Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Te J-ilkʼinal ta toyol  |  Num. 1, 2017

 TEMA TA SBABIAL PAJINA | ¿YABAL ATSAK TE MUKʼUL MAJTʼANIL YAKʼOJ TE DIOSE?

Te mukʼul majtʼanil yakʼoj te Diose. ¿Bin yuʼun te mukʼ skʼoplale?

Te mukʼul majtʼanil yakʼoj te Diose. ¿Bin yuʼun te mukʼ skʼoplale?

¿Bin yuʼun mukʼ skʼoplal ya awil jun majtʼanil? Jaʼniwan ta swenta te bin chanchajp ini: 1) te machʼa la yakʼbat te majtʼanile, 2) bin yuʼun te la yakʼbate, 3) bin la slokʼes ta yoʼtan yuʼun sok 4) teme yuʼun-nix ya xtuun awuʼun-ae. Kʼalal ya jnopilan ta koʼtantik te bintik chanchajp-abi ya skoltayotik yuʼun mukʼ skʼoplal ya xkʼot ta koʼtantik te stojol jkoleltike, jaʼ te mukʼul majtʼanil yakʼojbotik te Diose.

¿MACHʼA LA YAKʼ TE MAJTʼANILE?

Mukʼ skʼoplal ta koʼtantik jun majtʼanil teme tulan yaʼtel yichʼoj te machʼa la skʼebanbotike o teme kʼux ta koʼtantik te machʼa la yakʼbotike. Ayniwan yantik majtʼanil te mukʼ skʼoplal ta koʼtantik ta skaj te la yakʼbotik jtul jfamiliatik o jtul kamigotik, manchukme ma toyoluk stojol. Jich bitʼil te majtʼanil la yakʼ te Russell ta stojol te Jordan te la yichʼ alel ta yan articuloe. Jaʼukmeto, ¿bin-utʼil snitojbey sba skʼoplal sok te stojol jkoleltike?

Ta sbabial, te Biblia ya yal te Dios la «sticon tal ta bahlumilal te hip jtuhl Snichʼan scuenta yuʼun ya xcuxajotic ta scuenta» (1 Juan 4:9). Kʼalal jich la spas te Diose, jich la yakʼbotik jun mukʼul majtʼanil, melel maʼyuk yan machʼa te kʼax mukʼxan yaʼtel yichʼoje. Jtul te machʼa la stsʼibay te salmos, jich la yal: «Ha Jehová te abihile, te haʼat atuquel te Machʼa toyol ayat ta stojol spahmal te qʼuinale» (Salmo 83:18). Maʼyuk yan machʼa te kʼax mukʼxan yaʼtel yichʼoj te ya yakʼbotik jmajtʼantike.

Ta schebal, jaʼ Tatil kuʼuntik te Diose (Isaías 63:16). ¿Bin yuʼun te jich ya kaltike? Melel jaʼ la yakʼbotik te jkuxlejaltike. Jaʼnix jich ya skanantayotik sok ay jkʼoplaltik ta yoʼtan jich bitʼil ya spas jtul tatil sok te yal snichʼnabe. Jich la yalbey skʼoplal ta swenta jtsojb j-abatetik yuʼun ta namey kʼinal jaʼ te stsʼumbal Efraín, te Diose jich la yal: «Te Efraín, ¿ma bal haʼuc te jnichʼan te bayel scʼoblal ta coʼtan? ¿Ma bal haʼuc te alal te ya smulan te coʼtane? [...] bayel me ya jnaʼbe yoʼbolil sba» (Jeremías 31:20). Te Diose, jichnix ya yil te j-abatetik yuʼun ta ora ini. Ma jaʼuknax Jpaswanej kuʼuntik  te spisil ya xjuʼ yuʼune, jaʼnix jich jaʼ jTatik te kʼuxotik ta yoʼtan sok jaʼ Kamigotik. Jich yuʼun biluk majtʼanil te ya yakʼbotike kʼax bayal skʼoplal ta koʼtantik.

¿BIN YUʼUN TE JICH LA SPASE?

Ay majtʼaniletik te mukʼ skʼoplal ta koʼtantik ta swenta te la kichʼtik akʼbeyel sok kʼuxul oʼtanile, ma yuʼunuk sujbil te machʼa la yakʼbotike. Te machʼa ay bin ya yakʼ sok slekil yoʼtane maba ya smaliy te ay bin ya yichʼ akʼbeyel-euke.

Te Dios la yakʼ te sNichʼan ta skaj te kʼuxotik ta yoʼtane. Te Biblia ya yal: «Hich la yacʼ ta ilel te cʼuxotic ta yoʼtan te Dios, ha te la sticon tal ta bahlumilal te hip jtuhl Snichʼan scuenta yuʼun ya xcuxajotic ta scuenta» (1 Juan 4:9). Maba sujbil te jich la spas ta jtojoltike. Ta swenta te «stojel mulil ta scuenta Cristo Jesús», jich la yakʼ ta ilel te «yutsil yoʼtan Dios» (Romanos 3:24).

¿Bin yuʼun te jaʼ jun mukʼul majtʼanil te «yutsil yoʼtan Dios[e]»? Te Biblia ya yal: «Te Dios la yacʼ ta ilel te scʼuxul yoʼtan ta jtojoltic te bin utʼil cham Cristo cuʼuntic te cʼalal ayotic to ta mulil a» (Romanos 5:8). Te skʼuxul yoʼtan te Diose, jaʼ tijbot yoʼtan ta skoltaybelotik ta skaj te maʼyuk bin ya xjuʼ kuʼuntik spasel sok te jmulawilotik te chʼaybilotik ta oʼtanil-ae. Ma snujpʼuk te la yakʼbotik te skʼuxul yoʼtane sok maʼyuk bin-ora ya xjuʼ ya jtojbeytik. Te majtʼanil la yakʼbotike, jich la yakʼ ta ilel te smukʼul skʼuxul yoʼtane.

