Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Te J-ilkʼinal ta toyol (te ya yichʼ nopel)  |  Septiembre yuʼun 2016

 TEMA TA SBABIAL PAJINA | ¿BANTI YA XJUʼ YA JTATIK SMUKʼUL KʼINAL KAʼIYTIK?

La sta smukʼul kʼinal yaʼiyik kʼalal ayik ta tulan wokol-ae

La sta smukʼul kʼinal yaʼiyik kʼalal ayik ta tulan wokol-ae

Ay bayal ta chajp wokoliletik, jaʼukmeto maba ya xjuʼ ya kalbeytik skʼoplal spisil ta articulo ini. Ta ora ini ya xbajtʼ kiltik te schanebal ejemploetik te la yichʼ ilel ta sbabial articulo. Ilawil ta lek bitʼil te Dios la yakʼbey smukʼul kʼinal yaʼiyik te ants winiketik te yanyantik wokolil la staike.

KʼALAL MAʼYUKIX KAʼTELTIK

Jtul winik te Seth *sbiil jich la yal: «Te joʼon sok te kinam pajal la kichʼtik lokʼesel ta kaʼteltik. Ta cheb jaʼbil jaʼ la skoltayotik ta takʼin te jfamiliatike sok la jpastik biluk aʼtelil ya xlokʼ swenta ya jtatik te bin ya xtuun kuʼuntike. Ta swenta te bin kʼot ta pasel, tsakot ta depresión te Priscilla te kiname, te joʼone ma xtuunonix la kaʼiy jba.

»¿Bin-utʼil juʼ kuʼuntik stsʼikel te wokolil-abi? Te Priscilla ya snaʼulan spisil-ora te sjun Mateo 6:34 te banti la yal te Jesús te ma skʼan ya xbajtʼ koʼtantik snaʼel te pajel, melel te pajel jaʼ ya yil sba stukel. Jaʼnix jich te bitʼil ya skʼopon sok spisil yoʼtan te Dios ya x-akʼbot yip yuʼun maba ya xlujb. Te joʼone jaʼ la smukʼubtesbon kʼinal kaʼiy te Salmo 55:22. Jich bitʼil la spas te machʼa la stsʼibay te salmo, la kakʼ ta stojol Jehová te jwokole sok jich la kaʼiy te la skoltayone. Manchukme ta ora ini ayix kaʼtel, maba ya jletik bayal biluketik te ma xtuun kuʼuntike, melel ya jtʼuntik te tsitsel la yakʼ te Jesús ta Mateo 6:20-22. Te bin lekxane, jaʼ te la stsakxan yip te bitʼil jun-nax ayotik ta jchebaltik sok te bitʼil kamigoinej jbatik sok te Diose».

Te Jonathan jich la yal: «Kʼalal laj te negosio kuʼunkotik ta jfamilia ma jnaʼ bin ya jpas yuʼun. Ta skaj te maʼyuk lek takʼin ta yorail-abi, tojolnax kʼot ta lokʼel te jtab jaʼbil aʼtejotik talele. Jajch kʼop kuʼun sok te kinam ta swenta te takʼine. Ni jaʼuk ya xjuʼ ya jtuuntestik te tarjeta yuʼun crédito ta skaj te ya jxiʼtik te ma stsakikixe.

»Jaʼukmeto ta swenta te koltayel te ya yakʼ te Biblia sok te chʼul espiritu yuʼun te Diose, juʼ kuʼuntik stael ta nopel te bin leke. La jkʼan spasel biluk aʼtelil, manchukme maʼyuk lek skʼoplal yilel sok maba la jmantikix biluketik te maba ya xtuun kuʼuntike. Jich bitʼil testigootik yuʼun Jehová, te kermanotaktik te jun schʼuunel koʼtantik soke la skoltayotik. La slekubtesik te bitʼil lek ya kaʼiy jbatik sok la snaʼik yakʼel koltayel kʼalal yakotik ta kʼaxel ta tulan wokolile».

