Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Te J-ilkʼinal ta toyol (te ya yichʼ nopel)  |  Noviembre yuʼun 2017

¿Jaʼbal anibal kʼoem kuʼuntik te Jehovae?

¿Jaʼbal anibal kʼoem kuʼuntik te Jehovae?

«Te Jehová ya yacʼ ta libre te aʼbatetic yuʼun; ma ba ya xhalbotic te ay smulic te machʼatic ha smucʼulinej yoʼtanique» (SALMO 34:22).

KʼAYOJIL SOK 54

1. ¿Bin-utʼil ya yaʼiy sbaik bayal j-abatetik yuʼun Dios ta skaj te mulile?

JUN buelta te jpuk-kʼop Pablo jkʼaxel chebaj yoʼtan, jaʼ yuʼun jich la yal: «¡Cʼux obol jba!» (Romanos 7:24). Ta ora ini, bayal j-abatetik yuʼun Dios te jun yoʼtanik ta stojol jichnix ya yaʼiy sbaik. Manchukme ya jpastik tulan yuʼun lek ya yilotik te Jehová, jpisiltik ya xchʼayotik ta skaj te kichʼojtik jilel te mulil sok maba tojotik. Ay machʼatik te spasojik tulan mulil ay jich ya snopik te maʼyuk bin-ora ya xpasbotik perdon yuʼun te Jehovae.

2. 1) Jich bitʼil ya yal te Salmo 34:22, ¿bin yuʼun te j-abatetik yuʼun Dios ma skʼan te jkʼaxel tenbil ya yaʼiy sbaik yuʼun te mulil spasojike? 2) ¿Bin ya jnoptik ta articulo ini? (Ilawil te recuadro « ¿Aybal bin ya yakʼ jnoptik o ay bin señail?»).

2 Te Biblia ya yal ta jamal ta stojol te machʼatik jaʼ anibal yuʼunik te Jehová te ma skʼan te jkʼaxel tenbil ya yaʼiy sbaik yuʼun te mulil spasojike (kʼopona te sjun Salmo 34:22). ¿Bin ya skʼan ya yal te jaʼ anibal kuʼuntik ya xkʼot te Jehová? ¿Bintik ya skʼan ya jpastik yuʼun ya snaʼ yoʼbolil jbatik te Jehová sok ya spasbotik perdon? Ya kakʼbeytik sujtib te jojkʼoyeletik-abi kʼalal ya jnoptik bin-a sok bin-utʼil tuun te puebloetik yuʼun anibal te ya yalbey skʼoplal te Ley ta namey Israel. Melelnix-a te la yichʼ jeltayel ta yan te chapbilkʼop yuʼun te Ley ta kʼin yuʼun Pentecostés ta jaʼbil 33. Jaʼukmeto, juluk ta koʼtantik te jaʼ Jehová te machʼa  la yakʼ te Leye. Jaʼ yuʼun te bin ya yal te namey Ley ta swenta te puebloetik yuʼun anibal ya yakʼ jnaʼtik bin ya snop Jehová ta swenta te mulil, te machʼatik ya spasik mulil sok ta swenta te sujtesel oʼtanile. Ta ora ini, kiltik bin yuʼun ayin te puebloetik-abi sok bin-utʼil la yichʼik tuuntesel.

«TSAHAHIC TE PUEBLOHETIC YUʼUN AHNIBAL»

3. ¿Bin ya skʼan utel te jmilawaletik ta Israel?

3 Te Jehová mero tulan mulil ya yil teme jtul israel-winik ya yaʼiy milaw. Teme ay machʼa ya yaʼiy milaw, jtul winik ta sfamilia te machʼa laje, te naʼbil sba bitʼil «te machʼa ya sutbe spacol te chʼichʼ malbil», jaʼ ya smil te jmilawale (Números 35:19). Jich te jmilawale ya stoj sok skuxlejalnix te skuxlejal te machʼa maʼyuk smul la smile. Te machʼa ya sutbey spakol te chʼichʼ malbile, ya skʼan te oranax ay bin ya spas yuʼun ma xbolob skʼoplal te Kʼinal te albil skʼoplal ya yichʼike, melel te Jehová jich yaloj: «Te chʼichʼ ini ya sbohlobtesbe scʼoblal te qʼuinale». Te Jehová jich yaloj ta mantal: «Ma me xabohlobtesbe scʼoblal te qʼuinal te banti ya xnahinex» (Números 35:33, 34).

