Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Te J-ilkʼinal ta toyol (te ya yichʼ nopel)  |  Mayo yuʼun 2017

Te bitʼil maʼyuk bayal jbiluktik ya yakʼbotik stseʼelil koʼtantik

Te bitʼil maʼyuk bayal jbiluktik ya yakʼbotik stseʼelil koʼtantik

TE DANIEL SOK TE MÍRIAM nujpunik ta septiembre ta jaʼbil 2000, nainemik ta Barcelona (España) sok leknax ay te skuxlejalike. Te Daniel jich ya yal: «Leknax ya kichʼtik tojel yuʼun te kaʼtelkotike, ya xjuʼ xbootik ta weʼel ta lekil restaurante, paxial ta yan nasion sok leknax te jkʼuʼ jpakʼkotike. Soknix ya jcholtik skʼop Dios spisil-ora». Jaʼukmeto ay bin jelontesbot te skuxlejalike.

Ta jun mukʼul tsoblej te la yichʼ pasel ta jaʼbil 2006, te Daniel tijbot yoʼtan jun discurso te yichʼoj jun jojkʼoyel te jich ya yal: «¿Yakotikbal ta skoltayel te bantito kʼalal ya xjuʼ kuʼuntik ta yikʼel bael te be yuʼun kuxlejalil sbajtʼelkʼinal “te machʼatic yaquic ta bahel ta lajel”?» (Proverbios 24:11). Te discurso la yal te ay ta jwentatik scholel te lek yachʼil kʼop, melel jich ya xjuʼ sta skolel te ants winiketike (Hechos 20:26, 27). Te Daniel jich ya xjul ta yoʼtan: «Jich la kaʼiy te joʼon yak skʼoponbelon te Jehovae». Te discurso jaʼnix jich la yal teme ya jpastikxan tulan ta abatinel ta stojol te Jehovae ayxan stseʼelil koʼtantik yuʼun. Te Daniel snaʼoj te yuʼun-nix jich-ae, melel te Míriam ochem ta precursora sok ay stseʼelil yoʼtan yuʼun.

Te discurso kʼaxto tijbot yoʼtan te Daniel, jich la snop te ya sjelontes ta jkʼaxel te bitʼil ay te skuxlejale. Maba aʼtejix bayal hora, och ta precursor sok la snop te tseʼelnax yoʼtan sok te Míriam teme ya xbajtʼik ta abatinel te banti maʼyuk bayal jcholkʼopetike.

NAIL KʼAX SWOKOLIK, PATIL AY BIN KʼAX LEK LA STAIK

Ta mayo yuʼun 2007, te Daniel sok te Míriam la yijkʼitayik te yaʼtelik, bajtʼik ta Panamá te ay yulaʼtayojikixe. La scholik skʼop Dios ta chaʼoxpam lumetik te ayik ta yolil mar te sbiilinej Bocas del Toro te ay ta mar Caribe. Jteb ma spisiluk te ants winiketik te nainemik tey-ae jaʼik ngäbeetik. Te Daniel sok te Míriam la snopik te ya xjuʼ x-ayinik waxakeb u ta Panamá sok te takʼin skʼejojike.

Beenik ta barko sok bisikleta ta yulaʼtayel te lumetik-abi. Yato xjul ta yoʼtanik kʼalal beenik 30 kilometro ta bisikleta ta moel kʼinal te mero kʼux kʼajkʼal-ae. Te Daniel kʼax lujbenix-a sok kʼan chʼayuk ta kʼinal. Te familia ngäbeetik te la snaʼbeyik sbae ya x-ikʼawanik ochel ta snaik, kʼaxtoxan-a te kʼalal la snopik chaʼoxpʼal kʼopetik yuʼun te lugar-abi. Maba kʼax bayal tiempo te jajchik ta yakʼbeyel snop te Biblia 23 ta tul ants winiketik.

¿Bin la spasik te kʼalal laj te stakʼinike? Te Daniel jich ya yal: «Ochotik ta okʼel kʼalal la jnoptik te ya sujtotik ta Españae». Bayal la smel yoʼtanik yuʼun te ya yijkʼitayik te machʼatik yakik ta snojptesel ta Bibliae. Jaʼukmeto jun u ta patil ay bin kʼax lek la yichʼik albeyel. Te Míriam jich ya yal: «La kichʼtik albeyel te ya x-aʼtejotik ta precursor espesial. Bayal la yakʼbotik stseʼelil koʼtantik te juʼ jilotik te banti ayotik ta abatinele».

TE BIN BAYAL YA X-AKʼBOT STSEʼELIL YOʼTANIK YUʼUNE

Te bitʼil ay bin chaʼoxchajp sjelontesoj te organisasione, te Daniel sok te Míriam la yichʼik albeyel ta 2015 te maba ya x-aʼtejikix ta precursor espesial. ¿Binwan ya spasikix-a? La smukʼulin yoʼtanik te Salmo 37:5 te ya yal: «Acʼa ta stojol Jehová te be awuʼun, ha acʼa smucʼulin awoʼtan, hich ya spas te bin ya scʼan pasele». La staik jun aʼtelil te ya x-akʼbotik tiempo yuʼun ya x-ochik ta precursor regular, ta ora ini ayik ta jun kongregasion ta tut lum te Veraguas sbiil te ay ta Panamá.

Te Daniel jich ya yal: «Te kʼalal mato xlokʼotik tal ta Españae ma jnaʼojtik-a teme ya xjuʼ xkuxinotik teme maʼyuk bayal jbiluktike. Ta ora ini jich yakotik ta kuxinel, ay kuʼuntik te bin mukʼxan skʼoplale». ¿Bin-a te ya x-akʼbotik stseʼelil yoʼtanik yuʼune? Jich ya yalik ini: «Te skoltayel te ants winiketik te pekʼel yoʼtanik ta snaʼbeyel sba te Jehovae, jaʼ ya yakʼbotik bayal stseʼelil koʼtantik te maʼyuk bin ya spaje».