Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

TE J-ILKʼINAL TA TOYOL (TE YA YICHʼ NOPEL) ABRIL 2016

¿Jichbal bitʼil tsʼujul te kʼalal ya achol skʼop Diose?

¿Jichbal bitʼil tsʼujul te kʼalal ya achol skʼop Diose?

TULAN skʼoplal te scholel skʼop Diose, jaʼukmeto ay machʼatik te ma jichuk ya snopike. Manchukme ay machʼatik ya smulanik te bin ya yal te Bibliae, ya skuyik te ma puersauk ya snopik te Biblia sok te joʼotike.

Kiltik te bin kʼot ta swenta jtul winik te Gavin sbiile. Ya xkʼot ta tsoblejetik ta sNail Tsoblej, jaʼukmeto maba ya skʼan te nojptesel yuʼun Biblia. ¿Bin yuʼun? La yal te maʼyuk bayal bin ya snaʼ ta swenta te Bibliae sok ma skʼan te ya snaʼik stojol te yantike. Jaʼnix jich malaj ya skʼan te jkʼaxel ya yakʼ sba ta jun relijion sok malaj skʼan te ay machʼa ya xloʼlayote. ¿Bin ya anop ta swenta te bin la yal te Gavin? ¿Aybal ya xtal ta awoʼtan te ay bin-utʼil ya xjuʼ ta koltayele? Te bin ya yakʼ ta nopel te Bibliae, ya xjuʼ xkoltayot te ants winiketike. Jaʼ yuʼun te Jehová la yalbey te israeletik ta swenta te skʼope «hich te bin utʼil tsʼujul» sok «hich te bin utʼil cʼunil haʼal te ya xco tal ta sba te ac» (Deuteronomio 31:19, 30; 32:2). Yame kiltik bael chanchajp te bin yilel stalel te tsʼujul te ya xjuʼ ya jkʼayintik te kʼalal ya jcholbeytik skʼop Dios ta «spisil ants-winiquetic» (1 Timoteo 2:3, 4).

 ¿BIN YUʼUN PAJAL SOK TSʼUJUL TE SCHOLEL SKʼOP DIOSE?

Te tsʼujul kʼun-nax ta aʼiyel. Te tsʼujule, jaʼik te stʼulutʼul jaʼ ya xchiknaj ta ajkʼabal ta sba te bintik ay ta kʼinal ta skaj te ya sikub te ikʼe. ¿Bin yuʼun ya yal te Biblia te jich bitʼil «tsʼujul» te skʼop Jehová? Melel kʼun-nax ta aʼiyel sok yutsil skʼop la skʼopon te j-abatetik yuʼune. ¿Bin-utʼil ya xjuʼ jtʼunbeytik te stalele? Jaʼ te ya kichʼbeytik ta mukʼ te bintik schʼuunej yoʼtanik, te ya jtijbeytik yoʼtanik sok te jaʼuknix ya staik ta nopel ta stukelik te ants winiketike. Teme ya kakʼtik ta ilel te yuʼun-nix ay ta koʼtantik-a te ants winiketike, ya schʼuun yoʼtanik te bin ya kalbeytike. Ta swenta-abi, ay bintik lek ya xlokʼ kuʼuntik-a te kʼalal ya jcholtik te skʼop Diose.

Te tsʼujule leknax kʼinal ya kaʼiytik yuʼun. Te kʼalal ya jcholtik te skʼop Diose, jich ya xkʼot te bitʼil tsʼujul teme ya sikubtesbot kʼinal ya yaʼiyik o leknax ya yaʼiy sbaik yuʼun te ants winiketike. ¿Bin–utʼil ya xjuʼ ya jpastik-abi? Akʼa jnoptik bintik-utʼil ya xjuʼ ya jkoltaytik te ants winiketik swenta ya snopik te Bibliae. Kiltik yan buelta te bin kʼax ta stojol te Gavin. Ta sjajchibal, ay jtul hermano te Chris sbiile, la sjapbey nojptesel yuʼun Biblia, jaʼukmeto maba la suj yuʼun jich ya skʼan te nojptesele. Te bin la spase, la sle te bin leknax ya yaʼiy sba yuʼun te Gavin ta jujun buelta te kʼalal ya scholbey yaʼiy ta swenta te Bibliae. Te Chris la scholbey yaʼiy te ay bin tulan skʼoplal ta Biblia sok la yalbey te kʼalal snaʼojbeyix skʼoplal-abi, jaʼ ya xkoltayot swenta ya xkʼot lek ta yoʼtan te bin ya yichʼ nopel ta tsoblejetike. Jaʼnix jich te Chris la yalbeyxan te Gavin ta swenta te albilkʼopetik te ay ta Biblia te jaʼ koltayot swenta ya xkʼot ta yoʼtan te ya xjuʼ ya smukʼulin yoʼtan te bin ya yal te Bibliae. Bayal la yalbeyik skʼoplal te albilkʼopetik ta Bibliae. Te Gavin leknax la yaʼiy sba sok la skʼan te nojptesel yuʼun Bibliae.