4. ¿Bin ya xkʼot ta pasel teme jtul israel-winik ay machʼa ma yolojuk ya smil?

4 ¿Bin ya xkʼot ta pasel teme jtul israel-winik ay machʼa ma yolojuk ya smil? Manchukme jich-abi, ya sta smul ta skaj te la smil te machʼa maʼyuk smule (Génesis 9:5). Jaʼukmeto, te bitʼil maba schapoj te ya xmilawane, te Jehová ya yakʼ ta naʼbeyel yoʼbolil sba. Te jmilawe ya xjuʼ x-an bael ta junuk ta swakebal puebloetik yuʼun anibal, te banti ma xjuʼ xmilot yuʼun te machʼa ya sutbey spakol te chʼichʼ malbile. Jaʼukmeto ma xjuʼ xlokʼ tey-a, jaʼto teme ya xlaj te mukʼul sacerdote (Números 35:15, 28).

5. ¿Bin yuʼun te puebloetik yuʼun anibal ya xjuʼ ya skoltayotik ta snaʼbeyelxan sba ta lek te Jehová?

5 Te Jehová jich la yalbey te Josué: «Tsahahic te pueblohetic yuʼun ahnibal». Jich yuʼun, jaʼnix te Dios te machʼa la yal te ya yichʼ tsael te puebloetik-abi yuʼun ay bin kʼax mukʼ skʼoplal ya yichʼik pasel tey-a, chʼultesbilik ya xkʼotik (Josué 20:1, 2, 7, 8). Jaʼ yuʼun ya xjuʼ jich ya jojkʼoybey jbatik: «¿Bin-utʼil ya skoltayotik te puebloetik yuʼun anibal ta snaʼelxan ta lek bantito kʼalal ya snaʼ yoʼbolil jbatik te Diose? ¿Sok bin-utʼil ya snojptesotik te jaʼuk anibal kuʼuntik ya xkʼot te Jehová ta ora ini?».

TE JMILAW YA SKʼAN «YA YALBE YAʼIYIC TE MAMALETIC» TE SMULE

6, 7. 1) ¿Bin ya skʼan ya spasik te ancianoetik teme ay machʼa ma yolojuk ya yaʼiy milaw? (Ilawil te lokʼomba ta sjajchibal te articulo). 2) ¿Bin yuʼun jaʼ lek te ya xkʼopoj sok te ancianoetik te machʼa milawane?

6 Kʼalal jtul israel-winik ay machʼa ma yolojuk ya smil, ya skʼan ya xbajtʼ ta anel ta jun pueblo yuʼun anibal sok te ya xkʼot «yalbe yaʼiyic te mamaletic» ta yochibal te pueblo bin yuʼun te taleme. Te ancianoetik ya skʼan te ya yikʼik ochel ta pueblo (Josué 20:4). Ta patil bael, ya skʼan ya stikunik sujtel te banti milawan yuʼun ya yichʼ ichʼel ta kʼop yuʼun te ancianoetik ta pueblo-abi (kʼopona te sjun Números 35:24, 25). Teme jich ya staik ta ilel te manix yolojuk-a te la yaʼiy milawe ya yakʼik sujtel ta pueblo yuʼun anibal.

7 ¿Bin yuʼun ya skʼan te ya xkʼopoj sok te ancianoetik te jmilawe? Melel jaʼ te ancianoetik ay ta swentaik yilel te maʼyuk yabakul ya xkʼot te lum Israel sok skoltayel te jmilaw yuʼun ya xnaʼbot yoʼbolil sba yuʼun te Jehovae. Jtul winik te ya yilbey swentail te Biblia la yal te ya xjuʼ ya yichʼ milel te machʼa yak ta anel teme maba ya xkʼopoj sok te ancianoetike. Jich la yalxan: «Jaʼnix smul teme ya xlaje, melel maba la schʼuun spasel te bin yaloj te Dios yuʼun ya xnaʼbot yoʼbolil sba». Te machʼa ma yolojuk la yaʼiy milaw ay koltayel ta stojol, jaʼukmeto ya skʼan ya sle sok te ya schʼuun spasele. Teme maba ya x-an bael ta junuk pueblo yuʼun anibal, ya xjuʼ xmilot yuʼun te machʼa ay ta swenta sutbeyel spakol te chʼichʼ malbile.

