastik tulan ta skʼotesel ta spasel ta lek te bintik ya yichʼ kʼanel ta swenta-abi (1 Timoteo 3:1). Jaʼukmeto jpisiltik ay bin ya jnoptik ta swenta te bintik ya yichʼ kʼanbeyel te ancianoetike. Jich bitʼil, te Jehová ya skʼan te jujuntul ya kakʼtik ta ilel te ma jaʼuk jkʼaxel ya jkʼantik ya yichʼ pasel te bin ya jmulantike sok te ya skʼan te ya jnaʼtik kʼinale (1 Pedro 4:7; Filipenses 4:5). Kʼalal te ancianoetik ya yakʼik ta ilel lekil taleliletik ta stojol te kongregasione, te hermanoetike yame skʼayinbeyik stalelik sok ya snopbeyik te schʼuunel yoʼtanike (Hebreos 13:7; 1 Pedro 5:3).

11 «¿Bin-utʼil ya xjuʼ ya jtuuntes swenta ya jkoltay yantik te bin la jnope?». Te bintik ya yichʼ kʼanbeyel te ancianoetike ya xjuʼ ya jtuuntestik swenta ya jcholbeytik yaʼiyik te machʼatik ya kakʼbeytik nojptesel yuʼun Biblia soknix te yantik ants winiketik te bitʼil maba pajal sok te jwolwanejetik yuʼun yantik relijionetik te ancianoetike. Jaʼnix jich ya yakʼ juluk ta koʼtantik te tulan ya x-aʼtejike. Te kʼalal ya jnop ta koʼtantik te ya spasik tulan ta spasel te yaʼtelike, jich mukʼ skʼoplal ya kiltik te ancianoetike (1 Tesalonicenses 5:12). Sokme stseʼelil yoʼtanik ya x-aʼtejik ta kongregasion te kʼalal mukʼxan skʼoplal ya kiltike (Hebreos 13:17).

12, 13. 1) ¿Bin ya xjuʼ ya jlebeytikxan skʼoplal ta junetik ay kuʼuntike? 2) Akʼa jun ejemplo te bin ya jtabeytikxan skʼoplal te kʼalal ya kiltik bin kʼot ta pasel te kʼalal la yichʼ tsʼibayel te bin cholbil jilel ta Bibliae.

12 Akʼa jletikxan te bin ya jnoptike. Kʼalal ya jnoptik te Biblia, ya xjuʼ ya jlebeytik sujtib te jojkʼoyeletik ini:

  • ¿Machʼa la stsʼibay te jxajtʼ te bin tsʼibaybil ta Bibliae?

  • ¿Banti sok bin-ora la yichʼ tsʼibayel?

  • ¿Bintik mukʼ skʼoplal kʼot ta pasel te kʼalal yak ta tsʼibayel-a te libro ini?

Teme ya jlebeytikxan skʼoplal te jojkʼoyeletik-abi ya xjuʼ ya skoltayotik ta stael te bintik lek ya jnoptik te ay ma chikanik ta ilel ta oranaxe.

13 Kiltik junuk ejemplo. Ta sjun Ezequiel 14:13, 14, te Jehová la yal teme ay jpam nasion ya sta smul ta stojole, ya slajin sok ya stupʼbey te sweʼelik sok te schambalamike. Jaʼukmeto jich la yal: «Te teyuc ay ta yohlilic a te Noé, Dan[i]el soc Job, ha nax ya xcolic ta libre ta yoxebalic te hichuque, ta scuenta te toj bin ya spasic». Teme ya jlebeytikxan skʼoplal ta swenta-abi, tey ya jtatik ta ilel-a te jaʼ la stsʼibay Ezequiel te versiculoetik ini te kʼalal ayto skʼan 612 jaʼbil ya xtal-a te Cristoe. Manchukme te Noé sok te Job ayix bayal cien jaʼbil te lajemikix-ae, te Jehová ayto ta yoʼtan te bitʼil jun yoʼtan la yakʼ sbaik ta stojole. Jaʼukmeto te Daniel kuxulto-a. Ayniwan 20 yaʼbilal-a te kʼalal Jehová la yalbey te kʼax toj te yaʼtel jich bitʼil te Noé sok te Jobe. ¿Bin ya jnoptik yuʼun? Jaʼ te ya yil Jehová sok mukʼ skʼoplal ya yil spisil te j-abatetik te jun yoʼtan ya yakʼ sbaik ta stojole sok te jchʼieletike (Salmo 148:12-14).

