Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Te J-ilkʼinal ta toyol (te ya yichʼ nopel)  |  Junio yuʼun 00ok

¿Yabal jpastik tulan yuʼun ya kiltik te bin ay ta yoʼtan te yantike?

¿Yabal jpastik tulan yuʼun ya kiltik te bin ay ta yoʼtan te yantike?

TE Don jaʼ jtul testigo yuʼun Jehová ta Canadá te ya spas tulan ta skʼoponel te machʼatik nainemik ta kaye. Jich la yal ta stojol jtul te la skʼopone: «Te Peter jaʼ jtul winik te pajal sok yantik te ayik ta kaye te jkʼaxel ay yabakulike te maʼyuk yantik jich kiloj-ae. Spisil-ora ya schopolkʼoptay te yantik sok biluk bin ya spas yuʼun ma xlakʼot yuʼun yantik. Ya spʼaj te machʼa ya skʼan ya x-akʼbot yil slekil yoʼtan yuʼun». Manchukme jich stalel, kʼaxem ta catorce jaʼbil la spas tulan te Don ta yakʼbeyel yil slekil yoʼtan te kʼalal jich ya xjuʼ ta pasel ya yile.

Ta jun buelta te Peter jich la sjojkʼoybey te Don: «¿Bin yuʼun te bayal ya amel awoʼtan ta jtojole? Maʼyuk yan machʼa ayon ta yoʼtan. ¿Bin yuʼun te jaʼat ay jkʼoplal ta awoʼtane?». Te Don la sle bin-utʼil lek la stuuntes oxeb texto yuʼun te Biblia yuʼun ya stijbey yoʼtan. Ta sbabial, la sjojkʼoybey teme snaʼoj te ay sbiil te Dios sok la yalbey te jaʼuknix ya yil ta Biblia ta Salmo 83:18. Patil, yuʼun ya yakʼbey yil bin yuʼun te bayal ya smel yoʼtan ta stojol la yakʼbey skʼopon Romanos 10:13, 14 te jich ya yal: «Como spisil te machʼatic ya yalbeyic wocol ta scuenta sbihil te Cajwaltic [Jehová], ya me xcolic». Ta slajibal te Don la skʼoponbey Mateo 9:36 te jich ya yal: «Cʼalal la yil te bayel ants-winiquetic, stsʼujet ta yoʼtan la yaʼiy, como ay swocolic soc ihquitaybilic hich bin utʼil tuminchijetic te mayuc jcanan yuʼunique». Ta patil, te Peter la skʼanbey te jaʼuknix ya skʼopon te textoe. Te kʼalal la skʼopone, tal yalel sit sok jich la sjojkʼoy: ¿Jtulbal tuminchijon ta spisil te tuminchijetik te la yal te Jesuse?

Te Peter jajch sjel stalel. Atin, la schajpan ta lek yisim sok la stuuntes te kʼuʼul pakʼal akʼbot yuʼun te Don. Teyto-abi, jajch smel yoʼtan yuʼun maʼyuk yabakul sok te lekuk ta ilele.

Te Peter ta jujun kʼajkʼal ya stsʼibay te bin ya xkʼax ta skuxlejal. Ta nail talel jaʼnax ya stsʼibay te bin mel-oʼtantik sba ta aʼiyele, jaʼukmeto ta patil lekix te bin ya stsʼibaybey skʼoplale. Jun buelta jich la stsʼibay: «Yoʼtik la jnop te jaʼ Jehová sbiil te Diose. Te kʼalal ya jkʼopon Dios ya xjuʼ ya kalbeyix sbiil. Kʼax bayal yutsil te ya jnaʼbeytik sbiile. Te Don ya yalbon  te ya xjuʼ ya kamigoin te Dios te spisil-ora ay stiempo yuʼun ya yaʼiybon jkʼop, chikan banti ayon sok bin ya kalbey».

Te bin la stsʼibay te kʼalal nopol ya xlajix-ae jaʼ la stsʼibay ta stojol te yijtsʼinab sok sbankil swixitak. Jich la stsʼibay:

«Ma lek ya kaʼiy jba te yoʼtike. Jich ya kaʼiy te ma xjuʼix kuʼun. Manchukme ya xlajon te yoʼtik, yananix jnaʼ-a te ya jchaʼkil te kamigo [Don] ta Nichimal Kʼinal. Teme yakex ta skʼoponel te jun ini, jaʼ yuʼun te maba jokinejexixe. Teme ya awilik jtul winik te ma pajaluk sok te yantike, kʼopojanik sok, jaʼnix jich kʼoponaik awokolukik te tut libro azul ini [jaʼ yak ta yalbeyel skʼoplal te libro te la yichʼ tuuntesel ta snopel te Biblia La verdad que lleva a vida eterna, te ayix cheʼoxeb jaʼbil akʼbil-ae]. * Te libro ya yal te ya jchaʼkil te kamigo ta Nichimal Kʼinal. Ya jchʼuun sok spisil koʼtan. Joʼonme Peter te kʼuxex ta koʼtan te la jtsʼibaybeyexe».

Patil te yichʼojix mukel te Peter, te swix te Ummi sbiil jich la yal: «Ayniwan chebix jaʼbil te la skʼoponon te Peter. Kʼax tseʼel yoʼtan yaʼiyel, bayalix jaʼbil te maʼyuk jich ya yaʼiy sbae. Sok yakto ta tseʼej-a». Te Ummi jich la yalbey te Don: «Ya jkʼopon te libro, melel chikan bin-a te la stijbey yoʼtan te Peter bayalnanix skʼoplal-a». Te antse jaʼnix jich lek la yaʼiy te ya x-ulaʼtayot yuʼun jtul hermana yuʼun ya yichʼ nojptesel sok te libro ¿Bin ya yakʼ ta nopel ta smelelil te Bibliae?

Te joʼotike jaʼnix jich ya xjuʼ te ma jaʼuknax ya xbajtʼ ta koʼtantik te bin yilel te ants winiketike, ya xjuʼ ya kakʼtik ta ilel smelelil kʼuxul oʼtanil sok te manchuk ya xchʼajubotik ta ora ta skoltayel te ants winiketike (1 Timoteo 2:3, 4). Teme jich ya jpastike, yaniwan xjuʼ kuʼuntik te ya xkʼot ta yoʼtanik te smelelil te machʼatik jich yilelik bitʼil te Peter te ma lekukik ta ilele, jaʼukmeto te ya skʼan ya snopik te skʼop Diose. Ya jnaʼtik ta lek te bitʼil te Dios te «ya yil te bin yilel te oʼtanile» ya yakʼ koluk te smelelil ta yoʼtan te machʼatik ya skʼan ya xnoptsajik ta stojole (1 Samuel 16:7; Juan 6:44).

^ parr. 7 Te jaʼ spasojik te stestigotak Jehová. Maʼyukix ta lokʼel.