8, 9. ¿Bin yuʼun ya skʼan ya skʼanbey koltayel te ancianoetik te machʼa spasoj tulan mulil ta kongregasion?

8 Ta kʼajkʼal ini, te j-abat yuʼun Dios te spasoj tulan mulil ya skʼan ya sle te koltayel yuʼun te ancianoetik ta kongregasion. ¿Bin yuʼun tulan skʼoplal te jich ya spase? Ta sbabial, jaʼ yuʼun te  jaʼ Jehová te ya yal ta sKʼop te akʼa yilik te ancianoetik te kʼalal ay machʼatik ya spasik tulan muliletik (Santiago 5:14-16). Ta schebal, jaʼ yuʼun te ancianoetik ay ta swentaik skoltayel te machʼa sujtesoj yoʼtan te lekuk ya xchaʼilot yuʼun te Diose, sok te manchuk ya schaʼpas te mulile (Gálatas 6:1; Hebreos 12:11). Ta yoxebal, jaʼ yuʼun te ancianoetik yichʼojik yaʼtelik sok pʼijubtesbilik swenta ya skoltayik te machʼatik sujtesoj yoʼtanik yuʼun ya xlamaj bael yoʼtanik sok kʼunkʼun ya xchʼay bael te mel-oʼtan ya yaʼiyik ta skaj te mulil spasojike. Te Jehová ya spajaltay te ancianoetik bitʼil anibal «te ya smac te tulan yicʼal haʼal» (Isaías 32:1, 2). ¿Mabal jichuk te spisil-abi ya yakʼ ta ilel te ya snaʼ yoʼbolil jbatik te Diose?

9 Bayal j-abatetik yuʼun Dios lek yaʼiyej sbaik kʼalal skʼoponojik te ancianoetik sok te koltaybilik yuʼune. Jtul hermano te sbiil Daniel la spas tulan mulil, jaʼukmeto ta bayal u la sxiʼ yalbeyel te ancianoetike. Jich ya yal ta jamal: «Ta skaj te kʼaxemix bayal tiempo jich jkuyoj te maʼyukix bin-utʼil ya xjuʼ ya skoltayonike». Te Daniel spisil-ora ya sxiʼ te ay machʼa ya yaʼiy te mulil spasoje. Ta jujun buelta te ya skʼopon Dios jich ya yaʼiy te ya skʼan jaʼ nail ya skʼanbey perdon te Jehová. Ta patil la sta skʼajkʼalel te la skʼanbey koltayel te ancianoetike. Yato xjul ta yoʼtan te bin la spase, jich ya yal: «Ta melel ya jxiʼ te ya xkʼopojon sok te ancianoetike. Jaʼukmeto ta patil te jich la jpase, jich la kaʼiy te la slokʼesbonik kijkats te kʼax ale. Ta ora ini jich ya kaʼiy te maʼyuk bin ya smakonix te kʼalal ya jkʼopon te Jehová». Ta ora ini, te Daniel ma xkʼopojix yoʼtan yuʼun te smule, mato jaluk la yichʼ yaʼtel ta siervo ministerial.

«YA XBAHT TA AHNEL TA BAYUC AHNIBAL PUEBLO»

10. ¿Bin ya skʼan ya spas te machʼa ma yolojuk la yaʼiy milaw teme ya skʼan ya yichʼ naʼbeyel yoʼbolil sba?

