Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

TE J-ILKʼINAL TA TOYOL (TE YA YICHʼ NOPEL) NOVIEMBRE 2016

 TEMA TA SBABIAL PAJINA | NAJALSITILETIK TE YA SCHOL BIN YILEL TE CHʼULCHANE

Najalsitiletik ta swenta te machʼatik ayik ta chʼulchan

Najalsitiletik ta swenta te machʼatik ayik ta chʼulchan

Te Biblia ya scholbey skʼoplal najalsitil te chajpiknax te ya yakʼ «kiltik jtebuk» bin yilel te kuxlejalil ta chʼulchan te maba chikan ta ilele. Ya kikʼatkotik ta snopbeyel skʼoplal. Jteb ma spisiluk te bin ya xchiknaj ta ilel tey-ae jaʼnax señail, jaʼukmeto ya xjuʼ ya awil kʼoem te machʼatik ayik ta chʼulchan sok ya xkʼot ta awoʼtan bin-utʼil ya skoltayotik ta jkuxlejaltik.

TE JEHOVÁ, JAʼ TE MACHʼA KʼAX TOYOL AYE

«La jquil ay mucʼul-huctajibal ta chʼulchan soc ay Machʼa hucul tey a. Te Machʼa hucul tey a hich yilel te bin utʼil jaspe soc cornalina, soc ta sjoyobal te mucʼul-huctajibal ay xojob te hich yilel te bin utʼil esmeralda» (Apocalipsis [Revelación] 4:2, 3).

«Ay stsʼanabul ta sjoyobal. Hich te bin utʼil xojob te ay ta tocal te cʼalal ay haʼal, hich yilel te stsʼanabul ta sjoyobal. Hich yilel te nahalsitil yuʼun te bin yilel te yutsilal te Jehová» (Ezequiel 1:27, 28).

Te najalsitiletik akʼbot yilik te jpuk-kʼop Juan sok te j-alwanej Ezequiel, ya scholbey skʼoplal te yutsilal Jehová te Dios te machʼa toyol aye ta swenta chaʼoxchajp te bintik maba wokoluk ya xkʼot ta oʼtanile jich bitʼil: tʼujbil tonetik te ya yakʼik xojobil, jun arco iris sok jun juktajibal te kʼax tʼujbile. Spisil-abi ya yakʼik ta naʼel te kʼax bayal stʼujbilal ya yakʼ te Jehová te banti aye, te ya yakʼ lamalkʼinal sok te ya yakʼ te jun yoʼtanik ya yaʼiy sbaike.

Te bintik ya yakʼik ta naʼel te cheb najalsitiletik snitojbey sba skʼoplal sok te bin la yal jtul te machʼa la stsʼibay te Salmo: «Como mucʼ te Jehová soc ha nix yuʼun te halbeyel yutsil scʼoblale; cʼax hich ay ta xiʼel a te bin utʼil spisil yantic diosetic. Ha locʼombahetic spisil te diosetic yuʼun te pueblohetic, yan te Jehová ha la spas te chʼulchane. Te tsʼanabul soc smucʼul utsilal ayic ta stojol; ay yuʼel soc tʼujbil yutsilal ta chʼul awilal yuʼun» (Salmo 96:4-6).

Manchukme te Jehová jaʼ te machʼa kʼax toyol aye, ya yikʼotik yuʼun ya xnoptsajotik ta stojol sok ta skʼoponel, jamal ya yalbotik te ya yaʼiy te jkʼoptike (Salmo 65:2). Te Dios bayal ya skʼanotik sok ayotik ta yoʼtan ta spisil-ora, te jich snujpʼ la stsʼibay te jpuk-kʼop Juan: «Jcʼuxul-oʼtanil stuquel te Diose» (1 Juan 4:8XCD).

