Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

TE J-ILKʼINAL TA TOYOL (TE YA YICHʼ NOPEL) ABRIL 2016

Te Jehová lek ya yil te machʼatik ay schʼuunel yoʼtanik ta stojole

Te Jehová lek ya yil te machʼatik ay schʼuunel yoʼtanik ta stojole

«Ha yac anopbeyic yoʼtan te machʼatic te ta scuenta schʼuhunel yoʼtanic soc te jun yoʼtanic yaquic ta mahlab, ya yich’ic te bintic yaloj ta jamal te Diose.» (HEBREOS 6:12)

KʼAYOJIL 86 SOK 54

1, 2. ¿Bin-a te wokol ta pasel la yaʼiy te Jefté sok te yantsil nichʼane?

JTUL winik yak ta sujtel talel ta sna te kʼalal juʼ yuʼun tsalaw ta guerrae. Kʼalal te achʼix la yil te state, tseʼelnax yoʼtan lokʼ tal ta stael, yak ta ajkʼot lokʼel tal sok yak ta kʼayoj. Jaʼukmeto te state ay bin la yal sok la spas te chamnax yoʼtan yuʼun te achʼixe. La schʼiʼ te skʼuʼe jich la yakʼ ta ilel te ay ta bayal mel-oʼtane sok jich la yal ta aw: «¡Ay, cantsil-nichʼan, ta mero melel la awaʼbon jwocol!». Te winike la yalbey te ay bin yaloj ta jamal ya spas ta stojol Jehová te ya xjelbot te bin yilel skuxlejal ta spisil-orae. Ta swenta te bin la yal ta jamale, jich maʼyuk bin-ora ya xnujpun sok maʼyuk ya x-ayin yal te yantsil nichʼane. ¿Bin la yal te yantsil nichʼane? Ta oranax la yalbey te stat te akʼa skʼotes ta pasel te bin yaloj ta jamale. Ta swenta te sujtib la yakʼ te achʼixe, jich la yakʼ ta ilel te smukʼul yoʼtan ta stojol te Jehová sok snaʼoj te maʼyuk te bin chopol ya xbajtʼ kʼanbotuk yuʼun te Diose (Jueces 11:34-37). Te kʼalal la yil te ay bayal schʼuunel yoʼtan te yantsil nichʼane, kʼax tseʼel yoʼtan la yaʼiy sba te winike. Snaʼoj  te kʼax tseʼel yoʼtan yuʼun te Jehová ta swenta te lek stalel te achʼixe.

2 Jaʼ Jefté sbiil te winik-abi. Te Jefté sok te yantsil nichʼane bayal smukʼul yoʼtanik ta stojol te Jehová sok ta swenta te bin-utʼil ya spas te yaʼtele. Jaʼnix jich te kʼalal ayik ta wokolil la yakʼik ta ilel te ay schʼuunel yoʼtanike. Jaʼ la skʼanik te lek ilbilik yuʼun te Jehová, jaʼ swentail te la spasik tulan te jaʼnix la slokʼes sba ta yoʼtanike.

3. ¿Bin ya yakʼ jnoptik te stalel Jefté sok te yantsil nichʼane?

3 Maba kʼun ta pasel te bitʼil spisil-ora ya kakʼtik ta ilel te tulan ay te schʼuunel koʼtantik ta stojol te Jehovae. Ya skʼan ya jpastik tulan teme ya jkʼan ya jkanantaytik te schʼuunel koʼtantike (Judas 3). Jich yuʼun ta articulo ini, ya jnoptik ta swenta stalel te Jefté sok te yantsil nichʼane. Yame kiltik bael bin-utʼil la yakʼikxan ta ilel schʼuunel yoʼtanik te kʼalal ayik ta wokole.

TULAN TE SCHʼUUNEL YOʼTANIK MACHUKME MABA LEK STALEL TE YANTIKE

4, 5. 1) ¿Bin la yichʼik kʼanbeyel te ya spasik te israeletik te kʼalal ya x-ochik ta Kʼinal te Albil jilel skʼoplale? 2) Jich bitʼil ya yal ta sjun Salmo 106, ¿bin kʼot ta swentaik te israeletik ta skaj te la skʼaxuntayik kʼope?

