Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

TE J-ILKʼINAL TA TOYOL (TE YA YICHʼ NOPEL) SEPTIEMBRE 2016

 TEMA TA SBABIAL PAJINA | ¿BANTI YA XJUʼ YA JTATIK SMUKʼUL KʼINAL KAʼIYTIK?

¿Bin-utʼil ya yakʼbotik smukʼul kʼinal kaʼiytik te Diose?

¿Bin-utʼil ya yakʼbotik smukʼul kʼinal kaʼiytik te Diose?

Te jpuk-kʼop Pablo la yal te bitʼil te Jehová * jaʼ te «Dios te ya yacʼ spisil mucʼul-oʼtanil, ha te machʼa ya smucʼubtes qʼuinal caʼiytic ta spisil te jwocoltic» (2 Corintios 1:3, 4). Ta swenta-abi, te Biblia ya yalbotik ta jamal te jpisiltik ya xjuʼ ya skoltayotik te Dios, manchukme kʼax tulan ta jkʼaxel te jwokoltike te jTatik te ay ta chʼulchan ya xjuʼ ya yakʼbotik smukʼul kʼinal kaʼiytik.

Ta melel, ay bin ya skʼan ya jpastik teme ya jkʼan ya yakʼbotik smukʼul kʼinal kaʼiytik te Diose. Nopa awaʼiy ini: ¿bin-utʼil ya xjuʼ ya skoltayat jtul doktor teme maba ya akʼanbey cita ta nailtoe? Te j-alwanej Amós jichnix la yal: «¿Pajal bal ya xbehen te chebic teme ma ba pajal yoʼtan sbahic?» (Amós 3:3). Jaʼ yuʼun te sJun Dios jich ya stij koʼtantik ta spasel: «Nohpojanic ta stojol Dios, hich ya xnohpoj ta atojolic» (Santiago 4:8).

¿Bin-utʼil ya jnaʼtik ta lek te ya xnoptsaj ta jtojoltik te Diose? Ta sbabial, jaʼnix ya yalulanbotik ta jamal te  ya skʼan ya skoltayotike ( ilawil te recuadro te ay ta pajina ini). Ta schebal, jnaʼojtik ta jamal te ay machʼatik la yichʼik akʼbeyel smukʼul kʼinal yaʼiyik yuʼun Dios ta namey kʼinal soknix ta ora ini.

Te ajwalil David, bayal wokolil kʼax ta skuxlejal jich bitʼil bayal ants winiketik ya xkʼax yuʼunik ta ora ini, jaʼukmeto la sle koltayel ta stojol Dios. Jich la yalbey: «Aʼiybon awaʼiy caw te cʼalal ya jcʼambat coltayel». ¿Labal yaʼiy Jehová te skʼope? Laj, melel te David jich la yalxan: «La jquichʼ coltayel, ha yuʼun te tseʼel coʼtan» (Salmo 28:2, 7).

¿BIN AʼTELIL YICHʼOJ TE JESÚS TA SWENTA YAKʼEL SMUKʼUL KʼINAL KAʼIYTIK?

Te Dios la skʼan la stuuntes te Jesús ta yakʼel smukʼul kʼinal kaʼiytik. Te Jehová la yakʼbey yaʼtel ta «spoxtayel te machʼatic pichʼil yoʼtanic» sok «ta smucʼubtesbeyel qʼuinal yaʼiyic spisil machʼatic ayic ta mel-oʼtan» (Isaías 61:1, 2). Jich bitʼil albil jilel skʼoplale, te Jesús jaʼ bajtʼxan ta yoʼtan skoltayel te machʼatik lujbenik sok te ay yijkats ya yaʼiyike (Mateo 11:28-30).

Te Jesús la yakʼ lekil tsitsel, la yakʼ ta ilel slekil yoʼtan sok ay la spoxtay schamel te ants winiketik, jich la yakʼbey smukʼul kʼinal yaʼiyik. Ta jun buelta, jtul winik te yichʼoj kʼaʼel chamel jich la skʼanbey te Jesús: «Teme yac acʼane, ya xhuʼ awuʼun te yac alecubteson». Te Jesús la snaʼbey yoʼbolil sba te jich la yalbey: «Ya jcʼan, acʼa lecubucat» (Marcos 1:40, 41). Jich te winik lekub ta swenta te schamele.

Manchukme maba liʼ ayix ta Balumilal te sNichʼan te Diose, te sTat te jaʼ «Dios te ya yacʼ spisil mucʼul-oʼtanil» yakto ta yakʼbeyel smukʼul kʼinal yaʼiyik te machʼatik ayik ta wokole (2 Corintios 1:3). ¿Bin-utʼil ya skoltayotik? Kiltik chanchajp te bin-utʼil ya spas.

  • Te Biblia. «Como spisil te bintic tsʼihbabil ta nahil, scuenta jpʼijubteseltic te la yichʼ tsʼihbayel, scuenta yuʼun ay smucʼul coʼtantic ta scuenta te bin ya xcuhch cuʼuntic soc ta scuenta te yip coʼtantic ya jtahtic yuʼun te bin tsʼihbabile» (Romanos 15:4).

  • Te chʼul espiritu. ¿Bin la yakʼ la smulanik te jchʼuunjeletik te lamalkʼinal ayin jtebuk tiempo kʼalal lajemix-a te Jesuse? Te Biblia ya yal te «spisil ora la yichʼic ta mucʼ Cajwaltic, soc behbe pʼohlel soc yichʼbel yip yoʼtanic ta scuenta te Chʼul Espíritu» (Hechos 9:31). Te chʼul espiritu yuʼun te Dios bayal yuʼel, te Dios ya xjuʼ ya stuuntes yuʼun ya yakʼbey smukʼul kʼinal yaʼiy chikan machʼa-a sok chikan bin wokolil yak ta kʼaxel ta stojole.

  • Te skʼoponel Dios. Te Biblia jich ya yal: «Ma me ayuc bin ya snaʼulan awoʼtanic yuʼun». Sok jich ya yal: «Aʼbeya snaʼ Dios spisil te bintic yac acʼambeyic, soc halbeyahic wocol Dios yuʼun. Hich te lamal qʼuinal te ya yacʼ te Diose, te cʼax mucʼ te ma xhuʼ cuʼuntic snaʼel, ya me scanantaybeyex awoʼtanic soc apensaric» (Filipenses 4:6, 7).

  • Te kermanotaktik ta swolol Balumilal. Yantik j-abatetik yuʼun Dios ya xjuʼ xkʼotik ta smelelil kamigotaktik te ya skoltayotik kʼalal ya jkʼantik smukʼul kʼinal kaʼiytike. Te jpuk-kʼop Pablo la yal ta swenta te yermanotak te jaʼik te machʼa ya x-akʼbot smukʼul kʼinal yaʼiy kʼalal yak ta kʼaxel swokol-ae (Colosenses 4:11; 1 Tesalonicenses 3:7).

Yaniwan ajojkʼoybey aba teme yanix xtuun te koltayel la kiltik ta articulo ini. Kilbeytikxan skʼoplal te ants winiketik te la yichʼix ilel ta yan articuloe. Jich bitʼil stukelik, ya xbajtʼ awil te bitʼil te Dios yak ta skʼotesel ta pasel te bin tʼujbil jamal yaloj ya spase: «Hich te bin utʼil nanil te ya smucʼubtesbe qʼuinal yaʼiy te yale, hich ya jmucʼubtesbeyex qʼuinal awaʼiyic te haʼexe» (Isaías 66:13).

^ párr. 3 Te Biblia ya yal te jaʼ Jehová sbiil te Diose.