TE JESÚS AY TA SWAʼEL KʼAB DIOS

Te jpuk-kʼop Esteban «nojel ta yoʼtan te Chʼul Espíritu, la yil mohel te chʼulchan, la yilbe yutsilal te Dios soc la yil teqʼuel ta swaʼel-cʼab Dios te Jesús, hich la yal: Ilawil, jamal ya quil te chʼulchan soc teqʼuel ta swaʼel-cʼab Dios te Nichʼanil ay ta scuenta winic» (Hechos 7:55, 56).

Te kʼalal yak ta yilel te najalsitil te Esteban jaʼ yak ta kʼop-a sok te jwolwanejetik yuʼun te relijionetik judío te la yakʼik ta milel te Jesuse. Te bin la yil te Esteban la yakʼ ta naʼel ta jamal te yuʼun-nanix kuxul-a te Jesuse, te chaʼkuxajemix sok te akʼbilix bayal yutsilal ta chʼulchane. Ta swenta-abi te jpuk-kʼop Pablo jich la stsʼibay: «Te [Jehová] la schaʼcuxajtes [te Jesús] ta yohlil te machʼatic chamenic soc la yacʼ huhcajuc ta swaʼel-cʼab Dios ta chʼulchan, te ha toyol cʼoht yuʼun spisil ajwaliletic, te machʼatic ay yaʼtelic, te ay yuʼelic soc jpasawetic ta mandar, soc ha toyol cʼoht yuʼun spisil bihililetic te ya yichʼic aʼbeyel, ma haʼuc nax ta ora ini, soc ta patil bahel» (Efesios 1:20, 21).

Te sJun Dios ma jaʼuknax ya yalbey skʼoplal te toyol aʼtelil yichʼoj te Jesuse, jaʼnix jich ya yal te  kʼax kʼuxotik ta yoʼtan jich bitʼil te Jehovae. Te jayeb kʼajkʼal abatin ta Balumilal te Jesús la slekubtes jchameletik sok la schaʼkuxajtes machʼatik lajemikixe. Te kʼalal la yakʼ sba ta lajele, la yakʼ ta ilel jich yipal te skʼuxul yoʼtan ta stojol te sTate soknix ta stojol te ants winiketik (Efesios 2:4, 5). Ta ora ini nopol ay ta stojol te Dios, melel ay ta swaʼel kʼab, nopol ya staix yorail te ya stuuntes yuʼel te akʼbil swenta ya yakʼbey slekilalik te ants winiketik te ya schʼuunik mantal chikan banti ayike.

TE CHʼUL-ABATETIK YA X-ABATINIK TA STOJOL DIOS

Te j-alwanej Daniel jich la stsʼibay: «Yacon ta yilel a, la yichʼ chahpanel huctajibaletic, la shuhcan sba jtuhl Mamal [Jehová] [...] bayel ta mil ta mil ta tuhl ya yacʼ sbahic ta aʼbatinel yuʼun, soc bayel ta millón ta millón tecʼajtic ta stojol» (Daniel 7:9, 10).

Ta najalsitil akʼbot yil ta swenta te chʼulchane, te Daniel la yil bayal ta tul chʼul-abatetik, ma jtuluknax. ¡Chajpnaxniwan ta ilel-a te bin akʼbot yile! Te chʼul-abatetik jaʼik espirituetik, ay spʼijilik sok ay yuʼelik. Kajalkaj chapbil te yaʼtelike, tey ochem skʼoplal-a te serafinetik sok te kerubinetik. Kʼaxem ta doscientos cincuenta buelta ya yichʼ albeyel skʼoplal ta Biblia te chʼul-abatetike.

Te chʼul-abatetik maba ants winiketikuk te kuxinik ta Balumilale. La yichʼik pasel yuʼun te Dios te kʼalal mato ayuk-a te ants winiketike. Kʼalal la yichʼ pasel te Balumilale, te chʼul-abatetik yakik ta yilel ta lek-a sok stsʼeel yoʼtanik awunik spisilik (Job 38:4-7).