4 Ta jujun kʼajkʼal te Jefté sok te yantsil nichʼane la yilik te bintik maba lek lokʼ yuʼunik te israeletik ta skaj te ya skʼaxuntaybeyik smantal te Jehovae. Ayniwan 300 jaʼbil ta nail te kʼalal nopol ya x-ochikix te israeletik ta Kʼinal te Albil jilel skʼoplale, te Jehová la yal ta mantal te ya slajinik te ants winiketik te ya yichʼik ta mukʼ te lotil diosetike. Jaʼukmeto maba la schʼuunik (Deuteronomio 7:1-4). Bayal ta tul jajchik ta yichʼel ta mukʼ te lotil diosetik sok yalik ta mulwej jich bitʼil kʼayemik ta spasel te machʼatik nainemik ta Canaán te Kʼinal te Albil jilel skʼoplal (kʼopona te sjun Salmo 106:34-39).

5 Ta swenta te jkʼaxuntayejkʼopetike, te Dios maba la skoltay te israeletik ta skʼab ta skontratake (Jueces 2:1-3, 11-15; Salmo 106:40-43). Maniwan kʼunuk la yaʼiyik te familiaetik te kʼux ta yoʼtanik te Jehová ta yakʼel ta ilel te schʼuunel yoʼtanik ta skʼajkʼalel-a te kʼax chujkʼultik sbae. Jaʼukmeto te Biblia ya yalbey skʼoplal chaʼoxtul israeletik te yakʼoj ta yoʼtanik te ya yakʼbeyik stseʼelil yoʼtan te Jehovae. Jich bitʼil te Jefté sok te yantsil nichʼane, te Elcana, te Ana sok te Samuel (1 Samuel 1:20-28; 2:26).

6. 1) ¿Bintik ya yakʼ ta pasel te ants winiketik ta ora ini? 2) ¿Bin ya skʼan ya jpastik tulan ta spasel?

6 Ta kʼajkʼal ini, bayal ants winiketik jaʼ skʼayinojbeyik stalel te machʼatik kuxinik ta Canaán. Jaʼ baem yoʼtanik ta spasel te mulwej, utsʼinwanej sok te sleel kʼulejalil. Jaʼukmeto te Jehová ya yal te ya jtsajtay jbatike. Jaʼ ya skʼan ya skanantayotik ta swenta te maba lek stalel te yantik jich bitʼil kʼan skanantay te israeletike. ¿Aybal bin ya jnoptik ta swenta stalel te israeletike? (1 Corintios 10:6-11.) Akʼame jpastik tulan te maʼyuk bin-ora ya jkʼayinbeytik stalel te chopol ants winiketike (Romanos 12:2).

TULAN SCHʼUUNEL YOʼTAN MANCHUKME KʼAN YICHʼ CHʼAYEL SMUKʼUL YOʼTAN

7. 1) ¿Bin la yichʼ pasbeyel yuʼun yermanotak sok te ancianoetik yuʼun Israel te Jefté? 2) ¿Bin la spas te Jefté?

7 Ta skʼajkʼalel te Jefté, la yichʼik tsalel yuʼun skontratakik te israeletik ta skaj te la skʼaxuntaybeyik skʼop te Jehovae (Jueces 10:7, 8). Ma jaʼuknax kʼax swokol yuʼun te utsʼinel yuʼun te skontratak te Jefté, jaʼnix jich jajch kʼop sok te yermanotak soknix te ancianoetik ta Israel. Te yermanotak la spʼajik sok la sbikʼtal-oʼtantayik. Jich yuʼun la snutsik lokʼel ta skʼinal (Jueces 11:1-3). Jaʼukmeto te Jefté maba la yakʼ jelonuk yoʼtan ta skaj schopolil te israeletike. ¿Bin-utʼil ya jnaʼtik-abi? Melel te kʼalal talik te ancianoetik yuʼun Israel ta skʼanbeyel koltayel te Jefté, sok spisil yoʼtan la skoltaylan  (Jueces 11:4-11). ¿Bin yuʼun te jich la spase?

8, 9. 1) ¿Bintik smelelil te ya xtojobteswan te ay ta ley yuʼun Moisés koltayot yuʼun te Jefté? 2) ¿Bin-a te kʼax tulan skʼoplal ta yoʼtane?