10 Teme ya skʼan ya yichʼ naʼbeyel yoʼbolil sba te machʼa ma yolojuk la yaʼiy milawe, ya skʼan te oranax ya x-an bael ta pueblo yuʼun anibal te nopolxan aye (kʼopona te sjun Josué 20:4). Jaʼnax ya xkol teme ya xkʼot ta oranax ta pueblo sok teme ya xjil tey-a jaʼto te kʼalal ya xlaj te  mukʼul sacerdote. Ay bintik ya yijkʼitay te kʼalal jich ya spase jich bitʼil te yaʼtel, te sna soknix ma xjuʼ te bayuk banti ya xbajtʼe (Números 35:25). * Jaʼukmeto manchukme bayal te bin ya xchʼay yuʼun, jaʼnix jich kʼax lek te bin ya stae. Teme ya xlokʼ ta pueblo yuʼun anibal te jmilaw, ya yakʼ ta ilel te ma muliluk ya yaʼiy te ay machʼa la smile, jich yuʼun ya xjuʼ ya yichʼ milel.

11. ¿Bin ya xjuʼ ya spas te machʼa ya sujtes yoʼtan swenta ya yakʼ ta ilel te ma skuy te yananix xnaʼbot yoʼbolil sba yuʼun te Diose?

11 Ta kʼajkʼal ini, te machʼa ya sujtes yoʼtan yuʼun te smule, jaʼnix jich ya skʼan te ay bin ya spas yuʼun ya xnaʼbot yoʼbolil sba yuʼun te Diose. Ya skʼan ya yijkʼitay ta jkʼaxel te mulil te yak ta spasele, jaʼnix jich te ma spas te bin ya xjuʼ x-ikʼot bael yuʼun ta spasel yan buelta te mulile. Ta swenta chʼul espiritu, te jpuk-kʼop Pablo jich la yal ta swenta te machʼatik la sujtes yoʼtanik ta namey Corinto: «Lec cʼoht te la amel awoʼtanic ta stojol Dios: ¡tey hahch anaʼic bin yac apasic a, la anop te yac acoltay abahic, ilinex yuʼun te bin chopol, ay xiwel ta awoʼtanic, cʼopoj awoʼtanic ta jtojolcotic, xutʼet awoʼtanic, soc hahch achahpanic ta stojil! Ta spisil chican te mayuc amulic tey a» (2 Corintios 7:10, 11). Teme jaʼnix jich ya jpastik tulan ta yijkʼitayel jun tulan mulil, yame kakʼbeytik yil te Jehová te mero ya jmel koʼtantik yuʼun te bin jpasojtike sok te ma jkuytik te yananix snaʼbotik yoʼbolil jbatik-a.

12. ¿Bintikwan ya skʼan ya yijkʼitay jtul jchʼuunjel teme ya skʼan te yatoxan xnaʼbot yoʼbolil sba yuʼun te Diose?

12 ¿Bintikwan ya skʼan ya yijkʼitay jtul jchʼuunjel teme ya skʼan te yatoxan xnaʼbot yoʼbolil sba yuʼun te Diose? Ya skʼan te ya slokʼes sba ta yoʼtan yijkʼitayel-euk te bintik ya smulan teme ya yil te ya xjuʼ x-ikʼot bael ta spasel mulil (Mateo 18:8, 9). Jich bitʼil, teme te kamigotaktik ya yutsʼin jtaleltik, ¿yabal kijkʼitaytik sjokinlanel? Teme jich ya kaʼiytik te ya xjelawotik ta yuchʼel trago, ¿yabal jpastik tulan yuʼun ma x-ayinotik te banti jich ya kaʼiytik te ma xjuʼ ya jkom jbatik ta yuchʼel bayale? Teme yakotik ta spasel tulan yuʼun ya jkomtik te bin chopol ya skʼan jbakʼetaltik, ¿yabal jpʼajtik biluk pelikula, pajina ta Internet o te bin ya stij koʼtantik ta snopel te bin ilobtik sba o chopol skʼoplale? Juluk ta koʼtantik te biluk-a te bin ya jpastik tulan ta yijkʼitayel, bayal bin lek ya jtatik yuʼun. Maʼyuk bin kʼux-xan ta aʼiyel te bitʼil yijkʼitayojotikix ya kaʼiytik te Jehová. Jaʼukmeto maʼyuk bin ya yakʼbotikxan stseʼelil koʼtantik te bitʼil yaʼiyel te skʼuxul yoʼtan ta sbajtʼelkʼinal te Diose (Isaías 54:7, 8).