Jun te bin-utʼil te chʼul-abatetik ya x-abatinik ta stojol te Dios jaʼ te ya xkoltaywanik ta spasel te aʼtelil te kʼax tulan skʼoplal te yak ta pasel ta ora ini te jaʼ te scholel te lek yachʼil kʼop yuʼun te Ajwalinel yuʼun te Diose (Mateo 24:14). Jnaʼojtik te ya spasik te aʼtelil ini, melel jich akʼbot yil te jpuk-kʼop Juan te la stsʼibaye: «La jquil yan chʼul aʼbat yac ta wihlel ta poʼtal chʼulchan, yichʼoj te lec yachʼil cʼop scuenta sbahtel qʼuinal yuʼun ya yalbe yaʼiy machʼatic nahinemic ta bahlumilal, spisil nacionetic, tsʼumbaliletic, cʼopiletic soc pueblohetic» (Apocalipsis 14:6). Manchukme maba ya xkʼopojikix sok te ants winiketik te chʼul-abatetik jich bitʼil la spasik ta nameye, ya stojobtesik te machʼatik ya scholik te skʼop Dios ta stojol te ants winiketik te ya skʼanik snopele.

TE SATANÁS YA SLOʼLAY BAYAL TA MIYON ANTS WINIKETIK

«Hahch guerra ta chʼulchan: te Miguel [Jesucristo] soc te chʼul aʼbatetic yuʼun la stsal sbahic soc te dragón. Te dragón soc te aʼbatetic yuʼun la  yaʼbeyic guerra, pero ma ba huʼ yuʼunic, soc mayuquix lugar yuʼunic ta chʼulchan. La yichʼ chʼojel cohel te mucʼul dragón, ha te antiguo chan, te Pucuj soc Satanás sbihil, ha te ya sloʼloy spisil te bahlumilale. Chʼojot cohel ta bahlumilal soc te aʼbatetic yuʼune» (Apocalipsis 12:7-9).

Maba spisiluk-ora ayinem lamalkʼinal ta chʼulchan. Ta yorail te chiknaj te sbabial ants winike, jtul chʼul-abat te jkʼaxel bajtʼ ta yoʼtan te ya skʼan ya x-ichʼot ta mukʼe, la skʼaxuntaybey smantal te Jehová sok kʼatpʼuj ta Satanás, te ya skʼan ya yal «Jkontrainwanej». Ta patil, yantikxan chʼul-abatetik la stʼunik te Satanás ta spasel te bin chopol sok la yichʼik naʼbeyel sba jich bitʼil chopol espirituetik. Te chopol espirituetik-abi ya skontrainik ta jkʼaxel te Dios sok juʼem yuʼunik te jteb ma spisiluk te ants winiketik ma xyakʼix sbaik ta wentainel yuʼun te Jehovae.

Te Satanás sok te chopol espirituetik yuʼune jkʼaxel ya smulanik spasel te bin chopol sok ma snaʼ yoʼbolil jbatik. Ya yilayik te ants winiketik sok jaʼ ta smulik te ay bayal wokolil ta Balumilale. Jich bitʼil, te Satanás la smilbey spisil te wakaxetik sok te j-abatetik yuʼun te Job te jun yoʼtan yakʼoj sba ta stojol Diose. Ta patil la yakʼ talel «tulan icʼ» te la sjin koel te na te banti ayik te lajchaytul snichʼnabe, te jich lajik yuʼune. Ta slajibal, la «yehchentes ta cʼaʼel chin te Job, hahch ta stahn yoc cʼalal ta sjol» (Job 1:7-19; 2:7).

Jaʼukmeto nopolme ya yichʼix lajinel te Satanase. Jaʼto te kʼalal la yichʼ chʼojel koel tal ta Balumilale, snaʼoj te jtebxanix tiempo ay yuʼune (Apocalipsis 12:12). Jaʼ jun lek yachʼil kʼop te albilix skʼoplal te ya yichʼ lajinele.

ANTS WINIKETIK TE KUXINEMIK TA BALUMILAL

«[Jaʼat, Jesús,] la amambe scolel te ants-winiquetic te ha yuʼun Dios ya xcʼohtic, ta spisil ta chahp tsʼumbaliletic, cʼopiletic, pueblohetic soc nacionetic. La awaʼbeyix yaʼtelic ta ajwalil soc ta sacerdotehil ta stojol te Dios cuʼuntic, ya me yaʼiyic cuentahinwanej ta bahlumilal» (Apocalipsis 5:9, 10).