JTUUNTESTIK TA LEK TE JUNETIKE

14. 1) ¿Bin-utʼil ya xjuʼ xkoltayot te junetik te chajpanbil ta swenta te jchʼieletike? 2) ¿Bin-utʼil ya sta slekilalik-euk te yantike? (Ilawil te lokʼomba ta sjajchibal te articulo.)

14 Te junetik chajpanbil ta swenta te jchʼieletike. La kiltikix te jpisiltik ay bayal bin ya xjuʼ ya jnoptik ta spajkal te Bibliae. Jaʼnix jich jpisiltik bayal  bin ya xjuʼ ya jnoptik ta swenta te junetik kuʼuntik lokʼemik ta Bibliae. Kiltik cheʼoxebuk ejemplo. Te ayix talel cheʼoxeb jaʼbile, te Jehová yakʼojbotik bayal articuloetik sok libroetik ta swenta te jchʼieletike [1] (ilawil te nota ta slajibal te articulo). Te junetik-abi, ya xkoltayot ta sitintayel te tenel ya staik ta eskuela sok te bintik wokolil ya staik ta swenta te yaʼbilalike. Jaʼukmeto, ¿bin-utʼil ya jta jlekilaltik ta jpisiltik ta swenta te articuloetik sok te libroetik chajpanbil ta swenta te jchʼieletike? Teme ya jkʼopontike, yame xkʼot ta koʼtantik te bintik wokolil ya sitintayik te jchʼieletik sok jich ya xjuʼ kuʼuntik skoltayel sok ya xjuʼ ya kakʼbeytik yip yoʼtanik.

15. ¿Bin yuʼun ya skʼan ayuk skʼoplal ta yoʼtan-euk te machʼatik ayix yaʼbilalik te junetik chajpanbil ta swenta te jchʼieletike?

15 Te jchʼuunjeletik te ayix yaʼbilalike yame skʼan te manchuk ya xtal ta yoʼtanik te ma xtuun yuʼunik te junetik chajpanbil ta swenta te jchʼieletike. Teme jich ya jnoptik-abi ya kakʼtik te ilel te ya jtoy jbatike. Te machʼatik ayix bayal yaʼbilalike, ay bayal wokoliletik ya sitintayik-euk te ya yalbey skʼoplal ta articuloetik-abi. Jich bitʼil te jpisiltik ya skʼan ya jkoltaytik te bintik schʼuunej koʼtantik, ya jnoptik skomel te bin yaʼiyel ya kaʼiy jbatik, ya jnoptik sitintayel te machʼatik ya stenotik sok yijkʼitayel te chopol joʼtaktike soknix te bintik ya jkʼasestik kʼajkʼal-a te maba lekike. Te junetik chajpanbil ta swenta te jchʼieletike, lokʼemik ta Biblia-euk. Jaʼ yuʼun jpisiltik ya jta jlekilaltik yuʼun.

16. ¿Bin-utʼil ya xkoltayotikxan te jchʼieletik te junetik lokʼem ta Bibliae?

16 Te junetik chajpanbil ta swenta te jchʼieletike, jaʼnix jich ya xkoltayotik ta yamigoinel ta lek te Jehovae (kʼopona te sjun Eclesiastés 12:1, 13). Jaʼukmeto te machʼatik ayix yaʼbilalike, ya xjuʼ ya stuuntesik ta lek-euk. Jich bitʼil, te ¡Despertad! yuʼun abril 2009 yichʼoj talel jun articulo te sbiilinej «¿Cómo disfrutar la lectura de la Biblia?». Te articulo-abi, bayal bintik la yal te ya xjuʼ ya jpastik sok yichʼoj talel jun recuadro te ya xjuʼ ta setʼel sok ya jkʼejtik swenta ya jnoptik. ¿Tuunbal yuʼun-euk te machʼatik ayix yaʼbilalike? ¡Tuun yuʼunik! Ay jtul ants te nujpunem sok ay yalatak la yal te wokol ya yaʼiy skʼoponel te Bibliae, jich yuʼun la stuuntes te bintik la yal te articulo-abi. Ta ora ini bayal ya smulanix snopel te Biblia sok ya yil te bin-utʼil snitojbey sba skʼoplal te libroetik yichʼoj te Bibliae. Jaʼ-abi ya xkoltayot ta yilel spisil te bin ya yalbey skʼoplal ta spajkal te Bibliae. Jich la yalxan: «Maʼyuk bin-ora jmulanoj skʼoponel ta lek te Biblia ta nailto».