8 Te Jefté ya snaʼ ta lek yakʼel guerra, ya snaʼ ta lek te bintik kʼaxem ta stojol te israeletik sok snaʼoj ta lek te ley yuʼun Moisés. Te kʼalal la snopilan ta yoʼtan te bin spasoj te Jehová ta stojol te lum yuʼune, jich la snop te bin lek sok te bin maba lek ta pasele (Jueces 11:12-27). Te jich yipal kʼajkʼal kuxul la stuuntes te bintik smelelil ya xtojobteswan swenta jich ya sta ta nopel te bintik ya spas ta skuxlejale. Te Jefté snaʼoj ta lek te maba ya skʼan Jehová te talel kʼaxel ya sujtesbey sbaik te bin chopol te j-abatetik yuʼune, jaʼ ya skʼan te talel kʼaxel kʼux ya yaʼiy sbaike. Jaʼnix jich ta ley la snop te bin-utʼil ya yakʼ ta ilel stalel ta stojol yantik soknix ta stojol te machʼatik ya xpʼajot yuʼune (kʼopona te sjun Éxodo 23:5 sok Levítico 19:17, 18).

9 Te binwan yan koltayot te Jefté, jaʼ te slekil talel te José. Snaʼojniwan ta lek te bitʼil te José la snaʼbey yoʼbolil sba te sbankiltak manchukme la yichʼ pʼajel yuʼune (Génesis 37:4; 45:4, 5). Jaʼniwan la snopilan ta yoʼtan te Jefté ta swenta te bin lek la spas te Josee, jaʼ-abi jaʼ koltayot ta snaʼel te bin ya xkʼanbot Jehová te ya spas-euke. Kʼaxniwan bayal swokol te Jefté ta skaj te bintik pasbot yuʼun te yermanotake. Jaʼukmeto ma jaʼuk mukʼ skʼoplal la yakʼ te bin yaʼiyel la yaʼiy sbae. Te bin tulan skʼoplal ta yoʼtane jaʼ te ya skoltaybey skʼoplal sbiil te Jehová sok te lum yuʼune (Jueces 11:9). Te Jefté jaʼ la skʼan te ya yakʼ ta ilel schʼuunel yoʼtan ta stojol te Jehovae. Jaʼ yuʼun akʼbot bayal bendision yuʼun Dios sok te lum yuʼune (Hebreos 11:32, 33).

Mame kijkʼitaytik te abatinel ta stojol Jehová manchukme ay mel-oʼtan

10. ¿Bin-utʼil ya skoltayotik te mantaliletik yuʼun Jehová ta yakʼel ta ilel ta jkuxlejaltik te j-abatotik yuʼun te Diose?

10 ¿Bin-utʼil ya xjuʼ ya jkʼayinbeytik stalel te Jeftee? Jnop kaʼiytik ini: ¿binwan ya jpastik teme ay jtul hermano ya schʼaybotik smukʼul koʼtantik o ma stojiluk te bin ya spasbotike? Manchukme ya jmel koʼtantik yuʼun te ay jich ya xkʼot ta pasele, yame skʼan jich ya jpastik te bitʼil Jefté sok ya jtuuntestik te bintik smelelil ya xtojobteswan swenta ya jtatik ta nopel te bin leke. Mame kijkʼitaytik te abatinel ta stojol te Jehovae, manchukme ay mel-oʼtan. Sok mame kijkʼitaytik te tsoblejetik sok te sjokinel te hermanoetik ta kongregasione. Jaʼ lek te ya jchʼuunbeytik smantal te Jehovae. Jaʼ-abi ya skoltayotik ta sitintayel te tulan wokoliletik sok jich ya kakʼbeytik yil yantik te lek te jtaleltike (Romanos 12:20, 21; Colosenses 3:13).

TE SLOKʼESEL JBATIK TA KOʼTANTIK YA YAKʼ TA ILEL TE TULAN SCHʼUUNEL KOʼTANTIKE

11, 12. 1) ¿Bin-a te jamal la yal te Jefté te ya spase? 2) ¿Bin ya spas yuʼun jich ya skʼotes ta pasel te bin la yal ta jamale?

