Te bin ya yal te Salmo 144:12-15, ¿jaʼbal skʼoplal te lum yuʼun Dios o jaʼ te chopol jyanlumetik te ya yichʼ albeyel skʼoplalik ta versiculo 11?

Te bitʼil tsʼibaybil ta kʼopil hebreo ma junuknax bin-utʼil ya xjuʼ xkʼot ta koʼtantik. Jich yuʼun te bin ya kiltik ta ora ini ya skoltayotik yuʼun ya jnaʼtik ta lek bin-utʼil ay skʼoplal ta smelelil:

  1. Ya skʼan ya kiltik bin ya yakʼ ta naʼel te yantik versiculo ta salmo-abi. Te bendisionetik ya yal te versiculo 12 kʼalal ta 14 jaʼ skʼoplal te machʼatik toj yoʼtanik te jich ya yalik ta versiculo 11: «Coltayawon, acʼawon ta libre ta scʼab te jyanlumetic». Te versiculo 15 jichnix ya yakʼ jnaʼtik, melel tey-a te cheb buelta ya xchiknaj te kʼopetik «Bayel me yutsil» jaʼ ya yichʼ albeyel «te pueblo te ha Dios yuʼun te Jehová».

  2. Te bitʼil kʼoem ta oʼtanile ya snit sba skʼoplal sok te bintikxan ya yakʼ ta nopel te Biblia ta yantik versiculoetik. Te salmo-abi ya yakʼ ta ilel ta jamal te bin schʼuunej sok spisil yoʼtan te David, jaʼ te ya yakʼbey bendision sok lekilal Jehová te israeletik ta patil te ya yakʼtiklan ta libre ta skʼab te skontratakik (Levítico 26:9, 10; Deuteronomio 7:13; Salmo 128:1-6). Jich bitʼil, te Deuteronomio 28:4 jich ya yal: «Bayel me yutsil scʼoblal awal-anichʼnab, te sit atsʼunub-awawal, te yalatac chambahlametic awuʼun, te yalatac awacax, tuminchijetic soc tentsunetic awuʼun». Ta melel, kʼalal ay ta ajwalil-a te Salomón te snichʼan David ayin bayal lamalkʼinal ta nasion sok mero kʼulejubik-a te maʼyuk jich kʼoem ta pasel-a. Te bin yilel la spas yaʼtel ta ajwalil te Salomón yame yakʼ ta naʼel bin-utʼil ya yaʼiy wentainwanej te Mesías (1 Reyes 4:20, 21; Salmo 72:1-20).

Jich bitʼil ya kiltik, te bin smelelil ya yakʼ jnaʼtik te Salmo 144 ya yakʼ chiknajuk ta lek ta spisil te salmo-abi te bin ayix tal bayal jaʼbil yakik ta smaliyel te j-abatetik yuʼun Dios, jaʼ te ya slajin Jehová te chopol ants winiketik, te ya yakʼ lamalkʼinal sok te sbajtʼelkʼinal ya smulanbeyik yutsil te kuxlejalil te machʼatik toj yoʼtanike (Salmo 37:10, 11).