¿BIN-A TE LA YICHʼ LOKʼESEL TA OʼTANILE?

Ay majtʼaniletik te mukʼ skʼoplal ta koʼtantik ta swenta te ay bin la slokʼes ta yoʼtan te machʼa ay bin la yakʼbotike. Teme ay machʼa ya slokʼes ta yoʼtan te bin mukʼ skʼoplal ta yoʼtan yuʼun ya yakʼbotike, kʼax mukʼxan skʼoplal ya xkʼot ta koʼtantik te majtʼanil-abi.

Te Diose la yakʼ te «hip jtuhl Snichʼan» (Juan 3:16). Jaʼ la yakʼbotik te machʼa kʼax kʼux ta yoʼtane. Te Diose bayal miyon ta jaʼbil la spas te bintik ay ta chʼulchan sok ta Balumilal, te Jesús la sjokin ta aʼtel te Diose sok mero yutsil yoʼtan Dios kʼot (Proverbios 8:30). Te Jesús kʼuxultaybil yuʼun te Diose, «ha slocʼomba te Dios te ma chicanuc ta ilel» (Colosenses 1:13-15). Maʼyuk machʼatik kʼax lek yiloj sbaik jich te bitʼil te Dios sok te Jesuse.

Jaʼukmeto, te Jehová la slokʼes tal ta yoʼtan te sNichʼan yuʼun la yakʼ ta jwentatik (Romanos 8:32). Ta melel, jaʼ la yakʼbotik te machʼa kʼax mukʼ skʼoplal ta yoʼtane. Maʼyuk yan mukʼul majtʼanil te jich yakʼojbotike.

¿BIN YUʼUN TE JICH LA SKʼAN PASELE?

Ay majtʼaniletik te mukʼ skʼoplal ta koʼtantike, melel yuʼun-nix ya xtuun kuʼuntik-a. Nopa awaʼiy te ayat ta chamel te ya akʼan akʼbeyel poxetik te ma xjuʼ awuʼun stojele, jaʼukmeto ay machʼa ya sjap sba ta stojel. ¿Mabal jichuk te kʼax bayal ya awalbey wokol te ants winik-abi?

«Hich te bin utʼil ta scuenta Adán te ya xcham spisilic, ha nix hich ta scuenta Cristo spisilic ya xchaʼcuxajic» (1 Corintios 15:22). Te bitʼil stsʼumbalotik te Adán ya xchamotik ta jpisiltik, melel maba libre ayotik yuʼun te chamel sok te lajele, jaʼnix jich ma xjuʼ te ya xlekub koʼtantik sok te Dios sok te maʼyuk jmultik ta stojole. Jich bitʼil te jmulawilotike, ma xjuʼ te ay machʼa ya jchaʼkuxajtestike. Te Biblia jamal ya yal te «mayuc machʼa ya xhuʼ ya scoltay loqʼuel ta libre te yermano o te ya yaʼbe Dios te stojol te ya xlocʼ ta libre», melel ma xjuʼ kuʼuntik spasel (Salmo 49:7, 8). Jich yuʼun ya jkʼantik koltayel ta oranax, melel ma xjuʼ kuʼuntik stojel te jkoleltike. Ma xjuʼ ya jkoltay jba ta jtukeltik.

Ta swenta te smukʼul skʼuxul yoʼtan te Jehová sok spisil yoʼtan la stoj kʼoem te jpoxtik yuʼun jich ya jtatik-a te jkoleltike. Jaʼ la stoj-a te kʼalal la yakʼ ta lajel te Jesuse. ¿Bin-utʼil ya skoltayik te stojol  kolel-abi? «Ha ya spocbotic loqʼuel spisil jmultic te schʼichʼel Jesús, te Snichʼane». Te bin swentail-abi, jaʼ te ya skʼan ya kakʼtik schʼuunel koʼtantik ta stojol te bitʼil la smal schʼichʼel te Jesús, melel jaʼ ya skoltayotik yuʼun ya jtatik perdon yuʼun te jmultike sok jich ya jtatik kuxlejalil ta sbajtʼelkʼinal (1 Juan 1:7; 5:13). Jaʼnix jich te machʼatik lajemix kuʼuntike yame staik lekilal yuʼun-euk ta swenta te stojol kolele, melel te Biblia ya yal: «Te bin utʼil och lajel ta scuenta jtuhl winic, ha nix hich ta scuenta jtuhl winic [Jesús] te ya xchaʼcuxaj te machʼatic chamenique» (1 Corintios 15:21). *

Te slajel te Jesuse, jaʼ te mukʼul majtʼanil akʼbilotike, melel jaʼ la yakʼbotik te Dios te kʼax mukʼ skʼoplal ta chʼulchan ta swenta te skʼuxul yoʼtan te maʼyuk machʼa ya xpajbot yuʼune. Maʼyuk machʼa jich slokʼesoj sba ta yoʼtan jich bitʼil te Jehovae. Maʼyuk yan majtʼanil te ya skoltayotik yuʼun ya yakʼotik ta libre yuʼun te mulil sok te lajele. Ta melel, maʼyuk yan majtʼanil te ya spajbey skʼoplal te stojol jkoleltike.

 

^ parr. 19 Teme ya akʼan ya anaʼbeyxan skʼoplal ta swenta te skʼanojel yoʼtan Dios yuʼun te chaʼkuxajele, ilawil te kapitulo 7 yuʼun te libro ¿Bin ya yakʼ ta nopel ta smelelil te Bibliae?, te jaʼ spasojik te stestigotak Jehová sok ya xjuʼ ya awil ta www.jw.org/tzh.