KʼALAL YA SCHʼOJ SBAIK JILEL TE MACHʼA NUJPUNEMIKE

Jtul ants te Raquel sbiil jich la yal: «Kʼalal te jmamlal la schʼojon jilele, jajch skʼajkʼal koʼtan sok kʼax kʼux la kaʼiy. La stsakon tulan mel-oʼtan, jaʼukmeto noptsajon ta stojol Dios, jich la yakʼbon smukʼul kʼinal kaʼiy. Jujun kʼajkʼal ya jkʼopon-a te Diose, te lamalkʼinal yuʼune la skanantaybon te koʼtane, jich kʼoem te la spoxtaybone.

»Te sKʼop Dios la skoltayon ta slokʼesel te skʼajkʼal koʼtan sok te bitʼil kilintayoj-a te jmamlale. Ta melel la kakʼ ta koʼtan te Romanos 12:21 te ya yal: “Ma me xawacʼ stsalat te bin chopol, haʼat me xatsal ta bin lec te bin ma lecuque”.

»Jtul kamigo la skoltayon yuʼun ya kijkʼitay snopilanel te bin kʼax ta jtojole. Patil te la yakʼbon kil te Eclesiastés 3:6 sok yutsil yoʼtan la yalbon te ay ya xkʼot yorail te ay bin ya jchʼaytike. Kʼax tulan la kaʼiy te tsitsel-abi, jaʼukmeto jaʼ te bin ya skʼan ya jpase. Ta ora ini ayix bintik yachʼil ya jkʼan ya jpas ta jkuxlejal.

Te Elizabeth jich ya yal: «Kʼalal ya yichʼ lajinel te sjunal nujpunele, ya skʼan te ay machʼa ya yakʼbat smukʼul kʼinal awaʼiy. Jich la skoltayon spisil-ora jtul kamiga. La sjokinon ta okʼel, la yakʼbon smukʼul kʼinal kaʼiy sok kʼanbilon la yakʼ la kaʼiy jba jich maba pʼajbil la kaʼiy jba yuʼun. Schʼuunej koʼtan te bitʼil jaʼ la stuuntes te Jehová swenta la spoxtaybon te koʼtane».

KʼALAL YA XMEʼEL MAMALUBOTIK O YA STSAKOTIK CHAMEL

Te Luis te la yichʼ alel ta sbabial articulo, yichʼoj tulan chamel ta yoʼtan te jteb ma kʼan lajuk yuʼun cheb buelta. Ta jujun kʼajkʼal ya yichʼ ikʼ juklajuneb ora ta makina. «Spisil-ora ya jkʼopon Dios, kʼalal ya xlaj koʼtan ta spasele, ya kaʼiy te ya yakʼbon kip te schʼul  espiritue. Te skʼoponel Dios ya yakʼbon kip swenta ya jpasxan tulan, melel ay schʼuunel koʼtan ta stojol sok kʼoem ta koʼtan te ayon ta yoʼtane».

Te Petra te kʼaxemix ta 80 yaʼbilal jich ya yal: «Bayal bintik ya jkʼan ya jpas, jaʼukmeto ma xjuʼix kuʼun. Kʼax mel-oʼtantik sba te bitʼil ya xlaj bael te kiptike. Lujbenonix ya kaʼiy jba sok kuxulonix ta pox. Bayal buelta ya jnopilan te bin la skʼanbey Jesús te sTat te jich la yal: “Ayuc bin utʼil ma ba ya cuchʼ te copa ini”. Jaʼukmeto te bin la spas te Jehová jaʼ te la yakʼbey yip. Jaʼnix jich ya spas sok te joʼone. Te skʼoponel Dios jaʼ ya skoltayon ta jujun kʼajkʼal, kʼax lekxan ya kaʼiy jba te kʼalal ya xlaj koʼtan ta skʼoponele» (Mateo 26:39).

Te Julian te ayix 30 jaʼbil yak ta wokol yuʼun te chamel te esclerosis múltiple sbiile, jaʼnix jich ya yal-euk: «La jelontes te jsilla yuʼun ofisina ta jun silla de ruedas, jaʼukmeto jaʼ lekxan te jkuxlejal ta ora ini, melel ya jtuuntesxan ta tsʼakal ta skoltayel te jpatxujke. Te skoltayel te yantike ya slamantes te jwokoltik, jaʼnix jich te Jehová ya skʼotes ta pasel te bin jamal yaloj te ya skoltayotik ta jwokoltike. Jich bitʼil te Pablo, ya xjuʼ ya kal te spisil ya xjuʼ kuʼun ta swenta te machʼa ya yakʼbon yip koʼtane» (Filipenses 4:13).