17, 18. ¿Bin-utʼil ya skoltayotik te junetik chajpanbil ta swenta ants winiketike? Ala junuk ejemplo.

17 Te junetik ta swenta ants winiketik. Ta yaʼbilal 2008 la yichʼ lokʼesel Te J-ilkʼinal ta toyol te ya  yichʼ nopele, te jaʼ la yichʼ chajpanel ta swenta te stestigotak Jehová. Jaʼukmeto jaʼnix jich yak ta lokʼesel revistaetik ta swenta te machʼatik maba testigoetik yuʼun Jehová. ¿Bin-utʼil ya xjuʼ ya jtuuntestik ta lek? Kaltik junuk ejemplo. Jnop kaʼiytik te ya kikʼtik talel jtul ants winik ta sNail Tsoblej, tal ta yoʼtan te ya xtale. Ta melel tseʼel koʼtantik yuʼun. Te kʼalal yak ta kʼaxel-a te discursoe, yaniwan jnop ta koʼtantik te bin yaʼiyel ya yaʼiy sba sok te binwan-utʼil ya xjeltaybot te skuxlejale. Ta swenta-abi bayal ya kaltik wokol yuʼun te bintik la yichʼ albeyel skʼoplal ta discursoe.

18 Ayniwan jich ya xkʼax ta jtojoltik te kʼalal ya jkʼopontik te junetik chajpanbil ta swenta spisil te ants winiketike. Jich bitʼil, akʼa jnoptik ta swenta te revista Te J-ilkʼinal ta toyol ta swenta ants winiketik sok te articuloetik ay ta jw.org. Te junetik ay tey-ae maba chujkʼul ya yaʼiyik te machʼatik maba testigoetik yuʼun Jehovae. Te kʼalal ya jkʼopontik te junetik-abi, ya xkʼotxan lek ta koʼtantik te bintik ya yakʼ ta nopel te Biblia te ya jnaʼtikix ta leke. Jaʼ-abi ya skoltayotik ta smulanelxan ta lek te bin jnopojtikixe. Te junetik-abi, jaʼnix jich ya yakʼ jnoptik bayal ta chajp yachʼil te bin-utʼil ya jcholtik te bintik schʼuunej koʼtantik ta scholel skʼop Dios. Te revista ¡Despertad! ya skoltayotik-euk. Jich bitʼil, snaʼel te bintik ya yakʼxan schʼuun koʼtantik te Dios, te bintik spasoj sok ya snojptesotik ta skoltaybeyel skʼoplal te bintik jchʼuunejtike (kʼopona te 1 Pedro 3:15).

19. ¿Bin-utʼil ya kakʼtik ta ilel te ya kalbeytik wokol Jehová ta swenta te ya yakʼbotik te weʼelil kʼoem ta swenta te sKʼope?

19 Chikan ta ilel te yakʼojbotik Jehová bayal weʼelil kʼoem ta swenta te sKʼop yuʼun jich ya jta jlekilaltik (Mateo 5:3, TNM). Jaʼ yuʼun spisiluk-ora ya jkʼopontik sok ya jpastik ta jkuxlejaltik te tsitsel ya yakʼbotik sok te bintik ya yakʼ jnoptike. Teme jich ya jpastike, lekme ya xlokʼotik ta jkuxlejaltik sok yame kakʼbeytik yil Jehová te bayal ya kalbeytik wokol yuʼun te bayal weʼelil kʼoem te ya yakʼbotik ta swenta te sKʼope (Isaías 48:17).

^ [1] (parrafo 14): Jich bitʼil, ilawil te volumen 1 sok 2 yuʼun te libro Lo que los jóvenes preguntan. Respuestas prácticas sok te seccion «Los jóvenes preguntan» te yakix ta lokʼesel ta jw.org.