«HA YA XTUHUN AWUʼUNIC SCUENTA AHNIBAL»

13. ¿Bin yuʼun te jmilaw ya xjuʼ te jun sok tseʼel yoʼtan ya x-ayin ta pueblo yuʼun anibale?

13 Kʼalal ochemix ta pueblo yuʼun anibal te jmilawe ma xjuʼ xmilotix-a. Te Jehová jich la yal ta swenta te puebloetik ini: «Ha ya xtuhun awuʼunic scuenta ahnibal» (Josué 20:2, 3). Te Jehová maba ya skʼan te ya xchaʼichʼot ta kʼop te jmilaw ta swenta te bin la spase. Te machʼa ay ta swenta sutbeyel spakol te chʼichʼ malbile ma x-akʼot ochel ta pueblo yuʼun ya smil. Teme maba ya xlokʼ ta pueblo te machʼa ma yolojuk la yaʼiy milaw, kanantaybil yuʼun Dios ya x-ayin sok maʼyuk bin ya sxiʼ. Maba ay ta karsel, melel ya xjuʼ x-aʼtej, ya skoltay yantik sok ya xjuʼ x-abatin ta stojol Jehová ta lamalkʼinal. Ya xjuʼ lek ya xkuxin sok te tseʼeluk yoʼtane.

Chʼuuna sok spisil awoʼtan te la spasbatix perdon te Jehovae. (Ilawil te parrafo 14 kʼalal ta 16).

14. ¿Bin ya xjuʼ ya schʼuun sok spisil yoʼtan te j-abat yuʼun Dios te la sujtesix yoʼtan ta swenta jun tulan mulil te la spase?

14 Ay j-abatetik yuʼun Dios te sujtesojix yoʼtanik ta swenta te tulan mulil spasojike, jaʼukmeto mato lek ya yaʼiy sbaik. Ay machʼatik jich ya skuyik te spisil-ora ay yabakul ya x-ilotik yuʼun te Jehovae. Teme jich ya awaʼiy aba te jaʼate, yame xjuʼ ya achʼuun sok spisil awoʼtan te la snaʼbatix yoʼbolil aba te Jehová sok te la spasbatix perdon ta jkʼaxele. Jaʼ yuʼun maʼyuk bin ya skʼan ya axiʼix. Te Daniel te la kalbeytik skʼoplal ta parrafo 9 la yil te jichnix-ae. Ta patil te tojobtesot yuʼun te ancianoetik sok te koltayot swenta maʼyuk bin ya x-albotix yuʼun te yoʼtane, jaʼto  lek jach yaʼiy sba-a. Jich la yal: «Ma skʼanix te ayto jmul ya kaʼiy jbae. Kʼalal ya kichʼtik pasbeyel perdon yuʼun te jmultike, jkʼaxel ya xtupʼ bael. Jich bitʼil ya yal te Jehová, ya slokʼesbotik bael te kijkatstik sok mero namal ya yakʼ ta jtojoltik. Maba ya yakʼ te ya jchaʼiltike». Ta nail talel la kaltik te kʼalal ayix ta yutil te pueblo yuʼun anibal te machʼa la yaʼiy milawe, ma skʼan te ya sxiʼix te machʼa ay ta swenta sutbeyel spakol te chʼichʼ malbile. Jaʼnixme jich kʼalal te Jehová ya spasbotik perdon yuʼun te jmultike, maba ya skʼan ya jxiʼtik te ya schaʼyalbotik te mulil la jpastike o te ya yichʼotikxan ta kʼop yuʼun (kʼopona te sjun Salmo 103:8-12).

15, 16. ¿Bin-utʼil ya kaʼiy jbatik kʼalal ya jnaʼtik te la yakʼ skuxlejal ta jtojoltik te Jesús sok te jaʼ Mukʼul Sacerdote kuʼuntike?