TE KʼALAL YA XLAJ TE MACHʼA KʼUX TA KOʼTANTIKE

Jtul winik te Antonio sbiile jich la yal: «Kʼalal te jtat milot ta karro maba la jchʼuun yaʼiyel. Maba stojiluk la kaʼiy, melel ma smuluk. Jaʼukmeto maʼyuk bin juʼ la jpas. Joʼeb kʼajkʼal chʼayem yoʼtan, ta patil laj bael. Ya jpas tulan swenta maba ya x-okʼon ta sit te jmeʼe, jaʼukmeto bayal ya x-okʼon kʼalal jtukel ayon-ae. Bayal buelta la jojkʼoybey jba: “¿Bin yuʼun te jich kʼot ta pasele?”.

»Kʼalal ayon ta wokol-ae, maba la kijkʼitay skʼanbeyel te Jehová te yakuk skoltayon swenta maba ya jmel koʼtan ta jkʼaxel sok te ya yakʼbon lamalkʼinale. Kʼunkʼun lamaj bael te koʼtane. Jul ta koʼtan te ya yal te Biblia te ay bin “ajcʼ nax te jich ya xcʼot” ta pasel ta jtojoltike. Jich bitʼil te Dios ma spas lot, kʼoem ta koʼtan te ya xbajtʼ kil yan buelta te jtat kʼalal ya xchaʼkuxaj talele» (Eclesiastés 9:11; Juan 11:25; Tito 1:2).

«Manchukme laj te kal jnichʼantik ta abion, yato xjul ta koʼtantik te bitʼil bayal buelta tseʼel koʼtantik la kaʼiy jbatik kʼalal jun ayotik sok-ae» (xchi te Robert).

Te Robert te la yichʼ alel ta sbabial articulo, jichnix ya yal: «Kʼalal ya jkʼopon te Jehová sok te kiname, ya kaʼiytik te lamalkʼinal te ya yalbey skʼoplal te Filipenses 4:6, 7. Te lamalkʼinal-abi la skoltayotik yuʼun ya xkʼopojotik sok te reporteros ta swenta te chaʼkuxajele. Manchukme laj te kal jnichʼantik ta abion, yato xjul ta koʼtantik te bitʼil bayal buelta tseʼel koʼtantik la kaʼiy jbatik kʼalal jun ayotik sok-ae, jaʼ ya xbajtʼ ta koʼtantik snaʼulanel.

»Kʼalal chaʼoxtul kermanotaktik te jaʼik Testigoetik la yalbotik te la yilotik ta telebision te jun koʼtantik yakotik ta scholel te bin jchʼuunejtike, la kalbeytik te jaʼ ta skaj te bitʼil bayal machʼatik yakik ta skʼoponel Dios ta jtojoltike. Ta melel kʼoem ta koʼtan te bitʼil te Jehová la yakʼ smukʼul kʼinal kaʼiytik ta swenta te bayal mensaje la kichʼtik tikunele».

Spisil te machʼa la kalbeytikix skʼoplal ta articulo ini, ya yakʼik ta ilel te bitʼil te Dios ya xjuʼ ya yakʼbey smukʼul kʼinal yaʼiyik te machʼatik yakik ta kʼaxel ta biluk wokolil o ta bin tulan ya yaʼiyik spasele. ¿Yabal yakʼbat smukʼul kʼinal awaʼiy te jaʼate? Yak. Chikan bin wokolil yak ta kʼaxel ta atojol, jaʼnix jich ya xjuʼ ya ata koltayel swenta ya stsʼijk awuʼun. * Jich yuʼun, lea te Jehová te «Dios te ya yacʼ spisil mucʼul-oʼtanil» (2 Corintios 1:3).

^ párr. 5 Ay yichʼoj jelel te biililetik.

^ párr. 23 Teme ya akʼan ya xnoptsajat ta stojol Dios sok ya akʼan smukʼul kʼinal awaʼiye, kʼopojan sok te stestigotak Jehová te banti alumal o tsʼibaya ajun ta ofisina yuʼun te stestigotak Jehová te nopol ya xjil awuʼune.