¿Labal yichʼ tuuntesel ta namey Israel te mantaliletik yuʼun te Ley yuʼun Moisés ta schajpanel tulan kʼopetik te ya staik ta jujun kʼajkʼale?

TE EJEMPLO te ya xbajtʼ kiltik ya yakʼ jnaʼtik te ay la yichʼ tuuntesel. Ta Deuteronomio 24:14, 15 jich ya yal: «Ma me xawaʼbe swocol te jle-aʼtel te pobre ay te mayuc bin ay yuʼune, teme ha nix awermanotac o jyanlumetic te nahinemic ta aqʼuinal [...]; scuenta yuʼun ma ba ya xʼawon ta stojol Jehová ta acontra, te hich yac ata amul a».

Te sxejtʼelul pakʼbil lum te banti chikan te la skʼan koltayel te j-aʼtel winike.

Nopol ta mukʼul lum Asdod la yichʼ tael sxejtʼelul pakʼbil lum te la yichʼ pasel ta sjukebal siglo kʼalal mato jaʼuk jkʼajkʼaleltik-ae. Tey tsʼibaybil skʼoplal jtul winik te ya skʼan koltayel yuʼun ay bin la yichʼ pasbeyel jich bitʼil ya yal te kapitulo 24 yuʼun te Deuteronomio. Jich yilel te jaʼ skʼoplal jtul j-aʼtel winik te malaj la yakʼ te sit awal tsʼunubil te la yichʼ kʼanbeyele. Jich ya yal: «Te kʼalal laj koʼtan ta skʼejel te sit awal tsʼunubil te wojey chaʼjeye, tal te Hoshayahu snichʼan te Shobay, la yichʼbon bael te jkʼuʼ jpakʼ. [...] Spisil te machʼa sjokinejonik ta kʼajoj te kʼalal mero kʼux kʼajkʼal-a yame yalik ta jamal [...] te smelelil te bin la kalixe. Mame ayuk jmul jtaoj ta jkʼaxel. [...] Teme jaʼat gobernador ya awal te ma awaʼteluk yakʼel ta sutel te jkʼuʼ jpakʼe, yakuk anaʼbon yoʼbolil jba te ya awakʼbon ta sutel yuʼun. Mame jichuk ya skʼan te maʼyuk bin ya apas te bitʼil yichʼoj pojbeyel te skʼuʼ spakʼ te j-abat awuʼune».

Ta swenta te koltayel la skʼan te j-aʼtel winike, jtul winik te Simon Schama sbiil la yal te «ma jaʼuknax ya yakʼ ta ilel te ma snaʼ bin ya spas te j-aʼtel winik yuʼun ya sutbot [te skʼuʼ spakʼe]». La yalxan: «Jaʼnix jich ya yakʼ ta ilel te ya snaʼ te winik bin ya yal te Ley yuʼun Dios, jaʼ ya snaʼbeyxan skʼoplal te leyetik ya jtatik ta Levítico sok te Deuteronomio te jkʼaxel ma xyakʼik ta utsʼinel te pobreetik».