Te tsʼujul ya yakʼ kuxlejalil. Ta lum Israel, te kʼalal yorail takin kʼinal kʼax kʼux te kʼajkʼale sok ayniwan ya xkʼax bayal u te maba ya yakʼ te jaʼale. Teme maʼyuk te tsʼujule ya xtakij sok ya xlaj spisil te teʼetike. Te Biblia ya yal ta swenta te kʼajkʼal ini, bayal ants winiketik ya skʼan ya yaʼiyik «te scʼop Jehová» (Amós 8:11). Jich kʼoem te bitʼil ay bayal takin tiʼile, jaʼnax yuʼun te jaʼ ta swenta te sKʼop Diose. Jaʼ yuʼun te Biblia ya yal te kʼalal ya scholik lek yachʼil kʼop ta swenta Ajwalinel yuʼun Dios te machʼatik tsabilik te ya xbajtʼik ta chʼulchane, jaʼ jichik «te bin utʼil te tsʼujul yuʼun Jehová» (Miqueas 5:7). Sok ayxan jtsojb te sbiilinejik «yantic tuminchijetic» te yakik ta koltaywanej-euk (Juan 10:16). Te lek yachʼil kʼop yakotik ta scholele, jaʼ smakojbey skʼoplal te bin sjapoj te Jehová swenta ya yakʼbey skuxlejal sbajtʼel kʼinal te machʼatik ya skʼan ya snaʼbeyik sba ta leke. ¿Bayalbal skʼoplal ta koʼtantik-abi?

Te tsʼujul jaʼ jun bendision yuʼun Jehová. (Deuteronomio 33:13). Te scholel skʼop Dios ya xjuʼ jich ya xkʼot te bitʼil jun bendision o jun majtʼanil ta stojol te machʼatik ya skʼan ya snopik te smelelil kʼope. Ta swenta te Gavin jich kʼot bitʼil jun bendision te nojptesel yuʼun Bibliae, melel koltayot ta stabeyel sujtib te jojkʼoyeletik yuʼune. Maʼyuk bayal tiempo ta patil la yichʼ jaʼ, jaʼnix jich ta ora ini yak ta smulanel scholel skʼop Dios sok te yinam te Joyce sbiile.

Te stestigotak Jehová yakik ta spukel ta swolol Balumilal te lek yachʼil kʼop yuʼun te Ajwalinel yuʼun Diose.

BAYALUKME SKʼOPLAL TA KOʼTANTIK TE SCHOLEL SKʼOP DIOSE

Teme ya jpajbeytik skʼoplal te scholel skʼop Dios te bitʼil tsʼujule, yame jtatik ta ilel te bayal skʼoplal te bintik ya jpastik tulan spasel ta jujuntule. ¿Bin yuʼun? Melel te jtʼulnax tsʼujule maʼyuk bayal bin ya xjuʼ ya spas, jaʼukmeto te kʼalal ay bayal miyon ta tʼul tsʼujul ya stsob sba ta jun-naxe, ya x-ajchʼ yuʼun te lum kʼinale. Jaʼ pajal sok-abi, ayniwan ya xtal ta koʼtantik te maʼyuk bayal bin ya xjuʼ ya jpastik te kʼalal jtukeltik ya x-aʼtejotike. Jaʼukmeto ay bayal miyon ta tul stestigotak Jehová te jun-nax ya jcholtik skʼop Dios ta «spisil nacionetic» (Mateo 24:14). Jich te bitʼil la kiltike, te scholel skʼop Dios jaʼ jun bendision yuʼun te Jehovae. Sok ya xjuʼ te jich ya xkʼot te bitʼil tsʼujul te kʼun-nax ta aʼiyel, leknax kʼinal ya kaʼiytik yuʼun sok ya yakʼ kuxlejalil.