15 Ta melel, te joʼotik ay bayalxan bin yuʼun ya xjuʼ ya smukʼulin koʼtantik te ya snaʼbotik yoʼbolil jbatik te Jehová. Jich bitʼil la kiltik ta sjajchibal te articulo, te Pablo la yal te kʼux obol sba sok te jkʼaxel chebajem yoʼtan ta skaj te ma xjuʼ ya schʼuun ta tsʼakal te skʼop te Jehová. Manchukme yak ta spasel tulan ta stsalel te mulil sok te ma lek ya yaʼiy sba ta swenta te bin chopol spasoj ta namey, jich la yal: «¡Wocol yal Dios, ta scuenta te Cajwaltic Jesucristo!» (Romanos 7:25). Jich bitʼil sujtesojix yoʼtan, schʼuunej sok spisil yoʼtan te pasbilix perdon yuʼun te Jehová ta swenta te Jesuse. Te Cristo la yakʼ skuxlejal ta jtojoltik, jich maʼyuk bin ya yalbotikix koʼtantik sok ya yakʼbotik lamal-oʼtanil (Hebreos 9:13, 14). Jich bitʼil te Jesús jaʼ Mukʼul Sacerdote kuʼuntik «ya xhuʼ ya scoltay sbahtel qʼuinal te machʼatic ya xnohpojic ta stojol Dios ta scuenta, como stalel cuxul yuʼun ya xcʼopoj ta scuentahic» (Hebreos 7:24, 25). Ta namey kʼinal te aʼtelil ya spas te mukʼul sacerdote ya yakʼbey snaʼ te israeletik te yananix xpasbotik perdon yuʼun te Jehovae. Ta ora ini, te aʼtelil ya spas te Jesús bitʼil Mukʼul Sacerdote ya yakʼ te ya jchʼuuntikxan ta lek te ya snaʼbotik yoʼbolil jbatik te Jehová sok te «ya jtahtic cʼuxultayel soc yuʼel te ya scoltayotic ta yorahil te jwocoltique» (Hebreos 4:15, 16).

16 Jaʼ yuʼun teme ya akʼan te jaʼ anibal ya xkʼot awuʼun te Jehová, akʼame schʼuunel awoʼtan ta swenta te la yakʼ sba ta lajel ta jtojoltik te Jesús. Melelnix-a te jaʼ yuʼun spisil te ants winiketik te stojol kolele, jaʼukmeto mame jichuknax ya awil, chʼuuna sok spisil awoʼtan te jaʼ awuʼun te stojol kolele (Gálatas 2:20, 21). Chʼuuna sok spisil awoʼtan te jaʼ ta swenta te stojol kolel te ya xjuʼ ya spasbat perdon te Dios te muliletik apasoje. Sok chʼuuname sok spisil awoʼtan te ya xjuʼ ya yakʼbat kuxlejalil ta sbajtʼelkʼinal te stojol kolele. Te skuxlejal te Jesús te la yakʼ ta jtojoltik jaʼ majtʼanil te yakʼojbat te Jehovae.

17. ¿Bin yuʼun ya akʼan te jaʼ anibal ya xkʼot awuʼun te Jehovae?

17 Te puebloetik yuʼun anibal ya yakʼik ta ilel ta jamal te ya snaʼbotik yoʼbolil jbatik te Jehová. Ta swenta te puebloetik-abi, te Jehová la yakʼ ta ilel ta jamal te chʼultesbil te kuxlejalile. Jaʼnix jich la yakʼ ta ilel bin-utʼil ya skoltayotik te ancianoetik, bin-utʼil ya xchiknaj ta ilel te smelelil sujtesel oʼtanil sok bin yuʼun ya xjuʼ ya jchʼuuntik sok spisil koʼtantik te ya spasbotik perdone. ¿Jaʼbal anibal kʼoem kuʼuntik te Jehovae? Maʼyuk yan anibal jich bitʼil stukel (Salmo 91:1, 2). Ta yan articulo ya kiltik bin-utʼil te puebloetik yuʼun anibal ya skoltayotik ta snopbeyel yoʼtan te Jehová te jaʼ machʼa ya yakʼ ta ilel ta tsʼakal te bin stojil ta pasel sok te ya snaʼ yoʼbolil jbatik.

^ parr. 10 Bayal namey libroetik yuʼun te judioetik ya yalik te jich yilel te ya xbajtʼ ta nainel-euk ta pueblo yuʼun anibal te sfamilia te jmilawe.