11 Te Jefté snaʼoj te ya skʼan koltayel yuʼun Dios swenta ya xjuʼ yuʼun skoltayel te israeletik ta skʼab te skontratake. Jaʼ yuʼun ay bin jamal la yalbey te Jehová te ya spas ta stojole. La yalbey teme ya xkoltayot ta tsalawe, yalaj yakʼbey ta majtʼanil te machʼa nail ya xlokʼ tal ta tael yuʼun te kʼalal ya sujt tal ta yakʼel guerrae. Te Jefté la yal te yalaj yakʼ ta «chicʼbil mahtanil» (Jueces 11:30, 31). ¿Bin la skʼan la yal-abi?

12 Te Jefté ma yuʼunuk la skʼan la yal te ya smil te machʼa nail ya xlokʼ tal ta tael yuʼune. ¿Bin yuʼun te jich ya kaltike? Melel te Jefté snaʼoj  te pʼajbil yuʼun Jehová te ya yichʼ chikʼel jich bitʼil majtʼanil te ants winiketike (Deuteronomio 18:9, 10). Ta skʼajkʼalel te israeletik te chikʼbil majtʼanil jaʼ te bin mukʼ skʼoplal te ay machʼa jich ya yakʼbey te Jehovae (ilawil te recuadro «¿Bin ya skʼan ya yal?»). Jich yuʼun, te bin la skʼan la yal te Jefté jaʼ te ay machʼa ya yakʼbey ta skʼab Jehová swenta ya x-abatin ta nailpakʼ templo te jayeb kʼajkʼal kuxule. Te Jehová lek la yaʼiy te bin albot ta jamal yuʼun te Jefté, jich koltayot ta stsalel te skontratake (Jueces 11:32, 33). Jaʼukmeto, ¿machʼaniwan ya xbajtʼ yakʼ ta majtʼanil ta stojol Dios te Jeftee?

13, 14. ¿Bin ya snojptesotik te bin ya yal te Jueces 11:35 ta swenta te schʼuunel yoʼtan te Jeftee?

13 Jich bitʼil la kiltik ta sbabial parrafo yuʼun te articulo ini, te machʼa sbabial lokʼ ta tael yuʼun te Jefté jaʼ te jip jtul yantsil nichʼan te kʼax kʼux ta yoʼtane. ¿Binwan ya spas te Jefté? ¿Yabal skʼotes ta pasel te bin la yalbey ta jamal te Jehovae? ¿Yabal yakʼbey te yantsil nichʼan swenta ya x-abatin ta stojol Jehová ta nailpakʼ templo te jayeb kʼajkʼal kuxule?

14 Te kʼalal jich kʼot ta pasele, te Jefté laniwan stuuntes te bintik smelelil ya xtojobteswan te snopoj ta ley yuʼun te Diose. Julniwan ta yoʼtan te bitʼil ya yal te ley ta swenta te israeletik te ya skʼan ya yakʼbeyik te Jehová te bin lek ay yuʼunike (Éxodo 23:19). Jaʼnix jich julniwan ta yoʼtan teme ay machʼa ya yalbey ta jamal Dios te ay bin ya spas ta stojole, te ley jich ya yal: «Ma me sut scʼop; ya me spas spisil te bin yaloje» (Números 30:2). Jich yuʼun te Jefté ya skʼan yakuk spas jich bitʼil te Ana te jun yoʼtan ta stojol te Dios te kuxin-niwan ta skʼajkʼalel-euk te Jeftee. Yananix skʼan skʼotes ta pasel-a te bin jamal yaloje, manchukme maniwan kʼunuk la yaʼiy spasel soknix te yantsil nichʼane. Ta swenta te ya xbajtʼ ta abatinel te achʼix ta stojol Dios ta nailpakʼ templo te jayeb kʼajkʼal kuxule, maʼyuk bin-ora ya xnujpun sok maʼyuk ya x-ayin yal. Jich yuʼun maʼyuk machʼa ya yakʼbey jilel stsʼumbal te Jefté sok maʼyuk machʼa ya yuʼunin jilel te skʼinale (Jueces 11:34). Jaʼukmeto jich la yal: «Yuʼun ay bin la jcal ta jamal ta stojol Jehová, ma xhuʼ ya jsut te jcʼope» (Jueces 11:35).  Te bin la yal te Jefté ya yakʼ jnoptik te tulan te schʼuunel yoʼtane. Te Jehová lek la yil te mukʼul majtʼanil akʼbot yuʼune te jich la yakʼbey bendision. Te joʼokotike, ¿jichbal la kakʼtik ta ilel te tulan schʼuunel koʼtantik te bitʼil Jeftee?