Jaʼnix jich bitʼil kʼax ta stojol te Jesucristo, ay bayalxan ants winiketik te ya xchaʼkuxajik swenta ya xbajtʼik ta chʼulchan. Te Jesús jich la yalbey te jnopojeletik yuʼune: «Ya xbaht jchahpambeyex awawilic tey a. [...] Ya xchaʼtalon xan, ya xtal quiqʼuex bahel scuenta yuʼun te banti ayon ha nix hich tey ya xʼayinex a» (Juan 14:2, 3).

Ay swentail bin yuʼun ay machʼatik ya xbajtʼik ta chʼulchan, jaʼ te ya sjokinik te Jesús ta mantalteswanej ta swolol te Balumilal sok ta yakʼbeyel bendisionetik spisil machʼatik ya x-ayinik tey-ae. Jaʼ te Ajwalinel te la yakʼ ta nopel te Jesús ta stojol te jnopojeletik te ya skʼan ya yalbeyik skʼoplal ta skʼoponel Dios te kʼalal jich la yal: «Jtatic te ayat ta chʼulchan, acʼa ichʼotuc ta mucʼ achʼul bihil. Acʼa taluc te cuentahinel awuʼun; acʼa yichʼ pasel ta bahlumilal te bin ya scʼan awoʼtan, hich te bin utʼil yac ta pasel ta chʼulchan» (Mateo 6:9, 10).

¿BIN YA XBAJTʼ SPASIK TE MACHʼATIK AYIK TA CHʼULCHANE?

Te jpuk-kʼop Juan jich la stsʼibay: «Soc la jcaʼiy ay machʼa tulan cʼopoj tal ta mucʼul-huctajibal, hich la yal: Ya xnahinix Dios ta yohlil te ants-winiquetic [...]. Ya me xcusticlambot yaʼlel sitic yuʼun te Diose; mayuquix lajel, mel-oʼtan, oqʼuel o te bin cʼux, como cʼaxix spisil te bintic ay ta nahil to» (Apocalipsis 21:3, 4).

Te najalsitil-abi, jaʼ jun albilkʼop te ya yalbey skʼoplal te yorail te kʼalal te Ajwalinel yuʼun Dios, te jaʼ wentainbil yuʼun te Jesús sok te machʼatik ya xchaʼkuxajik ta chʼulchan, ya slajinbey skʼoplal te yaʼtel te Satanás sok ya skʼatpʼun ta nichimal kʼinal te Balumilale. Spisil te bin yakʼojbey bayal wokolil sok te bin kʼux ta stojol te ants winiketike yame xlaj ta jkʼaxel. Jaʼnix jich ya xtupʼ te lajele.

Jaʼukmeto, ¿bin ya xkʼot ta stojolik te bayal ta mil miyon ants winiketik te lajemik te maba ya xbajtʼik ta chʼulchane? Yame xchaʼkuxajik swenta ya xkuxinik ta Balumilal te banti ya smulanik te kuxlejalil ta Nichimal Kʼinal (Mateo 5:5).

Te najalsitiletik te la kilbeytikix skʼoplale, ya yakʼ jnaʼtik te bayal skʼoplal ta yoʼtanik te lekuk ayotik te Jehová Dios, te sNichʼan Jesucristo sok te chʼul-abatetik te jun yoʼtan yakʼoj sbaik ta stojol soknix te machʼatik manbilik ta Balumilale. Teme ya akʼan ya anaʼbeyxan skʼoplal te bin ya xbajtʼ spasik ta pajel chaʼbeje, kʼopona te testigoetik yuʼun Jehová o ochan ta pajina kuʼunkotik ta Internet www.jw.org sok pasa descargar te libro ¿Bin ya yakʼ ta nopel ta smelelil te Bibliae?