15. 1) ¿Bin la kalbeytik ta jamal Jehová te ya jpastik kʼalal la kakʼ jbatik ta stojole? 2) ¿Bin-utʼil ya xjuʼ ya kakʼtik ta ilel te ay schʼuunel koʼtantike?

15 Te kʼalal la kakʼ jbatik ta stojol te Jehovae, la kalbeytik ta jamal te bin kʼax tulan skʼoplal kuʼuntike, jaʼ te ya jpastik te bin ya skʼane. Jnaʼojtik te ma spisiluk-ora kʼun ta pasel-abi. Jaʼukmeto ¿bin ya jnoptik yuʼun te kʼalal ay bin ya skʼanbotik Jehová te maba ya jmulantik spasele? Teme pajal schʼuunel koʼtantik jich bitʼil te Jefté, yame kakʼtik ta ilel te kʼalal ya jkʼotestik ta pasel te bin jamal la kalbeytik te Jehová te ya jpastik ta stojole sok te kʼalal ya jchʼuunbeytik smantal sok spisil koʼtantik. Jnaʼojtik te spisil-ora jaʼ kʼax lekxan te bendision yuʼun Dios te bitʼil ya jlokʼes jbatik ta koʼtantike (Malaquías 3:10). ¿Bin la spas-euk te yantsil nichʼan Jefté? ¿Bin la snop te kʼalal la snaʼ te bin jamal la yal te stat te ya spas ta stojol Diose?

¿Bin-utʼil ya xjuʼ ya kakʼtik ta ilel te pajal tulan schʼuunel koʼtantik jich bitʼil te Jefté sok te yantsil nichʼane? (Ilawil te parrafo 16 sok 17)

16. ¿Bin la yal te yantsil nichʼan Jefté te kʼalal la snaʼ te bin yaloj ta jamal ya spas te state? (Ilawil te lokʼomba ta sjajchibal te articulo.)

16 Te bin jamal la yal te Jefté te ya spas ta stojol te Jehová, maba pajal sok te bin jamal la yalbey Jehová te Anae. Te Ana la yal ta jamal te ya yakʼbey Jehová te skerem-al yuʼun ya x-abatin ta stojol jich bitʼil nazareo ta nailpakʼ templo (1 Samuel 1:11) (ilawil te recuadro «¿Bin ya skʼan ya yal?»). Te nazareotik ya xjuʼ xnujpunik stukel sok ya xjuʼ x-ayin yal snichʼnabik. Yan stukel te yantsil nichʼan te Jefté ma xjuʼ xnujpun stukel, melel akʼot yuʼun stat ta skʼab te Jehová jich bitʼil skojtol «chicʼbil mahtanil» (Jueces 11:37-40). Nopa awaʼiy ini: Te achʼixe nujpun-niwan sok jtul lekil kerem te jichuke, melel te state jaʼ jwolwanej yuʼun Israel. Jaʼukmeto ma jichuk kʼot ta pasel, melel ya x-och ta abatinel ta stojol Dios ta nailpakʼ templo. ¿Bin la yal yuʼun? Ay bin la yalbey te stat te jich la yakʼ ta ilel te jaʼ tulan skʼoplal ta yoʼtan te ya x-abatin ta stojol te Diose: «Pasbon te bin awaloj» (Jueces 11:36). Ta skaj te la skʼan abatin ta stojol te Jehovae, te achʼix la slokʼes sba ta yoʼtan te bitʼil maba ya xnujpune sok te maba ya x-ayin yale. ¿Bin-utʼil ya xjuʼ ya jkʼayinbeytik te slekil talele?

Swenta ya x-abatin ta stojol Jehová te yantsil nichʼan Jefté la slokʼes sba ta yoʼtan te bitʼil maba nujpun sok maba ayin yal

17. 1) ¿Bin ya xjuʼ ya jpastik yuʼun jich ya jkʼayinbeytik schʼuunel yoʼtan te Jefté sok te yantsil nichʼane? 2) ¿Bin yuʼun ya stijbat awoʼtan te bin ya yal te sjun Hebreos 6:10-12?

 17 ¿Bin-utʼil ya xjuʼ ya jkʼayinbeytik stalel te Jefté sok te yantsil nichʼane? Ta kʼajkʼal ini, bayal ta mil jchʼiel testigoetik yuʼun Jehová slokʼesoj sba ta yoʼtanik yuʼun maba ya xnujpunik o te maba ya skʼan yal snichʼnabik ta ora. ¿Bin yuʼun? Melel jaʼ ya skʼan xbajtʼ ta yoʼtanik te abatinel ta stojol te Jehovae. Bayal hermanoetik te ayix yaʼbilalike jaʼnix slokʼesoj sbaik ta yoʼtanik te kʼalal ay jich maba ya sjokinik te yal snichʼnabik o smamatakik. ¿Bin yuʼun? Melel snopojik ta yoʼtanik te jaʼ ya yakʼbeyik stiempoik sok yipik te Jehovae. Ay chaʼoxtul te ya xkoltaywanik ta spasel snail tsoblejetik. Ay yantik te ya xbajtʼik ta Pʼijubtesel ta swenta te Machʼatik yaʼtelinejik scholel skʼop Dios, ta patil ya xbajtʼik ta yan kongregasion te ya skʼan koltayel ta swenta scholel skʼop Dios. Jaʼnix jich ay yantik bayal ya scholik skʼop Dios te kʼalal yorail-a te Snaʼojibal slajel te Cristoe (ilawil te recuadro «¿Bin ya skʼan ya yal?»). Te Jehová maʼyuk bin-ora ya schʼay ta yoʼtan te machʼatik slokʼesoj sba ta yoʼtanik te jich ya spasik ta skaj te kʼux ta yoʼtanike (kʼopona te sjun Hebreos 6:10-12). ¿Jaxan te jaʼate? ¿Yabal alokʼes aba ta awoʼtan yuʼun jich ya x-abatinatxan ta stojol te Jehovae?

¿BIN LA JNOPTIKIX?

18, 19. 1) ¿Bin la jnoptik ta swenta te Jefté sok te yantsil nichʼane? 2) ¿Bin-utʼil ya xjuʼ ya jkʼayinbeytik stalelik?

18 Bayal bin ya xjuʼ ya jnoptik ta swenta stalel te Jefté sok te yantsil nichʼane. Jich bitʼil, jaʼ la stʼun te tojobtesel yuʼun Jehová te kʼalal ay bin la sta ta nopel te ya spas ta skuxlejale. La spas tulan yuʼun maba la stʼun te chopol stalel te ants winiketik ay ta sjoyobale. La yakʼ ta ilel schʼuunel yoʼtan manchukme kʼan yichʼ chʼayel smukʼul yoʼtan yuʼun te yantike. Te kʼalal ay chaʼoxtul te maba la schʼuunbeyik smantal te Diose, te Jefté sok te yantsil nichʼane la yakʼik ta ilel te tulan schʼuunel yoʼtanike. Jich akʼbotik bendision yuʼun Jehová ta skaj te la slokʼes sba ta yoʼtanike. Jaʼnix jich te Jehová la stuuntes te Jefté sok te yantsil nichʼan swenta jich ya skoltay te yantik ta abatinel ta stojol te Jehová.

19 Te Biblia ya yal: «Ha yac anopbeyic yoʼtan te machʼatic te ta scuenta schʼuhunel yoʼtanic soc te jun yoʼtanic yaquic ta mahlab, ya yichʼic te bintic yaloj ta jamal te Diose» (Hebreos 6:12). Jich yuʼun akʼa jtʼunbeytik stalel te Jefté sok te yantsil nichʼan te spisiluk-ora kakʼtik ta ilel te tulan schʼuunel koʼtantike. Akʼa juluk ta koʼtantik te lek ya yil Dios te machʼatik ay schʼuunel yoʼtanik ta stojole.